YU WANI kisi wan grani na ini a gemeente di yu no man du now? Kande na wan grani di wan tra sma abi. Noso kande na wan frantwortu noso grani di yu ben abi fosi, ma di yu no man du moro. Kande yu no man du so furu moro fu di yu kon owru, yu kon siki, na ekonomia na ini a kondre no e drai bun noso kande yu abi tra frantwortu na ini yu osofamiri. Noso a kan taki yu ben abi fu tapu nanga wan wroko di yu ben e du wan langa ten fu di kenki kon na ini na organisâsi. Kande yu e firi now taki yu no e du ala san yu man na ini a diniwroko fu Gado. Wi kan frustan taki na ini den sortu situwâsi disi yu kan firi brokosaka. Ma san kan yepi yu fu no lasi-ati, fu no atibron èn fu no dyarusu srefi tapu trawan? Fa yu kan tan abi prisiri?

Na eksempre fu Yohanes a Dopuman kan leri wi fa wi kan tan abi prisiri. Yohanes ben abi wan tu moi grani, ma kande a no ben fruwakti taki son sani ben o pasa nanga en. Kande a no ben fruwakti taki a ten di a ben o tan na ini strafu-oso ben o moro langa leki a ten di a preiki fu Yesus. Toku a tan du en wroko nanga prisiri èn a ben tan abi prisiri en heri libi langa. San yepi en? Èn fa wi kan tan abi prisiri awinsi sani no e go leki fa wi ben fruwakti?

Na a pisi ten fu april fu a yari 29 Yohanes bigin du a wroko di Yehovah ben gi en. A ben musu sreka sma gi a ten te a Mesias ben o kon. A ben e taki: „Un musu abi berow, bika a Kownukondre fu hemel kon krosibei” (Mat. 3:2; Luk. 1:12-17). Furu sma arki en. Fu taki en leti, ipi-ipi sma ben kon fu farawe fu arki a boskopu fu en èn furu fu den ben abi berow èn den teki dopu. Yohanes ben warskow den heimemre kerki fesiman tu taki Gado ben o strafu den efu den no ben o kenki (Mat. 3:5-12). A moro prenspari sani di Yohanes du di a ben e du en diniwroko, na taki a dopu Yesus na ini oktober fu a yari 29. Sensi a ten dati Yohanes gi den sma deki-ati fu waka baka Yesus, a Mesias di Gado ben pramisi.​—Yoh. 1:32-37.

Yesus ben taki fu Yohanes: „Fu ala den sma di ben de na libi, nowan bigi moro Yohanes a  Dopuman” (Mat. 11:11). Wi kan de seiker taki Yohanes ben breiti nanga den blesi di a ben kisi. Neleki Yohanes, furu brada nanga sisa na ini a ten disi e kisi moi blesi fu Gado. Luku na eksempre fu wan brada di nen Terry. En nanga en wefi Sandra e du a furuten diniwroko moro leki 50 yari kaba. Terry e taki: „Mi kisi furu moi grani. Mi dini leki pionier, na Betel, leki spesrutu pionier, kring-opziener, distrikt-opziener èn now mi e dini baka leki spesrutu pionier.” A e gi wi prisiri te wi e kisi grani na ini na organisâsi. Ma na eksempre fu Yohanes o leri wi taki wi musu meki muiti fu tan abi prisiri srefi te wi situwâsi kenki.

Wan prenspari sani di yepi Yohanes a Dopuman fu tan abi prisiri, na taki ala ten a ben de nanga tangi gi den grani di a ben abi. Luku wan eksempre. Baka di Yesus dopu, Yohanes no ben abi so furu bakaman moro fu di furu sma bigin waka baka Yesus. Fu di den disipel fu Yohanes ben e broko den ede nanga a sani disi, meki den taigi en: „A man dati e dopu sma èn ala sma e go na en” (Yoh. 3:26). Yohanes piki den: „Na a trowmasra abi a trowmisi. Ma te a mati fu a trowmasra e tanapu drape èn e yere a trowmasra, dan a e prisiri trutru fu yere a sten fu a trowmasra. Fu dati ede mi e prisiri srefisrefi” (Yoh. 3:29). Yohanes no ben e strei nanga Yesus. A no ben denki taki a wroko fu en no ben prenspari moro fu di Yesus ben abi wan moro prenspari wroko. Na presi fu dati, Yohanes ben tan abi prisiri fu di a ben abi warderi gi a frantwortu di a ben abi leki „mati fu a trowmasra”.

A fasi fa Yohanes ben e si sani yepi en fu de koloku awinsi a wroko fu en no ben makriki. Fu eksempre, Yohanes ben de wan Nasireisma sensi di a gebore. Dati meki a no ben mag dringi win (Luk. 1:15). Yesus ben taki fu a libi di Yohanes ben abi: ’Yohanes kon èn a no ben nyan noso dringi.’ Ma Yesus nanga den disipel fu en no ben de Nasireisma èn dati meki den ben man libi leki ala tra sma (Mat. 11:18, 19). Boiti dati, Yohanes no ben du wondru, aladi a ben sabi taki den disipel fu Yesus ben man du wondru (Mat. 10:1; Yoh. 10:41). Sonwan fu den disipel dati ben de bakaman fu Yohanes fosi. Yohanes no ben poti tumusi furu prakseri na den sani disi, ma a tan du a wroko di Yehovah ben gi en fayafaya.

