1. Na sortu fasi wi kan wroko makandra nanga Yehovah?

BAKA DI Yehovah meki libisma, a ben wani taki den wroko makandra nanga en fu du san a abi na prakseri. Aladi libisma abi sondu now, toku reti-ati sma kan wroko ibri dei nanga Yehovah ete. Fu eksempre, te wi e preiki a bun nyunsu fu a Kownukondre èn te wi e yepi sma fu tron disipel, dan „wi e wroko makandra nanga Gado” (1 Kor. 3:5-9). Na wan bigi grani wi abi taki na Almakti Gado di meki hemel nanga grontapu e gi wi na okasi fu du so wan prenspari wroko. Ma boiti taki wi e preiki èn e meki disipel, tra fasi de tu fa wi kan wroko makandra nanga Yehovah. Na ini na artikel disi, wi o si taki wi kan du dati tu te wi e yepi wi famiri nanga tra sma na ini a gemeente, te wi e sori switifasi gi sma, te wi e yepi nanga wroko di de fu du na ini na organisâsi èn te wi e du moro gi Yehovah.​—Kol. 3:23.

2. Fu san ede wi no musu teki wisrefi gersi nanga trawan?

² Te wi o studeri na artikel disi, dan hori na prakseri taki a no ala sma man du a srefi gi Yehovah. A yari fu wan sma, a gosontu fu en, a situwâsi fu en, nanga den sani di a man  du kan difrenti fu wan trawan. Dati meki wi no musu teki wisrefi gersi nanga trawan. Na apostel Paulus ben taki: „Meki ibri sma ondrosuku san na den sani di ensrefi e du. Dan dati sa meki taki a e prisiri nanga san ensrefi e du èn a no musu teki ensrefi gersi nanga tra sma.”​—Gal. 6:4.

3. Fu san ede wi kan taki dati ibri sma di e sorgu gi en osofamiri e wroko makandra nanga Gado?

³ Yehovah wani taki sma di e anbegi en musu sorgu gi den osofamiri. Kande yu e wroko fu man sorgu gi yu osofamiri. Furu mama e tan na oso fu luku den yongu pikin fu den. Son pikin di kon bigi kaba e sorgu gi den papa noso mama di kon owru noso di e siki. Wi musu du den sani disi, fu di Gado Wortu e taki: „Efu wan sma no e sorgu gi den sma fu en, spesrutu den sma fu en osofamiri, dan a drai en baka gi a bribi èn a takru moro wan sma di no abi bribi” (1 Tim. 5:8). Efu yu abi a frantwortu fu sorgu yu osofamiri, dan kande yu no o man du so furu na ini a diniwroko leki fa yu ben o wani. Ma no lasi-ati! Yehovah breiti nanga wi te wi e sorgu gi wi osofamiri.​—1 Kor. 10:31.

4. Fa papa nanga mama kan sori taki den e poti a Kownukondre na a fosi presi, èn san na a bakapisi fu dati?

⁴ Kresten papa nanga mama e wroko makandra nanga Yehovah te den e gi den pikin deki-ati fu du moro gi Yehovah. Furu papa nanga mama di du disi, abi pikin di e du a furuten diniwroko now. Sonwan e dini leki zendeling, trawan e pionier pe moro preikiman de fanowdu èn sonwan e dini na Betel. Efu yu pikin e dini na wan farawe presi, dan a no de fu taki dati yu no man miti so furu nanga en. Toku papa nanga mama di lobi Yehovah e gi den pikin fu den deki-ati fu tan dini pe den de. Fu san ede? Fu di den papa nanga mama disi breiti taki den pikin e poti a Kownukondre na a fosi presi ini den libi (3 Yoh. 4). Kande furu fu den e firi leki Hana di ben taki dati a ben „leni” Yehovah a boi fu en, Samuel. Den papa nanga mama disi e si en leki wan bigi grani fu wroko makandra nanga Yehovah na a fasi disi.​—1 Sam. 1:28.

