1-2. San wi musu du aladi wi e wakti a nyun grontapu?

 WI BREITI srefisrefi taki Yehovah o tyari wan kaba kon na a sistema disi èn taki a o seti wan nyun grontapu pe retidu o de (2 Petr. 3:13). Aladi wi no sabi o ten a nyun grontapu dati o kon, toku den sani di e pasa na grontapu e sori taki a no o teki langa moro.​—Mat. 24:32-34, 36; Tori 1:7.

² Ma na a srefi ten, wi alamala musu tranga a bribi fu wi na ini a pramisi dati, awinsi o langa wi de na ini waarheid. Fu san ede? Fu di srefi wan tranga bribi kan kon swaki. Na apostel Paulus ben taki dati wan swaki bribi na „a sondu di kan kisi wi makriki” (Hebr. 12:1). Efu wi no wani taki a bribi fu wi kon swaki, dan wi musu abi a gwenti fu denki dipi fu den sani di e sori taki heri esi wan nyun grontapu o kon.​—Hebr. 11:1.

3. San wi o luku na ini na artikel disi?

³ Na ini na artikel disi wi o taki fu dri sani di kan tranga wi bribi na ini a nyun grontapu di Yehovah pramisi: (1) Denki dipi fu a lusu-paiman. (2) Denki dipi fu a krakti di Yehovah abi. (3) Du sani di o meki wi kon moro krosibei na Yehovah. Baka dati wi o luku fa a boskopu di Yehovah ben gi Habakuk e tranga wi bribi na ini a ten disi. Ma fosi wi taki fu den sani disi, kow luku wan tu situwâsi na ini a ten disi pe wi musu abi wan tranga bribi na ini a nyun grontapu di o kon.

 SITUWÂSI PE WI MUSU ABI WAN TRANGA BRIBI

4. Sortu prenspari bosroiti wi musu teki na ini wi libi?

⁴ Wi musu abi wan tranga bribi fu man teki bosroiti ibri dei. Fu eksempre, wi musu luku suma wi o teki leki mati, sortu prisiriten wi o abi, sortu skoroleri wi o teki, nanga suma wi o trow, efu wi o kisi pikin, èn sortu wroko wi o du. A bun fu aksi wisrefi: ’Den bosroiti di mi e teki e sori taki mi sabi taki a grontapu disi o kon na wan kaba èn taki heri esi Gado o tyari a nyun grontapu kon? Noso den bosroiti di mi e teki e sori taki mi e du den srefi sani leki den sma di no e bribi taki den kan libi fu têgo?’ (Mat. 6:19, 20; Luk. 12:16-21) Wi o teki a moro bun bosroiti efu wi e tranga wi bribi na ini a nyun grontapu di o kon heri esi.

5-6. Fu san ede wi bribi musu tranga te wi e kisi tesi? Gi wan eksempre.

⁵ Wi musu abi wan tranga bribi tu te wi e kisi tesi. Kande sma e frufolgu wi, kande wi abi wan seryusu siki, noso kande sani de di kan meki wi lasi-ati. Te wi e bigin kisi tesi, dan kande wi e firi leki wi o man horidoro. Ma nofo tron wan tesi e go doro fu wan langa pisi ten. Dati meki o moro a tesi e go nanga langa, o moro wi o abi wan tranga bribi fanowdu fu man horidoro èn fu tan dini Yehovah nanga prisiri.​—Rom. 12:12; 1 Petr. 1:6, 7.

⁶ Te wi e kisi tesi, dan wi kan firi leki a nyun grontapu fu Yehovah e teki langa fu kon. Disi wani taki dati wi bribi swaki? Dati no abi fu de so. Luku wan eksempre: Te wi de na ini bigi dreiten èn a son faya srefisrefi, dan kande wi e firi leki alenten e teki langa fu kon. Ma toku wi sabi taki a o kon wan dei. Na so a de tu taki te wi lasi-ati srefisrefi, wi kan firi leki a nyun grontapu e teki langa fu kon. Ma efu a bribi fu wi tranga, dan wi sabi taki a o kon fu di na Yehovah pramisi en (Ps. 94:3, 14, 15; Hebr. 6:17-19). Te wi abi a tranga bribi dati, dan wi o man tan poti na anbegi fu Yehovah na a fosi presi na ini wi libi.

7. Nanga sortu denki wi musu luku bun?

⁷ Wi musu abi wan tranga bribi tu te wi e du a preikiwroko. Furu fu den sma gi suma wi e preiki, feni taki a „bun nyunsu” di e taki dati wan nyun grontapu o kon na wan sani di no kan (Mat. 24:14; Esek. 33:32). Wi musu luku bun nanga a denki disi fu di wi no wani tweifri noiti na den sani di Yehovah e leri wi. Dati meki wi musu tan tranga a bribi fu wi so taki disi no pasa nanga wi. Kow go luku dri sani di kan yepi wi.

DENKI DIPI FU A LUSU-PAIMAN

8-9. Fa wi kan tranga wi bribi te wi e denki dipi fu a lusu-paiman?