Efu wi e warderi a wroko di wi mag du gi Yehovah now, dan wi o tan abi prisiri tu. Terry di wi taki fu en kaba, e taki: „Ibri wroko di mi ben kisi, mi ben suku fu du bun.” Te a e prakseri san a ben man du na ini a furuten diniwroko, a e taki: „Te mi e prakseri ala den wroko di mi du, dan na soso prisiri mi e prisiri.”

Wi kan dini Gado nanga moro prisiri te wi e prakseri taki awinsi sortu frantwortu wi abi, wi abi a grani fu „wroko makandra nanga Gado” (1 Kor. 3:9). Te yu kisi wan moi sani di abi furu waarde, dan a o tan moi te yu e sorgu en bun. Na so a de tu taki wi o tan abi prisiri te wi e hori na prakseri taki a de wan bigi grani fu wroko makandra nanga Yehovah. Wi no o teki wisrefi gersi nanga tra sma. Wi no o denki taki a wroko di Yehovah gi wi no prenspari so, leki a wroko di a gi trawan.​—Gal. 6:4.

A kan taki Yohanes ben sabi taki a no ben o du a wroko fu en langa. Ma kande a no ben sabi taki na so esi a wroko fu en ben o kon na wan kaba (Yoh. 3:30). Na ini a yari 30, siksi mun baka di Yohanes dopu Yesus, Kownu Herodes poti en na strafu-oso. Toku Yohanes tan gi sma leri (Mark. 6:17-20). San yepi en fu tan abi prisiri, awinsi a situwâsi fu en kenki? A tan poti prakseri na sani di prenspari gi Yehovah.

Di Yohanes ben de na strafu-oso, a yere ala den sani di Yesus ben e du (Mat. 11:2; Luk. 7:18). Yohanes ben abi na overtoigi taki Yesus ben de a Mesias, ma kande a ben aksi ensrefi efu Yesus ben o du ala den sani di Gado Wortu ben e taki fu a Mesias. Fu eksempre, Gado Wortu e taki dati a Mesias ben o tron kownu. Sobun, kande Yohanes ben aksi ensrefi efu Yesus ben o tron kownu heri esi. Kande a ben  denki tu taki Yesus ben o puru en na strafu-oso te a ben o tron kownu. Fu di Yohanes ben wani sabi san Yesus ben o du, a seni tu disipel fu en fu go aksi Yesus a sani disi: „Na yu na a sma di musu kon, noso wi musu fruwakti wan tra sma?” (Luk. 7:19) Yesus seni den go baka na Yohanes fu taigi en: „Den breni sma e si, den malengri sma e waka, den gwasiman e kon krin, den dofu sma e yere, den dede sma e kisi wan opobaka, èn den pôti sma e yere a bun nyunsu” (Luk. 7:20-22). Di den drai go baka na Yohanes, dan a no de fu taki dati a ben arki bun di den fruteri en fa Yesus ben e du wondru fu dresi den sikisma.

A boskopu di den disipel tyari gi Yohanes gi en deki-ati. A sani disi sori en taki Yesus ben e meki den profeititori fu a Mesias kon tru. Aladi Yesus no ben o puru en na strafu-oso, toku Yohanes ben sabi taki a wroko fu en no ben de fu soso. A ben de nanga prisiri aladi a ben de na ini strafu-oso.

Efu wi e poti prakseri na a dini di wi e dini Yehovah, neleki fa Yohanes ben e du dati, dan wi o horidoro nanga pasensi èn nanga prisiri (Kol. 1:9-11). Wi o man horidoro te wi e leisi Bijbel èn te wi e denki dipi fu san wi e leisi. Disi o yepi wi fu si taki ala wroko di wi e du gi Gado no de fu soso (1 Kor. 15:58). Sandra e taki: „Fu di mi e leisi wan kapitel fu Bijbel ala dei, meki mi tron wan moro bun mati fu Yehovah. A yepi mi fu tan prakseri en, na presi fu denki mi srefi.” Wi kan poti prakseri tu na a wroko di wi brada nanga sisa e du gi Yehovah na heri grontapu. Disi o yepi wi fu no denki wisrefi nomo, ma fu prakseri fa a wroko fu Yehovah e go na fesi. Sandra e taki: „A JW Broadcasting^® programa di e kon ala mun yepi wi fu kon sabi na organisâsi moro bun èn a e yepi wi fu tan du wi wroko nanga prisiri.”

Na ini a syatu pisi ten di Yohanes ben e preiki, a ben e du a wroko disi nanga „a faya nanga a krakti fu Elia” èn neleki Elia a ben „abi den srefi firi leki wi” (Luk. 1:17; Yak. 5:17). Neleki Yohanes, wi wani abi warderi gi a wroko di wi mag du gi Yehovah èn wi wani tan poti prakseri na sani di prenspari gi Yehovah. Disi o yepi wi fu dini Yehovah nanga prisiri, awinsi san e pasa.