5. Fa yu kan yepi brada noso sisa na ini yu gemeente? (Luku a prenki na a bigin fu na artikel.)

⁵ Efu yu no abi a frantwortu fu sorgu wan osofamiri, dan kande yu kan yepi wan brada noso sisa di musu du dati. Kande a musu sorgu gi wan sikisma, wan owrusma noso wan sma di abi tra yepi fanowdu. A bun fu luku na ini yu gemeente suma abi yepi fanowdu. Fu eksempre, kande wan sisa na ini yu gemeente e sorgu gi en owru papa nanga mama. Kande yu kan meki ten fu de nanga den bigisma disi so taki a sisa kan go du wan tra sani. A kan taki son sma abi yepi fanowdu fu kon na den konmakandra, fu go bai sani noso fu go luku wan sma na ati-oso. Luku fa yu kan yepi den. Te yu e du dati, dan kande Yehovah kan gebroiki yu fu piki a begi fu wan sma. Na so yu e wroko makandra nanga Yehovah.​—Leisi 1 Korentesma 10:24.

6. Fa wi kan sori switifasi gi trawan?

⁶ Sma di e wroko makandra nanga Gado e sori switifasi gi trawan èn den lobi gi sma wan switikon. Na ini Bijbel, a Griki wortu di vertaal nanga „switikon” wani taki „sori switifasi gi sma di yu no sabi” (Hebr. 13:2). Na ini Gado Wortu wi kan leisi fu sma di ben sori switifasi gi trawan (Gen. 18:1-5). Solanga wi abi na okasi fu  yepi trawan, wi musu du dati awinsi den „abi a srefi bribi leki wi” noso awinsi dati no de so.​—Gal. 6:10.

7. Fu san ede a bun fu sori switifasi gi sma di e du furuten diniwroko?

⁷ Yu kan wroko makandra nanga Gado te yu e sori switifasi gi sma di e du furuten diniwroko. Kande wan kring-opziener di kon luku a gemeente abi wan presi fanowdu fu tan. (Leisi 3 Yohanes 5, 8.) Te yu e kari den sortu sma disi kon na yu oso, dan unu kan „gi makandra deki-ati” (Rom. 1:11, 12). Luku na ondrofenitori fu Olaf. A e fruteri taki di a ben yongu, wan kring-opziener di no ben trow ben kon luku a gemeente. Nowan sma na ini en gemeente ben abi wan tanpresi gi en. Dati meki Olaf aksi en papa nanga mama di no ben de Kotoigi efu a kring-opziener ben kan tan na den oso. Den ben feni en bun, ma den ben taki dati Olaf ben o abi fu sribi na tapu a sturu na ini a foroisi. A sani dati no ben de wan problema gi Olaf. A e fruteri: „A ben de wan moi wiki. Ibri mamanten mi nanga a kring-opziener ben e opo fruku, dan wi ben e taki fu difrenti sani te wi ben e nyan. A deki-ati di a gi mi, meki taki mi ben wani du a furuten diniwroko.” Na ini den 40 yari di pasa, Olaf dini leki zendeling na ini difrenti kondre.

8. Fu san ede wi musu sori switifasi gi trawan srefi efu a gersi leki den no de nanga tangi? Gi wan eksempre.

⁸ Furu fasi de fa yu kan sori switifasi gi sma di yu no sabi. Son leisi a kan gersi leki sma no de nanga tangi gi san yu e du. Luku wan eksempre. Wan dei wan sisa na ini Spanyorokondre ben e studeri Bijbel nanga wan uma di nen Yesica èn di ben de fu Ekwador. Di a sisa si taki Yesica e krei, a aksi en fu san ede a e krei. Yesica fruteri en taki fosi a froisi kon na Spanyorokondre, a ben e pina so te taki wan dei a no ben abi noti fu nyan. Na soso watra a ben abi fu gi a pikin meisje fu en. Yesica ben begi aladi a ben pruberi fu meki a meisje sribi. Syatu baka dati tu Kotoigi kon na Yesica, ma a taki grofu nanga den èn a priti a tijdschrift di den gi en. A taigi den: „Na a tijdschrift a meisje fu mi musu nyan?” Den sisa pruberi fu trowstu en, ma a no ben wani arki den. Bakaten, den sisa libi wan manki nanga nyanyan na Yesica mofodoro. A sani disi ben naki na ati fu Yesica. Ma now fosi a ben kon frustan taki na Gado ben piki a begi fu en èn dati meki a ben krei. Now a teki a bosroiti fu dini Yehovah. Na eksempre disi e sori krin taki a e tyari bun bakapisi kon te wi e sori switifasi gi trawan!​—Preik. 11:1, 6.

