1, 2. Sortu sani meki taki sma poti Paulus nanga Silas na strafu-oso na ini Filipi? (Luku a prenki na a bigin fu na artikel.)

NA WAN ten fu twarfu yuru na neti, Paulus nanga Silas de na strafu-oso na ini a foto Filipi. Den de te na bakasei fu a strafu-oso. Den futu de na ini strafu-udu èn den baka e hati den fu di sma ben fon den (Tori 16:23, 24). Moro fruku a dei dati, wan grupu sma ben srepi Paulus nanga Silas go na a wowoyo, sondro taki den tu man disi ben fruwakti dati. Den seti sani esi-esi fu krutu den. Sma hari den krosi puru na den skin, èn den fon den nanga tiki (Tori 16:16-22). A sani di sma ben du nanga den tu man disi no ben fiti kwetikweti. Paulus ben de wan borgu fu Rome èn sma ben musu krutu en na wan reti fasi. *

² Paulus e sidon na ini a dungru aladi a e prakseri den sani di ben pasa a dei dati. A e prakseri a pipel fu Filipi. Tra fasi  leki furu fu den foto pe Paulus ben go, den sma disi no ben abi wan Dyu snoga na ini a foto fu den. Fu taki en leti, den Dyu anbegiman ben e kon makandra dorosei fu a foto na sei wan liba (Tori 16:13, 14). Na a ten dati tin Dyu mansma ben de fanowdu fu seti wan snoga. Yu denki taki na fu di den no ben abi so furu mansma, meki den no ben abi wan snoga? A no de fu taki dati a pipel fu Filipi ben breiti taki den ben de borgu fu Rome (Tori 16:21). Kande na fu dati ede den ben denki taki Paulus nanga Silas di ben de Dyu, no ben kan de borgu fu Rome. Wi no sabi seiker, ma san wi sabi na taki sma ben poti den man disi na strafu-oso sondro taki den ben du wan ogri.

3. Fu san ede a ben kan muilek gi Paulus fu frustan fu san ede a doro na strafu-oso? Ma sortu denki a ben abi?

³ Kande Paulus e prakseri den sani tu di ben pasa wan tu mun na fesi. A ben de na abrasei fu na Egeus Se, na ini Pikin Asia. Di Paulus ben de drape, dan santa yeye tapu pasi gi en ibri tron baka fu go na son presi. A ben de neleki santa yeye ben e pusu en fu go na wan tra presi (Tori 16:6, 7). Pe a ben musu go? Di a ben de na Trowas, dan a kisi wan fisyun. Na ini a fisyun dati wan man taigi en: „Abra kon na Masedonia.” Fu di a fisyun disi ben e sori Paulus krin san Yehovah ben wani, meki a go drape wantewante. (Leisi Tori fu den apostel 16:8-10.) Ma san pasa baka dati? Syatu baka di a doro na ini Masedonia, den poti en na strafu-oso. Fu san ede Yehovah gi pasi taki a sani disi pasa nanga Paulus? O langa a ben o abi fu tan na strafu-oso? A kan taki Paulus ben e broko en ede nanga den sani disi, ma awansi fa a no fa, a no lasi bribi èn a no lasi prisiri. En nanga Silas bigin „begi èn den ben e singi prèisesingi gi Gado” (Tori 16:25). A freide fu Gado kibri den ati nanga den frustan.

4, 5. (a) Fa wi ben kan feni wisrefi na ini wan srefi sortu situwâsi leki Paulus? (b) Fa a situwâsi fu Paulus kenki sondro taki a ben fruwakti dati?

⁴ Kande yu srefi ben denki son leisi taki a santa yeye fu Gado ben e tiri yu, ma toku sani no waka soleki fa yu ben fruwakti. Kande yu kisi problema, noso kande yu ben musu tyari bigi kenki kon na ini yu libi (Preik. 9:11). Te yu e prakseri fa sani waka, dan kande yu e aksi yusrefi fu san ede Yehovah gi pasi taki son sani miti yu. Efu dati de so, dan san kan yepi yu fu tan horidoro sondro taki yu e lasi frutrow na ini Yehovah? Fu kisi piki tapu na aksi dati, dan meki wi go luku baka san ben pasa nanga Paulus nanga Silas.

