1. Sortu grani wi abi?

A DE wan bigi grani fu de wan memre fu a gemeente fu Yehovah! Wi de koloku fu di wi e dini Yehovah makandra nanga wi brada nanga sisa na ini a gemeente èn wi abi wánfasi. San yu kan du gi a gemeente?

2. Sortu agersitori na apostel Paulus gebroiki na ini wan tu fu den brifi fu en?

² Wi kan leri furu fu a tori disi te wi e luku na agersitori di na apostel Paulus gebroiki na ini wan tu fu den brifi di a skrifi. Na ini ibriwan fu den brifi dati, Paulus agersi a gemeente nanga wan libisma skin. A taki tu dati den sma na ini a gemeente de leki den difrenti pisi fu wan skin.​—Rom. 12:4-8; 1 Kor. 12:12-27; Ef. 4:16.

3. San na den dri sani di wi o luku na ini na artikel disi?

³ Ibriwan fu wi de fanowdu na ini a gemeente fu Yehovah. Wi alamala kan gi trawan deki-ati. Awinsi fu sortu ras noso lo wi de èn awinsi wi gudu noso pôti, wi alamala prenspari na ini a gemeente. Na ini na artikel disi wi o taki fu dri sani di wi kan leri fu na agersitori fu Paulus. A fosi sani di wi o luku, na taki ibriwan fu wi prenspari gi a gemeente fu Yehovah. Baka dati wi o si san wi kan du te wi abi a firi leki na fu soso wi de na ini a gemeente. Leki lasti wi o luku fu san ede wi musu tan meki muiti fu gi trawan deki-ati na ini a gemeente.

4. San Romesma 12:4, 5 e leri wi?

⁴ A fosi sani di wi kan leri fu na agersitori fu Paulus na taki ibriwan fu wi prenspari gi a gemeente fu Yehovah. Paulus e bigin na agersitori nanga den wortu disi: „Wi abi wán skin di abi furu pisi, ma den pisi fu a skin no e du a srefi wroko. Na so wi di de wán nanga Krestes na wán skin tu aladi wi de nanga furu sma èn wi leki pisi fu a skin abi makandra fanowdu” (Rom. 12:4, 5). San Paulus wani leri wi? Aladi wi e du difrenti sani na ini a gemeente, toku ibriwan fu wi prenspari.

5. Suma Yehovah poti fu sorgu gi a gemeente?

⁵ Kande wi e denki taki na soso den brada di e teki fesi na ini a gemeente prenspari (1 Tes. 5:12; Hebr. 13:17). A tru taki nanga yepi fu Krestes, Yehovah poti den man disi fu sorgu gi a gemeente (Ef. 4:8). Den man disi na den brada fu a Tiri Skin, den yepiman fu a Tiri Skin, brada fu den Bijkantoro komte, kring-opziener, den leriman fu den skoro fu na organisâsi, den gemeente owruman nanga den dinari ini a diniwroko. Nanga yepi fu en santa yeye Yehovah gi ala den man disi a frantwortu fu sorgu gi den skapu fu en èn fu tranga a gemeente.​—1 Petr. 5:2, 3.

6. Soleki fa 1 Tesalonikasma 2:6-8 e sori, dan san den brada di abi frantwortu na ini a gemeente e du?

⁶ Wi anu nanga wi futu na tu difrenti pisi fu a skin, ma den sani di wi e du nanga den e tyari wini gi a heri skin. Na so a de tu taki den brada di e teki fesi abi difrenti frantwortu na ini a gemeente, ma a wroko di den e du e tranga a heri gemeente. Den no e suku fu kisi grani fu libisma. Na presi fu dati, den e meki muiti fu tranga a bribi fu den brada nanga sisa èn fu gi den deki-ati. (Leisi 1 Tesalonikasma 2:6-8.) Wi e taki Yehovah tangi gi den lepi brada disi di no e suku den eigi bun!

7. Sortu blesi furu sma di e du a furuten diniwroko e kisi?

⁷ Son sma na ini a gemeente e dini leki zendeling, spesrutu pionier noso gewoon pionier. Furu brada nanga sisa na heri grontapu bosroiti fu du a pionierwroko. Na so den yepi furu sma fu tron disipel fu Krestes Yesus. Furu fu den pionier disi no gudu, ma toku Yehovah blesi den nanga furu bun sani (Mark. 10:29, 30). Wi lobi den brada nanga sisa disi èn wi breiti taki den de na ini a gemeente!

8. Fu san ede ibri preikiman fu a bun nyunsu prenspari gi Yehovah?

⁸ Na soso den brada di e teki fesi nanga den wan di e du a furuten diniwroko prenspari gi a gemeente? Nôno! Ala preikiman fu a bun nyunsu prenspari gi Gado èn gi a gemeente (Rom. 10:15; 1 Kor. 3:6-9). Fu taki en leti, wan fu den moro prenspari wroko di a gemeente abi na fu meki sma tron disipel fu Yesus Krestes (Mat. 28:19, 20; 1 Tim. 2:4). Ala preikiman na ini a gemeente, den wan di dopu nanga den wan di no dopu, e pruberi fu poti a wroko disi na a fosi presi na ini den libi.​—Mat. 24:14.