⁸ Wan fasi fa wi kan tranga wi bribi na fu denki dipi fu a lusu-paiman. A lusu-paiman e gi wi a dyaranti taki den pramisi fu Gado o kon tru. Te wi e denki dipi fu san ede a lusu-paiman pai gi wi èn san ben de fanowdu fu pai a paiman disi, dan dati e tranga wi bribi na ini den pramisi fu Yehovah. Disi o meki taki wi de seiker taki wi man libi fu têgo na ini wan nyun grontapu. Fu san ede wi kan taki dati?

⁹ We, san Yehovah ben musu du fu pai a lusu-paiman? Yehovah seni en lobi Manpikin fu hemel kon na grontapu fu gebore leki wan libisma di no abi sondu. Di Yesus ben de na grontapu a ben kisi ala sortu problema. Bakaten a nyan pina èn a dede na wan ogri-ati fasi. Dati na  wan bigi sani di Yehovah du gi wi! A lobi-ati Gado fu wi noiti no ben o meki en Manpikin nyan pina so èn dede na so wan fasi, soso fu meki wi libi kon moro bun fu wan syatu pisi ten nomo (Yoh. 3:16; 1 Petr. 1:18, 19). Fu di Yehovah pai so wan bigi paiman gi wi, meki a o sorgu taki wi o man libi fu têgo na ini a nyun grontapu.

DENKI DIPI FU A KRAKTI FU YEHOVAH

10. San Yehovah man du soleki fa Efeisesma 3:20 e taki?

¹⁰ Wan tra fasi fa wi kan tranga wi bribi, na te wi e denki dipi fu a krakti fu Yehovah. Yehovah abi a makti fu du ala san a pramisi fu du. Furu sma na ini a ten disi no e bribi taki wi o man libi fu têgo na ini wan nyun grontapu. Ma a pasa furu leisi taki Yehovah e pramisi sani di libisma no o man du noiti. A man du disi fu di en na a Almakti Gado (Yob 42:2; Mark. 10:27). Sobun, a no e fruwondru wi te a e pramisi wi kefalek sani.​—Leisi Efeisesma 3:20.

11. Gi wan eksempre fu wan sani di Gado pramisi di ben gersi leki a no kan. (Luku a faki „ Wan tu aparti pramisi di kon tru”.)

¹¹ Luku wan tu sani di Yehovah pramisi en pipel na ini owruten di ben gersi leki den no kan. A taigi Abraham nanga Sara taki den ben o kisi wan manpikin tapu den owrudei (Gen. 17:15-17). A ben taigi Abraham tu taki den bakapikin fu en ben o kisi a kondre Kanan. Na ini den someni yari di den bakapikin fu Abraham ben de leki srafu na ini Egepte, a ben musu gersi leki a pramisi dati no ben o kon tru noiti. Ma a kon tru. Bakaten, Yehovah taki dati Elisabet di ben owru kaba, ben o kisi wan pikin. A ben taigi Maria, di noiti no ben sribi nanga wan man, taki a ben o kisi wan manpikin. A ben o de Yehovah en eigi Manpikin, di a ben pramisi dusundusun yari na fesi na ini a dyari fu Eden. Disi na ete wan pramisi di kon tru!​—Gen. 3:15.

12. Te a abi fu du nanga a krakti fu Yehovah, dan sortu dyaranti wi e kisi na ini Yosua 23:14 nanga Yesaya 55:10, 11?

¹² Te wi e prakseri ala den pramisi fu Yehovah èn fa a meki den kon tru, dan wi e frustan taki a abi furu krakti. Disi o tranga wi bribi na ini a nyun grontapu di a pramisi. (Leisi Yosua 23:14; Yesaya 55:10, 11.) A sani disi o meki taki wi man yepi trawan moro bun fu frustan taki a pramisi nyun grontapu no de wan dren noso wan anansitori. Yehovah srefi ben taki fu a nyun hemel nanga a nyun grontapu: „Den wortu disi tru èn sma kan bribi den.”​—Openb. 21:1, 5.

DU SANI FU KON MORO KROSIBEI NA YEHOVAH

13. Fa den gemeente konmakandra kan tranga wi bribi? Fruklari dati.

¹³ A di fu dri fasi fa wi kan tranga wi bribi na te wi e gebroiki wi ten fu kon moro krosibei na Yehovah. Luku fu eksempre fa wi kan kisi wini fu den gemeente konmakandra. Anna, di dini furu yari na difrenti fasi na ini a furuten diniwroko, e taki: „Den konmakandra e yepi mi fu tan abi wan tranga bribi. Srefi efu a takiman no de wan bun leriman noso efu a e taki sani di mi sabi kaba, toku mi e yere wan sani nofo tron di e yepi mi fu frustan Bijbel moro bun èn di e tranga mi bribi.” b A bribi fu wi e kon tranga tu te wi e arki den piki fu wi brada nanga sisa.​—Rom. 1:11, 12; 10:17.

