1. Fa wan boi sori taki a e bribi na ini na opobaka howpu?

 WAN boi di nen Matthew ben musu du furu oparâsi fu di a abi wan seryusu siki. Di a ben abi seibi yari, dan en nanga en famiri ben e luku wan JW Broadcasting^® programa di e kon ibri mun. Na ini a programa, wan video clip ben de di ben e sori fa sma e prisiri fu si den lobiwan fu den di kisi wan opobaka. b Di den kaba luku a programa, dan Matthew go na en papa nanga mama, a hori den anu, èn a taigi den: „Papa, mama, un no si? Srefi efu mi dede, mi o kisi wan opobaka. Un kan wakti mi, un no abi fu sari.” Yu kan frustan fa a papa nanga mama ben e firi di den si fa a boi fu den ben abi so wan tranga bribi na ini na opobaka howpu.

2-3. Fu san ede a bun te wi e prakseri a pramisi taki sma o kisi wan opobaka?

² A bun te wi e prakseri a pramisi di Bijbel e gi taki sma o kisi wan opobaka na ini a ten di e kon (Yoh. 5:28, 29). Fu san ede? Fu di wi no sabi efu wi o kisi wan seryusu siki noso efu wan lobiwan fu wi o lasi libi sondro taki wi fruwakti dati (Preik. 9:11; Yak. 4:13, 14). Na opobaka howpu kan yepi wi fu pasa den tesi dati (1 Tes. 4:13). Bijbel e pramisi taki wi Papa na hemel sabi wi bun èn taki a lobi wi trutru (Luk. 12:7). Yehovah musu fu sabi wi heri bun fu man gi wi wan opobaka nanga den srefi fasi èn nanga den srefi prakseri di wi ben abi fosi. A de krin taki Yehovah lobi wi trutru fu di a o gi wi na okasi fu libi fu têgo. Srefi efu wi ben o dede, a o gi wi wan opobaka.

 ³ Na ini na artikel disi, wi o luku fosi fu san ede wi kan bribi na ini na opobaka howpu. Baka dati, wi o poti prakseri na a Bijbel tori di abi fu du nanga den wortu na ini a thema tekst fu wi di e taki: „Yu brada o kon na libi baka” (Yoh. 11:23). Leki lasti, wi o leri fa wi kan tranga wi bribi na ini na opobaka howpu.

4. Fu san wi musu de seiker efu wi wani bribi wan pramisi? Gi wan eksempre.

⁴ Efu wi wani bribi wan pramisi, dan wi musu de seiker taki a sma di e pramisi wi a sani dati, wani du a sani dati èn taki a man du a sani dati tu. Fu eksempre: Kow taki dati wan bigi winti pori na oso fu yu. Dan wan mati e kon na yu èn a e pramisi yu: ’Mi o yepi yu fu seti yu oso kon bun baka.’ Efu a sabi fa fu bow oso èn a abi den wrokosani fu du a wroko, dan yu sabi taki a o man yepi yu. Dati meki yu e bribi a sani di a pramisi yu. Ma fa a de nanga a pramisi fu Gado taki a o gi sma wan opobaka? A de so taki a wani du san a pramisi èn taki a man du dati tu?

5-6. Fu san ede wi kan de seiker taki Yehovah wani gi den dedewan wan opobaka?

⁵ A tru taki Yehovah wani gi den dedewan wan opobaka? Iya, seiker. A gebroiki en santa yeye fu meki wan tu Bijbel skrifiman skrifi taki a o gi dedesma wan opobaka na ini a ten di e kon (Yes. 26:19; Hos. 13:14; Openb. 20:11-13). Èn te Yehovah e pramisi wan sani, dan ala ten a e du san a pramisi (Yos. 23:14). Fu taki en leti, Yehovah no man wakti fu gi den dedewan wan opobaka. Fu san ede wi kan taki dati?

