1. San wi sabi seiker?

 WI NA Yehovah en pipel. Wi sabi taki a lobi wi èn taki a wani wi fu abi a moro bun libi (Rom. 8:35-39). Wi sabi tu taki wi o kisi wini te wi e fiti Bijbel gronprakseri na ini wi libi (Yes. 48:17, 18). Ma san wi musu du efu wi e kisi problema di wi no ben fruwakti?

2. Sortu problema kan miti wi èn san wi kan aksi wisrefi?

² Ala den futuboi fu Yehovah e kisi problema. Fu eksempre, wan famiriman fu wi kan du wan hati sani nanga wi. A kan taki wi kisi wan seryusu siki di e meki taki wi no man du so furu gi Yehovah. Kande wi e pina fu di wan rampu pasa noso kande sma e frufolgu wi fu di wi na Kotoigi. Te wi e kisi den sortu problema disi, dan wi kan aksi wisrefi: ’Fu san ede a sani disi e pasa nanga mi? San mi du taki disi e miti mi? Disi wani taki dati Yehovah no e blesi mi?’ Oiti yu ben firi so? Efu yu ben firi so wan leisi, dan no lasi-ati. Furu fu den getrow futuboi fu Yehovah ben firi so tu.​—Ps. 22:1, 2; Hab. 1:2, 3.

3. San wi kan leri fu Psalm 34:19?

³ Leisi Psalm 34:19. Luku tu prenspari sani na ini a psalm disi: (1) Reti-ati sma e kisi problema. (2) Yehovah e lusu den problema gi wi. Fa Yehovah e du dati? Wan sani di a e du, na taki a e yepi wi fu si a libi na ini a grontapu disi na wan yoisti fasi. Aladi Yehovah e pramisi wi taki wi o de nanga prisiri te wi e dini en, toku a no e gi wi a dyaranti taki a libi fu wi o de sondro problema now (Yes. 66:14). A e gi wi deki-ati fu tan poti prakseri na a ten di e  kon te wi o abi a libi di a wani taki wi abi fu têgo (2 Kor. 4:16-18). Fosi a ten dati doro, a e yepi wi fu tan dini en ibri dei.​—Sari 3:22-24.

4. San wi o luku na ini na artikel disi?

⁴ Kow go luku san wi kan leri fu getrow anbegiman fu Yehovah na ini Bijbel ten èn na ini a ten fu wi. Wi o si taki wi kan kisi problema di wi no ben fruwakti. Ma te wi e frutrow tapu Yehovah, dan a o horibaka gi wi ala ten (Ps. 55:22). Te wi o luku den eksempre disi, dan aksi yusrefi: ’San mi ben o du efu mi ben de na ini wan srefi sortu situwâsi? Fa den eksempre disi e yepi mi fu poti moro frutrow tapu Yehovah? San mi kan leri fu den sma disi?’

5. Sortu problema Yakob kisi? (Luku a fowtow na tapu a kafti.)

⁵ Futuboi fu Yehovah na ini Bijbel ten ben kisi problema di den no ben fruwakti. Luku na eksempre fu Yakob. En papa ben taigi en fu teki wan fu den umapikin fu Laban leki wefi. Laban ben de wan famiri fu den di ben e anbegi Gado. Yakob en papa ben gi en a dyaranti taki Yehovah ben o gi en furu blesi (Gen. 28:1-4). Na so Yakob du san en papa ben aksi fu en. A gwe libi Kanan èn a go na a oso fu Laban, di ben abi tu umapikin, Lea nanga Rakel. Yakob kon lobi Rakel, a moro yongu umapikin fu Laban èn a ben wani wroko seibi yari gi Laban fosi a trow nanga Rakel (Gen. 29:18). Ma sani no waka soleki fa Yakob ben fruwakti. Laban kori en so taki a trow nanga a moro bigi umapikin, Lea. Laban meki Yakob trow nanga Rakel wán wiki baka dati, ma a ben musu wroko ete seibi yari gi en (Gen. 29:25-27). Laban no ben de eerlijk tu te a ben e du bisnis nanga Yakob. Laban no libi bun nanga Yakob 20 yari langa!​—Gen. 31:41, 42.

6. Sortu tra problema Yakob ben kisi?

⁶ Yakob ben kisi tra problema tu. A ben abi wan bigi osofamiri, ma a no ala den boi fu en ben e libi bun nanga makandra. Den ben seri den eigi brada Yosef leki srafu. Tu fu den boi fu Yakob, Simeon nanga Leifi, meki a famiri kisi syen èn den meki Yehovah kisi porinen. Boiti dati, Rakel, a wefi di Yakob ben lobi srefisrefi, kon lasi libi di a ben e meki a di fu tu pikin fu den. Èn fu di wan bigi angriten ben kon, meki Yakob no ben abi tra fasi leki fu froisi go na a kondre Egepte tapu en owrudei.​—Gen. 34:30; 35:16-19; 37:28; 45:9-11, 28.

