DI MI ben abi 12 yari, mi kon si taki mi ben abi wan moi sani fu gi trawan. Na wan kring konmakandra, wan brada aksi mi efu mi ben wani preiki. Mi taigi en taki mi wani, aladi noiti ete mi ben preiki. Di wi go na a kontren pe wi ben musu preiki, a gi mi wan tu brochure di ben e taki fu Gado Kownukondre. A taigi mi: „Yu kan preiki na disi sei fu a strati èn mi o preiki na a tra sei.” Mi ben e senwe, ma toku mi bigin go oso fu oso. Mi no ben man bribi taki esi-esi mi ben prati ala den brochure. Na so mi kon si taki furu sma ben wani san mi ben abi fu gi den.

Mi gebore na ini 1923 na Chatham, na ini Kent, Ingrisikondre. Na a ten di mi ben e gro kon bigi, furu sma ben lasi howpu fu di sani no go leki fa den ben fruwakti. Den ben denki taki baka a Bigi Feti, noso a Fosi Grontapufeti, grontapu ben o de wan moro bun presi. Mi papa nanga mama ben lasi howpu tu fu di den Baptist kerki fesiman ben e suku den eigi wini nomo. Di mi ben abi sowan neigi yari, mi mama bigin go na a zaal fu na Internationaal Organisâsi fu Bijbel Ondrosukuman. Drape den sma, di ben teki a nen Yehovah Kotoigi, ben e konmakandra leki wan klas di wi sabi now leki gemeente. Wan fu den sisa drape ben e gebroiki Bijbel nanga a buku De Harp Gods fu gi wi Bijbel les. Mi ben lobi san mi ben e leri.

Di mi ben de wan yongu boi, mi ben lobi fruteri sma sortu howpu Gado Wortu abi. Nofo tron mi ben e wroko oso fu oso mi wawan. Ma te mi ben e preiki nanga trawan, mi ben e leri furu tu. Fu eksempre, wan dei di mi nanga wan owru brada ben e rèi baisigri go na wan kontren fu go preiki, wi pasa wan kerki fesiman. Ne mi taki: „Luku wan bokoboko.” A brada saka fu en baisigri, dan a aksi mi fu kon sidon na en sei tapu wan pisi udu. A taigi mi: „Suma gi yu a reti fu kari sma bokoboko? Wi musu breiti taki wi kan preiki a bun nyunsu gi sma. Libi en gi Yehovah fu krutu den.” Sobun, yonguyongu kaba mi leri taki te mi e gi sani, mi o de koloku.​—Mat. 25:31-33; Tori 20:35.

Wan tra owru brada ben leri mi taki fu kan de koloku, wi musu abi pasensi fu di dati na wan fasi fa wi e gi sani. A wefi fu a brada disi no ben lobi Yehovah Kotoigi. Wan leisi a brada kari mi kon na en oso fu nyan wan sani. A wefi fu en ati bron so te taki en masra go preiki èn a bigin trowe paki te kon na wi tapu. Ma a brada no bari en. Na presi fu dati,  a teki den paki te poti baka pe den ben de. Na a pasensi di a sori, meki taki wan tu yari baka dati a kisi blesi. A wefi fu en dopu leki wan Kotoigi fu Yehovah.

Na ini september 1939, Ingrisikondre nanga Doisrikondre bigin feti. Moro nanga moro mi ben e angri fu gi trawan howpu. Dati meki mi nanga mi mama dopu na ini a foto Dover na ini maart 1940. Na ini yuni 1940, mi ben tanapu na mi doromofo e luku fa truck e pasa nanga dusundusun srudati di ben e sari fu ala den ogri-ati sani di den si na ini a feti. Na den wawan ben tan na libi baka a feti na Duinkerken. Mi ben kan si na den ai taki den ben lasi howpu èn mi ben wani fruteri den fu Gado Kownukondre. Bakaten na ini a srefi yari dati, Doisri plane bigin trowe bom tapu Ingrisikondre. Ibri neti mi ben e si fa den plane disi ben e frei abra a birti fu wi. Wi ben e frede moro srefi te wi ben e yere den bom e fadon èn e sutu. Di wi go preiki a tra mamanten, wi si taki furu presi ben lai nanga oso di ben sutu panya. Den sani disi meki mi kon si taki a Kownukondre na a wan-enkri howpu gi libisma.