9, 10. (a) Sortu okasi den Israelsma ben abi fu yepi nanga a wroko fu Yehovah? (b) Nanga sortu wroko brada kan yepi na ini a gemeente?

⁹ Na ini a ten di pasa, den Israelsma ben abi furu okasi pe den ben kan yepi nanga a wroko fu Yehovah (Eks. 36:2; 1 Kron. 29:5; Neh. 11:2). Na ini a ten disi, furu okasi de fu gebroiki yu ten, yu gudu, nanga den koni fu yu fu yepi yu brada nanga sisa. Te yu e du dati, dan yu o de koloku èn yu o kisi furu blesi.

¹⁰ Gado Wortu e gi mansma na ini a gemeente a deki-ati fu tron dinari ini a diniwroko noso owruman, so taki den kan dini trawan (1 Tim. 3:1, 8, 9; 1 Petr. 5:2, 3). Den brada di e du disi, man yepi den brada nanga sisa nanga sani di den abi fanowdu na ini a libi fu den èn na ini na anbegi fu den (Tori 6:1-4). Brada kan dini leki zaal-waktiman, den kan sorgu gi den buku nanga tijdschrift, den kan luku a kontren  pe a gemeente e preiki èn den kan sorgu taki a zaal tan bun. Den owruman aksi yu fu du wan fu den sani disi? Den brada di e du den wroko disi taki dati a e gi den furu prisiri.

11. Sortu wini wan sisa kisi fu di a meki mati di a ben e du bow-wroko?

¹¹ Den wan di e yepi nanga a wroko di de fu du na ini na organisâsi e meki furu mati. Luku na eksempre fu Margie, wan sisa di yepi bow Kownukondre zaal 18 yari langa. Na ini ala den yari a ben man poti prakseri na furu yongu sisa èn a ben man sori den fa fu du bow-wroko. A taki dati den okasi disi e yepi wi fu gi makandra deki-ati (Rom. 1:12). Te Margie abi en muilek son leisi, dan den mati di a meki na den difrenti presi pe a bow Kownukondre zaal, e gi en deki-ati. Yu yepi wan leisi kaba fu bow Kownukondre zaal? Yu kan yepi nanga a wroko disi, awinsi yu no sabi fa fu du bow-wroko.

12. Fa yu kan yepi baka te wan rampu pasa?

¹² Wi e wroko makandra nanga Gado tu, te wi e yepi wi brada nanga sisa te wan rampu pasa. Fu eksempre, wi kan gi moni (Yoh. 13:34, 35; Tori 11:27-30). Wan tra sani di wi kan du na fu yepi krin a presi baka wan rampu èn fu yepi seti den oso baka. Gabriela, wan sisa fu Polen ben lasi en oso di wan frudu ben sungu a kontren pe a ben libi. A sisa disi ben breiti di brada nanga sisa fu tra gemeente kon yepi en. A e taki: „Mi no wani taki fu den sani di mi lasi. Den sani dati na grontapu sani. Ma mi wani taki fu den sani di mi kisi. San mi ondrofeni meki mi si krin baka taki na wan bigi grani fu de na ini a Kresten gemeente èn mi e firi koloku.” Furu brada nanga sisa di kisi yepi baka wan rampu e firi a srefi fasi. Èn den wan di e wroko makandra nanga Yehovah fu yepi te wan rampu pasa, e firi koloku trutru.​—Leisi Tori fu den apostel 20:35; 2 Korentesma 9:6, 7.

