1. Sortu deki-ati Paulus gi den Kresten na ini Filipi?

KRESTEN e lon wan streilon fu kisi libi. Sonwan fu wi bigin lon no so langa pasa èn trawan de ini a streilon furu yari kaba. Awinsi o langa wi e dini Yehovah, wi musu lon te na a kaba. A brifi di na apostel Paulus skrifi gi den Kresten na ini Filipi kan gi wi deki-ati fu lon a streilon te na a kaba. Di Paulus seni a brifi gi den, dan son Kresten fu a gemeente dati ben e dini Yehovah furu yari kaba. Den ben e dini Yehovah nanga den heri ati, ma Paulus memre den taki den ben musu horidoro na ini a streilon. A ben wani taki den ben musu „lon nanga a marki fu kisi a pai fu Gado”, neleki fa en ben e du dati.​—Fil. 3:14.

2. Fu san ede wi kan taki dati Paulus gi a gemeente na ini Filipi deki-ati na a yoisti ten?

² Paulus gi den Kresten na ini Filipi a deki-ati disi na a yoisti ten. Sensi di a gemeente seti, sma bigin frufolgu den brada nanga sisa. Na ini a yari 50, Gado taigi Paulus na ini wan fisyun fu „abra kon na Masedonia”. Dati meki en nanga Silas go drape fu preiki a bun nyunsu (Tori 16:9). Drape den miti wan uma di ben nen Lidia èn di ben arki den. „Yehovah opo en ati bradi”, so taki a ben kan poti prakseri na a bun nyunsu (Tori 16:14). Syatu baka dati en nanga ala sma di ben tan na ini en oso dopu. Ma wantewante Didibri meki den kisi tesi. Wan tu man fu a foto tyari Paulus nanga Silas go na den tiriman èn den lei gi den taki den ben e tyari dyugudyugu na ini a foto. Dati meki den fon Paulus nanga Silas, den poti den na strafu-oso èn bakaten den taigi den fu komoto na ini a foto (Tori 16:16-40). Paulus nanga Silas gi abra? Nôno! San den brada nanga sisa fu a  nyun gemeente du? Den srefi horidoro! A no de fu taki dati a bun eksempre fu Paulus nanga Silas gi den deki-ati.

3. San Paulus ben sabi èn sortu aksi wi o luku?

³ Paulus ben o du ala muiti fu no gi abra (2 Kor. 4:16). Ma a ben sabi taki efu a ben wani lon a streilon te na a kaba, a ben musu tan poti prakseri na a pai di a ben o kisi. San wi kan leri fu Paulus? Sortu eksempre wi abi na ini a ten disi fu sma di tan dini Yehovah awinsi san ben miti den? Fa den eksempre disi e sori taki wi srefi man horidoro? Èn fa a howpu di wi abi kan gi wi a krakti fu no gi abra noiti?

4. Fa Paulus tan dini Yehovah fayafaya awinsi na ini sortu situwâsi a ben de?

⁴ Prakseri na ini sortu situwâsi Paulus ben de di a skrifi a brifi gi den Kresten na ini Filipi. A ben de leki strafuman na ini wan oso na ini Rome. A no ben man go na dorosei fu preiki. Ma a tan preiki gi den sma di ben kon luku en èn a ben e skrifi brifi gi gemeente di ben de farawe. Na ini a ten disi furu Kresten no man komoto na ini den oso fu di den siki noso fu di den owru. Ma den e teki ibri okasi fu preiki a bun nyunsu gi sma di e kon na den oso. Den e skrifi brifi tu gi sma di wi no man miti na ini a preikiwroko.

