1. San furu brada nanga sisa e du fu di furu de fu du na ini a diniwroko fu Yehovah?

 WI ABI furu fu du na ini a ten disi fu a kaba (Mat. 24:14; Luk. 10:2; 1 Petr. 5:2). Wi alamala wani du ala san wi man gi Yehovah. Dati meki furu sma e du moro na ini a diniwroko. Son sma wani tron pionier. Trawan wani dini na Betel noso den wani yepi nanga bow-wroko fu na organisâsi. Boiti dati, furu brada e du muiti fu doro a marki fu dini leki dinari ini a diniwroko noso owruman (1 Tim. 3:1, 8). Yehovah breiti srefisrefi te a e si taki so furu sma de klariklari fu du so furu gi en!​—Ps. 110:3; Yes. 6:8.

2. Fa wi kan firi efu wi no man doro wan marki na ini a diniwroko fu Yehovah?

² Ma wi kan bigin firi brokosaka, efu wan moi pisi ten e pasa èn wi no man doro den marki fu wi na ini a diniwroko fu Yehovah. Noso wi kan lasi-ati efu wi no man du son sani na ini Yehovah en organisâsi fu di wi owru tumusi noso fu di a situwâsi fu wi no e gi wi pasi fu du dati (Odo 13:12). Na dati ben pasa nanga Melissa. * A ben o wani dini na Betel noso a ben o wani go na a Skoro gi Kownukondre preikiman, ma a e taki: „Mi no man kisi den grani  dati fu di mi owru kaba. Son leisi a sani disi e meki mi lasi-ati.”

3. San son sma musu du fosi den man kisi tra grani?

³ Son sma di yongu ete èn di gosontu, musu leri kande fu kon abi son fasi, fosi den o man kisi tra grani. Fu eksempre, son sma koni, den man teki bosroiti esi-esi èn den de klariklari fu wroko tranga. Ma kande den musu leri fu abi moro pasensi, fu du den wroko moro bun, èn fu sori moro lespeki gi trawan. Efu yu e du muiti fu kon abi den fasi di yu musu abi, dan kande den brada o gi yu moro grani te yu no fruwakti dati. Luku na eksempre fu Nick. Di a ben abi 20 yari, a ben brokosaka srefisrefi fu di den no ben poti en leki dinari ini a diniwroko. A e taki: „Mi ben denki taki wan sani no bun nanga mi.” Ma Nick tan wroko na den fasi di a ben musu abi. A ben du ala san a man na ini a gemeente èn na ini a preikiwroko. Now a e dini na wan Bijkantoro Komte.

4. San wi o luku na ini na artikel disi?

⁴ Yu lasi-ati fu di yu no man doro wan marki ete na ini a diniwroko? Efu dati de so, dan begi Yehovah èn fruteri en fa yu e firi (Ps. 37:5-7). Boiti dati, yu kan aksi brada di abi ondrofeni fu gi yu rai fa yu kan du en moro bun na ini a diniwroko èn fiti den rai di den e gi yu. Efu yu e du dati, dan kande yu o man doro a marki di yu ben poti. Ma neleki Melissa, kande yu no o man doro a marki dati now. San yu o du dan? Fa yu kan tan de nanga prisiri? Fu man piki den aksi dati, wi o luku (1) san kan gi yu prisiri, (2) san yu kan du fu abi moro prisiri, èn (3) sortu marki yu kan poti fu abi moro prisiri.

5. San wi musu du fu de nanga prisiri? (Preikiman 6:9)

⁵ Preikiman 6:9 e sori san kan yepi wi fu de nanga prisiri. (Leisi en.) Efu wi wani de nanga prisiri, dan a moro betre fu de tevrede nanga san wi abi èn nanga san wi man kisi, leki fu wani wan tra sani ibri leisi baka. Wi no o de nanga prisiri efu wi e feti baka sani di wi no o man kisi noiti.

6. Sortu agersitori wi o luku now, èn san wi o leri fu en?

⁶ Wan sma kan prisiri trutru nanga san a abi kaba? Furu sma feni taki dati no kan, fu di a de so taki wi alamala wani du wan tra sani baka wan pisi ten. Ma wi kan prisiri trutru nanga den sani di wi abi now. Fa wi kan du dati? Meki wi luku na agersitori di Yesus ben gi fu den talenti na Mateyus 25:14-30. Wi o leri fa wi kan prisiri nanga a situwâsi fu wi now èn fa wi kan abi moro prisiri.