13. Te wi e yepi trawan di de na nowtu, dan fa dati e meki wi kisi moro lobi gi Yehovah? Gi wan eksempre.

¹³ Stephanie nanga tra preikiman ben abi a grani tu fu wroko makandra nanga Gado. Den ben yepi brada nanga sisa di  ben lowe kon na Amerkankondre fu di feti ben de na ini a kondre fu den. Den ben yepi fu suku oso gi den nanga sani fu poti na ini na oso. Stephanie e taki: „A ben naki wi ati fu si fa den ben abi furu warderi èn fa den ben de nanga prisiri fu di den Kresten brada nanga sisa sori furu lobi gi den. Den ben denki taki na wi yepi den, ma fu taki en leti na den yepi wi. Wi si a lobi, a wánfasi, a bribi nanga a frutrow di den ben abi na ini Yehovah. Dati meki wi kisi moro lobi gi Yehovah èn now wi abi moro warderi gi ala den sani di wi e kisi fu na organisâsi fu en.”

14, 15. (a) Sortu denki a profeiti Yesaya ben abi? (b) Fa Kresten kan teki na eksempre fu Yesaya?

¹⁴ Yu wani wroko makandra nanga Yehovah moro furu? Yu ben o wani froisi go dini pe moro preikiman de fanowdu? A no de fu taki dati a no ala sma man froisi go na wan tra presi. Ma son brada nanga sisa man du dati. Den abi a srefi denki leki a profeiti Yesaya. Di Yehovah aksi: „Suma sa de wi boskopuman? Suma mi sa seni?” Yesaya taki: „Dya mi de! Seni mi” (Yes. 6:8). Yu man du moro gi Yehovah èn yu de klariklari fu du dati tu? San yu kan du?

¹⁵ Luku san Yesus ben taki fu a preikiwroko èn a wroko di wi e du fu meki disipel: „A kotiwroko bigi, ma furu wrokoman no de. Fu dati ede, begi a Masra fu a kotiwroko meki a seni wrokoman fu go du a kotiwroko fu en” (Mat. 9:37, 38). Yu man dini leki pionier na wan presi pe moro preikiman de fanowdu? Noso yu kan yepi wan tra sma fu du dati? Furu brada nanga sisa kon si taki a moro bun fasi fa den kan sori lobi gi Gado èn gi tra sma, na te den e pionier na ini kontren pe nofo preikiman no de. Tra sani de di yu kan du fu du moro gi Yehovah? Yu o kisi furu prisiri te yu e du den sani dati.

16, 17. Sortu tra sani yu kan du efu yu wani du moro gi Yehovah?

¹⁶ Yu ben o wani dini na Betel noso yu ben o wani yepi nanga a bow-wroko fu na organisâsi? Yu kan du disi fu wan pisi ten noso yu kan wroko wan tu dei na ini a wiki. Ala ten Yehovah organisâsi abi sma fanowdu di de klariklari fu wroko na iniwan presi noso fu du iniwan wroko di den kisi. Sobun a kan taki aladi yu sabi du wan spesrutu wroko, den e aksi yu fu du wan tra wroko. No frigiti taki Yehovah e warderi ala den wan di de klariklari fu yepi nanga iniwan wroko di de fu du.​—Ps. 110:3.

¹⁷ Yu wani kisi leri na wan fu den skoro fu na organisâsi so taki yu kan du moro gi Yehovah? Efu dati de so, dan kande yu kan aksi fu go na a Skoro gi Kownukondre preikiman. A skoro disi e gi leri na lepi brada nanga sisa di e du furuten diniwroko so taki na organisâsi kan gebroiki den moro bun. Den wan di e go na a skoro disi musu de klariklari fu dini na iniwan presi pe na organisâsi o seni den go. Yu ben o wani go na a skoro disi so taki yu kan du moro gi Yehovah?​—1 Kor. 9:23.

18. Sortu wini yu o kisi te yu e wroko makandra nanga Yehovah ibri dei?

¹⁸ Fu di wi na Yehovah pipel, meki wi lobi fu gi sani. Wi e du bun gi trawan èn wi e sori switifasi nanga lobi gi den. Ibri dei wi e yepi sma. Dati meki wi de nanga prisiri, wi abi freide èn wi de koloku (Gal. 5:22, 23). Awinsi na ini sortu situwâsi yu de, yu o de koloku solanga yu lobi gi sani neleki Yehovah èn solanga yu e wroko makandra nanga en.​—Odo 3:9, 10.