Na ini 1941 fosi, mi bigin wan nyun libi di ben o meki mi de koloku. Mi ben e wroko na Royal Dockyard na Chatham pe mi ben leri meki sipi. Ala sma ben wani wroko drape fu di a ben e pai bun. Langa ten kaba futuboi fu Yehovah ben sabi taki Kresten no kan feti gi wan kondre. Na a ten fu 1941, wi kon frustan tu taki wi no ben kan wroko na presi pe den e meki fetisani (Yoh. 18:36). Fu di den ben e meki srudatiboto na a presi pe mi ben e wroko, meki mi bosroiti fu gowe drape èn mi bigin nanga a furuten diniwroko. A fosi presi pe den seni mi go pionier, na Cirencester, wan moi foto na den pikin bergi fu Cotswold.

Di mi tapu 18 yari, den seni mi go na strafu-oso neigi mun langa fu di mi no ben wani go na ini a legre. Mi ben frede srefisrefi di den naki a doro fu mi cel tapu èn mi wawan ben de drape. Ma no langa baka dati den cipier nanga den tra strafuman bigin aksi mi fu san ede mi ben de na strafu-oso. Mi ben breiti fu fruteri den san mi ben e bribi.

Baka di den lusu mi, den brada aksi mi fu preiki makandra nanga Leonard Smith * na den difrenti foto fu Kent, pe wi ben gebore. Na ini 1944, moro leki wán dusun plane di no ben abi piloot èn di ben span nanga bom, fadon tapu Kent fu di den Doisri ben musu frei abra a foto disi fu kan trowe  bom tapu Londen. Den ben e kari den plane disi „doodlebug”. Ala sma ben e frede den sortu plane disi. Te den ben yere taki a motor stop drai, dan den ben sabi taki syatu baka dati a plane ben o fadon èn a ben o sutu panya. Wi ben e studeri Bijbel nanga wan osofamiri fu feifi sma. Son leisi wi alamala ben e sidon na ondro wan isri tafra di ben kan kibri den efu na oso ben o broko fadon. Bakaten a heri osofamiri disi teki dopu.

Baka a feti, mi pionier tu yari na zuidsei fu Ierland. Wi no ben sabi taki Ierland ben e difrenti so furu fu Ingrisikondre. Wi ben e go na den sma oso èn wi ben e taigi den taki wi na zendeling. Dan wi ben e aksi den efu den abi wan presi gi wi fu tan. Wi ben prati tijdschrift tu gi sma na strati. Dati na a moro don sani di wi ben kan du fu di ala sma drape ben de Lomsu. Di wan man ben wani fon wi, wi go na wan skowtu. Ne a taki: „We, san yu ben denki dan?” Wi no ben sabi taki den priester fu den kerki drape ben abi someni makti. Den ben meki sma lasi den wroko efu den ben teki den buku fu wi èn den ben yagi wi puru fu den presi pe wi ben e tan.

Heri esi wi kon si taki te wi ben doro na wan nyun presi, dan a ben moro bun fu no preiki drape wantewante. Dati meki wi ben e rèi go na wan tra presi pe sma ben abi wan tra priester. Èn te fu kaba wi ben e preiki gi den sma na ini a birti fu wi. Na Kilkenny, wi studeri dri tron wan wiki nanga wan yongu man aladi sma ben wani fon en. Mi ben e prisiri so te fu leri sma den tru tori fu Bijbel, taki mi ben wani go na a Waktitoren Bijbelskoro Gilead fu tron zendeling.

Baka feifi mun, mi kaba a skoro na New York. Den seni fo fu wi go na den pikin èilanti na a Karibis Se. Na ini november 1948, wi teki wan seiriboto di nen Sibia èn wi gowe libi New York. Mi no ben teki boto noiti, ma toku mi ben breiti. Wan fu den brada ben de kapten fosi èn a ben sabi tyari sipi. A ben nen Gust Maki èn a ben leri wi fa fu seiri boto. Wi ben e leri fa fu opo èn saka den seiri, fa fu wroko nanga wan kompas èn fa fu seiri so taki winti no e naki a boto. Gust ben sabi tyari a boto so bun, taki wi pasa den bigi winti na tapu a se èn baka 30 dei wi doro den Bahamas.

Baka di wi preiki wan tu mun na den Bahamas-èilanti, wi seiri go na den Bovenwindse nanga den Benedenwindse èilanti di de na mindri Virgin Islands nanga Trinidad. Komoto fu Virgin Islands di de krosibei fu Porto Riko te go miti Trinidad, na sowan 800 kilometer. Feifi yari langa, wi ben e preiki na den farawe èilanti pe nowan Kotoigi ben de. Son leisi wi ben e tan omeni wiki drape sondro taki wi ben man seni noso kisi brifi. Ma wi ben breiti fu preiki a wortu fu Yehovah na den èilanti dati.​—Yer. 31:10.