⁵ Di Paulus nanga Silas ben e singi prèisesingi, dan wan tu sani pasa di den no ben e fruwakti srefisrefi. Wantronso wan hebi gronseki pasa. Den doro fu a strafu-oso e frei opo. Den bui fu ala den strafuman lusu. Paulus e sorgu taki a waktiman fu a strafu-oso no kiri ensrefi. A waktiman fu a strafu-oso nanga en heri osofamiri teki dopu. Frukufruku a tra mamanten, den hei lantiman seni skowtu fu lusu Paulus nanga Silas èn den e aksi den fu gowe libi a foto sondro fu meki dyugudyugu. Ma te den hei lantiman kon frustan taki Paulus nanga Silas na borgu fu Rome èn taki den meki wan bigi fowtu, dan den srefi e kon fu tyari den man go na dorosei fu a foto. Ma Paulus nanga Silas de nomonomo fu go taki wan sisa di nen Lidia odi fosi. A sisa disi no ben dopu so langa ete. Den gebroiki na okasi disi tu fu tranga den brada drape (Tori 16:26-40). A no de fu taki dati sani ben kenki heri esi!

6. San wi o luku now?

⁶ San wi e leri fu den sani di miti Paulus nanga Silas? Yehovah kan du san wi no ben fruwakti, sobun, wi no musu broko wi ede tumusi te tesi e miti wi. A no de fu taki dati a sani disi ben de wan bigi deki-ati gi Paulus. Wi kan si dati te wi e leisi fa a ben gi den brada na ini Filipi deki-ati fu no broko den ede tumusi èn fu suku a freide fu Gado. Wi o taki fosi fu den sani di Paulus ben skrifi na Filipisma 4:6, 7. (Leisi en.) Baka dati wi o luku tra Bijbel eksempre di e sori fa Yehovah ben du san sma no ben fruwakti srefisrefi. Leki lasti, wi o luku fa „a freide fu Gado” kan yepi wi fu horidoro sondro taki wi e lasi frutrow na ini Yehovah.

7. San Paulus ben wani leri den brada na ini Filipi nanga yepi fu a brifi fu en? San wi kan leri fu den sani di a ben taki?

⁷ A no de fu taki dati di den brada na ini Filipi leisi a brifi fu Paulus gi den brada nanga sisa, dan den memre sortu sani ben miti Paulus. Den memre tu fa nowan fu den ben fruwakti taki Yehovah ben o yepi den man disi na a fasi dati. San Paulus ben wani leri den? Te yu luku en bun, a ben wani sori den taki den no ben musu broko den ede. Den ben musu begi fu kisi a freide fu Gado. Ma luku taki „a freide fu Gado . . . bigi moro iniwan sani di libisma man frustan”. San dati wani taki? Na ini son Bijbel a pisi disi vertaal nanga „a kefalek moro leki iniwan dren di wi ben kan abi” noso „a bun moro iniwan sani di libisma srefi seti”. Fu taki en leti, Paulus ben taki dati „a freide fu Gado” kefalek moro leki san wi e denki. Sobun, awansi wi e denki taki wan lusu no de gi den problema fu wi, toku Yehovah man tyari wan lusu kon èn a kan du dati na wan fasi di wi no ben fruwakti.​—Leisi 2 Petrus 2:9.

8, 9. (a) Sma na ini Filipi ben du ogri nanga Paulus, ma sortu bun bakapisi dati ben abi? (b) Fu san ede den brada na ini Filipi ben kan bribi san Paulus ben taigi den?

⁸ Te den brada na ini Filipi ben e prakseri san Yehovah ben du gi den na ini den tin yari di ben pasa, dan a no de fu taki dati a brifi fu Paulus ben de wan deki-ati gi den. Den sani di Paulus ben skrifi ben tru. Aladi Yehovah ben gi pasi taki sma du ogri nanga Paulus nanga Silas, toku den ben man ’opo taki gi a bun nyunsu èn den ben man du ala san den man fu meki lanti gi den a reti fu preiki’ (Fil. 1:7). Den hei lantiman ben o denki bun fosi den du wan sani fu gens a nyun Kresten gemeente di ben seti na ini a foto fu den. Kande na fu den sani di Paulus ben du, meki a datra Lukas ben man tan na ini Filipi baka di Paulus nanga Silas ben gowe drape. Na so Lukas ben man yepi den nyun Kresten na ini a foto dati.

