1. San e sori taki Yehovah no e denki ensrefi nomo, ma taki a lobi fu gi sani?

ALADI Yehovah ben de en wawan wan heri pisi ten fosi a bigin meki sani, toku a no ben e denki ensrefi nomo. A bosroiti fu meki engel nanga libisma so taki den srefi kan prisiri fu a libi. „A koloku Gado”, Yehovah, lobi gi sma bun sani (1 Tim. 1:11; Yak. 1:17). Èn fu di a wani taki wi musu de koloku, meki a e leri wi fu de sma di lobi gi sani.​—Rom. 1:20.

2, 3. (a) Fu san ede wi o de koloku te wi e gi sma sani? (b) San wi o luku na ini na artikel disi?

² Gado meki libisma leki fa ensrefi de (Gen. 1:27). Dati wani taki dati wi kan sori den srefi fasi fu Yehovah. Efu wi wani de koloku trutru èn efu wi wani taki Yehovah blesi wi, dan neleki en wi musu broko wi ede nanga tra sma èn wi musu lobi fu gi sma sani (Fil. 2:3, 4; Yak. 1:5). Fu san ede? Fu di na so Yehovah meki wi. Aladi wi abi sondu, toku wi kan lobi fu gi sma sani neleki Yehovah.

 ³ Bijbel e sori fa wi kan de sma di lobi gi sani. Meki wi go luku fu san ede Yehovah o breiti nanga wi te wi e gi sma sani èn fa a fasi disi kan yepi wi fu du a wroko di Yehovah gi wi fu du. Wi o si tu fu san ede wi kan de koloku te wi lobi gi sma sani noso te wi lobi yepi den èn fu san ede wi musu tan abi a gwenti fu gi sma sani.

4, 5. Fa Yehovah nanga Yesus sori taki den lobi fu gi sani èn fu san ede wi musu teki na eksempre fu den?

⁴ Yehovah wani taki wi musu teki na eksempre fu en èn dati meki a breiti te wi lobi fu gi sma sani (Ef. 5:1). Te wi e luku a fasi fa wi meki èn den so furu moi sani di Yehovah meki, dan a de krin taki a wani taki wi de koloku (Ps. 104:24; 139:13-16). Sobun, te wi e du muiti fu meki tra sma de koloku, dan wi e gi grani na Yehovah.

⁵ Wi e teki a bun eksempre fu Yesus tu di ben lobi gi sma sani. Yesus srefi taki: „A Manpikin fu libisma no kon fu sma dini en, ma a kon fu dini sma èn fu gi en libi leki wan lusu-paiman fu frulusu furu sma” (Mat. 20:28). Dati meki na apostel Paulus ben gi Kresten a deki-ati disi: „Tan abi a srefi denki di Krestes Yesus ben abi tu. . . . A gowe libi ala san a ben abi. A kon de leki fa wan srafu de” (Fil. 2:5, 7). Ibriwan fu wi musu aksi ensrefi: ’Wan sani de ete di mi kan du fu waka soifri na Yesus baka?’​—Leisi 1 Petrus 2:21.

6. San Yesus wani leri wi nanga a tori fu a Samaria man di ben yepi wan Dyu? (Luku a prenki na a bigin fu na artikel.)

⁶ Yehovah breiti nanga wi te wi e teki na eksempre fu en nanga en Manpikin. Wi kan du dati te wi e sori taki wi e broko wi ede nanga tra sma èn te wi e luku fa wi kan yepi den. Yesus sori o prenspari a de fu du disi di a fruteri a tori fu a Samaria man di ben yepi wan Dyu. (Leisi Lukas 10:29-37.) A leri den bakaman fu en taki den musu yepi trawan, awinsi suma na den noso awinsi fu pe den komoto. Yu sabi ete fu san ede Yesus fruteri a tori disi? Na fu di wan Dyu ben aksi en: „Suma na den tra sma di mi musu lobi?” A piki di Yesus gi e sori taki wi musu de klariklari fu yepi trawan neleki a Samaria man efu wi wani taki Yehovah breiti nanga wi.

7. Fruklari fu san ede a moro bun fu du sani na Yehovah fasi.

⁷ Te wi e luku san pasa na ini a dyari fu Eden, dan dati na wan tra reide fu san ede wi musu de sma di lobi fu gi sani. Fa so? Satan ben taki dati Adam nanga Eva ben o de moro koloku te den ben o trangayesi Yehovah èn te den ben o denki densrefi nomo. Fu di Eva ben e denki ensrefi nomo, meki a ben wani de leki Gado. Adam ben e denki ensrefi nomo èn dati meki a du san Eva wani, na presi fu arki Gado (Gen. 3:4-6). Wi kan si krin sortu takru bakapisi dati tyari kon. Te sma e denki densrefi nomo, dan den no sa de koloku. Ma te wi lobi fu gi sani, dan wi e sori taki wi e bribi taki a moro bun fu du sani na Yehovah fasi.