Son leisi te wi ben trowe ankra na wan sesyoro, dan ala den sma fu a dorpu ben e fruwondru èn den ben e lon kon luku a sipi fu si suma na wi. Sonwan fu den noiti ete ben si wan seiriboto noso wan wetiman. Den sma fu den èilanti ben lobi gado tori èn den ben sabi Bijbel bun. Den ben abi switifasi èn furu tron den ben gi wi fisi, afkati nanga pinda. A sipi ben pikin, ma toku presi ben de fu sribi, fu bori èn fu wasi krosi.

Wi ben gwenti pari boto go na syoro èn heri dei wi ben e preiki gi den sma. Wi ben e taigi den tu  taki wan Bijbel-lezing ben o hori. Te wi ben e naki a bel fu a sipi na mofoneti, a ben moi fu si fa den sma ben e kon drape fu arki. Te den ben e kon nanga den kokolampu fu den, dan a ben gersi leki pikin stari ben e saka kon fu den bergi. Son leisi wán hondro sma ben e kon èn den ben e tan te latilati neti e poti aksi gi wi. Den ben lobi singi èn dati meki wi ben skrifi den wortu fu son Kownukondre singi na tapu papira gi den. Wi ala fo ben e meki muiti fu singi den singi fosi gi den. Baka dati den ben e singi makandra nanga wi èn a ben moi fu yere. A ten dati ben switi!

Te wi ben kaba hori wan Bijbelstudie, dan son Bijbelstudenti ben e waka nanga wi go na a tra famiri pe wi ben o studeri fu di den ben wani de na a studie dati tu. Baka te wi ben tan na wan presi wan tu wiki, wi ben abi fu gowe. Ma nofo tron wi ben e aksi den moro seryusu Bijbelstudenti fu tan studeri nanga tra sma teleki wi drai kon baka. A ben moi fu si fa sonwan fu den ben e teki a wroko fu den leki wan seryusu sani.

Now furu sma e go koiri na den èilanti dati pe yu abi moi blaw sewatra, moi sesyoro nanga palmbon. Ma na a ten dati, furu sma no ben e go na den presi disi. Nofo tron na netiyuru wi ben e seiri fu a wan èilanti go na a trawan. Dolfijn ben e swen sei a boto fu wi èn ala san yu ben e yere na fa a boto fu wi e hari pasa a watra. A leti fu a mun di ben e skèin na tapu a se, ben gersi wan langa brenki pasi.

Baka di wi preiki feifi yari na tapu den èilanti, wi seiri go na Porto Riko fu di wi ben wani seri a seiriboto fu bai wan boto nanga wan masyin. Di wi doro drape, mi miti wan moi zendeling sisa di nen Maxine Boyd èn mi kon lobi en. Sensi di a ben pikin, a ben de wan fayafaya preikiman. Bakaten a ben e dini leki zendeling na Dominikan Republiek teleki den Lomsu tiriman yagi en komoto fu a kondre na ini 1950. Fu di mi ben de sipiman, meki mi ben mag tan wán mun nomo na Porto Riko. Baka dati mi ben o go na den tra èilanti èn wan tu yari mi no ben o drai go baka na Porto Riko. Sobun, mi taki na misrefi: ’Ronald, efu yu wani a meisje disi, dan yu musu du esi-esi.’ Baka dri wiki mi aksi en efu a wani trow nanga mi èn baka siksi wiki wi trow. Den brada ben meki mi nanga Maxine tan wroko leki zendeling na Porto Riko èn dati meki noiti mi go nanga a nyun boto.

Na ini 1956, wi bigin du kring-wroko. Furu brada nanga sisa ben pôti, ma wi ben lobi go na den. Fu eksempre, na ini a dorpu Potala Pastillo yu ben abi tu Kotoigi famiri di ben abi furu pikin èn mi ben gwenti prei froiti gi den. Wan leisi mi aksi wan fu den pikin meisje di nen Hilda efu a wani kon preiki nanga wi. A taki: „Mi wani, ma mi no man. Mi no abi susu.” Ne wi bai susu gi en èn a kon preiki nanga wi. Baka omeni yari, di mi nanga Maxine go na Brooklyn Betel na ini 1972, wan sisa di ben klari a Gileadskoro, kon na wi. A ben de fu go na Ekwador leki zendeling. A taki: „Yu sabi mi ete? Mi na a pikin meisje fu Pastillo di no ben abi susu.” Ne wi kon si taki na Hilda! Wi ben breiti so te taki wi bigin krei.

