1. San wi alamala wani gi den famiri fu wi?

WAN sisa di nen Pauline * e taki: „Di mi kon sabi waarheid, mi ben wani taki mi heri famiri musu de nanga mi na ini Paradijs. Mi ben wani taki mi masra Wayne nanga a boi fu wi ben musu dini Yehovah tu.” Yu abi famiri di no e dini Yehovah ete? A no de fu taki dati neleki Pauline, yu wani taki den dini Yehovah makandra nanga yu.

2. Sortu aksi wi o luku na ini na artikel disi?

² Wi no kan dwengi den famiri fu wi fu bribi san Bijbel e leri, ma wi kan gi den deki-ati fu arki a bun nyunsu (2 Tim. 3:14, 15). Fu san ede wi musu fruteri wi famiri a bun nyunsu? Fu san ede wi musu pruberi fu frustan fa den e firi? San wi kan du fu yepi den fu kon lobi Yehovah neleki wi? Èn fa a gemeente kan yepi? Na ini na artikel disi wi o luku den aksi disi.

3. Soleki fa 2 Petrus 3:9 e sori, dan fu san ede wi musu fruteri wi famiri a bun nyunsu?

³ Heri esi Yehovah o pori a grontapu disi. A o frulusu soso den sma di abi „a yoisti denki fu man kisi têgo libi” (Tori 13:48). Efu wi e du so furu muiti fu preiki gi sma na ini wi kontren di wi no sabi, dan seiker wi wani yepi wi famiri tu fu kon anbegi Yehovah. Wi lobi-ati Papa Yehovah „no wani taki wan sma lasi libi. A wani taki ala sma musu  kisi na okasi fu sori berow.”​—Leisi 2 Petrus 3:9.

4. Sortu fowtu wi e meki son leisi te wi e preiki gi wi famiri?

⁴ Wi musu hori na prakseri taki tu fasi de fa wi kan taki fu a bun nyunsu: Wan bun fasi nanga wan fowtu fasi. Fu eksempre, te wi e preiki gi sma di wi no sabi, dan wi e meki muiti fu taki na wan switi fasi nanga den. Ma te wi e taki nanga wi famiri, dan kande wi e taki sani di e hati den firi.

5. San wi musu hori na prakseri te wi e pruberi fu taki nanga wi famiri fu a bun nyunsu?

⁵ Te wi e prakseri a fosi leisi di wi pruberi fu taki fu Bijbel nanga wi famiri, dan kande furu fu wi e sari taki wi no taki bun nanga den èn wi e winsi taki wi ben du sani tra fasi. Na apostel Paulus ben gi Kresten a rai disi: „Taki na wan switi fasi ala ten. Den wortu fu unu musu abi sowtu. Te unu e taki na so wan fasi, dan unu o sabi fa fu piki ibriwan sma” (Kol. 4:5, 6). A bun fu hori a rai disi na prakseri te wi e taki nanga wi famiri. Efu wi no e du dati, wi kan taki wan sani di kan meki den mandi, na presi taki wi yepi den fu arki a bun nyunsu.

6-7. Gi wan eksempre di e sori fu san ede wan sma musu pruberi fu frustan fa en trowpatna di no e dini Yehovah e firi.

⁶ Pruberi fu frustan fa den e firi. Pauline di wi kari na a bigin, e taki: „Na ini a bigin mi ben wani taki nanga mi masra soso fu Gado nanga Bijbel. Wi no ben e taki fu tra sani.” Ma Wayne, a masra fu Pauline, no ben sabi furu fu Bijbel èn a no ben frustan den sani di Pauline ben e taki. Gi en, a ben gersi leki Pauline ben e prakseri soso a kerki fu en. A ben e broko  en ede taki sma ben e kori Pauline èn taki a tron wan memre fu wan sekte.

⁷ Pauline taki dati wan pisi ten a ben de furu nanga den brada nanga sisa te neti èn tapu satra nanga sonde. A ben de na den konmakandra, a ben go nanga den na ini a preikiwroko èn a ben go luku den na oso. A e taki: „Son leisi te Wayne ben kon na oso, nowan sma ben de na oso èn a ben firi leki na en wawan e tan.” Wi kan frustan taki Wayne ben winsi taki en frow nanga en boi ben de nanga en. A no ben sabi den sma pe den ben e go èn a ben gersi leki den nyun mati fu Pauline ben kon moro prenspari gi en leki en masra. Dati meki Wayne taigi Pauline taki a ben o broko a trow. Fa yu denki taki Pauline ben kan sori taki a e frustan fa en masra e firi?

