„NOWAN fu den feti di sma feti, tyari so furu problema kon gi Europa leki a bigi feti disi.” Na dati The Watch Tower fu 1 september 1915 ben taki fu a Fosi Grontapufeti pe te fu kaba sowan 30 kondre ben feti nanga makandra. Fu di someni feti ben de, meki The Watch Tower ben taki: „A no ben e go so bun nanga a [Kownukondre] preikiwroko, spesrutu na ini Doisrikondre nanga Fransikondre.”

Aladi den Bijbel Ondrosukuman ben si fa someni kondre ben e feti nanga makandra, toku den no ben frustan krin san a wani taki gi Kresten fu no teki sei na ini feti. Ma den ben wani preiki a bun nyunsu fu a Kownukondre nomonomo. Dati meki Wilhelm Hildebrandt di ben wani preiki tu seni aksi a traktaat di ben nen The Bible Students Monthly na ini Fransitongo. A no ben go na Fransikondre leki wan kolporteur (furuten preikiman), ma leki wan Doisri srudati. Den Fransiman ben e si en leki wan feanti, ma den fruwondru di den si taki aladi a ben weri en srudati krosi, a ben e prati a boskopu fu freide gi sma di ben e waka pasa.

Na ini The Watch Tower wi kan leisi brifi di ben sori taki wan tu Bijbel Ondrosukuman fu Doisrikondre ben angri fu preiki a bun nyunsu, aladi den ben de na ini a legre. Brada Lemke, di ben de wan srudati na ini a legre di ben e feti na se, skrifi taki feifi srudati di ben e wroko makandra nanga en ben wani sabi moro fu Bijbel. A taki: „Srefi na tapu a sipi disi, mi e du bun sani di e gi Yehovah glori.”

Georg Kayser di ben go na feti tu, drai kon baka na oso leki wan futuboi fu a tru Gado. San ben pasa? A ben feni wan buku fu den Bijbelstudenti, a leisi en èn nanga en heri ati a teki a tru anbegi. Dati meki a no ben wani feti moro. Baka dati a bigin du tra wroko na ini a legre. Baka a feti, a ben de wan fayafaya pionier omeni yari langa.

Aladi den Bijbel Ondrosukuman no ben frustan krin ete san a wani taki gi wan Kresten fu no teki sei na ini feti, toku den ben de heri tra fasi leki den sma di ben horibaka fayafaya gi a feti. Politiekman nanga kerki fesiman ben e horibaka gi a legre fu a kondre fu den te den ben go feti, ma den Bijbel Ondrosukuman ben e horibaka gi a „Granman fu Freide” (Yes. 9:6). Aladi sonwan fu den ben tron  srudati, toku den no ben frigiti san Bijbel e leri. Den ben abi a srefi denki leki Konrad Mörtter, wan Bijbel Ondrosukuman di ben taki: „Mi ben e si krin na ini Gado Wortu taki wan Kresten no mag kiri sma.”​—Eks. 20:13. *

Na ini Doisrikondre, pe a wet no ben gi pasi taki sma weigri fu go na ini a legre fu den konsensi ede, moro leki 20 Bijbel Ondrosukuman no ben wani abi noti fu du nanga a legre. Sma ben taki dati sonwan fu den Bijbel Ondrosukuman disi ben e law. Dati meki den poti Gustav Kujath na ini wan lawman-oso pe den gi en dresi. Hans Hölterhoff no ben wani go na ini a legre di den seni kari en. Fu dati ede den seni en go na strafu-oso pe a ben weigri fu du iniwan wroko di ben abi fu du nanga a feti. Den waktiman fu a strafu-oso ben meki a weri wan dyakti di den hari span teleki a no ben man buweigi moro. Di den si taki den no ben man dwengi en, den bigin tapu skreki gi en taki den ben o kiri en. Ma a heri pisi ten fu a feti Hans tan horidoro.

Aladi tra brada go na ini a legre, den no ben wani tyari fetisani èn den ben aksi efu den ben kan du tra sortu wroko. * Johannes Rauthe ben de wan fu den èn den seni en go wroko na den lokopasi. Konrad Mörtter ben musu wroko leki ati-oso yepiman èn Reinhold Weber ben de wan ati-oso broeder. August Krafzig di ben musu sorgu gi den bagasi fu den srudati, ben breiti taki a no ben abi fu go na feti. Fu di den Bijbel Ondrosukuman disi nanga tra sma di ben e denki leki den, ben lobi Yehovah èn den ben wani tai hori na en, meki noti no ben tapu den fu tan dini en.

Fu di den Bijbel Ondrosukuman no ben wani go na feti, meki den tiriman bigin hori ai na den tapu. Na ini den yari baka dati, dusundusun krutu-afersi hori fu di den Bijbel Ondrosukuman fu Doisrikondre ben tan preiki. Fu yepi den, a bijkantoro fu Doisrikondre seti wan afdeling na Betel na ini Maagdenburg pe den ben e luku den krutu-afersi disi.

Safrisafri Yehovah Kotoigi kon frustan krin san a wani taki gi Kresten fu no teki sei na ini feti. Na a ten fu a Di Fu Tu Grontapufeti, den no ben wani abi noti fu du nanga a legre. Dati meki den tiriman fu Doisrikondre ben e si den leki feanti fu a kondre èn den bigin frufolgu den hebi. Ma wan tra leisi wi o taki fu a tori disi.​—A historia fu wi na ini Centraal Europa.