5. Te wi e luku san Paulus taki na Filipisma 3:12-14, dan san yepi en fu tan dini Yehovah?

⁵ Paulus no ben meki den bun sani di a du noso den fowtu di a ben meki puru en prakseri na a anbegi fu Yehovah. A taki dati a ben ’frigiti den sani di de na en baka’ so taki a ben kan ’lon go miti den sani di de na en fesi’. Sobun, a ben wani lon a streilon te na a kaba. (Leisi Filipisma 3:12-14.) San na wan tu fu den sani di ben kan puru Paulus prakseri? Wan fu den sani na taki fosi, a ben de wan prenspari sma na ini a Dyu bribi. Ma a ben si den sani di a ben du na ini a Dyu bribi leki „wan ipi doti” (Fil. 3:3-8). Wan tra sani na taki a ben sari fu di a ben frufolgu a Kresten gemeente hebi. Ma a no meki den firi dati tapu en fu dini Yehovah. Ete wan sani na taki a ben du furu kaba gi Yehovah, ma toku a no ben feni taki a no abi fu wroko so tranga moro. Paulus ben du a preikiwroko fayafaya awinsi san ben miti en. Fu eksempre, a ben de na ini strafu-oso, sma ben fon en, den trowe ston na en tapu, wan tu leisi den boto pe a ben de na ini sungu, son leisi a no ben abi nofo nyanyan, èn a no ben abi nofo krosi fu weri (2 Kor. 11:23-27). Ma awinsi omeni Paulus ben du kaba gi Yehovah èn awinsi o furu a pina, toku a ben sabi taki a ben musu go doro. Wi musu du dati tu.

6. San na wan tu sani ’di de na wi baka’ èn di wi musu frigiti?

⁶ Fa wi kan ’frigiti den sani di de na wi baka’ neleki fa Paulus ben du dati? Kande sonwan fu wi abi konsensi fonfon ete fu sani di wi du na ini a ten di pasa. Efu dati de so, dan yu kan studeri artikel di e taki fu a lusu-paiman fu Krestes. Te wi e studeri fu a tori disi, te wi e denki dipi fu en èn te wi e begi fu en, dan wi no o sari so furu moro. A kan yepi wi tu fu no abi konsensi fonfon moro fu di wi o de seiker taki Yehovah gi wi pardon. Sortu tra sani wi kan leri fu Paulus? Son sma ben abi wan wroko pe den ben e meki furu moni, ma den gowe libi a wroko fu kan du moro gi Yehovah. Fa den kan sori taki den ’frigiti den sani di de na den baka’? Den no musu prakseri a moni nanga tra gudu di den ben kan abi (Num. 11:4-6; Preik. 7:10). A kan taki wi du furu kaba gi Yehovah noso  kande wi pasa furu tesi na ini a ten di pasa. Ma toku wi musu si den sani disi leki sani di de na wi baka. A no fowtu fu prakseri fa Yehovah blesi wi èn fa a horibaka gi wi na ini a ten di pasa fu di dati kan meki taki wi tron moro bun mati fu wi Papa. Ma noiti wi musu kon abi a firi taki wi du nofo kaba èn taki wi no abi fu wroko tranga moro gi Yehovah.​—1 Kor. 15:58.

7. Soleki fa 1 Korentesma 9:24-27 e sori, dan san wi musu du fu man wini a streilon fu a libi? Gi wan eksempre.

⁷ Paulus ben frustan den wortu disi fu Yesus bun: „Du ala muiti” (Luk. 13:23, 24). Paulus ben sabi taki neleki Krestes a ben musu du muiti te na a kaba. Dati meki a agersi a libi fu wan Kresten nanga wan streilon. (Leisi 1 Korentesma 9:24-27.) Wan sma di de na ini wan streilon wani lon te na a kaba èn a no e meki tra sani puru en prakseri. Son leisi sma di de na ini wan streilon e lon na ini pasi pe wenkri de noso tra sani di kan puru den prakseri. Yu denki taki wan lonman o stop luku den sani di den wenkri abi? A no o du dati efu a wani wini! Na ini a streilon fu a libi wi no musu meki sani puru wi prakseri tu. Efu wi e dini Yehovah fayafaya neleki Paulus, dan wi o kisi a pai!

8. San na dri sani di kan meki wi lasi-ati?

⁸ Meki wi poti prakseri now na dri sani di kan meki wi lasi-ati. Dati na te sani no e pasa leki fa wi ben fruwakti, te wi no tranga moro leki fosi èn te wi e kisi tesi wan heri pisi ten. Wi kan leri furu fu sma di horidoro aladi den ben de na ini den situwâsi disi.​—Fil. 3:17.