14. Fa a preikiwroko e tranga wi bribi?

 ¹⁴ Wi e tranga wi bribi tu te wi e du a preikiwroko (Hebr. 10:23). Barbara, di e dini Yehovah moro leki 70 yari kaba, e taki: „Ala ten mi feni taki a preikiwroko e tranga mi bribi. O moro mi e taki nanga trawan fu den moi pramisi fu Yehovah, o moro mi bribi e kon tranga.”

15. Fa wi e tranga wi bribi te wi e studeri? (Luku den fowtow.)

¹⁵ Wan tra sani di kan tranga wi bribi na te wi e studeri Bijbel. Susan e taki dati a e yepi en te a meki wan schema fu studeri. A e taki: „Na tapu sonde, mi e sreka a Waktitoren-studie gi a wiki di e kon. Tapu munde nanga tudewroko, mi e sreka gi a mindriwiki konmakandra. Tapu den tra dei fu a wiki mi e studeri tra sani.” Fu di Susan e hori ensrefi na en schema, meki a e tan tranga en bribi. Irene, di e dini furu yari kaba na a edekantoro, e taki dati a e tranga en bribi te a e studeri Bijbel profeititori. A e taki: „Mi feni en wan kefalek sani taki srefi den moro pikin sani fu den profeititori fu Yehovah e kon tru.” c

„A O KON TRU NOMONOMO”

16. Fu san ede a dyaranti di Yehovah gi Habakuk na gi wi tu na ini a ten disi? (Hebrewsma 10:36, 37)

¹⁶ Sonwan fu den futuboi fu Yehovah e wakti langa ten kaba fu a grontapu disi kon na wan kaba. Te yu e luku en libisma fasi, dan a kan gersi leki den pramisi fu Gado e teki tumusi langa fu kon tru. Ma Yehovah sabi fa den futuboi fu en e firi. A ben gi a profeiti Habakuk a dyaranti disi: „A fisyun o kon tru na wan spesrutu ten. A e hasti ensrefi fu doro na a kaba èn a no de wan leitori. Un musu tan fruwakti en awinsi a no pasa ete, bika a o kon tru nomonomo. A no o kon lati”  (Hab. 2:3). A dyaranti disi di Gado ben gi Habakuk, ben de gi en wawan? Noso a wani taki wan sani gi wi tu na ini a ten disi? Yehovah ben sori na apostel Paulus taki den wortu disi de sosrefi gi den Kresten di ben e wakti a nyun grontapu fayafaya. (Leisi Hebrewsma 10:36, 37.) Sobun, awinsi a gersi leki a e teki langa fu Yehovah frulusu wi, toku wi kan de seiker taki a pramisi fu en „o kon tru nomonomo. A no o kon lati”!

17. Fa wan sisa fiti a rai di Yehovah gi Habakuk?

¹⁷ Furu anbegiman fu Yehovah teki a rai fu „tan fruwakti en”. Sonwan fu den e du dati someni tenti yari kaba. Fu eksempre, Louise bigin dini Yehovah na ini 1939. A e taki: „Na a ten dati, mi ben denki taki Armagedon ben o kon fosi mi kaba nanga middelbaar skoro. Ma dati no pasa. Na ini ala den yari di pasa, mi leisi tori na ini Bijbel fu sma di ben e wakti fu a pramisi fu Yehovah kon tru. Disi yepi mi fu wakti tapu Yehovah. Mi leisi den tori fu Noa, Abraham, Yosef, nanga trawan di ben abi fu wakti langa fosi den kisi a sani di Yehovah pramisi den. Fu di mi tan fruwakti taki den pramisi fu Yehovah o kon tru, meki dati yepi mi nanga trawan fu bribi taki a nyun grontapu de heri krosibei.” Furu tra futuboi fu Yehovah di e dini en langa ten kaba, e denki so tu!

18. Fa wi kan tranga wi bribi na ini a nyun grontapu te wi e luku den sani di Gado meki?

¹⁸ A tru taki a nyun grontapu no kon ete. Ma prakseri wan tu fu den sani di de kaba: den stari, den bon, den meti, nanga tra libisma. Nowan sma ben o taki dati den sani disi no de trutru, aladi den no ben de fosi. Den sani disi de now fu di Yehovah meki den (Gen. 1:1, 26, 27). A Gado fu wi pramisi tu taki a o meki wan nyun grontapu. A o meki a pramisi dati kon tru. Na ini a nyun grontapu, sma o libi fu têgo èn den o abi wan bun gosontu. Wi kan de seiker taki a nyun grontapu o kon na a ten di Gado bosroiti taki a musu kon.​—Yes. 65:17; Openb. 21:3, 4.

19. Fa yu kan tranga yu bribi?

¹⁹ Ma fosi a ten dati doro, du ala san yu man fu tranga yu bribi. Du muiti ala ten fu de nanga tangi gi a lusu-paiman. Denki dipi fu a krakti di Yehovah abi. Du sani di o meki yu kon moro krosibei na Yehovah. Te yu e du den sani disi, dan yu kan de wan fu den sma „di kisi den sani di Gado pramisi den, fu di den ben abi bribi èn fu di den ben abi pasensi”.​—Hebr. 6:11, 12; Rom. 5:5.