9. Fu san ede wi lobi den sisa na ini a gemeente?

⁹ Yehovah gi sisa prenspari wroko tu na ini a gemeente. Na ini a gemeente  yu abi wefi, mama, uma di masra dede kaba nanga sisa di no trow. Yehovah e warderi ala den sisa disi di e tan dini en. Bijbel e taki fu furu uma di ben prisiri Yehovah ati. Den uma disi ben koni, den ben abi wan tranga bribi, den ben dini Yehovah fayafaya, den ben abi deki-ati, den ben lobi fu gi sma sani èn den ben e du furu bun sani gi trawan (Luk. 8:2, 3; Tori 16:14, 15; Rom. 16:3, 6; Fil. 4:3; Hebr. 11:11, 31, 35). Wi breiti taki wi abi sisa na ini a gemeente di abi den srefi moi fasi disi!

10. Fu san ede wi lobi den owru brada nanga sisa na ini a gemeente?

¹⁰ Wi breiti tu nanga den owrusma na ini a gemeente. Son gemeente abi owru brada nanga sisa di dini Yehovah den heri libi langa. Tra owrusma kon leri sabi Yehovah no so langa pasa. Furu fu den owru brada nanga sisa disi abi problema nanga den gosontu. Dati meki den no man du furu na ini a gemeente èn na ini a preikiwroko. Toku den e du san den man èn den e gebroiki den krakti fu gi trawan deki-ati èn fu leri den sani. Wi e leri furu fu na ondrofeni di den abi. Den warti trutru gi Yehovah èn gi wi!​—Odo 16:31.

11-12. Fa den yonguwan na ini yu gemeente e gi yu deki-ati?

¹¹ Prakseri den yonguwan na ini a gemeente. Den e kisi furu tesi na ini na ogri grontapu disi pe furu sma abi a denki fu Satan Didibri (1 Yoh. 5:19). Toku den yonguwan disi e gi piki na den konmakandra, den e preiki èn den no e frede fu taki fu a bribi fu den. Dati e gi wi deki-ati. Iya, unu yonguwan prenspari gi Yehovah èn gi a gemeente!​—Ps. 8:2.

¹² Ma son brada nanga sisa feni taki na fu soso den de na ini a gemeente. San kan yepi den fu si taki den prenspari gi a gemeente? Wi o taki fu dati now.

13-14. Fu san ede son sma e denki taki na fu soso den de na ini a gemeente?

¹³ Now wi o taki fu a di fu tu sani di wi kan leri fu na agersitori fu Paulus. A e taki fu wan problema di furu sma abi na ini a ten disi. A muilek gi den fu bribi taki den prenspari gi a gemeente. Paulus skrifi: „Efu a futu ben o taki: ’Fu di mi no de wan anu, meki mi no de wan pisi fu a skin’, dan dati no wani taki dati a no de wan pisi fu a skin. Efu a yesi ben o taki: ’Fu di mi no de wan ai, meki mi no de wan pisi fu a skin’, dan dati no wani taki dati a no de wan pisi fu a skin” (1 Kor. 12:15, 16). San Paulus ben wani leri wi?

¹⁴ Efu yu e teki yusrefi gersi nanga tra sma na ini a gemeente, dan yu kan kisi a denki taki san yu e du no bun nofo. Son sma na ini a gemeente sabi gi leri, den sabi orga sani bun èn den sabi fa fu gi trawan deki-ati nanga trowstu. Kande yu feni taki yu no man du san den e du. Disi e sori taki yu abi sakafasi (Fil. 2:3). Ma yu musu luku bun. Efu ala ten yu e teki yusrefi gersi nanga sma di sabi du son sani bun, dan yu o lasi-ati. Kande yu o denki srefi taki na fu soso yu de na ini a gemeente, soleki fa Paulus ben taki na ini na agersitori fu en. San kan yepi yu fu no denki so?

15. Soleki fa 1 Korentesma 12:4-11 e taki, dan fa wi musu denki fu den sani di wi man du na ini a gemeente?

¹⁵ Prakseri a tori disi: A santa yeye fu Yehovah ben meki taki son Kresten na ini a ten fu Paulus ben man du wondru, ma a no alamala ben man du a srefi sani. (Leisi 1 Korentesma 12:4-11.) Aladi den ben man du difrenti sani, toku den alamala ben warti gi Yehovah. Na ini a ten disi wi no man du wondru. Ma toku wi kan leri wan sani fu den Kresten dati. Wi no man du den srefi sani na ini a gemeente, toku wi alamala prenspari gi Yehovah.

16. Sortu rai na apostel Paulus ben gi wi?

 ¹⁶ Na presi taki wi e teki wisrefi gersi nanga tra brada nanga sisa, wi musu teki a rai disi fu na apostel Paulus: „Meki ibri sma ondrosuku san na den sani di ensrefi e du. Dan dati sa meki taki a e prisiri nanga san ensrefi e du èn a no musu teki ensrefi gersi nanga tra sma.”​—Gal. 6:4.

