1. San Yehovah wani taki wi du?

 A E GI wan trowpaar furu prisiri te den kisi wan gosontu beibi. Ma aladi a p’pa nanga m’ma lobi a nyun beibi fu den, tòg den no wani meki a tan wan beibi ala ten. Den ben o broko den ede trutru efu a beibi no ben e gro. Na so a de tu taki Yehovah breiti te wi e bigin leri sabi en, ma a no wani taki wi no e go na fesi noso taki wi e tan wan beibi (1 Kor. 3:1). Ma na presi fu dati, a wani taki wi e „tron lepi” Kresten.​—1 Kor. 14:20.

2. Fu san wi o taki na ini na artikel disi?

² San a wani taki fu tron wan lepi Kresten? San wi musu du fu tron wan lepi Kresten? Te wi e nyan tranga n’nyan, dan fa dati o yepi wi fu gro leki wan Kresten? Fu san ede wi no musu denki taki wi no abi fu gro moro fu di wi na wan lepi Kresten kba? Wi o taki fu den piki tapu den aksi disi na ini na artikel disi.

SAN A WANI TAKI FU TRON WAN LEPI KRESTEN?

3. San a wani taki fu tron wan lepi Kresten?

³ Na ini Bijbel a Grikitongo wortu di vertaal leki „bigi sma” wani taki sosrefi „wan lepi sma” (1 Kor. 2:6). Neleki fa wan beibi e gro kon tron wan bigisma, na so a matifasi di wi abi nanga Yehovah musu kon moro tranga teleki wi tron wan lepi brada noso sisa. A no de fu taki dati awinsi wi tron wan lepi Kresten kba, wi musu tan meki muiti fu go na fesi (1 Tim. 4:15). Wi alamala, srefi den yonguwan, kan gro kon tron wan lepi Kresten. Ma san e sori efu wi na lepi Kresten?

4. Suma na wan lepi Kresten?

⁴ Wan lepi Kresten na wan sma di e hori ensrefi na ala den sani di Gado e aksi fu en. So wan sma no e du nomo san ensrefi wani du. A no de fu taki dati fu di wi na sondu sma, meki wi o meki fowtu. Ma wan lepi Kresten e pruberi ibri dei fu denki èn du sani leki fa Gado wani. A wani tron a  nyun sma di Yehovah wani taki a tron èn a e tan meki muiti fu denki leki fa Yehovah e denki (Ef. 4:22-24). A e oefen fu teki koni besroiti di no de teige den wet nanga den gronprakseri fu Yehovah. Dati meki wan lepi Kresten no abi bun furu wet fanowdu di e taigi en fa a musu tyari ensrefi. Te a teki a besroiti fu du wan sani, dan a e meki tranga muiti tu fu du san a besroiti.​—1 Kor. 9:26, 27.

5. San kan psa nanga wan Kresten di no lepi? (Efeisesma 4:14, 15)

⁵ Ma na a tra sei, wan Kresten di no e gro èn di no lepi, kan meki taki falsi nyunsu nanga sma di fadon kmoto na bribi kori en nanga den „triki” èn den „lei” fu den. a (Leisi Efeisesma 4:14, 15.) A kan taki a e dyarusu es’esi, taki a lobi fu strei, a e atibron gawgaw, noso a kan du sani di no bun te a kisi wan tesi.​—1 Kor. 3:3.

6. Gi wan eksempre di e sori fa wan sma e gro kon tron wan lepi sma. (Luku a prenki.)

⁶ Soleki fa wi ben taki kba, dan neleki fa wan beibi e gro kon tron wan bigi sma, na so wan Kresten musu gro kon lepi tu. Furu sani de di wan pkin no sabi, dati meki a abi a yepi fanowdu fu wan bigi sma di kan kibri en èn di kan leri en san a musu du. Fu eksempre, wan mama e aksi en yongu meisje fu hori en anu te den e abra a strati. Te a pkin e gro kon moro bigi, dan a kan taki a mama e meki en w’wan abra a strati, ma tòg a e memre en meisje taki a musu luku efu wagi no e kon fosi a abra a pasi. Te a pkin tron wan bigi sma kba, dan ensrefi sabi kba san a musu du fu no meki ogri miti en te a e abra a strati. Neleki fa yongu pkin abi a yepi fanowdu fu bigi sma so taki ogri no miti den, na so Kresten di no lepi abi a yepi fanowdu fu lepi Kresten so taki den kan tan abi wan bun matifasi nanga Yehovah èn so taki den kan teki koni besroiti. Na a tra sei, te wan lepi Kresten musu teki wan besroiti, dan a e prakseri bun san Bijbel e taki fu a tori so taki a kan sabi fa Yehovah e si a tori, èn a e du tu san a leri.

