1. Fruteri san pasa di Yesus du en fosi wondru.

 PRAKSERI fa sani ben de di Yesus bigin nanga en diniwroko na grontapu na ini a yari 29. Yesus nanga en mama, Maria, nanga wan tu disipel fu en kisi wan kari fu go na wan trowfesa na ini Kana, wan dorpu na a noordsei fu Nasaret, a foto pe Yesus kweki. Maria na wan mati fu a trowpaar èn kande a e yepi fu tyari nyanyan nanga tra sani go gi den fisitiman. Ma na a ten fu a trowfesa wan problema e opo kon di ben kan meki den famiri nanga a yongu trowpaar srefi kisi syen. Win no de moro. b Kande a sani disi pasa fu di moro sma kon na a fesa leki san den ben fruwakti. Wantewante Maria e go na en Manpikin èn a e taki: „Den no abi win moro” (Yoh. 2:1-3). San Yesus du? A du wan wondru. A meki watra tron „bun win”.​—Yoh. 2:9, 10.

2-3. (a) Sortu wondru Yesus du? (b) San wi o luku na ini na artikel disi?

² Yesus du furu tra wondru na ini a pisi ten di a du en diniwroko dyaso na grontapu. c A gebroiki a makti fu en fu du wondru fu yepi dusundusun sma. Fu eksempre, tu fu  den wondru di a du, na taki a ben gi 5000 man nyanyan èn wan tra leisi a gi 4000 man nyanyan. A kan taki na ala den tu okasi disi sowan 27.000 sma kisi nyanyan, te wi e teri den uma nanga den pikin di ben de drape (Mat. 14:15-21; 15:32-38). Boiti dati, na ala tu okasi Yesus dresi furu sma (Mat. 14:14; 15:30, 31). Prakseri fa den sma di ben de drape ben fruwondru di Yesus meki den kon betre èn di a du wan wondru fu gi den nyanyan.

³ Wi kan leri furu fu den wondru fu Yesus. Na ini na artikel disi wi o luku fa den wondru dati kan tranga a bribi fu wi. Baka dati wi o luku fa wi kan sori sakafasi nanga sari-ati neleki fa Yesus ben du dati di a ben du den wondru.

4. San wi e leri fu den wondru fu Yesus?

⁴ Den wondru fu Yesus no e leri wi sani fu en nomo, ma sosrefi fu en Papa. Disi na fu di Yehovah na a sma di gi Yesus a krakti fu du wondru. Tori fu den apostel 10:38 e taki: „Gado salfu en [Yesus] nanga santa yeye èn nanga krakti. Yesus ben e waka na ini a heri kondre e du bun èn a ben e dresi ala sma di Didibri ben kwinsi, bika Gado ben de nanga en.” No frigiti taki na ini ala sani di Yesus ben e taki èn ben e du, a ben sori krin fa en Papa ben e denki èn ben e firi. Dati ben de fu si tu na ini den wondru di a ben du (Yoh. 14:9). Kow go luku dri sani di wi kan leri fu den wondru fu Yesus.

5. Fu san ede Yesus ben du wondru? (Mateyus 20:30-34)

⁵ A fosi sani, na taki Yesus nanga en Papa lobi wi srefisrefi. Di Yesus ben de na grontapu, dan a sori taki a lobi libisma srefisrefi èn dati meki a du wondru fu yepi den wan di ben e pina. Wan leisi, tu breniman bari kari Yesus fu yepi den. (Leisi Mateyus 20:30-34.) Luku taki Yesus „ben sari den” èn dati meki a dresi den. Na lobi meki taki Yesus ben abi so furu sari-ati nanga den man disi. Na a sari-ati disi meki taki a gi den wan di ben de nanga angri nyanyan èn taki a dresi wan gwasiman (Mat. 15:32; Mark. 1:41). Wi kan de seiker taki Yehovah, a Gado di „abi trutru sari-ati” nanga en Manpikin lobi wi trutru èn taki a e hati den taki wi e pina (Luk. 1:78; 1 Petr. 5:7). Den e angri srefisrefi fu tyari wan kaba kon na ala den problema di e kwinsi libisma.