⁹ Di den brada na ini Filipi leisi a brifi fu Paulus, dan a no de fu taki dati den ben sabi taki Paulus no ben skrifi sani somaar, fu di en srefi ben ondrofeni muilek situwâsi. Toku Paulus ben abi „a freide fu Gado”. Fu taki en leti, na a ten di Paulus ben skrifi a brifi gi den brada dati, den ben e hori en leki strafuman na ini wan oso na ini Rome. Ma srefi drape a ben e sori taki a ben abi „a freide fu Gado”.​—Fil. 1:12-14; 4:7, 11, 22.

10, 11. San wi musu du te wi e broko wi ede tumusi nanga wan problema, èn san wi kan fruwakti?

¹⁰ San kan yepi wi fu no broko wi ede tumusi nanga sani èn fu kisi „a freide fu Gado”? A rai di Paulus ben gi den Filipisma e sori wi taki begi o yepi wi fu no broko  wi ede tumusi. Sobun te wi e broko wi ede tumusi nanga sani, dan wi musu begi Yehovah fu yepi wi nanga den sani dati. (Leisi 1 Petrus 5:6, 7.) Begi Yehovah sondro fu tweifri taki a e broko en ede nanga yu. Begi en fu „taki en tangi” èn memre fa a e blesi yu. Wi o kisi moro frutrow na ini en te wi e tan hori na prakseri taki a kan „du moro leki iniwan sani di wi e aksi noso prakseri”.​—Ef. 3:20.

¹¹ Neleki Paulus nanga Silas, wi kan fruwondru tu fu den sani di Yehovah e du gi wi. Kande a no bigi sani, ma ala ten a o gi wi san wi abi fanowdu (1 Kor. 10:13). Ma disi no wani taki dati wi musu sidon nomo, aladi wi e wakti Yehovah fu lusu a problema. Te wi begi Yehovah, dan wisrefi musu du san wi kan du (Rom. 12:11). Na so wi e sori taki wi wani taki Gado yepi wi trutru èn disi o meki taki Yehovah blesi wi. Ma wi musu frustan tu taki Yehovah kan du moro leki san wi aksi en. Son leisi a e du sani gi wi di wi no ben fruwakti srefisrefi. Meki wi luku wan tu Bijbel eksempre di o yepi wi fu bribi taki Yehovah kan du moro leki san wi aksi en.

12. (a) San Kownu Heskia du di Kownu Sanherib fu Asiria ben wani teki Yerusalem abra? (b) San wi e leri fu a fasi fa Yehovah lusu a problema?

¹² Bijbel e sori furu leisi fa Yehovah ben du sani gi sma aladi den no ben fruwakti dati srefisrefi. Kownu Heskia ben e libi na a ten di Kownu Sanherib fu Asiria broko go na ini Yuda èn teki ala den foto abra boiti Yerusalem (2 Kow. 18:1-3, 13). Baka dati, Sanherib ben wani teki Yerusalem abra. San Kownu Heskia du? A begi Yehovah èn a suku rai na Yesaya, a profeiti fu Yehovah (2 Kow. 19:5, 15-20). Heskia fu en sei du san a ben man fu lusu a problema. A pai Sanherib a butu di a ben musu pai en (2 Kow. 18:14, 15). Baka wan pisi ten, Heskia bigin sreka a foto fu di a legre fu Asiria ben o lontu a foto wan langa pisi ten (2 Kron. 32:2-4). Ma fa a problema lusu? Yehovah seni wan engel fu kiri 185.000 fu den srudati fu Sanherib na ini wán neti. Iya, srefi Heskia no ben fruwakti a sani dati!​—2 Kow. 19:35.

13. (a) San wi e leri fu a sani di pasa nanga Yosef? (b) San ben pasa nanga Sara aladi a no ben fruwakti dati srefisrefi?