7. Fa Yehovah sori Yakob taki a feni en bun?

⁷ Aladi den problema disi ben e miti Yakob, toku a no lasi frutrow na ini Yehovah èn na ini den pramisi fu En. Èn Yehovah srefi sori Yakob taki a feni en bun. Fu eksempre, aladi Laban no ben de eerlijk nanga Yakob, toku Yehovah gi Yakob furu gudu. Èn a no de fu taki dati Yakob ben de nanga bigi tangi taki Yehovah meki a si en manpikin Yosef baka, fu di a ben denki taki a boi fu en ben dede langa ten kaba. Fu di Yakob ben abi wan bun matifasi nanga Yehovah, meki a ben man horidoro di a kisi ala den problema disi (Gen. 30:43; 32:9, 10; 46:28-30). Te wi abi wan bun matifasi nanga Yehovah, dan wi o man horidoro tu te wi e kisi problema di wi no ben fruwakti.

8. San Kownu David ben wani du?

⁸ Kownu David no ben man du ala den sani di a ben wani du gi Yehovah. Fu eksempre, David trutru ben wani bow wan tempel gi a Gado fu en. A ben taigi a profeiti Natan taki a ben wani du a sani disi.  Natan taigi en: „Yu kan du awinsi san de na yu ati, bika a tru Gado de nanga yu” (1 Kron. 17:1, 2). A musu de so taki David kisi furu deki-ati di a yere a sani disi. Kande a bigin seti sani wantewante fu du a bigi wroko disi.

9. San David du di a kisi wan boskopu di a no ben fruwakti?

⁹ Ma syatu baka dati a profeiti fu Yehovah drai go baka na en nanga wan boskopu di a no ben fruwakti. „A neti dati” Yehovah taigi Natan taki David no ben o de a sma di ben o bow a tempel, ma na wan fu den manpikin fu en ben o du dati (1 Kron. 17:3, 4, 11, 12). San David du di a kisi a boskopu dati? A no lasi-ati so te taki a no ben wani yepi nanga a wroko disi. Ma a seti sani fu tyari moni nanga tra sani kon na wán di en manpikin Salomo ben o abi fanowdu fu bow a tempel.​—1 Kron. 29:1-5.

10. Fa Yehovah blesi David?

¹⁰ Wantewante baka di Yehovah taigi David taki a no ben o bow a tempel, a meki wan frubontu nanga en. Yehovah pramisi David taki wan fu den bakapikin fu en ben o tiri fu têgo (2 Sam. 7:16). Prakseri fa David o breiti srefisrefi na a ten fu a Dusun Yari Tiri, te a kon sabi taki Yesus, a Kownu di e tiri na a ten dati, na wan fu den bakapikin fu en. A tori disi e yepi wi fu frustan taki srefi efu wi no kan du ala san wi wani gi Yehovah, toku a Gado fu wi kan gi wi tra bun sani di wi no ben fruwakti noiti.

11. Sortu blesi den fosi Kresten kisi aladi a Kownukondre no ben kon na a ten di den ben fruwakti en? (Tori fu den apostel 6:7)

¹¹ Den fosi Kresten ben kisi problema di den no ben fruwakti. Fu eksempre, den ben e wakti fayafaya fu Gado Kownukondre kon, ma den no ben sabi o ten dati ben o pasa (Tori 1:6, 7). Sobun, san den du? Den tan du ala san den man na ini a preikiwroko. Den ben si fa Yehovah ben e blesi a muiti di den ben e meki di den ben e preiki na moro nanga moro presi.​—Leisi Tori fu den apostel 6:7.

12. San den fosi Kresten du di wan angriten ben kon?

¹² Baka wan pisi ten, wan bigi ’angriten kon na heri grontapu’ (Tori 11:28). Den fosi Kresten ben kisi fu du nanga na angriten disi tu. Prakseri fa den ben e pina. A no de fu taki dati den osofamiri-edeman ben e broko den ede fa den ben o feni nyanyan gi den osofamiri. Èn fa a de nanga den yongusma di ben abi na prakseri fu du moro na ini a diniwroko? Kande den ben e aksi densrefi efu den musu wakti teleki na angriten pasa. Awinsi fa a situwâsi ben de, den Kresten fiti densrefi. Den tan preiki na ala sortu fasi èn den ben breiti fu prati san den abi nanga den brada nanga sisa fu den na ini Yudea.​—Tori 11:29, 30.