6. Sortu makti Gado gi Yesus?

⁶ A di fu tu sani, na taki Gado gi Yesus a makti fu lusu ala den problema fu libisma. Den wondru di Yesus du sori taki a man lusu ala den problema di wi srefi no ben o man lusu noiti. Fu eksempre, a abi a makti frulusu wi fu a rutu fu ala den problema fu libisma èn dati na a sondu di wi kisi nanga ala den bakapisi fu en soleki siki nanga dede (Mat. 9:1-6; Rom. 5:12, 18, 19). Den wondru fu en sori taki a kan dresi „ibri sortu siki” èn taki a man wiki den dedewan srefi (Mat. 4:23; Yoh. 11:43, 44). A abi a makti tu fu meki bigi winti saka èn fu puru ogri yeye na sma tapu (Mark. 4:37-39; Luk. 8:2). A e gi wi deki-ati trutru fu sabi taki Yehovah gi en Manpikin a makti dati!

7-8. (a) Fu san wi kan de seiker te wi e luku den wondru fu Yesus? (b) Sortu wondru yu e angri fu si na ini a nyun grontapu di e kon?

⁷ A di fu dri sani, na taki wi kan abi a frutrow taki Gado Kownukondre o tyari blesi kon na ini a ten di e kon. Den wondru di Yesus du di a ben de wan libisma na  grontapu e leri wi san a o du na heri grontapu leki Kownu fu Gado Kownukondre na hemel. Luku san o pasa dyonsro te Krestes o tiri. Wi o de gosontu dorodoro fu di a o puru ibri siki nanga mankeri di pina libisma (Yes. 33:24; 35:5, 6; Openb. 21:3, 4). Noiti wi o de nanga angribere èn noiti moro rampu o pasa (Yes. 25:6; Mark. 4:41). Wi o prisiri srefisrefi fu gi den lobiwan fu wi „di de na ini den grebi” wan switikon te den kisi wan opobaka (Yoh. 5:28, 29). Sortu wondru yu e angri fu si na ini a nyun grontapu?

⁸ Di Yesus ben e du wondru, dan a sori taki a ben abi furu sakafasi nanga sari-ati. A bun te wi e du muiti fu kon abi den fasi disi. Kow poti prakseri na tu eksempre. Wi o bigin nanga a tori fu a trowfesa na ini Kana.

9. Fu san ede Yesus du wan wondru na a trowfesa na ini Kana? (Yohanes 2:6-10)

⁹ Leisi Yohanes 2:6-10. Di win no ben de moro na a trowfesa, dan a de so taki Yesus ben musu fu du wan sani? Nôno. Nowan enkri profeititori e fruteri taki a Mesias ben o du wan wondru fu meki win. Ma prakseri fa yu ben o firi efu dringi no ben de moro na a trowfesa fu yu. A musu de so taki Yesus ben e sari a famiri, spesrutu a trowmisi nanga a trowmasra, èn taki a no ben wani taki den kisi syen. Dati meki a du wan wondru, soleki  fa wi ben si kaba na a bigin. A meki sowan 390 liter watra kon tron a moro bun win. Kande a sorgu taki so furu win ben de taki a trowpaar ben kan gebroiki san ben tan abra na wan tra ten, noso den ben kan seri en fu abi pikinso moni. A no de fu taki dati a trowpaar disi ben de nanga tangi.

10. San na wan tu sani di wi kan leri fu a tori di skrifi na ini Yohanes kapitel 2? (Luku a fowtow.)

¹⁰ Kow go luku wan tu sani di wi kan leri fu a tori di skrifi na ini Yohanes kapitel 2. Luku taki a no Yesus srefi furu den ston watrakan nanga watra. Fu san ede? Fu di a no ben wani taki sma poti prakseri na en, meki a taigi den wrokoman fu furu den watrakan nanga watra (Vers 6, 7). Èn baka di Yesus meki a watra tron win, dan ensrefi no teki pikinso fu a win tyari go gi a fesiman fu a fesa. Na presi fu dati, a taigi den wrokoman fu du dati (Vers 8). Wi kan de seiker taki Yesus no ben wani meki bigi. A no teki wan kan nanga win fu sori ala den sma drape san a du èn a no taigi den: ’Tesi pikinso fu a win di mi meki!’

