1. Fu san ede wi e gi piki na den konmakandra?

 FU SAN EDE wi e go na den gemeente konmakandra? A moro prenspari reide fu san ede wi e du dati na fu prèise Yehovah (Ps. 26:12; 111:1). Wan tra reide na fu gi makandra deki-ati na ini den muilek ten disi (1 Tes. 5:11). Te wi e gi piki na den konmakandra, dan wi e du den tu sani disi.

2. O ten wi kan gi piki na den konmakandra fu wi?

² Ibri wiki wi e kisi okasi fu gi piki na den konmakandra fu wi. Fu eksempre, tapu satra noso sonde wi kan gi piki na a Waktitoren-studie. Na den mindriwiki konmakandra, wi kan gi piki na den pisi Diki moro dipi, Gemeente Bijbelstudie, èn na tra pisi pe den arkiman kan gi piki.

3. San kan meki en muilek gi wi fu gi piki èn fa Hebrewsma 10:24, 25 kan yepi wi?

³ Wi alamala wani prèise Yehovah èn wi wani gi wi brada nanga sisa deki-ati. Ma son leisi a kan muilek gi wi fu gi piki. Kande wi e senwe fu gi piki, noso kande wi lobi fu gi piki ma wi no e kisi wan piki te wi e opo wi anu. San kan yepi wi? Wi kan feni a piki te wi e luku san Paulus ben skrifi den Hebrewsma. Di a ben e taki o prenspari a de fu kon makandra, dan a taki dati wi musu luku taki wi e „gi makandra deki-ati”. (Leisi Hebrewsma 10:24, 25.) Wi no o senwe so moro fu gi  piki, efu wi e hori na prakseri taki wi kan gi trawan deki-ati kaba te wi e gi wan syatu piki di e sori a bribi fu wi. Èn efu wi opo wi anu furu leisi ma wi no kisi piki, wi kan breiti taki trawan na ini a gemeente o kisi na okasi fu gi piki.​—1 Petr. 3:8.

4. Sortu dri sani wi o luku na ini na artikel disi?

⁴ Na ini na artikel disi wi o taki fosi fa wi kan gi makandra deki-ati na ini wan pikin gemeente pe furu sma no de fu gi piki. Baka dati wi o luku fa wi kan gi makandra deki-ati na ini wan bigi gemeente pe furu sma e opo den anu fu gi piki. Leki lasti wi o luku na sortu fasi wi kan meki den piki fu wi gi trawan deki-ati.

5. Fa wi kan gi makandra deki-ati efu furu sma no de na den konmakandra?

⁵ Na ini wan pikin gemeente noso na ini wan grupu, furu sma no de fu gi piki. Son leisi disi kan meki taki a brada di e hori a pisi dati musu wakti pikinso so taki sma opo den anu fu gi piki. A kan gersi leki a konmakandra soi èn a sani dati no e gi sma deki-ati. Ma san yu kan du? De klariklari fu opo yu anu moro. Te yu e du dati, dan yu e gi trawan deki-ati fu opo den anu moro tu.

6-7. San kan yepi wi efu wi e senwe fu gi piki?

⁶ Ma san yu kan du efu yu e senwe fu gi piki? Furu sma e firi so tu. Ma efu yu wani gi yu brada nanga sisa deki-ati, dan kande yu kan luku san yu kan du fu no senwe so furu moro. San kan yepi yu?

⁷ Kande yu kan feni wan tu bun rai na ini A Waktitoren. b Wan fu den sani di yu kan du na fu sreka bun (Odo 21:5). O moro yu sabi na artikel, o moro yu no o senwe so fu gi piki. Boiti dati, hori den piki fu yu syatu (Odo 15:23; 17:27). Wan syatu piki e meki taki yu no abi fu broko yu ede so furu nanga san yu o taki. A moro makelek gi den brada nanga sisa fu frustan wan syatu piki di abi wán noso tu zin nomo, leki wan langa piki di abi furu prakseri na ini. Te yu e gi wan syatu piki nanga yu eigi wortu, dan yu e sori taki yu sreka bun èn taki yu e frustan na artikel bun.