7. Lepi Kresten abi a yepi fu tra sma fanowdu?

⁷ Disi wani taki dati noiti wan lepi  Kresten abi a yepi fu wan tra sma fanowdu? Nôno. Son leisi srefi lepi Kresten musu aksi tra sma fu yepi den. Ma kande wan sma di no de wan lepi Kresten ete wani taki tra sma taigi en san a musu du noso taki a tra sma musu teki wan besroiti di ensrefi ben musu teki. Ma te wan lepi Kresten e aksi a yepi fu wan Kresten di abi koni nanga ondrofeni, dan a sabi taki ensrefi musu teki en eigi besroiti èn taki Yehovah e ferwakti fu en taki a „musu tyari en eigi lai”.​—Gal. 6:5.

8. Fa lepi Kresten kan difrenti fu makandra?

⁸ Neleki fa ala bigi sma no de a srefi, ma den e difrenti, na so ala lepi Kresten no abi a srefi koni nanga deki-ati. Boiti dati den no e sori switifasi na a srefi fasi, èn a fasi fa den e sori sari-ati gi trawan e difrenti. Sosrefi, te tu lepi Kresten de na ini a srefi sortu situwâsi, dan a kan taki den e teki tu difrenti besroiti, ma ala tu besroiti e kruderi nanga san Bijbel e taki. Disi de furu tron so te a tori abi fu du nanga a konsensi fu wan sma. Fu di den e ferstan disi meki den no e krutu wan trawan di teki wan tra besroiti leki den. Ma na presi fu dati, den wani taki a wánfasi tan na den mindri.​—Rom. 14:10; 1 Kor. 1:10.

SAN WI MUSU DU FU TRON WAN LEPI KRESTEN?

9. Wi kan tron lepi Kresten sondro taki wi e du muiti gi dati? Ferklari dati.

⁹ Wan pkin e gro kon tron wan bigi sma baka ten, ma nowan sma kan gro kon tron wan lepi Kresten sondro taki a ben meki muiti gi dati. Fu eksempre, den brada nanga sisa na ini Korente ben bribi a bun nyunsu, den dopu, santa yeye kon na den tapu, èn den leri furu fu den sani di na apostel Paulus ben leri den (Tori 18:8-11). Ma tòg, wan tu yari baka di den ben dopu, furu fu den no ben de lepi Kresten ete (1 Kor. 3:2). San wi kan du so taki disi no psa nanga wi?

10. San wi musu du fu tron lepi Kresten? (Yudas 20)

¹⁰ Fu man tron wan lepi Kresten, dan wi musu wani dati fosi. Den sma di no wani kon lepi, wani tan wan beibi na yeyefasi èn den no o gro (Odo 1:22). Wi no wani fu de leki den sma di de bigi sma kba, ma di no wani teki frantwortu na den tapu èn di wani nomo meki den papa nanga mama teki besroiti gi den. Na presi fu dati, na wi musu sorgu taki wi e gro kon tron lepi Kresten. (Leisi Yudas 20.) Efu yu e meki muiti fu tron wan lepi Kresten, dan begi Yehovah meki a „gi yu a firi nanga a krakti” fu tron wan lepi Kresten.​—Fil. 2:13.