⁶ Luku san Yob ben taki: A ben de seiker taki awinsi a ben o dede, Yehovah ben o angri fu si en libilibi baka (Yob 14:14, 15). Na so Yehovah e firi tu te a abi fu du nanga ala den anbegiman fu en di dede. A no man wakti fu gi den wan opobaka leki sma di gosontu èn di de koloku. Fa a de nanga den milyardmilyard sma di dede sondro fu kon sabi den tru tori fu Yehovah? Wi lobi-ati Gado wani gi den wan opobaka tu (Tori 24:15). A wani gi den na okasi fu tron en mati èn fu libi fu têgo na grontapu (Yoh. 3:16). A de krin taki Yehovah wani gi den dedewan wan opobaka.

7-8. Fu san ede wi kan de seiker taki Yehovah man gi den dedewan wan opobaka?

⁷ A de so taki Yehovah man wiki den dedewan? Seiker! Bijbel e kari Yehovah „na Almaktiwan” (Openb. 1:8). Disi e sori taki a abi a makti fu wini iniwan feanti, srefi dede (1 Kor. 15:26). A de wan trowstu fu sabi dati èn a e gi wi deki-ati. Luku na ondrofenitori fu Sisa Emma Arnold. En nanga en osofamiri ben kisi hebi tesi na a ten fu a Di Fu Tu Grontapufeti. Emma trowstu en umapikin fu di lobiwan fu den ben lasi den libi na ini den strafuman-kampu fu den Nazisma. A taigi en: „Efu sma di dede noiti no ben o man libi moro, dan dati wani taki dati dede tranga moro Gado. Ma dati no tru kwetikweti.” A de krin taki noti no tranga moro Yehovah! Na Almakti Gado di e gi sma libi, man gi dedesma wan opobaka.

⁸ Wan tra reide fu san ede wi sabi taki Gado o gi den dedewan wan opobaka, na fu di a man memre ala sani. A e kari ibri stari na en nen (Yes. 40:26). Boiti dati, a e memre den wan di dede (Yob 14:13; Luk. 20:37, 38). A man memre ibri pikinpikin sani fu den sma di a o gi wan opobaka, a sabi fa den ben de, sortu fasi den  ben abi, san den ben ondrofeni na ini den libi, èn ala sani di den ben sabi.

9. Fu san ede yu e bribi taki Yehovah o gi sma wan opobaka na ini a ten di e kon?

⁹ A de krin taki wi kan bribi taki Yehovah o gi sma wan opobaka na ini a ten di e kon fu di wi sabi taki a wani du dati èn taki a man du dati. Luku ete wan reide fu san ede wi kan bribi taki Gado o gi sma wan opobaka: Yehovah gi sma wan opobaka kaba. Na ini Bijbel ten, a ben gi wan tu getrow man, sosrefi Yesus, a makti fu gi dedesma wan opobaka. Kow go luku a tori di e taki fu wan fu den opobaka disi di Yesus ben gi sma, soleki fa Yohanes kapitel 11 e fruteri.

10. San e pasa te Yesus e preiki na abrasei fu Yordan-liba, èn san a e du? (Yohanes 11:1-3)

¹⁰ Leisi Yohanes 11:1-3. Prakseri san pasa na ini Betania, na a kaba fu a yari 32. Lasarus nanga en tu sisa Maria nanga Marta tan na ini a dorpu disi. Den na bun mati fu Yesus (Luk. 10:38-42). Ma Lasarus kon siki èn den sisa fu en e broko den ede. Den e seni wan boskopu gi Yesus di e preiki na abrasei fu Yordan-liba. A e teki sowan tu dei fu waka fu Betania go na a presi pe Yesus de (Yoh. 10:40). A de wan sari sani taki Lasarus dede fosi a boskopuman doro Yesus. Aladi Yesus sabi taki a mati fu en kon dede, toku a e tan drape ete tu dei, fosi a e teki pasi go na Betania. Sobun, te Yesus e doro, dan Lasarus dede fo dei kaba. Yesus o du wan sani di o yepi den mati fu en èn di o gi glori na Gado.​—Yoh. 11:4, 6, 11, 17.