17. Sortu wini wi o kisi te wi e fiti a rai fu Paulus?

¹⁷ Te wi e fiti a rai disi fu Paulus èn te wi e luku san wi man du, dan wi o si taki wi man du son sani di tra sma no man du. Fu eksempre, kande wan owruman no sabi gi leri so bun te a de na tapu a podium, ma a sabi fa fu yepi sma fu tron disipel. Noso kande a no sabi orga sani so bun leki tra owruman, ma a abi switifasi èn dati meki den brada nanga sisa lobi en èn den no e frede fu go suku rai na en. Noso kande a lobi kari sma kon na en oso (Hebr. 13:2, 16). Te wi e si krin san wi man du, dan wi o firi bun èn wi o si taki wi prenspari gi a gemeente. Boiti dati, wi no o dyarusu tapu tra brada nanga sisa di man du sani di wi no man du.

18. Fa wi kan tron moro bun preikiman?

¹⁸ Awinsi san wi mag du na ini a gemeente, wi alamala musu pruberi fu du sani moro bun. Yehovah en organisâsi e yepi wi fu du dati. Fu eksempre, na den mindriwiki konmakandra wi e leri fa fu du a preikiwroko moro bun. Yu e wroko nanga den rai di yu e kisi na a konmakandra dati?

19. San yu musu du fu kan go na a Skoro gi Kownukondre preikiman?

¹⁹ Wan tra moi sani di na organisâsi fu Yehovah seti na a Skoro gi Kownukondre preikiman. A skoro disi na gi brada nanga sisa di de na ini a furuten diniwroko. Den musu doro 23 yari èn den no musu owru moro 65 yari. Kande yu e denki taki noiti yu o man go na a skoro disi. Ma na presi fu prakseri ala sortu reide fu san ede yu no man go, prakseri fu san ede yu wani go. Luku san yu musu du ete fu man go na a skoro disi. Efu yu e meki muiti, dan Yehovah o yepi yu. Dan yu o man du a sani di yu ben denki taki yu no ben o man du.

20. San wi kan leri fu Romesma 12:6-8?

²⁰ A di fu dri sani di wi kan leri fu na agersitori fu Paulus, skrifi na Romesma 12:6-8. (Leisi en.) Dyaso Paulus e taki baka dati den sma na ini a gemeente man du difrenti sani. Ma now a e sori taki ibriwan fu wi musu du san wi man fu tranga a gemeente.

21-22. San wi kan leri fu Robert nanga Felice?

²¹ Luku na eksempre fu wan brada di wi o kari Robert. A brada disi ben e dini na ini wan tra kondre, ma baka wan pisi ten a ben musu go dini na Betel na ini en eigi kondre. Den brada taigi en taki den no ben gi en wan tra toewijzing fu di a ben du wani sani di no bun. Ma toku a brada taki: „Omeni mun langa mi ben brokosaka fu di mi ben denki taki mi no ben du mi wroko bun. Son leisi mi ben abi a firi fu gowe fu Betel.” San yepi en fu kisi prisiri baka? Wan tra owruman memre en taki ibri toewijzing di Yehovah gi wi na ini a ten di pasa, sreka wi gi a toewijzing di wi abi now. Robert kon frustan taki a no ben musu tan prakseri a toewijzing di  a ben du fosi, ma a ben musu luku san a man du nownow.

²² Brada Felice Episcopo ben miti so wan sani tu. En nanga en wefi klari a Gileadskoro na ini 1956 èn den go du a kringwroko na ini Bolifia. Na ini 1964 den kisi wan pikin. Felice taki: „A ben muilek gi wi fu tapu nanga a wroko disi fu di wi ben lobi en. Wan heri yari langa mi ben e firi brokosaka, ma mi ben kon si taki dati no ben bun. Yehovah yepi mi fu kenki mi denki èn mi bigin poti prakseri na mi frantwortu leki papa.” Yu e firi leki Robert noso Felice? Yu e firi brokosaka fu di yu no abi den srefi frantwortu di yu ben abi fosi? Efu dati de so, dan yu o de moro koloku te yu e kenki yu denki èn te yu e poti prakseri na san yu kan du now gi Yehovah èn gi yu brada nanga sisa. Tan wroko tranga èn du san yu man fu yepi trawan, dan yu o de koloku fu di yu o gi a gemeente deki-ati.

23. San wi musu hori na prakseri èn san wi o luku na ini a tra artikel?

²³ Ibriwan fu wi prenspari gi Yehovah. A wani taki wi firi taki wi de fanowdu na ini a gemeente. Efu wi e teki ten fu prakseri san wi kan du fu tranga wi brada nanga sisa èn efu wi e du ala san wi man fu du dati, dan wi no o firi leki wi de na ini a gemeente fu soso! Ma fa wi e si trawan na ini a gemeente? Fa wi kan sori taki wi lobi den èn taki wi e lespeki den? Na ini a tra artikel wi o taki fu a prenspari tori dati.