8. Fa Yehovah e si en te wi e du ala san wi man?

⁸ San yu kan du efu yu pruberi den sani disi kaba ma toku yu e senwe fu gi moro leki wán noso tu piki? Yu kan de seiker taki Yehovah o warderi a muiti di yu meki fu du san yu man (Luk. 21:1-4). Yehovah no e aksi wi fu du moro leki san wi man du (Fil. 4:5). Luku san yu kan du, poti wan marki fu du a sani dati èn begi Yehovah fu no senwe tumusi. Kande yu kan poti en leki marki na a bigin fu gi wán syatu piki.

9. Fu san ede a kan muilek fu gi piki na ini wan bigi gemeente?

⁹ Efu a gemeente fu yu abi furu preikiman, dan a situwâsi kan de tra fasi. Kande so furu brada nanga sisa e opo den anu fu gi piki, taki nofo tron yu no e kisi piki. Fu eksempre, Danielle, lobi  fu gi piki na den konmakandra. c A e si a sani disi en leki wan pisi fu na anbegi fu en, leki wan fasi fu gi trawan deki-ati, èn leki wan sani di e tranga en bribi na ini Bijbel. Ma di a froisi go na wan moro bigi gemeente, a no ben e kisi piki so furu, èn son leisi a no ben kisi nowan piki a heri konmakandra. A e taki: „A sani disi ben bruya mi. A ben de neleki mi lasi wan grani. Te a e pasa furu taki yu no kisi piki, dan yu kan bigin denki taki na fu espresi den brada no wani gi yu piki.”

10. San wi kan du fu abi moro okasi fu gi piki?

¹⁰ Oiti yu ben firi so tu leki Danielle? Efu dati de so, dan kande yu no firi fu gi piki moro èn kande yu wani fu sidon arki nomo na den konmakandra. Ma tan meki muiti fu gi piki. San kan yepi yu? Kande yu kan sreka wan tu piki gi ibri konmakandra. Efu yu no kisi piki na a bigin fu a studie, dan yu abi na okasi ete fu gi piki. Te yu e sreka gi a Waktitoren-studie, dan luku fa ibri paragraaf abi fu du nanga a thema fu na artikel. Efu yu e du dati, dan kande yu o man gi bun piki. Boiti dati, yu kan sreka yusrefi fu piki na den paragraaf di e taki fu moro dipi Bijbel tori di no makelek so fu fruklari (1 Kor. 2:10). Fu san ede? Fu di a kan de so taki furu sma no e opo den anu na den pisi dati. Ma fa a de efu yu pruberi ala den sani disi èn toku yu no kisi piki na wan tu konmakandra kaba? Kande yu kan go na a fesiman fosi a konmakandra bigin èn taigi en na sortuwan fu den aksi yu ben o wani gi piki.

11. Sortu deki-ati Filipisma 2:4 e gi wi?

¹¹ Leisi Filipisma 2:4. Nanga yepi fu a santa yeye, Gado meki na apostel Paulus gi den Kresten a deki-ati fu poti prakseri na den afersi fu trawan. Fa wi kan fiti a rai disi na den konmakandra? Na te wi e hori na prakseri taki trawan wani gi piki tu neleki wi.

12. San na wan bun fasi fu gi trawan deki-ati na den konmakandra? (Luku a fowtow.)

 ¹² Prakseri a sani disi: Te yu e taki nanga den mati fu yu, dan yu ben o taki so furu dati den no ben o abi na okasi fu taki tu? Nôno, yu no ben o du dati. Yu wani den taki tu. Na so a de tu na den konmakandra. Wi wani gi so furu sma leki a kan na okasi fu gi piki. Fu taki en leti, wan fu den moro bun fasi fu gi wi brada nanga sisa deki-ati, na fu gi den na okasi fu taki fu a bribi fu den (1 Kor. 10:24). Kow go luku fa wi kan du dati.

13. Fa wi kan gi moro sma na okasi fu gi piki?

¹³ Efu wi e hori den piki fu wi syatu, dan ten o de so taki moro sma kan gi piki. Den owruman nanga den preikiman di abi ondrofeni kan gi na eksempre ini a tori disi. Srefi efu yu gi wan syatu piki, sorgu taki yu no e taki fu ala den penti na ini yu piki. Efu yu e taki fu ala den penti na ini a paragraaf, dan furu no de gi trawan moro fu taki. Fu eksempre, na ini a paragraaf disi, tu rai gi. A fosiwan na taki wi musu gi syatu piki èn a di fu tu na fu no taki fu ala den penti na ini a paragraaf. Efu yu na a fosiwan di kan gi piki na a paragraaf disi, dan pruberi fu taki fu wán penti nomo.

