1. Suma ben seti a gemeente na ini a foto Filipi?

DI NA apostel Paulus, Silas, Lukas nanga Timoteyus doro na ini a foto Filipi, den feni furu sma di ben arki a bun nyunsu fu a Kownukondre. Den fo fayafaya brada disi seti wan nyun gemeente drape. Ala den disipel bigin kon makandra, kande na ini na oso fu Lidia, wan sisa di ben lobi kari sma kon na en oso.​—Tori 16:40.

2. Sortu tesi a gemeente dati kisi syatu baka dati?

² Syatu baka dati a gemeente bigin kisi tesi. Satan meki sma di no ben lobi a tru bribi gens a preikiwroko fu Paulus nanga den mati fu en. Den grabu Paulus nanga Silas, den fon den èn den poti den na strafu-oso. Baka di den lusu, den go na den nyun disipel èn den gi den deki-ati. Paulus, Silas nanga Timoteyus gowe libi a foto, ma a sori leki Lukas tan na baka. San den nyun brada nanga sisa ben o du now? Yehovah gi den a santa yeye èn dati yepi den fu tan dini en fayafaya (Fil. 2:12). Paulus ben musu fu breiti taki den ben e tan dini Yehovah!

3. Soleki fa Filipisma 1:9-11 e sori, dan fu sortu sani Paulus ben e begi?

³ Sowan tin yari baka dati Paulus skrifi wan brifi gi a gemeente na ini Filipi. Te yu e leisi a brifi, dan yu kan si o furu Paulus ben lobi den brada nanga sisa. A skrifi: „Mi e angri fu si un alamala, fu di mi lobi unu trutru neleki fa  Krestes Yesus lobi unu” (Fil. 1:8). A taigi den taki a ben e begi gi den. A aksi Yehovah fu yepi den fu sori moro lobi, fu sabi san na den moro prenspari sani, fu no du sani di o meki sma feni fowtu na den tapu, fu no meki trawan fadon èn fu tan du san reti. Na ini a ten disi wi kan leri fu den sani di Paulus taki na ini a brifi disi. (Leisi Filipisma 1:9-11.) Na ini na artikel disi wi o luku den sani di Paulus taki na ini a brifi èn wi o luku fa wi kan fiti den rai fu en.

4. (a) Fa 1 Yohanes 4:9, 10 e sori o furu Yehovah lobi wi? (b) O furu wi musu lobi Gado?

⁴ Yehovah sori o furu a lobi wi di a seni en Manpikin kon na grontapu fu dede gi den sondu fu wi. (Leisi 1 Yohanes 4:9, 10.) A lobi di Gado sori gi wi e gi wi deki-ati fu lobi en tu (Rom. 5:8). O furu wi musu lobi Gado? Yesus piki na aksi disi di a taigi wan Fariseiman a sani disi: „Yu musu lobi Yehovah yu Gado nanga yu heri ati, nanga yu heri libi, èn nanga yu heri frustan” (Mat. 22:36, 37). Wi musu lobi Yehovah nanga wi heri ati. Wi wani taki a lobi di wi abi gi en kon moro tranga ibri dei. Paulus taigi den Kresten na ini Filipi taki den musu sori lobi „moro nanga moro”. Fa wi kan kon abi moro lobi gi Gado?

5. Fa wi kan kon abi moro lobi gi Gado?

⁵ Wi musu sabi Gado fu kan lobi en. Bijbel e taki: „A sma di no lobi trawan, no kon sabi Gado, bika Gado na lobi” (1 Yoh. 4:8). Na apostel Paulus ben sori taki wi o kon abi moro lobi gi Gado te wi ’kon sabi finifini san na den tru tori fu Gado èn te wi kon frustan krin san na a wani fu en’ (Fil. 1:9). Di wi bigin studeri Bijbel, wi ben kon lobi Yehovah aladi wi no ben sabi ala sani fu en. Ma o moro wi ben kon sabi Yehovah, o moro wi ben kon lobi en. Dati meki wi e si en leki wan prenspari sani fu abi a gwenti fu studeri Bijbel èn fu denki dipi fu san wi e leisi!​—Fil. 2:16.

6. Gi suma wi musu sori lobi tu soleki fa 1 Yohanes 4:11, 20, 21 e sori?

⁶ Fu di Gado abi so furu lobi gi wi, meki wi wani lobi wi brada nanga sisa tu. (Leisi 1 Yohanes 4:11, 20, 21.) Kande wi e denki taki a makriki fu lobi wi brada nanga sisa fu di wi alamala e anbegi Yehovah èn wi e du muiti fu de leki en. Wi e teki na eksempre fu Yesus tu di ben lobi wi so te, taki a dede gi wi. Toku son leisi a kan muilek gi wi fu lobi makandra soleki fa Bijbel taki. Luku wan eksempre na ini a gemeente na Filipi.

