1. San David ben taki fu Yehovah?

FU SAN EDE wi kan taki dati Yehovah abi sakafasi? Fu di David ben taki wan leisi: „Yu o gi mi yu skelt fu frulusu mi. Na a sakafasi fu yu e meki mi kon bigi” (2 Sam. 22:36; Ps. 18:35). Kande David ben prakseri a dei di a profeiti Samuel kon na a oso fu en papa fu salfu en leki kownu fu Israel. Aladi David ben de a moro yonguwan fu den aiti manpikin, toku Yehovah teki en fu tron kownu na ini a presi fu Saul.​—1 Sam. 16:1, 10-13.

2. San wi o luku na ini na artikel disi?

² A no de fu taki dati David ben o agri nanga den wortu disi na ini Psalm 113:6-8, di e taki fu Yehovah: „A e saka ensrefi fu luku hemel nanga grontapu. A e opo a mofinawan puru na doti srefi. A e opo a pôtiwan . . . fu meki a sidon nanga den heihei sma.” Na ini na artikel disi wi o taki fosi fa Yehovah sori sakafasi èn fa wi kan teki na eksempre fu en. Baka dati wi o luku san wi kan leri fu Kownu Saul, a profeiti Danièl nanga Yesus.

3. San Yehovah du gi wi èn san dati e sori?

³ Den sani di Yehovah e du gi sondu libisma e sori taki a abi sakafasi. A de klariklari fu teki na anbegi fu wi èn fu si wi leki en mati (Ps. 25:14). Yehovah meki en Manpikin dede gi den sondu fu wi so taki wi kan tron en mati. Yehovah sori trutru sari-ati gi wi!

4. Fa Yehovah meki wi èn fu san ede?

 ⁴ Luku wan tra moi fasi fa Yehovah sori sakafasi. A meki wi na so wan fasi, taki wi kan teki wi eigi bosroiti èn a meki wi soleki fa en de. Ma a no ben abi fu du dati. Aladi wi pikin na ini Yehovah ai, toku den bosroiti fu wi prenspari gi en. A wani taki wi srefi bosroiti fu dini en fu di wi lobi en nanga wi heri ati èn fu di wi sabi taki a bun fu gi yesi na en (Deut. 10:12; Yes. 48:17, 18). Wi de nanga tangi trutru taki Yehovah abi sakafasi.

5. Fa Yehovah e leri wi fu abi sakafasi? (Luku a fowtow na tapu a kafti.)

⁵ Te wi e luku ala den sani di Yehovah du gi wi, dan a e leri wi fu abi sakafasi tu. Yehovah na a moro koni sma na hemel nanga grontapu. Toku a de klariklari fu arki san tra sma abi fu taki. Fu eksempre, Yehovah meki en Manpikin yepi en fu meki ala tra sani (Odo 8:27-30; Kol. 1:15, 16). Èn aladi Yehovah na a moro makti sma di de, toku a e gi tra sma frantwortu tu. Fu eksempre, a poti Yesus leki Kownu fu a Kownukondre èn a o gi den 144.000 sma di o tiri makandra nanga Yesus frantwortu tu (Luk. 12:32). Yehovah leri Yesus fu de wan bun Kownu nanga Granpriester (Hebr. 5:8, 9). Boiti dati, a e leri den wan di o tiri makandra nanga Yesus fa den musu tyari den frantwortu fu den. Ma dati no wani taki dati Yehovah e sidon luku heri dei fa den e du a wroko fu den. A e meki den srefi du a wroko fu di a e frutrow taki den o du a wani fu en.​—Openb. 5:10.

6-7. Fa papa, mama nanga owruman kan teki na eksempre fu Yehovah?

⁶ Efu wi hemel Papa di no abi a yepi  fu sma fanowdu, e gi tra sma frantwortu, dan wi musu du a srefi tu! Fu eksempre, yu na wan papa, wan mama noso wan gemeente owruman? Neleki Yehovah unu kan gi tra sma frantwortu tu, ma dwengi yusrefi fu no sidon luku ala yuru fa den e du a wroko. Te yu e teki na eksempre fu Yehovah, dan yu o man klari furu wroko, yu o leri tra sma fu tyari frantwortu èn yu o yepi den fu si taki den man du a wroko bun (Yes. 41:10). Sortu tra sani den sma di abi frantwortu kan leri fu Yehovah?