¹³ Prakseri a yonguman Yosef, a manpikin fu Yakob. Di Yosef ben de na strafu-oso na ini Egepte, dan a no ben kan sabi taki a ben o tron a di fu tu tiriman na ini a kondre noso taki Yehovah ben o gebroiki en fu kibri en osofamiri di wan angriten ben de na ini a kontren drape (Gen. 40:15; 41:39-43; 50:20). A no de fu taki dati Yosef no ben fruwakti srefisrefi taki Yehovah ben o du den sani dati gi en. Prakseri Sara tu, na afo fu Yosef. Wi sabi taki na umasrafu fu Sara kisi wan  manpikin gi en. Ma yu denki taki Sara di ben owru kaba ben fruwakti taki Yehovah ben o meki a kisi en eigi manpikin? A no de fu taki dati di Sara kisi Isak, dan dati ben de wan moro bigi blesi leki san a ben fruwakti.​—Gen. 21:1-3, 6, 7.

14. Sortu frutrow wi kan abi na ini Yehovah?

¹⁴ Wi no e fruwakti taki Yehovah o du wan wondru fu tyari wan kaba kon na ala den problema fu wi fosi a nyun grontapu kon. Wi no e fruwakti tu taki Gado du bigi sani gi wi. Ma wi sabi taki a Gado di du bigi sani fu yepi den futuboi fu en na ini owruten, na wi Gado, Yehovah. (Leisi Yesaya 43:10-13.) Te wi e bribi disi, dan disi e yepi wi fu frutrow tapu Gado. Wi sabi taki a kan du iniwan sani di de fanowdu fu gi wi a krakti so taki wi kan du san a e aksi fu wi (2 Kor. 4:7-9). San wi e leri fu den Bijbel tori disi? Soleki fa den eksempre fu Heskia, Yosef nanga Sara e sori, Yehovah kan yepi wi fu pasa den moro muilek situwâsi efu wi e tan gi yesi na en.

15. San o yepi wi fu no lasi „a freide fu Gado”? Fruklari dati.

¹⁵ San kan yepi wi fu no lasi „a freide fu Gado” aladi tesi e miti wi? Na te wi e tan abi wan bun matifasi nanga wi Gado, Yehovah. Wi kan abi a matifasi dati soso „nanga yepi fu Krestes Yesus” di gi en libi gi wi leki lusu-paiman. A lusu-paiman na wan tra bigi sani di wi Tata du gi wi. Yehovah e gebroiki a lusu-paiman fu tapu den sondu fu wi so taki wi kan abi wan krin konsensi èn so taki wi kan kon krosibei na en.​—Yoh. 14:6; Yak. 4:8; 1 Petr. 3:21.

16. San o pasa te wi abi „a freide fu Gado”? Fruklari dati.

¹⁶ San e pasa te wi e kisi „a freide fu Gado di bigi moro iniwan sani di libisma man frustan”? Bijbel e taki dati a ’o kibri wi ati nanga wi frustan nanga yepi fu Krestes Yesus’ (Fil. 4:7). A Griki Wortu di vertaal nanga „kibri” na wan wortu di srudati ben e gebroiki. A abi fu du nanga wan grupu srudati di ben musu kibri wan tranga foto na ini owruten. Filipi ben de so wan foto. Den sma fu Filipi ben e sribi switi te neti fu di den ben sabi taki srudati ben e hori wakti na den portu fu a foto fu den. Na so a de tu taki te wi abi „a freide fu Gado”, dan wi sa abi wan korostu firi. Wi sabi taki Yehovah e sorgu gi wi èn taki a wani taki sani waka bun nanga wi (1 Petr. 5:10). A sani disi e yepi wi fu no broko wi ede tumusi èn fu no lasi-ati.

17. San o yepi wi fu frutrow tapu Yehovah na ini a ten di e kon?

¹⁷ Heri esi a bigi banawtu o pasa na heri grontapu (Mat. 24:21, 22). Wi no sabi soifri san o pasa nanga ibriwan fu wi. Ma wi no abi fu broko wi ede tumusi. Awansi wi no sabi soifri san Yehovah o du, toku wi sabi fa Gado de. Neleki fa a ben du na ini owruten, Yehovah ala ten o du san a abi na prakseri èn son leisi a e du dati na wan fasi di wi no ben fruwakti. Ibri leisi te Yehovah e du wan sani gi wi, dan dati e gi wi okasi fu ondrofeni „a freide fu Gado di bigi moro iniwan sani di libisma man frustan”.