13. Sortu blesi den Kresten kisi na a ten fu na angriten?

¹³ Sortu blesi den Kresten kisi na a ten fu na angriten? Den wan di ben kisi sani di den ben abi fanowdu ben si fa Yehovah ben e yepi den (Mat. 6:31-33). A musu de so taki den tron moro bun mati nanga den brada nanga sisa fu den di ben kon yepi den. Èn den sma di ben gi sani noso di ben yepi na tra fasi, ben ondrofeni fa a e gi prisiri te den e gi sma sani (Tori 20:35). Yehovah blesi den alamala fu di den fiti densrefi na a situwâsi di ben kenki.

14. San pasa nanga Barnabas nanga Paulus èn san ben de a bakapisi? (Tori fu den apostel 14:21, 22)

¹⁴ Sma ben gwenti frufolgu den fosi  Kresten èn son leisi dati ben e pasa na wan ten di den no ben fruwakti dati. Luku san pasa nanga Barnabas nanga Paulus di den ben e preiki na ini a kontren fu Listra. Na a bigin, den sma sori switifasi gi den èn den ben arki den. Ma bakaten, gensman „sutu faya gi den ipi-ipi sma” èn sonwan fu den sma dati fringi ston na tapu Paulus èn den libi en fu dede drape (Tori 14:19). Ma Barnabas nanga Paulus go doro fu preiki na tra presi. San ben de a bakapisi? „Den meki furu disipel.” Boiti dati, den sani di den ben taki èn na eksempre fu den gi den brada nanga sisa deki-ati. (Leisi Tori fu den apostel 14:21, 22). Furu sma kisi wini fu di Paulus nanga Barnabas tan preiki aladi sma frufolgu den sondro taki den fruwakti dati. Disi e leri wi taki solanga wi e tan du san Yehovah aksi wi fu du, wi o kisi blesi.

15. San yu leri fu na eksempre fu Brada A. H. Macmillan?

¹⁵ Na ini den yari fosi 1914, a pipel fu Yehovah ben e fruwakti wan tu sani. Luku na eksempre fu Brada A. H. Macmillan. Neleki furu sma na ini a ten dati, Brada Macmillan ben denki taki a ben o go na hemel heri esi. Na ini wan lezing di a ben hori na ini september 1914, a taki: „Kande disi na a lasti lezing di mi o hori.” A no de fu taki dati disi no ben de a lasti lezing fu en. Brada Macmillan ben skrifi bakaten: „Kande mi ben gaw tumusi fu denki taki wi ben o go na hemel wantewante.” A taki tu: „San wi musu du, na fu tan du a wroko fu Masra fayafaya.” Brada Macmillan tan du en diniwroko fayafaya. Di den brada fu wi ben de na strafu-oso fu di den ben weigri fu go na ini a legre, dan a ben abi a grani fu gi furu fu den deki-ati. Srefi di Brada Macmillan kon owru, a tan go na den gemeente konmakandra. Fa a kisi wini di a tan du ala san a man na ini a diniwroko fu Yehovah aladi a ben e wakti fu kisi a pai fu en? Syatu bifo a dede na ini 1966, a skrifi: „Now a bribi fu mi moro tranga leki oiti bifo.” Disi na wan heri moi eksempre gi wi, spesrutu efu wi e kisi tesi moro langa leki san wi ben fruwakti.​—Hebr. 13:7.

16. Sortu problema Herbert Jennings nanga en wefi ben kisi sondro fu fruwakti dati? (Yakobus 4:14)

¹⁶ Furu fu den anbegiman fu Yehovah kon siki sondro taki den ben fruwakti dati. Fu eksempre, na ini na ondrofenitori fu Brada Herbert Jennings b, a e taki fa en nanga en wefi ben lobi a toewijzing fu den leki zendeling na ini Gana. Ma baka wan pisi ten datra kon si taki a abi a seryusu siki di den e kari bipolaire stoornis. Di a situwâsi fu Brada Jennings kon kenki, a gebroiki Yakobus 4:14 fu sori taki ’wi no sabi fa wi libi o de tamara’. (Leisi en.) A ben skrifi: „Sobun, mi teki sani leki fa den ben de, èn wi seti sani fu gowe libi Gana èn sosrefi den furu bun mati fu wi èn wi drai go baka na Kanada [fu kisi datrayepi].” Yehovah yepi Brada Jennings nanga en wefi fu tan dini en go doro aladi den ben de na ini wan muilek situwâsi.