⁷ Bijbel e sori taki Yehovah wani sabi fa den engel e denki (1 Kow. 22:19-22). Papa nanga mama, fa unu kan teki na eksempre fu Yehovah? Te yu gi den pikin fu yu wan wroko fu du, dan yu kan aksi den fa den ben o wani du en. Efu a fiti, dan yu kan meki den du a wroko soleki fa den taki.

8. Fa Yehovah sori taki a ben abi pasensi nanga Abraham nanga Sara?

⁸ Wan tra fasi fa Yehovah e sori taki a abi sakafasi, na taki a abi pasensi. Fu eksempre, Yehovah abi pasensi nanga den anbegiman fu en di e aksi en na wan lespeki fasi fu san ede a teki son bosroiti. Yehovah arki di Abraham ben aksi en efu a ben o de wan koni sani fu pori Sodom nanga Gomora (Gen. 18:22-33). Èn Yehovah no atibron taki Sara lafu di a taki dati a ben o kon de nanga bere tapu en owrudei (Gen. 18:10-14). Na presi fu dati, a tan sori lespeki gi en.

9. San papa, mama nanga owruman kan leri fu Yehovah?

⁹ Un papa, mama nanga owruman, san unu kan leri fu na eksempre fu Yehovah? San yu e du te yu pikin noso son sma na ini a gemeente no e agri nanga den bosroiti fu yu? Yu wani sori den nomonomo taki a bosroiti di yu teki bun? Noso yu e pruberi fu frustan fa den e si sani? Te papa, mama nanga owruman e teki na eksempre fu Yehovah, dan sani o go bun na ini na osofamiri èn na ini a gemeente. Teleki now wi luku fa Yehovah sori sakafasi èn fa wi kan teki na eksempre fu en. Now wi o luku san wi kan leri fu tra sma na ini Bijbel.

10. Fa Yehovah e gebroiki na eksempre fu tra sma fu leri wi prenspari sani?

¹⁰ Yehovah, wi „Gran Leriman”, meki sma skrifi tori na ini en Wortu fu leri wi prenspari sani (Yes. 30:20, 21). Wi kan leri furu te wi e denki dipi fu sma na ini Bijbel di ben abi sakafasi nanga tra moi fasi. Wi kan leri furu tu te wi e luku san pasa nanga den wan di no ben abi den moi fasi disi.​—Ps. 37:37; 1 Kor. 10:11.

11. San wi kan leri fu na eksempre fu Saul?

¹¹ Prakseri san pasa nanga Kownu Saul. Di a ben moro yongu, a ben abi sakafasi. A ben sabi san a ben man èn san a no ben man. A ben denki srefi taki a no ben o man tyari son frantwortu (1 Sam. 9:21; 10:20-22). Ma baka di Saul tron Kownu a kon kisi heimemre èn a du sani di a no ben mag du. Wan leisi a no ben abi pasensi fu wakti tapu a profeiti Samuel. Na presi fu sori sakafasi èn fu wakti tapu Yehovah fu yepi en pipel, Saul tyari wan ofrandi aladi a no  ben mag du dati. A sani disi meki taki Yehovah no ben feni en bun moro èn a poti wan tra sma leki kownu (1 Sam. 13:8-14). Dati meki wi musu luku bun taki wi no e du sani di wi no abi a reti fu du.

12. Fu san ede Danièl na wan bun eksempre gi wi?

¹² Meki wi luku now san wi kan leri fu a bun eksempre fu a profeiti Danièl. En heri libi langa Danièl ben abi sakafasi èn ala ten a ben e suku rai na Yehovah. Fu eksempre, di a ben musu fruklari a dren fu Nebukadnesar, a no teki a grani. Na presi fu dati a gi ala grani na Yehovah (Dan. 2:26-28). San disi e leri wi? Efu brada nanga sisa lobi wan lezing fu yu noso efu yu abi bun bakapisi na ini a preikiwroko, dan yu musu gi Yehovah ala grani. Wi musu hori na prakseri taki wi no ben o man du den sani disi efu Yehovah no ben yepi wi (Fil. 4:13). Te wi e du dati, dan wi e teki na eksempre tu fu Yesus. Fa so?

13. San wi e leri fu Yesus te wi e luku san a taki na Yohanes 5:19, 30?

¹³ Aladi Yesus na a Manpikin fu Gado, toku a ben sabi taki a ben abi a yepi fu Yehovah fanowdu. (Leisi Yohanes 5:19, 30.) Noiti a ben wani teki a makti fu en hemel Papa abra. Filipisma 2:6 e taki dati Yesus ’no prakseri fu teki a makti fu Gado abra nanga tranga fu kan de a srefi leki en’. Ala ten Yesus ben e saka ensrefi na ondro en Papa. A ben frustan san a ben mag du èn san a no ben mag du.