11. San wi kan leri fu a wondru fu Yesus?

¹¹ San wi kan leri fu a wondru di Yesus du fu meki watra tron win? Wi e leri taki wi musu abi sakafasi. Yesus no ben meki bigi fu a wondru di a du. Fu taki en leti, noiti a meki bigi fu den sani di a ben du. Na presi fu dati, a ben abi sakafasi èn ibri leisi baka a gi en Papa ala glori nanga grani (Yoh. 5:19, 30; 8:28). Efu wi abi sakafasi neleki Yesus, dan wi no o denki tumusi furu fu wisrefi. Disi o meki taki wi no o meki bigi fu nowan sani di wi du. Awinsi san wi e du na ini a diniwroko fu Yehovah, wi no musu meki bigi fu den sani dati, ma wi musu meki bigi fu a makti Gado di wi mag anbegi (Yer. 9:23, 24). Wi musu gi en a grani di a musu kisi. Wi no man du noti efu Yehovah no e yepi wi.​—1 Kor. 1:26-31.

12. San na wan tra fasi fa wi kan sori sakafasi neleki Yesus? Gi wan eksempre.

¹² Kow go luku wan tra fasi fa wi kan sori sakafasi neleki Yesus. Luku a tori disi: Wan owruman e gebroiki furu fu en ten fu yepi wan yongu dinari fu sreka gi a fosi publikitaki fu en. Fu di na owruman yepi a yongu brada disi, meki a ben man hori wan bun lezing di a gemeente ben lobi. Baka a lezing, wan sma e go na a owruman èn a e taki: ’Brada so-so-so hori wan moi lezing, yu no feni?’ San na owruman musu taki? A musu taki dati na en teki en ten fu yepi a brada? Noso a musu sori sakafasi èn taki: ’Iya, a tru, a du en bun’. Efu wi abi sakafasi, dan wi no abi fu meki sma kon sabi san wi du gi trawan. Wi breiti kaba fu sabi taki Yehovah e si san wi du èn taki a e warderi den sani dati (Luku Mateyus 6:2-4; Hebr. 13:16). A no de fu taki dati Yehovah o breiti nanga wi te wi e sori sakafasi neleki Yesus.​—1 Petr. 5:6.

13. San Yesus si di a ben de krosibei fu a foto Nain, èn san a du? (Lukas 7:11-15)

¹³ Leisi Lukas 7:11-15. Prakseri san ben pasa di Yesus ben e du a diniwroko fu en sowan tu yari. A ben go na Nain, wan foto na ini Galilea di no ben de so fara fu a foto Sunem. Na ini a foto disi a profeiti Elisa ben gi a boi fu wan uma wan opobaka sowan 900 yari na fesi (2 Kow. 4:32-37). Te Yesus e doro krosibei fu a portu fu a foto, a e si taki sma e tyari wan dede man kon na dorosei. Na wan sari sani fu si. Wan uma di masra  ben dede kaba, lasi en wan-enkri pikin. Ma a mama disi di e sari no de en wawan. Wan bigi grupu sma fu a foto de nanga en. Yesus waka go na a uma èn a du wan tumusi moi sani gi en. A gi a boi fu en wan opobaka! Disi na a fosiwan fu den dri opobaka di Yesus ben gi sma, soleki fa den Evangelietori e sori.