17. Fa na eksempre fu Brada Jennings yepi trawan?

¹⁷ Den sani di Brada Jennings taki na ini na ondrofenitori fu en ben de wan bigi yepi gi trawan fu di a ben taki sani soleki fa a de. Wan sisa ben skrifi: „Di mi leisi na  artikel disi, a naki mi ati trutru. . . . Di mi si taki Brada Jennings ben musu gwe libi a toewijzing fu en fu go suku datrayepi, dan a sani dati yepi mi fu si a situwâsi fu mi na a yoisti fasi.” Wan brada ben skrifi: „Mi dini 10 yari leki gemeente owruman, ma mi no ben man du a wroko disi go doro fu di mi kon siki na frustan sei. Disi meki taki mi lasi-ati so te taki nofo tron mi no ben man leisi den ondrofenitori na ini den artikel. . . . Ma a fasi fa Brada Jennings horidoro gi mi furu deki-ati.” A sani disi e memre wi taki efu wi e horidoro te wi e kisi problema di wi no ben fruwakti, dan dati kan gi trawan deki-ati. Srefi efu a libi no e waka leki fa wi ben fruwakti, toku wi kan de wan eksempre gi trawan na ini a fasi fa wi horidoro èn fa wi sori bribi.​—1 Petr. 5:9.

18. Soleki fa den fowtow e sori, dan san yu e leri fu a sisa fu Nigeria di lasi en masra na ini dede?

¹⁸ Te wan rampu pasa soleki a COVID-19 siki di ben panya na heri grontapu, dan a sani dati abi krakti tapu furu fu den futuboi fu Yehovah. Fu eksempre, na ini Nigeria wan sisa di lasi en masra na ini dede, ben abi pikinso nyanyan nanga moni ete. Wan mamanten, a meisje fu en aksi en san den o nyan baka te den bori a lasti kan aleisi di den ben abi. A sisa taigi en meisje taki den no abi nowan moni noso nyanyan moro, ma a sani di den musu du na fu de leki na uma fu Sarfat di ben lasi en masra na ini dede. Den ben o sreka a lasti nyanyan di den ben abi èn den ben o poti ala den frutrow tapu Yehovah (1 Kow. 17:8-16). Fosi den bigin denki srefi san den o nyan a bakadina dati, den kisi wan pakket nanga sani di den abi fanowdu fu den brada nanga sisa. A pakket ben abi nofo nyanyan gi moro leki tu wiki. A sisa taki dati a no ben denki taki Yehovah ben e arki trutru san a taigi a meisje fu en. A de krin taki te wi e poti wi frutrow tapu  Yehovah, dan den problema di wi no ben fruwakti na ini a libi kan meki wi kon moro krosibei na en.​—1 Petr. 5:6, 7.

19. Fa sma frufolgu Aleksey Yershov?

¹⁹ Na ini den yari di pasa, sma frufolgu furu fu wi brada nanga sisa sondro taki den ben fruwakti dati. Luku a tori fu Brada Aleksey Yershov di e libi na ini Rosiakondre. A pipel fu Yehovah ben de fri fu du son sani leki Kotoigi di Brada Yershov teki dopu na ini 1994. Ma bakaten a situwâsi na ini Rosiakondre kenki. Na ini 2020, skowtu ben broko kon na ini na oso fu Brada Yershov fu suku sani. Den ben teki furu fu den sani di a ben abi. Wan tu mun baka dati, lanti tyari en na fesi krutu fu di den ben feni taki a du ogri. Ma san moro ogri, na taki moro leki wán yari langa wan sma di ben du neleki a ben wani studeri Bijbel, ben meki felem fu san a brada disi ben e du. Na den felem dati den gebroiki leki buweisi fu krutu a brada. Na wan kefalek ogri sani a sma disi du.

20. Fa Brada Yershov tranga a matifasi di a abi nanga Yehovah?

²⁰ Wan bun sani pasa di sma frufolgu Brada Yershov? Iya. A matifasi di a abi nanga Yehovah kon moro tranga. A e taki: „Mi nanga mi frow e begi moro furu makandra. Mi e frustan taki mi no ben o man horidoro na ini a situwâsi disi efu Yehovah no ben yepi mi.” A e taki tu: „Studeri yepi mi fu no lasi-ati. Mi e denki dipi fu na eksempre fu anbegiman fu Yehovah fu owruten. Furu tori de na ini Bijbel di e sori o prenspari a de fu tan tiri èn fu frutrow tapu Yehovah.”

21. San wi leri na ini na artikel disi?

²¹ San wi leri na ini na artikel disi? Son leisi wi e kisi problema na ini a grontapu disi di wi no ben fruwakti. Ma awinsi san pasa, Yehovah ala ten e yepi den futuboi fu en te den e frutrow tapu en. Dati meki a thema tekst fu wi e taki: „A reti-ati sma abi furu problema, ma Yehovah e lusu den alamala gi en” (Ps. 34:19). Meki a de so taki wi no e tan poti prakseri na den problema di wi e kisi, ma meki wi tan poti prakseri na a krakti di Yehovah e gi wi fu horidoro. Te wi e du dati, dan wi o man taki neleki na apostel Paulus: „Mi man du ala sani nanga yepi fu a sma di e gi mi krakti.”​—Fil. 4:13.