7. San wi e leri fu a rai di Paulus gi Eyodia nanga Sentike?

⁷ Eyodia nanga Sentike ben de tu fayafaya sisa di ben wroko „makandra nanga” na apostel Paulus. Ma den ben abi wan pikin trobi èn dati meki den no ben de mati moro. Na ini a brifi di Paulus skrifi gi a gemeente pe den tu sisa disi ben de, a kari a nen fu den èn a gi den a rai „fu meki a denki fu den kruderi nanga makandra” (Fil. 4:2, 3). Paulus ben feni en prenspari tu fu taigi a heri gemeente fu „tan du ala sani sondro fu krutukrutu èn sondro fu haritaki nanga sma” (Fil. 2:14). A musu de so taki a krin rai fu Paulus yepi den tu sisa èn ala den tra brada nanga sisa fu a gemeente fu sori moro lobi gi makandra.

8. San kan meki en muilek gi wi fu lobi wi brada nanga sisa, ma san kan yepi wi fu sori lobi?

 ⁸ Neleki Eyodia nanga Sentike a kan muilek gi wi fu sori lobi gi wi brada nanga sisa te wi e poti prakseri na den swakifasi fu den. Wi alamala e meki fowtu ibri dei. Efu wi e tan prakseri den fowtu fu trawan, dan a o moro muilek fu lobi den. Fu eksempre, efu wan brada frigiti taki a musu yepi krin a Kownukondre zaal, dan wi kan mandi. Efu wi o prakseri ala den tra fowtu di a meki, dan wi o ati bron moro nanga wi brada èn a lobi di wi abi gi en o kon kowru. Efu yu e mandi nanga wan sma na ini yu gemeente, dan prakseri a sani disi: Yehovah e si den fowtu fu yu èn fu a sma. Toku a lobi en èn a lobi yu tu. Dati meki wi musu sori lobi neleki Yehovah èn wi musu tan prakseri den bun sani fu wi brada nanga sisa. Te wi e du muiti fu lobi wi brada nanga sisa, dan wi o tan abi wánfasi.​—Fil. 2:1, 2.

9. San na wan tu fu „den moro prenspari sani”?

⁹ Nanga yepi fu a santa yeye, Yehovah meki na apostel Paulus gi den Kresten na ini Filipi a rai fu „kon sabi san na den moro prenspari sani” (Fil. 1:10). A rai disi de gi ala Kresten. Wan tu fu den moro prenspari sani na taki a nen fu Yehovah musu kon santa, den pramisi fu en musu kon tru èn taki freide nanga wánfasi musu de na ini a gemeente (Mat. 6:9, 10; Yoh. 13:35). Te den sani disi na den moro prenspari sani gi wi, dan wi e sori taki wi lobi Yehovah.

10. San wi musu du efu wi wani taki Yehovah breiti nanga wi?

¹⁰ Paulus ben taki tu dati ’sma no musu feni fowtu na wi tapu’. Disi no wani taki dati wi no o meki fowtu. Yehovah Gado na a wan-enkri sma di no e meki fowtu. Ma Yehovah o breiti nanga wi te wi e du ala san wi man fu sori moro lobi èn te wi e meki muiti fu kon sabi san na den moro prenspari sani. Wan fasi fa wi e sori lobi na te wi e du ala san wi man fu no meki trawan fadon.

11. Fu san ede wi no musu du sani di o meki trawan fadon?

¹¹ Wi musu si a warskow fu no meki trawan fadon leki wan seryusu sani. Fa wi ben kan meki wan tra sma fadon? Den sani di wi e luku noso arki, den krosi di wi e weri èn srefi a wroko di wi e du kan meki taki trawan fadon. Kande a sani di wi e du a no wan sani di fowtu. Ma efu den sani di wi e du e trobi a konsensi fu trawan èn efu den e meki den fadon, dan dati na wan seryusu sani. Yesus ben taki dati a ben o moro betre efu wan sma tai wan hebi ston na en neki, dan den trowe en go na ini se, na presi taki a meki wan fu den skapu fu en fadon!​—Mat. 18:6.

12. San wi e leri fu na eksempre fu a trowpaar di ben pionier?

¹² Luku fa wan trowpaar di e pionier fiti a rai fu Yesus. Na ini a gemeente fu den, wan trowpaar ben de di no ben dopu so langa ete. Den ala tu ben kweki na ini osofamiri pe den no ben mag du furu sani. Den ben bribi taki Kresten no ben mag go na a theater, srefi fu go luku felem di bun. Den skreki di den kon sabi taki a trowpaar di ben pionier ben go na a theater. Dati meki a trowpaar di ben pionier bosroiti fu no go moro na a theater teleki a brada nanga sisa disi ben kon moro lepi èn teleki den ben man frustan  moro krin san bun èn san no bun (Hebr. 5:14). A sani di a trowpaar disi du e sori taki den no ben taki nomo taki den lobi a brada nanga sisa, ma den ben lobi den trutru.​—Rom. 14:19-21; 1 Yoh. 3:18.