Na ini 1960, den aksi wi fu go dini na a bijkantoro fu Porto Riko na Santurce, San Juan. A bijkantoro ben de wan pikin oso nanga tu sodro. Na a bigin, mi nanga Lennart Johnson ben e du furu fu a wroko. En nanga en wefi ben de den fosi Kotoigi na ini Dominikan Republiek èn na ini 1957, den froisi kon na Porto Riko. Ma bakaten Maxine ben e sreka den formulier fu den sma di ben seni aksi tijdschrift. Na moro leki wán dusun a ben e sreka ibri wiki. A ben lobi du a wroko disi fu di a ben e prakseri ala den sma di ben kan leri sabi Yehovah.

Mi lobi wroko na Betel fu di mi e kisi na okasi fu gi sani. Ma a no ala ten a makriki. Fu eksempre, a fosi leisi di den ben o hori wan internationaal kongres na Porto Riko na ini 1967, a wroko ben furu so te taki a ben gersi leki mi no ben o man du en. Nathan Knorr, di ben teki fesi na ini na organisâsi fu Yehovah Kotoigi, kon na Porto Riko. A ben denki taki mi no ben seti sani fu go teki den zendeling di ben o kon na a kongres, aladi mi ben du dati. Bakaten a piri-ai gi mi èn a taigi mi taki a ben denki taki mi ben man orga sani moro bun. Mi no ben wani haritaki nanga en, ma mi ben feni taki a no taki bun nanga mi èn dati meki mi ben mandi wan heri pisi ten. Ma di mi nanga Maxine miti  Brada Knorr wan tra leisi, a kari wi kon na en kamra èn a bori gi wi.

Wan tu leisi wi go luku mi famiri na Ingrisikondre. Na a ten di mi nanga mi mama tron Kotoigi, mi papa no ben teki a tru anbegi ete. Ma te brada fu Betel ben e kon hori lezing, dan mi mama ben gwenti aksi den fu kon tan na wi oso. Mi papa ben si taki aladi den brada disi ben e teki fesi na Betel, toku den ben abi sakafasi èn den no ben de leki den kerki fesiman. Wan tu yari kaba a no ben wani yere noti moro fu den kerki fesiman disi. Te fu kaba, na ini 1962, a teki dopu leki wan Kotoigi fu Yehovah.

Na ini 2011, mi lobi wefi Maxine kon lasi libi. Mi e wakti a ten te a o kisi wan opobaka èn mi o si en. Dati o de wan prisiri ten! Na ini den 58 yari di mi nanga Maxine ben de nanga makandra, wi si fa a pipel fu Yehovah na Porto Riko gro fu 650 Kotoigi kon tron 26.000. Na ini 2013, di den tapu a bijkantoro na Porto Riko èn a bijkantoro fu Amerkankondre teki a wroko abra, den brada aksi mi fu go dini na Wallkill, New York. Baka di mi libi na Porto Riko 60 yari, mi kon si a kondre disi leki mi eigi kondre. Ma now mi ben musu go dini na wan tra kondre.

Te now ete mi lobi dini Gado na Betel. Mi pasa 90 yari kaba èn a wroko di mi e du na fu gi a Betel famiri deki-ati. Soleki fa mi yere, dan sensi di mi kon na Walkill mi taki nanga moro leki 600 brada nanga sisa fu Betel. Sonwan fu den wani taki fu wan osofamiri problema noso fu wan problema di den srefi abi. Trawan e aksi mi fa den kan tan dini na Betel nanga prisiri. Wan tu fu den di trow paspas noso di kisi wan tra wroko dorosei fu Betel, e kon suku rai na mi. Mi e arki ala sma di e kon taki nanga mi èn te a fiti, mi e taigi den: „’Gado lobi a sma di e gi sani nanga prisiri.’ Sobun, prisiri nanga wroko di yu e du. Na gi Yehovah yu e du en.”​—2 Kor. 9:7.

Awinsi yu de na Betel noso na wan tra presi, efu yu wani de koloku, dan yu musu hori na prakseri fu san ede a wroko di yu e du, prenspari so. Ala wroko di wi e du na Betel, na santa wroko. Na so wi e yepi „a koni srafu di de fu frutrow” fu prati nyanyan gi brada nanga sisa na heri grontapu (Mat. 24:45). Awinsi pe wi e dini Yehovah, wi abi furu okasi fu prèise en. Meki wi de nanga prisiri te wi e du den sani di Gado e aksi wi, fu di a „lobi a sma di e gi sani nanga prisiri”.