9. Fa wi kan firi te sani no e pasa leki fa wi ben fruwakti?

⁹ Te sani no e pasa leki fa wi ben fruwakti. Wi alamala wani kisi den moi sani di Yehovah pramisi wi. Di a profeiti Habakuk ben aksi o langa a ben musu wakti fosi Yehovah tyari wan kaba kon na den ogri di ben e pasa na ini Yuda, Yehovah taigi en fu „tan fruwakti” a dei (Hab. 2:3). Ma te a gersi leki den sani di wi e fruwakti no o  kon ete, dan dati kan meki taki wi no dini Yehovah fayafaya moro. Wi kan lasi-ati srefi (Odo 13:12). Na dati pasa nanga wan tu brada nanga sisa na a pisi ten fu 1914. Na a ten dati furu salfu Kresten ben denki taki den ben o go na hemel na ini 1914. Ma di dati no pasa, dan san den brada nanga sisa di ben abi wan tranga bribi du?

10. San wan trowpaar du di sani no pasa leki fa den ben fruwakti?

¹⁰ Luku na eksempre fu tu anbegiman fu Yehovah di ben kisi so wan tesi. Brada Royal Spatz ben dopu na ini 1908 di a ben abi 20 yari. A ben de seiker taki a ben o go na hemel heri esi. Di a aksi en vriendin Pearl fu trow nanga en na ini 1911, a taigi en: „Yu sabi san o pasa na ini 1914. Efu wi o trow, dan wi musu du dati esi-esi!” A trowpaar disi tapu fu lon a streilon fu a libi di den no go na hemel na ini 1914? Nôno. A moro prenspari sani gi den ben de fu du a wani fu Gado, a no fu kisi wan pai. Den ben o tan lon a streilon te na a kaba. Èn na dati den du tu. Royal nanga Pearl tan dini Yehovah fayafaya furu yari langa, te na a dede fu den. A no de fu taki dati yu no man wakti fu si fa Yehovah o krin a nen fu en, fa a o meki ala sma sabi taki en na a Moro Hei Tiriman èn fa a o du ala san a pramisi. Yu kan de seiker taki ala den sani disi o pasa na a ten di Yehovah poti. Solanga a ten dati no doro, wi o tan dini Gado fayafaya. Noiti wi musu lasi-ati te sani no e pasa leki fa wi ben fruwakti.

11-12. Fu san ede wi kan tan dini Yehovah nanga wi heri ati awinsi wi no tranga moro leki fosi? Gi wan eksempre.

¹¹ Te yu no tranga moro leki fosi. Wan lonman musu tranga fu man lon wan streilon. Ma wan sma no abi fu tranga fu kon abi moro bribi na ini Yehovah. Fu taki en leti, furu brada nanga sisa di kon owru wani tan wroko tranga gi Yehovah (2 Kor. 4:16). Fu eksempre, di Brada Arthur Secord * ben abi 88 yari a ben dini na Betel 55 yari kaba. A ben kon swaki èn a ben siki. Wan dei wan fu den sisa di ben sorgu en go na en bedi. A luku en, dan a taigi en na wan switi fasi: „Brada Secord, yu du furu gi Yehovah.” Ma Brada Arthur no ben luku san a ben du na ini a ten di pasa. A luku a sisa, a lafu, dan a taki: „Iya dati tru. Ma a no den sani di wi du prenspari. A moro prenspari sani na fu tan gi yesi na Yehovah now.”

¹² Kande yu e dini Yehovah furu yari langa èn now yu no man du so furu moro fu di yu kon owru èn yu kon swaki. Ma no  lasi-ati. Yu kan de seiker taki Yehovah no frigiti san yu du gi en èn a de nanga tangi gi san yu du (Hebr. 6:10). Hori na prakseri taki a no te yu e du furu gi Yehovah, dan dati e sori taki yu lobi en. Ma wi e sori o furu wi lobi Yehovah te wi e tan dini en nanga prisiri èn te wi e du ala san wi man (Kol. 3:23). Yehovah sabi san wi man du. A no e fruwakti taki wi du san wi no man du.​—Mark. 12:43, 44.

13. Fa na ondrofenitori fu Brada Melnik nanga en frow Lidiya e gi wi deki-ati fu tan dini Yehovah awinsi wi e kisi furu tesi?