11. Sortu yepi Yehovah e gi wi so taki wi kan tron lepi Kresten? (Efeisesma 4:11-13)

¹¹ Yehovah no e ferwakti fu wi taki wi e gro kon tron lepi Kresten sondro a yepi fu tra sma. Yehovah gi wi skapuman nanga leriman na ini a Kresten gemeente. Den wani yepi wi fu tron „lepi Kresten” so taki wi „kan kon de leki wan bigisma di lepi dorodoro leki Krestes”. (Leisi Efeisesma 4:11-13.) Yehovah gi wi en santa yeye tu di o yepi wi fu „denki soleki fa Krestes e denki” (1 Kor. 2:14-16). Boiti dati, Gado gi wi den fo Evangelietori fu sori wi fa Yesus ben denki, fa a ben taki, èn fa a ben du en diniwroko di a ben de na grontapu. Te yu e meki muiti fu denki èn du leki Yesus, dan yu kan doro a marki di yu abi fu tron wan lepi Kresten.

FA DEN DIPI LERI FU BIJBEL KAN YEPI WI

12. San na wan fu den fosi sani di wi leri èn di abi fu du nanga Krestes?

¹² Fu man gro kon tron lepi Kresten, dan  wi no musu leri soso den fosi sani di wi ben leri kba èn di abi fu du nanga Krestes. Son wan fu den fosi sani di wi ben leri abi fu du nanga berow, bribi, dopu, nanga na opobaka (Hebr. 6:1, 2). Disi na wan tu fu den fosi leri fu Bijbel di ala tru Kresten e bribi. Na fu den sani disi na apostel Petrus ben taki nanga a bigi grupu sma na a Pinksterfesa (Tori 2:32-35, 38). Wi musu bribi den prenspari Bijbel leri disi fu man tron disipel fu Krestes. Fu eksempre, na apostel Paulus ben sori taki efu wi no e bribi na ini na opobaka, dan wi no kan taki dati wi na bakaman fu Krestes (1 Kor. 15:12-14). Ma fu man tron lepi Kresten wi no musu sabi den prenspari tori disi nomo, ma wi musu wani sabi moro.

13. San wi musu du fu man kisi wini fu den dipi leri fu Bijbel soleki fa Hebrewsma 5:14 e taki? (Luku a prenki.)

¹³ Tra fasi leki den fosi tori di wi ben leri fu Bijbel, dan den dipi sani di wi leri fu Bijbel no e taki soso fu den wet fu Yehovah, ma sosrefi fu den gronprakseri fu en. Den sani disi o yepi wi fu man sabi fa Yehovah e prakseri fu sani. Fu man kisi wini fu den sani disi, dan wi musu studeri Bijbel, wi musu prakseri dipi fu en, èn wi musu du ala muiti fu du san wi leri fu Gado Wortu. Te wi e du dati, dan wi e leri fa wi kan teki besroiti di o plisi Yehovah. b​—Leisi Hebrewsma 5:14.

14. Fa Paulus ben yepi den Korentesma fu tron lepi Kresten?

¹⁴ Gi Kresten di no lepi, a muilek fu teki a yoisti besroiti ini wan tori efu wan Bijbel wet no de. Efu wan Bijbel wet no de gi wan tori, dan son Kresten kan denki taki den mag du san den wani. Tra sma wani taki sma musu meki wan weti gi den aladi Bijbel no e taki fu wan spesrutu wet gi wan tori. Fu eksempre, a gersi leki son Kresten na ini Korente ben aksi Paulus efu wan wet ben de di ben taki efu den ben mag nyan wan sani di ben tyari leki ofrandi gi den falsi gado. Paulus no ben taigi den san den ben musu du. Ma Paulus ben taki dati a konsensi fu ibri sma ben kan yepi a sma fu besroiti san a ben o  du na ini a tori disi. A ben taigi den san na wan tu gronprakseri di ben o yepi den fu teki wan besroiti di no ben gi den konsensi fonfon èn di no ben o meki tra sma naki futu (1 Kor. 8:4, 7-9). Na so Paulus ben yepi den Korentesma fu gro kon tron lepi Kresten so taki den kan gebroiki den eigi ferstan fu teki koni besroiti, na presi fu ferwakti taki tra musu teki besroiti gi den noso taki den abi wan wet fanowdu di ben o sori den san den musu du.