8. San kan abi moro krakti tapu wi famiri, soleki fa 1 Petrus 3:1, 2 e taki?

⁸ De wan bun eksempre. Nofo tron den sani di wi e du abi moro krakti tapu wi famiri leki den sani di wi e taki. (Leisi 1 Petrus 3:1, 2.) Na dati Pauline kon si te fu kaba. A taki: „Mi ben sabi taki Wayne lobi wi èn taki a no ben wani broko a trow trutru. Ma di a taki dati a ben wani brokotrow, mi kon frustan taki mi ben musu du sani na Yehovah fasi. Na presi fu preiki gi en, mi ben musu du bun sani.” Pauline no ben e dwengi Wayne moro fu taki fu Bijbel èn a bigin taki nanga en fu tra sani. Wayne si taki Pauline ben kon abi moro switifasi. A boi fu den ben kon abi moro lespeki èn a no ben trangayesi den (Odo 31:18, 27, 28). Di Wayne si taki Bijbel ben kenki en frow  nanga en pikin, a bigin arki a boskopu fu Gado Wortu.​—1 Kor. 7:12-14, 16.

9. Fu san ede wi musu tan meki muiti fu yepi wi famiri?

⁹ Tan meki muiti fu yepi yu famiri. Yehovah na wan bun eksempre gi wi. „Ibri tron baka” a e gi sma na okasi fu arki a bun nyunsu fu di a wani taki den kisi têgo libi (2 Kron. 36:15). Na apostel Paulus ben taigi Timoteyus tu fu tan yepi sma. Fu san ede? Efu a ben o tan du dati, dan a ben o frulusu ensrefi nanga den sma di ben e arki en (1 Tim. 4:16). Fu di wi lobi wi famiri, meki wi wani taki den kon sabi den tru tori fu Gado Wortu. Baka wan pisi ten, den sani di Pauline ben e taki èn a fasi fa a ben tyari ensrefi ben yepi en famiri. Now en nanga en masra e dini Yehovah. Den ala tu e pionier èn Wayne na wan owruman.

10. Fu san ede wi musu abi pasensi?

¹⁰ Abi pasensi. Te wi e bigin libi soleki fa Gado wani, dan kande wi famiri no e frustan fu san ede wi e libi tra fasi now. Nofo tron a fosi sani di den e si na taki wi no e hori kerki fesa nanga den moro èn wi no e bumui moro nanga politiek. Kande son famiri e atibron na wi tapu (Mat. 10:35, 36). Ma wi no musu tapu fu yepi den. Efu wi ben o tapu fu yepi den fu frustan san wi e bribi, dan a ben o de neleki wi bosroiti kaba taki den no fiti fu kisi têgo libi. Ma Yehovah no gi wi a frantwortu fu krutu sma, a gi Yesus a wroko dati (Yoh. 5:22). Efu wi abi pasensi, dan te fu kaba wi famiri kan arki a bun nyunsu.​—Luku a faki „ Gebroiki wi website fu yepi sma”.

11-13. San wi e leri fu a fasi fa Alice taki nanga en papa nanga mama?

¹¹ Tan du san yu leri na ini Bijbel, ma sori switifasi (Odo 15:2). Luku na eksempre fu Alice. A bigin leri fu Yehovah di a ben libi na ini wan tra kondre, farawe fu en papa nanga mama di ben de na ini politiek èn di no ben bribi na ini Gado. Alice ben sabi taki a ben musu fruteri en papa nanga mama san a leri, so esi leki a man. A e taki: „Efu yu e draidrai fu taigi yu famiri taki yu abi wan tra bribi èn taki yu e libi tra fasi, dan den kan atibron moro.” Alice ben e skrifi brifi gi en papa nanga mama. A ben skrifi fu sani di ben o hari den prakseri. Fu eksempre, a ben sori den san Bijbel e taki fu lobi èn a ben aksi den fa den e denki fu a tori (1 Kor. 13:1-13). A taki den tangi fu a fasi fa den kweki en èn fa den sorgu en èn a ben e seni kado gi den. Te a ben go luku en papa nanga mama, a ben yepi en mama furu nanga a wroko na oso. Na ini a bigin, en papa nanga mama no ben lobi en te Alice ben fruteri den fu a bribi fu en.

¹² Te Alice ben de na en papa nanga mama, a ben e tan leisi Bijbel ala dei. Alice e taki: „Disi yepi mi mama fu si o prenspari Bijbel de gi mi.” Baka wan pisi ten Alice en papa bosroiti fu leri moro fu Bijbel, so taki a ben kan frustan fu san ede a meisje fu en e denki tra fasi now. A ben wani feni fowtu tu na ini Bijbel. Alice e taki: „Mi gi en wan Bijbel èn mi skrifi wan sani na ini di ben o naki en ati.” San ben de a bakapisi? Alice en papa no feni fowtu na ini Gado Wortu, ma den sani di a leisi naki en ati trutru.