¹³ Te yu e kisi tesi wan heri pisi ten. Son anbegiman fu Yehovah kisi tesi nanga frufolgu furu yari langa. Anatoly Melnik * ben abi 12 yari nomo di skowtu grabu en papa go sroto èn di den seni en leki strafuman go na Siberia. Dati ben de 7000 kilometer fu Moldafia, pe den ben e tan. Wán yari baka dati den seni Brada Melnik, en mama, en granpapa nanga en granmama go na Siberia tu. Wan pisi ten baka dati, den ben man go na den konmakandra na ini wan tra dorpu, ma den ben musu waka 30 kilometer na ini snew èn a ben kowru srefisrefi. Bakaten Brada Melnik ben de na ini strafu-oso dri yari langa. A heri pisi ten dati a no ben man de makandra nanga en frow Lidiya nanga en meisje di ben abi wán yari nomo. Aladi Brada Melnik nanga en famiri kisi tesi so furu yari langa, den tan dini Yehovah. Now Brada Melnik abi 82 yari èn a de wan memre fu a Bijkantoro Komte fu Centraal Asia. Meki wi teki na eksempre fu Brada Melnik nanga en frow Lidiya. Meki wi dini Yehovah fayafaya èn meki wi horidoro soleki fa wi du na ini a ten di pasa.​—Gal. 6:9.

14. San Paulus ben musu du fu kan kisi en pai?

¹⁴ Paulus ben abi a frutrow taki a ben o lon a streilon te na a kaba èn taki a ben o kisi a pai. Fu di a ben de wan salfu Kresten, meki a ben abi a howpu fu „libi na ini hemel”. Ma fu man kisi a pai dati, a ben sabi taki a ben musu tan „lon” (Fil. 3:14). Paulus gebroiki wan moi agersitori fu yepi den Kresten na ini Filipi fu tan poti prakseri na a pai di den ben o kisi.

15. Sortu agersitori Paulus gebroiki fu gi den Kresten na ini Filipi deki-ati fu tan „lon”?

¹⁵ Paulus ben memre den Kresten na ini  Filipi taki te fu kaba den ben o libi na ini hemel (Fil. 3:20). Fu san ede den ben musu hori a sani dati na prakseri? Na ini a ten dati furu sma ben wani tron borgu fu Rome fu di dati ben e tyari furu wini kon gi den. * Ma salfu Kresten ben de borgu fu wan moro bun regering di ben o tyari moro wini kon gi den. A ben abi moro waarde fu de wan borgu fu a Kownukondre na hemel leki fu de wan borgu fu Rome! Dati meki Paulus gi den Kresten na ini Filipi a deki-ati fu ’tyari densrefi na wan fasi di fiti a bun nyunsu fu Krestes’. A Griki wortu di vertaal nanga „tyari unsrefi” na ini a tekst disi wani taki „tyari yusrefi leki borgu fu wan kondre” (Fil. 1:27). Salfu Kresten na ini a ten disi de wan moi eksempre gi wi. Den e tan du muiti fu kisi têgo libi na ini hemel.

16. Awinsi wi abi a howpu fu libi na ini hemel noso na grontapu, san wi musu tan du soleki fa Filipisma 4: 6, 7 e taki?

¹⁶ Awinsi wi abi a howpu fu libi fu têgo na ini hemel noso na ini wan paradijs na grontapu, wi musu tan meki muiti fu kisi a pai. Awinsi na ini sortu situwâsi wi de, wi no musu prakseri den sani di de na wi baka èn wi no musu meki nowan sani tapu wi fu dini Yehovah (Fil. 3:16). Kande den sani di wi ben e fruwakti no kon ete noso kande wi no tranga moro leki fosi. Kande wi e kisi tesi nanga frufolgu furu yari langa. Awinsi san e miti wi, wi ’no musu broko wi ede nanga nowan sani’. Ma wi musu begi Gado fayafaya, dan a o gi wi a freide di bigi moro iniwan sani di libisma man frustan.​—Leisi Filipisma 4:6, 7.

17. San wi o luku na ini a tra artikel?

¹⁷ Neleki fa wan lonman e meki moro muiti te a e si taki a e doro a kaba fu a streilon, na so wi musu meki moro muiti tu te wi e doro a kaba fu a streilon fu a libi. Awinsi san e miti wi, meki wi du ala san wi man fu kisi den moi sani di Gado pramisi wi. San wi musu du fu lon a streilon na a yoisti fasi? Wi musu „kon sabi san na den moro prenspari sani” (Fil. 1:9, 10). A tra artikel o taki fu a tori disi.