8. Fu san ede Adam nanga Eva no ben abi fu denki densrefi nomo?

⁸ Aladi Adam nanga Eva ben de den wawan na ini a dyari fu Eden, toku den no ben abi fu denki densrefi nomo.  Fu san ede? Fu di Yehovah ben gi den wan wroko pe den ben o abi fu suku a bun fu trawan. Yehovah ben taigi den fu meki pikin teleki sma kon lai na grontapu èn fu basi ala sani na grontapu (Gen. 1:28). Neleki fa Yehovah ben wani taki ala sma na grontapu de koloku, na so Adam nanga Eva ben musu wani taki den pikin di den ben o kisi de koloku tu. Gado ben wani taki Adam nanga Eva nanga ala den pikin di den ben o kisi, wroko makandra fu meki heri grontapu tron wan paradijs. Dati ben o de wan bigi wroko!

9. Fu san ede libisma ben o de koloku te den ben o meki heri grontapu tron wan paradijs?

⁹ Fu man meki heri grontapu tron wan paradijs, dan libisma di no ben abi sondu ben o abi fu wroko skinskin makandra nanga Yehovah. Prakseri fa a wroko dati ben o gi den furu prisiri èn fa den ben o de koloku! Yehovah ben o gi den furu blesi te den ben o suku a bun fu trawan na presi fu denki densrefi nomo.

10, 11. San o yepi wi fu du a wroko di Yehovah gi wi fu preiki èn fu meki disipel?

¹⁰ Na ini a ten disi, Yehovah gi en pipel a wroko fu preiki èn fu meki disipel. Fu kan du a wroko dati, wi musu broko wi ede trutru nanga tra sma. Wi o man tan du a wroko disi soso te wi lobi Yehovah èn te wi lobi tra sma.

¹¹ Paulus ben taki dati en nanga tra Kresten ben e „wroko makandra nanga Gado” fu di den ben e preiki a bun nyunsu èn den ben e gi sma leri (1 Kor. 3:6, 9). Na ini a ten disi wi kan „wroko makandra nanga Gado” te wi e gebroiki wi ten, wi gudu nanga wi krakti fu du a preikiwroko di Gado gi wi fu du. Dati na wan bigi grani trutru!

12, 13. Sortu blesi wi e kisi te wi e meki sma tron disipel?

¹² A e gi wi furu prisiri te wi e gebroiki wi ten nanga wi krakti fu preiki èn fu meki sma tron disipel. Na dati furu brada nanga sisa di e studeri Bijbel nanga sma ondrofeni. Wi breiti te wi e si taki wan Bijbelstudie fu wi e prisiri fu di a e frustan san Bijbel e leri. Wi e breiti tu te a bribi fu en e kon moro tranga, te a e kenki en libi èn te a e fruteri trawan san a leri. Yesus ben breiti tu di den 70 disipel di a ben seni go preiki, „drai kon baka nanga prisiri” fu di den ben abi bun bakapisi.​—Luk. 10:17-21.

¹³ Brada nanga sisa na heri grontapu e breiti te den si fa a bun nyunsu e yepi sma fu abi wan moro bun libi. Fu eksempre, Anna, wan yongu sisa di no trow, ben wani du moro gi Yehovah. *  Dati meki a froisi go na wan kondre fu Europa pe moro preikiman ben de fanowdu. A skrifi: „Yu kan feni furu Bijbelstudie dyaso èn mi lobi dati trutru. A preikiwroko e gi mi furu prisiri. Te mi doro oso, mi no abi ten fu prakseri misrefi nomo. Mi e broko mi ede nanga den Bijbelstudie fu mi èn den problema fu den. Mi e luku fa mi kan gi den deki-ati èn fa mi kan yepi den nanga den problema disi. Mi de seiker now taki ’wan sma sa de moro koloku te a e gi sani, leki te a e kisi sani’.”​—Tori 20:35.

14. Fa wi kan tan abi prisiri na ini a preikiwroko awinsi sma no wani arki?

¹⁴ Awinsi sma no wani arki a boskopu, wi o de nanga prisiri te wi e gi den na okasi fu yere a bun nyunsu. Na ini a ten disi, wi e du a srefi wroko di Yehovah ben gi a profeiti Esekièl fu du. Yehovah ben taki: „Awinsi den arki, noso den no arki, toku yu musu taigi den san mi taigi yu fu taki” (Esek. 2:7; Yes. 43:10). Srefi efu son sma no e warderi a boskopu di wi e preiki, Yehovah e warderi a muiti di wi e meki. (Leisi Hebrewsma 6:10.) Wan brada ben taki fu a preikiwroko: „Wi prani, wi gi watra èn wi begi Yehovah fu yepi a sma fu go na fesi.”​—1 Kor. 3:6.