15. Fa Paulus ben yepi den Hebrew Kresten fu tron lepi sma?

¹⁵ Wi kan leri wan tra prenspari sani fu a sani di Paulus ben skrifi den Hebrew Kresten. Son wan fu den no ben meki a matifasi di den abi nanga Yehovah kon moro tranga. Den ’ben kon de sma baka di abi merki fanowdu èn di no man nyan tranga n’nyan’ (Hebr. 5:12). Den no ben leri èn bribi den nyun sani di Yehovah ben leri den nanga yepi fu a gemeente (Odo 4:18). Fu eksempre, furu Dyu di ben tron bribiman ben gi sma deki-ati ete fu hori a wet fu Moses aladi na 30 yari psa kba a dede fu Krestes ben meki taki a Wet dati ben kon na wan kba (Rom. 10:4; Tit. 1:10). Na 30 yari ben psa kba. Sobun, den Dyu Kresten ben kisi nofo ten fu sabi taki den no de ferplekti moro fu hori densrefi na a Wet! Iniwan sma di ben leisi a brifi di Yehovah ben meki Paulus skrifi, ben kan si taki a brifi dati ben e taki fu dipi tru tori fu Bijbel. A brifi dati ben yepi den fu ferstan taki a nyun fasi fa Yehovah ben wani taki Kresten ben musu anbegi en, ben de moro bun. Èn a brifi ben gi den deki-ati tu fu tan preiki aladi den Dyu ben gens den.​—Hebr. 10:19-23.

FU SAN EDE WI NO MUSU DENKI TAKI WI DE KBA?

16. San wi musu du tu, boiti taki wi e meki muiti fu kon moro lepi?

¹⁶ Wi no musu du muiti nomo fu tron lepi Kresten, ma wi meki muiti tu fu tan lepi Kresten. Fu dati ede wi no musu denki taki wi no abi fu gro moro fu di wi na wan lepi Kresten kba (1 Kor. 10:12). Wi musu „tan ondrosuku” wisrefi fu de seiker taki wi e tan meki muiti fu tron wan moro lepi Kresten.​—2 Kor. 13:5.

17. Fa a brifi di Paulus ben skrifi gi den Kolosesma e sori taki wi musu tan de lepi Kresten?

 ¹⁷ Na ini a brifi di Paulus ben skrifi gi den Kolosesma a ben taki o prenspari a de fu tan de wan lepi Kresten. Aladi den Kolosesma ben de lepi Kresten kba, tòg Paulus ben warskow den taki den no musu meki grontapu sma kori den nanga a denki fu den (Kol. 2:6-10). Èn sosrefi Epafras di ben sabi den sma na ini a gemeente dati bun, ben begi doronomo taki den Kresten dati „kan de lepi sma” (Kol. 4:12). San wi kan leri fu disi? Paulus nanga Epafras ben ferstan taki wan sma srefi musu meki muiti fu tan de wan lepi Kresten èn taki a sma abi a yepi fu Gado fanowdu. Den ben wani taki den Kolosesma ben musu tan de lepi Kresten awinsi sortu tesi den ben e miti.

18. San kan psa nanga wan lepi Kresten? (Luku a prenki.)

¹⁸ Paulus ben warskow den Hebrewsma taki wan lepi Kresten di no e luku bun kan meki taki Gado no feni en bun noiti moro. Efu wan Kresten e meki en ati kon tranga èn a e weigri fu gi yesi na Gado, dan a no o man abi berow èn Gado no o gi en pardon. Wi breiti taki den Hebrewsma no ben meki dati psa nanga den (Hebr. 6:4-9). Fa a de nanga den sma na ini a ten disi di no e preiki moro noso di sluit uit, ma di ben sori berow baka ten? Fu di den ben abi sakafasi èn sori berow, meki den sori taki den no de leki den sma fu suma Paulus ben skrifi. A no de fu taki dati efu den drai kon baka na Yehovah, dan den abi a yepi fanowdu ete di A e gi (Esek. 34:15, 16). Den owruman kan sreka sani meki wan Kresten di abi ondrofeni e yepi den fu abi wan moro tranga matifasi baka nanga Yehovah.

19. Sortu marki wi musu wani fu doro?

¹⁹ Efu yu e meki muiti fu tron wan lepi Kresten, dan yu kan doro a marki dati! Tan leri den dipi sani di skrifi na ini Bijbel èn meki muiti fu abi a srefi denki leki di fu Yehovah. Èn efu yu tron wan lepi Kresten kba, dan meki muiti fu tan de wan lepi Kresten.