¹³ Wi musu abi switifasi, ma wi musu tan du san wi leri na ini Bijbel awinsi wi e kisi tesi (1 Kor. 4:12b). Alice en mama ben gens en. A e taki: „Di mi dopu, mi mama taigi mi taki mi no ben lobi en.” San Alice du? „Na presi fu no taki fu a  tori, mi taigi mi mama na wan lespeki fasi taki mi teki a bosroiti fu tron wan Yehovah Kotoigi èn mi no ben o kenki prakseri. Mi pruberi fu sori mi mama taki mi lobi en trutru. Wi ala tu krei èn mi bori wan switi nyanyan gi en. Sensi a ten dati, mi mama ben si taki Bijbel ben yepi mi fu de wan moro bun sma.”

14. Fu san ede wi musu tan hori wisrefi na a bosroiti di wi teki, awinsi wi famiri e dwengi wi fu kenki prakseri?

¹⁴ A kan teki ten fosi wi famiri frustan o prenspari a de gi wi fu anbegi Yehovah. Di Alice bosroiti fu pionier na presi fu go na heiskoro soleki fa en papa nanga mama ben wani, dan en mama bigin krei baka. Ma Alice no kenki prakseri. A taki: „Efu yu kenki prakseri wán leisi, fu di yu famiri dwengi yu fu du dati, dan den o tan dwengi yu fu kenki prakseri na ini tra tori tu. Ma efu yu e tan hori yusrefi na a bosroiti di yu teki èn yu e tan sori switifasi, dan kande wan tu famiri fu yu o arki yu.” Na dati pasa nanga Alice. Now en papa nanga mama e pionier èn en papa na wan owruman.

15. Soleki fa Mateyus 5:14-16 nanga 1 Petrus 2:12 e sori, dan fa den ’bun di trawan e du’ kan yepi wi famiri?

¹⁵ Yehovah e hari sma kon na en nanga yepi fu den ’bun di wi e du’. (Leisi Mateyus 5:14-16; 1 Petrus. 2:12.) Efu yu trowpatna no e dini Yehovah, dan a miti wan tu sma fu a gemeente kaba? Pauline di wi taki fu en kaba, ben e kari brada nanga sisa kon na en oso, so taki en masra  Wayne ben kan leri sabi den. Wayne e fruteri fa wan brada yepi en fu si fa Yehovah Kotoigi de trutru. A taki: „A brada teki wan dei vrij fu en wroko soso fu kon luku wan plèi tapu telefisi nanga mi. Mi ben prakseri: ’A no soso Bijbel a lobi!’”

16. Fu san ede wi musu kari wi famiri fu kon na den konmakandra?

¹⁶ Wan moi fasi fa wi kan yepi wi famiri na fu kari den kon na den konmakandra fu wi (1 Kor. 14:24, 25). A fosi konmakandra pe Wayne go, ben de a Memrefesa. A ben du dati fu di a ben hori baka en wroko èn a konmakandra ben syatu. A e taki: „Mi no ben frustan a lezing bun, ma mi ben lobi fa den sma ben de. Den kon na mi, den gi mi odi èn den seki mi anu. Mi ben kan si taki den na bun sma.” Wan sisa nanga en masra ben yepi Pauline furu nanga a boi fu en na den konmakandra èn na ini a preikiwroko. Sobun, di Wayne bosroiti fu kon sabi moro fu a bribi fu Pauline, a aksi a masra fu studeri Bijbel nanga en.

17. (a) San wi no musu denki efu wi famiri no wani dini Yehovah? (b) Fu san ede wi musu tan yepi wi famiri?

¹⁷ Wi e howpu taki ala sma na ini wi famiri bigin dini Yehovah makandra nanga wi. Ma awinsi o furu muiti wi e du fu yepi wi famiri fu dini Gado, toku a no abi fu de so taki den kon na ini a tru anbegi. Efu dati de so, dan a fowtu no de na wi. Na den musu teki den eigi bosroiti. Wi no man dwengi nowan sma fu teki a bribi fu wi. Ma efu den famiri fu yu e si o koloku yu de fu di yu e dini Yehovah, dan dati kan abi furu krakti na den tapu. Begi gi den. Taki nanga den na wan switi fasi. Tan yepi den! (Tori 20:20) Yu kan de seiker taki Yehovah o blesi a muiti di yu e meki. Èn efu yu famiri arki a bun nyunsu, dan den o kisi frulusu!