13. Fa wi kan meki taki wan sma sondu?

¹³ Wan tra fasi fa wi kan meki wan sma fadon na te wi e meki taki a sondu. Fa a sani dati kan pasa? Kon meki wi taki dati wan Bijbelstudenti meki tranga muiti fu tapu nanga a gwenti fu dringi furu sopi. A e frustan taki a moro bun efu a no dringi sopi srefisrefi. A e go na fesi esi èn a e dopu. Bakaten wan brada fu en gemeente e kari wan tu brada nanga sisa kon na en oso èn a e kari a nyun brada disi tu. A e gi en wan grasi nanga sopi èn a e taigi en: „Yu dopu now èn Yehovah e gi yu en santa yeye. A santa yeye o yepi yu fu dwengi yusrefi. Dati meki yu kan dringi pikinso sopi.” A ben o de wan sari sani efu a nyun brada disi ben o arki a rai disi di no bun. A sani disi ben kan meki taki a brada tron wan sopiman baka.

14. Fa den konmakandra e yepi wi fu fiti a rai na ini Filipisma 1:10?

¹⁴ Den konmakandra e yepi wi fu fiti a rai na ini Filipisma 1:10. Fu san ede wi kan taki dati? Den sani di wi e yere na den konmakandra e leri wi san prenspari gi Yehovah. Wan tra sani na taki wi e leri fa wi musu tyari wisrefi so taki sma no feni fowtu na wi tapu. Na den konmakandra wi e kisi deki-ati tu „fu abi lobi èn fu du bun wroko” (Hebr. 10:24, 25).  O moro wi e kisi deki-ati fu den brada nanga sisa, o moro wi o lobi den èn o moro wi o lobi wi Gado. Te wi lobi Yehovah èn den brada nanga sisa nanga wi heri ati, dan wi o du ala san wi man fu no meki wi brada nanga sisa fadon.

15. Fa wi kan ’du san reti wi heri libi langa’?

¹⁵ Paulus ben begi Yehovah fu yepi den Kresten na ini Filipi fu ’du san reti den heri libi langa’ (Fil. 1:11). A no de fu taki dati te den ben sori lobi gi Yehovah nanga en pipel, dan den ben „du san reti”. Den ben du san reti tu te den ben fruteri trawan fu Yesus èn fu a moi howpu fu den. Na ini Filipisma 2:15 Paulus e gebroiki wan tra agersitori. Paulus ben taki dati den Kresten ben „de leki sma di e skèin leti”. Na agersitori disi fiti fu di Yesus ben taki dati den disipel fu en na „a leti fu grontapu” (Mat. 5:14-16). A ben taigi den bakaman fu en tu fu ’go na sma èn fu meki den tron disipel’ èn fu ’de kotoigi fu en te na den moro farawe presi fu grontapu’ (Mat. 28:18-20; Tori 1:8). Wi e „du san reti” te wi e du ala san wi man fu du a prenspari wroko disi.

16. Fa Filipisma 1:12-14 e sori taki wi kan meki wi leti skèin srefi te wi de na ini muilek situwâsi? (Luku a fowtow tapu a kafti.)

¹⁶ Awinsi na ini sortu situwâsi wi de, wi kan meki wi leti skèin. Son leisi wan sani di e tapu wi fu preiki, kan opo a pasi gi wi fu preiki gi tra sma. Fu eksempre, na apostel Paulus ben skrifi a brifi gi den brada nanga sisa na ini Filipi, di a ben de leki strafuman na ini wan oso na Rome. A ben preiki tu gi den man di ben hori wakti gi en èn gi den sma di ben kon luku en. Paulus ben preiki fayafaya aladi a ben de na ini wan muilek situwâsi. A sani  disi ben gi den brada nanga sisa a deki-ati „fu taki fu a wortu fu Gado sondro frede”.​—Leisi Filipisma 1:12-14; 4:22.

17. Fa son brada nanga sisa e tan preiki aladi den de na ini muilek situwâsi?

¹⁷ Furu brada nanga sisa e sori deki-ati neleki Paulus. Den e tan na ini kondre pe den no mag preiki oso fu oso noso na tra presi. Dati meki den e suku tra fasi fu preiki a bun nyunsu (Mat. 10:16-20). Na ini wan fu den kondre disi a kring-opziener gi den preikiman a rai fu preiki gi den famiriman fu den, den birtisma, den pikin na skoro, den sma na wrokope nanga tra sma di den sabi. Na ini tu yari nomo, moro gemeente seti na ini a kring dati. Kande wi no e libi na ini wan kondre pe wi no mag preiki fri. Ma toku wi e leri wan moi sani fu den brada nanga sisa disi: Efu wi e du ala san wi man fu preiki gi trawan, dan Yehovah o gi wi a krakti fu tan preiki srefi te wi de na ini wan muilek situwâsi.​—Fil. 2:13.

18. San wi musu du?

¹⁸ Na ini a ten disi a prenspari taki wi fiti a rai na ini a brifi di Paulus skrifi gi den Kresten na ini Filipi. Meki wi du muiti fu kon sabi san na den moro prenspari sani, fu no du sani di o meki sma feni fowtu na wi tapu, fu no meki trawan fadon èn fu tan du san reti. Te wi e du den sani disi, dan wi o sori lobi moro nanga moro èn wi o gi grani na wi lobi-ati Papa Yehovah.