11. O prenspari a de fu abi mati, soleki fa a tori disi e sori?

¹¹ A tori disi e leri wi o prenspari a de fu abi mati. Denki a tori: Te Maria nanga Marta e seni a boskopu gi Yesus, dan den no e aksi en fu kon na Betania. Den e seni taigi en nomo taki a bun mati fu en siki (Yoh. 11:3). Di Lasarus dede, dan Yesus ben kan gi en wan opobaka komoto fu pe a ben de. Toku Yesus bosroiti fu go na Betania fu de nanga en mati Maria nanga Marta. Yu abi wan mati di o kon yepi yu sondro taki yu aksi en? Dan yu sabi taki yu kan frutrow na en tapu „te nowtu de” (Odo 17:17). Neleki Yesus wi kan de den sortu mati dati gi trawan. Kow go luku a tori baka fu si san e pasa moro fara.

12. San Yesus e pramisi Marta èn fu san ede a kan bribi dati? (Yohanes 11:23-26)

¹² Leisi Yohanes 11:23-26. Marta e yere taki Yesus de krosibei fu Betania. A e lon go miti en èn a e taigi en: „Masra, efu yu ben de dya, mi brada no ben o dede” (Yoh. 11:21). A tru taki Yesus ben kan dresi Lasarus. Ma Yesus wani du wan moro kefalek sani. A e pramisi Marta: „Yu brada o kon na libi baka.” Boiti dati, a e gi Marta moro reide fu bribi san a pramisi en. A e taigi en: „Mi na a opobaka nanga a libi.” Iya, Gado gi Yesus a makti fu  wiki den dedewan. Wan pisi ten na fesi a ben wiki wan yongu meisje di no ben dede so langa ete èn a ben wiki wan yonguman a srefi dei di a dede (Luk. 7:11-15; 8:49-55). Ma a kan wiki wan sma di dede fo dei èn di skin e bigin pori kaba?

13. Soleki fa skrifi na Yohanes 11:32-35 e sori, dan san Yesus e du te a e si taki Maria nanga trawan e krei? (Luku a fowtow.)

¹³ Leisi Yohanes 11:32-35. Luku san e pasa now. Maria, a tra sisa fu Lasarus, e waka go miti Yesus. A e taki a srefi sani di en sisa ben taki: „Masra, efu yu ben dya, mi brada no ben o dede.” En nanga den tra sma di de nanga en e sari srefisrefi. Te Yesus e si èn e yere fa den e krei, dan dati e naki en ati. A e firi gi den mati fu en èn a e bigin krei tu. A e frustan fa a e hati te wan lobiwan dede. A musu de so taki a no man wakti fu du wan sani so taki den no krei moro.

14. San wi kan leri fu Yehovah te wi e luku fa Yesus ben e sari di Maria ben e krei?

¹⁴ Te wi e luku fa a naki Yesus ati di a si fa Maria ben e krei, dan dati e leri wi taki Yehovah na wan Gado di e firi gi sma. Fu san ede wi kan taki dati? Soleki fa wi si na ini na artikel na fesi, Yesus e denki èn e firi neleki en Papa (Yoh. 12:45). Yesus krei fu di a ben e sari den mati fu en di ben e krei. Na so wi sabi taki Yehovah e firi sari tu te a si taki wi e krei (Ps. 56:8). A sani disi no wani meki yu kon moro krosibei fu wi Gado di abi so furu sari-ati?

15. Fruteri san e pasa na a grebi fu Lasarus soleki fa Yohanes 11:41-44 e sori. (Luku a fowtow.)

¹⁵ Leisi Yohanes 11:41-44. Te Yesus doro na a grebi fu Lasarus, dan a e aksi sma fu puru a ston di e tapu a bergi-olo. Marta no wani dati fu di a feni taki a dedeskin musu e smeri kaba. Yesus e piki en: „Mi no ben taigi yu taki yu o si a glori fu Gado te yu e bribi?” (Yoh. 11:39, 40) Dan Yesus e opo en ede luku go na hemel èn a e begi. A wani gi Yehovah ala glori gi san o pasa now. Dan a e bari nanga wan tranga sten: „Lasarus, kon na doro!” Ne Lasarus e waka komoto na ini a grebi!  Yesus du wan sani di son sma ben denki taki a no kan. c