14. Di sma aksi Yesus fu du wan sani di a no ben mag du, dan san a piki den?

¹⁴ Luku san Yesus du di den disipel Yakobus, Yohanes nanga den mama go aksi en fu du wan sani gi den di a no ben mag du. Wantewante Yesus taigi den taki na en hemel Papa wawan kan bosroiti suma o sidon na Yesus en reti-anusei èn na en kruktu-anusei na ini a Kownukondre (Mat. 20:20-23). Yesus sori taki a ben sabi taki a no ben abi a frantwortu fu du son sani. A ben abi sakafasi. Noiti a du wan sani di Yehovah no taigi en fu du (Yoh. 12:49). Fa wi kan teki na eksempre fu Yesus?

15-16. Fa wi kan du san skrifi na 1 Korentesma 4:6?

 ¹⁵ Wi e sori sakafasi neleki Yesus te wi e du san skrifi na 1 Korentesma 4:6. A tekst e taki: „No du sani di no skrifi na ini den Santa Buku.” Sobun, te sma e aksi wi rai, dan wi no wani dwengi den fu si sani soleki fa wi e si sani èn wi no wani taki sani sondro fu denki. Na presi fu dati wi musu sori den sortu rai de na ini Bijbel èn na ini den buku fu na organisâsi fu wi. Na a fasi disi wi e sori taki wi e frustan taki wi no sabi ala sani. Te wi e du disi, dan wi abi sakafasi èn wi e sori taki wi e frustan taki ala ten a rai fu Yehovah bun moro di fu wi.​—Openb. 15:3, 4.

¹⁶ Wi e sori sakafasi fu di wi wani gi grani na Yehovah. Ma tra reide de fu san ede wi musu abi sakafasi. Now wi o luku fa sakafasi kan gi wi prisiri èn fa a kan yepi wi fu feni en nanga trawan.

17. Fu san ede wi kan taki dati sma di abi sakafasi de koloku?

¹⁷ Te wi abi sakafasi, dan wi o de moro koloku. Fu san ede wi kan taki dati? Te wi sabi taki wi no man du ala sani, dan wi o de nanga tangi te tra sma e yepi wi. Fu eksempre, prakseri den tin gwasiman di Yesus ben dresi. Wán nomo drai kon baka fu taigi Yesus tangi taki a dresi en fu a takru siki dati. Noiti a man disi ben o man dresi ensrefi. A man disi di ben abi sakafasi ben de nanga tangi taki a kisi yepi èn a gi Gado glori.​—Luk. 17:11-19.

18. Fa sakafasi e yepi wi fu feni en nanga tra sma? (Romesma 12:10)

 ¹⁸ Sma di abi sakafasi man feni en nanga trawan èn den abi bun mati. Fu san ede? Den man si den moi fasi fu tra sma èn te den e gi den wan wroko fu du, den e sori den taki den e frutrow den. Sma di abi sakafasi breiti te tra sma e du wan wroko bun, den e prèise den èn den e gi den grani.​—Leisi Romesma 12:10.

19. San na wan tu reide fu san ede wi no musu abi heimemre?

¹⁹ Ma sma di abi heimemre feni en muilek fu prèise trawan fu di den wani kisi a grani. Den lobi strei nanga tra sma. Na presi taki den e leri sma fu teki frantwortu, den wani du ala sani srefi fu di den feni taki den man du sani moro bun. Nofo tron wan sma di abi heimemre wani de a moro prenspari sma èn a e dyarusu te trawan man du sani moro bun leki en (Gal. 5:26). Furu sma no wani de mati fu den sortu sma disi. Efu wi si taki wi e du sonwan fu den sani disi, dan wi musu begi Yehovah fayafaya fu yepi wi fu ’kenki wi denki’ so taki wi no tron heimemre sma.​—Rom. 12:2.

20. Fu san ede wi musu abi sakafasi?

²⁰ Wi de nanga tangi gi a moi eksempre fu Yehovah! Den sani di a du gi den anbegiman fu en e sori taki a abi sakafasi èn dati meki wi wani de leki en. Boiti dati, wi wani teki na eksempre fu sma na ini Bijbel di ben abi sakafasi. Ala ten wi musu gi Yehovah a grani nanga a glori di a musu kisi (Openb. 4:11). Te wi e du ala den sani disi, dan wi o de mati fu Yehovah fu têgo, bika a lobi sma di abi sakafasi.