14. San kan yepi wi fu sabi omeni leisi wi o opo wi anu fu gi piki? (Luku a fowtow.)

¹⁴ Luku bun tu omeni leisi yu e opo yu anu fu gi piki. Efu wi e opo wi anu tumusi furu, dan a kan de neleki wi e dwengi a fesiman fu gi wi moro piki aladi trawan no kisi na okasi ete fu gi piki. Disi kan meki trawan lasi-ati èn a kan meki taki den no e opo den anu moro.​—Preik. 3:7.

15. (a) San wi musu du te wi no kisi piki? (b) Fa a brada di e hori a studie kan sori taki a e poti prakseri na ala sma? (Luku a faki „ Te yu e hori a studie”.)

¹⁵ Te furu preikiman e opo den anu  na a studie, dan kande wi no e kisi so furu piki leki san wi ben o wani. Son leisi a fesiman no e gi wi nowan piki srefi. A sani dati kan meki wi lasi-ati, ma wi musu pruberi fu no firi wan fasi te wi no kisi piki.​—Preik. 7:9.

16. Fa wi kan gi trawan deki-ati te den gi piki?

¹⁶ Efu yu no e kisi piki so furu leki san yu ben o wani, dan yu kan arki bun te trawan e gi piki èn baka a konmakandra yu kan prèise den gi a piki fu den. Neleki fa den piki fu yu e gi den brada nanga sisa deki-ati, na so den o kisi deki-ati tu te yu e prèise den (Odo 10:21). Sobun, wan tra fasi fa wi kan gi makandra deki-ati na te wi e prèise wi brada nanga sisa.

17. (a) Fa papa nanga mama kan yepi den pikin fu sreka wan piki di fiti a yari fu den? (b) Soleki fa a felem sori, dan san na fo sani di wi musu du te wi e sreka wisrefi fu gi wan piki? (Luku sosrefi a futuwortu.)

¹⁷ Na sortu tra fasi wi kan gi makandra deki-ati na den konmakandra fu wi? Efu yu na wan papa noso mama, dan yepi den yongu pikin fu yu fu sreka wan piki di fiti a yari fu den (Mat. 21:16). Son leisi a studie e taki fu problema na ini a trowlibi noso fu hurudu,  ma kande wán noso tu paragraaf de pe wan pikin kan gi piki. Boiti dati, yepi yu pikin fu frustan fu san ede a kan pasa taki den no o kisi piki ibri leisi te den opo den anu. Te yu e fruteri den fu san ede disi kan pasa, dan dati kan yepi den fu no firi wan fasi te trawan e kisi piki na presi fu den.​—1 Tim. 6:18. d

18. Fa wi kan sorgu taki wi no e meki sma poti prakseri na wi te wi e gi piki? (Odo 27:2)

¹⁸ Wi alamala kan sreka fu gi bun piki di e gi Yehovah grani èn di e gi wi brada nanga sisa deki-ati (Odo 25:11). Aladi wawan leisi wi kan fruteri wan syatu ondrofenitori fu wisrefi, toku wi musu luku taki wi no e taki tumusi furu fu wisrefi (Leisi Odo 27:2; 2 Kor. 10:18). Na presi fu dati wi e meki muiti fu taki sani di o meki wi poti prakseri na Yehovah, na en Wortu, èn na a pipel fu en (Openb. 4:11). Ma a no de fu taki dati efu na aksi fu wan paragraaf na fu fruteri wan ondrofenitori fu wisrefi, dan a fiti fu du dati. Luku wan eksempre fu dati na ini a paragraaf di e kon.

19. (a) Fa sani o de te wi e hori ala sma na prakseri di de na a konmakandra? (Romesma 1:11, 12) (b) Fa yusrefi e feni en fu gi piki na den konmakandra?

¹⁹ Aladi wet no de fa fu gi piki èn fa wi no musu gi piki, toku wi alamala kan du muiti fu gi makandra deki-ati. Kande sonwan fu wi o abi fu gi moro piki. Noso kande wi musu breiti nanga den okasi di wi e kisi fu gi piki èn kande wi musu breiti taki trawan man gi piki tu. Te wi e poti prakseri na den afersi fu trawan te wi na den gemeente konmakandra, dan wi alamala „kan gi makandra deki-ati”.​—Leisi Romesma 1:11, 12.