16. Fa a tori na ini Yohanes kapitel 11 e tranga wi bribi na ini na opobaka howpu?

¹⁶ A tori na ini Yohanes kapitel 11 e tranga a bribi fu wi na ini na opobaka howpu. Fa so? Memre taki san Yesus ben pramisi Marta: „Yu brada o kon na libi baka” (Yoh. 11:23). Neleki en Papa, Yesus wani du san a pramisi èn a man du dati tu. Di a krei, a sori taki a e angri fu gi den dedewan wan opobaka èn taki a wani puru ala sari di sma e firi te wan lobiwan fu den dede. A momenti di Lasarus waka komoto na ini a grebi, Yesus sori baka taki a abi a makti fu wiki den dedewan. Prakseri tu san Yesus ben taigi Marta: „Mi no ben taigi yu taki yu o si a glori fu Gado te yu e bribi?” (Yoh. 11:40) Wi abi bun reide fu bribi taki Gado o wiki den dedewan soleki fa a pramisi. Ma san wi kan du fu tranga a bribi di wi abi na ini na opobaka howpu?

17. San wi no musu frigiti te wi e leisi den tori na ini Bijbel di e taki fu sma di kisi wan opobaka?

¹⁷ Leisi den tori di e taki fu sma di kisi wan opobaka èn denki dipi fu den. Bijbel e taki fu aiti sma di kisi wan opobaka na grontapu. d Fu san ede yu no e studeri ibriwan fu den tori disi finifini? Te yu e du dati, dan hori na prakseri taki den man, uma, nanga pikin dati ben de trutru. Luku san yu kan leri fu den tori disi. Prakseri fa ibri tori e sori taki Gado wani wiki den dedewan èn taki a man du dati. Ma prakseri sosrefi na opobaka fu Yesus, fu di dati na a moro prenspari opobaka di pasa oiti. No frigiti taki hondrohondro sma ben si taki Yesus kisi wan opobaka èn disi e gi wi bun reide fu bribi na ini na opobaka howpu.​—1 Kor. 15:3-6, 20-22.

18. Fa den singi fu wi di e taki fu na opobaka howpu kan yepi wi? (Luku sosrefi a futuwortu.)

 ¹⁸ Meki den singi fu wi di e taki fu na opobaka howpu gi yu deki-ati e (Ef. 5:19). Den singi disi kan meki wi si na opobaka leki wan trutru sani èn den kan tranga wi bribi na ini a moi howpu disi. Arki den singi disi, oefen den bun èn taki fu den na a Osofamiri Anbegi. Hori den wortu fu den singi na ede èn denki dipi fu den so taki den kan tranga yu bribi èn doro yu ati. Efu yu kisi fu du nanga wan tesi di kan meki yu lasi yu libi noso efu wan lobiwan fu yu lasi libi, dan a santa yeye fu Yehovah o yepi yu fu memre den singi di kan trowstu yu èn di kan tranga yu bribi.

19. San wi kan prakseri te a abi fu du nanga na opobaka? (Luku a faki „ San yu ben o aksi den?”)

¹⁹ Prakseri fa sani o de. Yehovah meki wi na so wan fasi taki wi man si wisrefi na ini a nyun grontapu. Wan sisa e taki: „Mi gwenti prakseri fa sani o de na ini a nyun grontapu. Mi du en so furu taki a de neleki mi man smeri den switi rowsu kaba na ini Paradijs.” Prakseri fa a o de fu miti getrow man nanga uma fu Bijbel ten. Suma yu wani miti? San yu o aksi a sma dati? Prakseri tu fa a o de fu miti baka nanga den lobiwan fu yu di kisi wan opobaka. Prakseri san na den fosi sani di yu o taigi a sma, prakseri fa yu o gi en wan switi brasa èn fa yu o prisiri fu si en baka.

20. San wi musu meki muiti fu du?

²⁰ Wi de nanga tangi trutru taki Yehovah o gi sma wan opobaka. Wi kan de seiker taki a pramisi disi o kon tru fu di Yehovah wani du dati èn a man du en tu. Meki wi du ala san wi man fu tranga wi bribi na ini a tumusi moi howpu disi. Te wi e du dati, dan wi o kon moro krosibei fu a Gado di e pramisi ibriwan fu wi: ’A sma di yu lobi, o kon na libi baka!’