15. Wi musu du bun soso gi sma di de nanga tangi gi san wi du? Tyari disi kon na krin.

¹⁵ Yesus wani taki wi gi sma sani so taki wi kan de koloku. Furu sma o warderi en te wi e gi den sani. Yesus ben taki: „Abi a gwenti fu gi sma sani, dan sma sa gi unu sani tu. Den o lai wan baskita, stampu en moi, seki en bun, furu en pasa marki, dan den o kanti en poti na ini a saka fu un krosi. Bika na a fasi fa unu e libi nanga trawan, na a fasi dati den sa libi nanga unu tu” (Luk. 6:38). A no ala sma o de nanga tangi te wi du wan sani gi den. Ma efu wan sma de nanga tangi gi san yu du gi en, dan dati o gi en deki-ati fu du bun gi tra sma tu. Sobun, tan du bun gi sma awinsi den no e warderi san yu e du. Yu no  sabi noiti o furu wini sma kan kisi fu a bun di yu du.

16. Gi suma wi musu du bun èn fu san ede?

¹⁶ Sma di lobi gi sma sani no e du dati fu di den wani kisi wan sani baka. Na dati Yesus ben abi na prakseri di a taki: „Te yu o sreka wan fesa, dan kari den pôti sma kon, nanga den malengri sma, den lan sma, nanga den breni sma. Dan yu o de koloku, bika den no abi noti fu pai yu baka” (Luk. 14:13, 14). Bijbel e taki: „A sma di abi switifasi o kisi blesi.” Wan tra tekst e taki: „Koloku fu a sma di e yepi den mofinawan” (Odo 22:9; Ps. 41:1). Iya, wi musu gi trawan sani fu di dati o meki wi de koloku trutru.

17. Na sortu tra fasi wi kan gi sma sani?

¹⁷ Di Paulus ben taki dati „wan sma sa de moro koloku te a e gi sani, leki te a e kisi sani”, dan a no ben taki nomo taki wi musu prati den gudu fu wi nanga tra sma. Wi kan gi sma deki-ati tu, wi kan gi den rai fu Bijbel èn wi kan yepi den nanga wan problema di den abi (Tori 20:31-35). Te wi e luku san Paulus taki èn san a ben e du, dan dati e sori o prenspari a de fu gebroiki wi ten nanga wi krakti fu yepi sma èn fu sori lobi gi den.

18. San furu sabiman taki fu sma di lobi du bun gi trawan?

¹⁸ Sabiman di e ondrosuku fa libisma e tyari densrefi sori tu taki te sma lobi gi sani, dan dati e meki den de koloku. Wan artikel e sori taki sma de moro koloku te den e du bun gi trawan. Sabiman e taki dati te wi e yepi sma, dan dati e gi wi a firi taki wi e du wan bun sani nanga wi libi. Dati meki sabiman taki dati efu sma wani abi wan moro bun gosontu èn efu den wani de moro koloku, dan den musu yepi sma di de na nowtu. Wi ben sabi disi kaba fu di wi Mekiman Yehovah ala ten leri wi taki wi o de koloku te wi e du bun gi sma.​—2 Tim. 3:16, 17.

19, 20. Fu san ede yu wani de wan sma di lobi gi sani?

¹⁹ Te sma na wi lontu e prakseri densrefi nomo, dan a kan muilek gi wi fu tan du bun gi trawan. Ma Yesus taki dati den tu moro prenspari wet na taki wi musu lobi Yehovah nanga wi heri ati, wi heri libi, wi heri frustan, èn nanga ala wi krakti, èn taki wi musu lobi tra sma leki fa wi lobi wisrefi (Mark. 12:28-31). Soleki fa wi si na ini na artikel disi, dan den sma di lobi Yehovah e meki muiti fu teki na eksempre fu en. Yehovah nanga Yesus lobi fu gi sma sani. Den e gi wi a deki-ati fu du a srefi sani fu di den sabi taki wi o de koloku. Efu wi e meki muiti fu du a wroko di Gado gi wi èn fu du bun gi tra sma, dan Yehovah o kisi grani èn a o tyari blesi kon gi wi nanga tra sma.

²⁰ A no de fu taki dati yu e du muiti kaba fu de wan sma di lobi gi sani èn di lobi yepi tra sma, spesrutu yu brada nanga sisa (Gal. 6:10). Efu yu e tan du dati, dan sma o lobi yu, den o de nanga tangi gi san yu du gi den èn yu o de koloku. Odo 11:25 e taki: „Sani o waka bun gi wan sma di lobi fu gi trawan sani èn a sma di e gi trawan watra bogobogo, o kisi watra bogobogo tu.” Na ini a libi fu wan Kresten èn na ini a preikiwroko, furu fasi de fa wi kan du bun gi tra sma. Na ini a tra artikel wi o taki fu wan tu fu den fasi disi.