14. San na wan tu sani di wi kan leri fu a tori na ini Lukas kapitel 7? (Luku a fowtow.)

¹⁴ Kow go luku san wi kan leri fu a tori na ini Lukas kapitel 7. Yu no si taki na di Yesus „si” a mama di ben e krei, dan baka dati „a firi sari gi en”? (Vers 13) Kande na fu di a ben si fa na uma ben e krei di a ben e waka na fesi a dedeskin fu en boi, meki a sani dati naki en ati. Sobun, Yesus no ben e firi sari nomo gi a mama, ma a sori en taki a ben e firi gi en. A no de fu taki dati a ben wani trowstu na uma disi èn fu dati ede a taigi en: „No krei moro.” Dan a du wan sani fu yepi na uma disi. A gi a boi fu en wan opobaka èn a „gi en baka na en mama”.​—Vers 14, 15.

15. San wi kan leri fu a wondru di Yesus ben du?

¹⁵ San wi kan leri fu a wondru di Yesus du fu gi a manpikin fu na uma di masra ben dede kaba wan opobaka? Wi e leri taki wi musu sori sari-ati gi den wan di e sari fu di wan lobiwan fu den dede. A no de fu taki dati wi no kan gi den dedewan wan opobaka neleki fa Yesus ben du dati. Ma neleki Yesus wi kan sori sari-ati gi sma di e sari. Wi kan trowstu den noso wi kan du wan sani fu yepi den d (Odo 17:17; 2 Kor. 1:3, 4; 1 Petr. 3:8). Awinsi wi e taigi den wan tu sani nomo, noso awinsi wi e du wan pikin sani nomo fu yepi den, toku dati kan de wan bigi trowstu gi den.

16. Te yu luku a fowtow, dan san yu leri fu na ondrofenitori fu a mama di lasi wan pikin fu en na ini dede?

¹⁶ Luku na ondrofenitori disi. Wan tu yari pasa di wan gemeente ben e singi na wan fu den konmakandra, dan wan sisa  si taki wan mama na ini a rèi krosibei fu en ben e krei. A singi ben e taki fu na opobaka howpu èn no so langa pasa a yongu meisje fu a mama disi kon dede. Fu di a sisa disi ben sabi dati, meki wantewante a go tanapu sei a mama, a brasa en hori èn a singi a singi go doro nanga en. Bakaten a mama taki: „Mi ati ben furu nanga lobi gi den brada nanga sisa.” A ben breiti srefisrefi taki a ben go na a konmakandra. A taki: „Na drape wi e feni yepi, drape na a Kownukondre zaal.” Wi kan de seiker taki Yehovah e si den pikinpikin sani di wi e du fu sori sari-ati gi den wan di „brokosaka” fu di den lasi wan lobiwan na ini dede.​—Ps. 34:18.

17. San wi leri fu den wondru fu Yesus na ini na artikel disi?

¹⁷ Te wi e studeri den Evangelietori di e taki fu den wondru fu Yesus, dan dati kan tranga a bribi fu wi. Den tori disi e leri taki Yehovah nanga Yesus lobi wi trutru, taki Yesus abi a makti fu lusu ala den problema fu libisma èn taki wi kan abi a frutrow taki heri esi wi o kisi den blesi di a Kownukondre fu Gado o tyari kon. Te wi e studeri den tori disi, dan wi kan luku fa wi kan sori den fasi fu Yesus. Kande yu kan studeri den tra wondru fu Yesus gi yusrefi noso na a Osofamiri Anbegi. Luku san yu kan leri fu den tori dati èn taki nanga trawan fu san yu leri. Yu o abi moi takimakandra te yu e du dati.​—Rom. 1:11, 12.

18. San wi o luku na ini a tra artikel?

¹⁸ Na a kaba fu Yesus en diniwroko, a gi ete wan sma wan opobaka èn disi ben de a di fu dri opobaka di Bijbel e taki dati a gi sma. Ma a wan disi no ben de leki den trawan. Disi leisi a gi wan bun mati fu en wan opobaka èn a mati disi ben dede fo dei kaba. San wi e leri fu na Evangelietori di e taki fu a wondru dati? Èn fa wi kan tranga a bribi di wi abi na ini na opobaka howpu? Wi o luku den aksi dati na ini a tra artikel.