7. Taki syatu fu na agersitori di Yesus ben gi fu den talenti.

⁷ Na ini na agersitori wan man ben o go na wan tra kondre. Ma fosi a gowe a kari den srafu fu en èn a gi ibriwan fu den talenti fu go du bisnis nanga dati. * A man ben sabi taki den srafu fu en ben man du difrenti sani bun. Dati meki a gi wan fu den srafu feifi talenti, a gi a trawan tu talenti èn a gi a di fu dri srafu wán talenti. Den fosi tu srafu wroko tranga fu meki moro moni gi den masra. Ma a di fu dri srafu no du noti  nanga a moni di a kisi. Dati meki a masra yagi en.

8. Fu san ede a fosi srafu na ini na agersitori ben de nanga prisiri?

⁸ A musu de so taki a fosi srafu ben breiti srefisrefi nanga den feifi talenti di a masra ben gi en. Dati ben de furu moni èn a ben sori taki a masra ben e frutrow en trutru! Ma fa a ben de nanga a di fu tu srafu? A srafu disi ben kan lasi-ati fu di a no kisi so furu talenti leki a fosi srafu. Ma san a du?

9. San Yesus no taki fu a di fu tu srafu? (Mateyus 25:22, 23)

⁹ Leisi Mateyus 25:22, 23. Yesus no taki dati a di fu tu srafu ben ati bron èn taki a ben firi wan fasi fu di a kisi tu talenti nomo. Yesus no taki dati a srafu ben kragi: ’Na disi wawan mi kisi? Mi e wroko tranga tu neleki a srafu di kisi den feifi talenti! Efu mi masra no feni taki mi e wroko bun nofo, dan kande mi musu beri a moni fu en èn go wroko gi misrefi.’

10. San a di fu tu srafu du nanga den talenti fu en?

¹⁰ Neleki a fosi srafu, na so a di fu tu srafu ben frustan taki a masra gi en wan prenspari wroko fu du èn a wroko tranga gi en masra. Dati meki a wroko ete tu talenti gi en masra. A masra pai a srafu gi a tranga wroko di a ben du. A masra ben prisiri nanga a srafu èn a gi en moro frantwortu!

11. Fa yu kan kon de nanga moro prisiri?

¹¹ Na so a de tu taki wi kan kisi moro prisiri te wi e du ala san wi man na ini  a diniwroko fu Yehovah. Preiki „fayafaya” èn wroko tranga makandra nanga a gemeente (Tori 18:5; Hebr. 10:24, 25). Sreka yusrefi bun gi den konmakandra so taki yu kan gi piki di e gi trawan deki-ati. Si en leki wan prenspari sani te yu musu hori wan lezing na den mindriwiki konmakandra. Efu den brada e aksi yu fu yepi nanga wan wroko na ini a gemeente, dan du en biten èn du en bun so taki den o si taki yu e teki a wroko seryusu. No denki taki a wroko di yu kisi no prenspari èn taki a no de fanowdu fu poti ten na wan sei fu du en. Meki tranga muiti fu du yu wroko moro bun (Odo 22:29). Te yu e wroko tranga gi Yehovah, dan yu o tron wan moro bun mati fu en èn yu o de nanga moro prisiri (Gal. 6:4). Yu o feni en moro makelek tu fu prisiri nanga trawan te den e kisi wan grani di yu ben o wani.​—Rom. 12:15; Gal. 5:26.

12. San yepi Melissa nanga Nick fu de nanga moro prisiri?

¹² Yu kan memre Melissa ete, a sisa di ben wani go na Betel noso na a Skoro gi Kownukondre preikiman? Aladi a no ben man du den sani dati, toku a e taki: „Mi e du ala san mi man na ini a pionierwroko èn mi e pruberi fu preiki na difrenti fasi. A sani disi gi mi furu prisiri.” Èn san Nick du di a no tron dinari? A e taki: „Mi ben poti ala mi prakseri na den sani di mi ben kan du, soleki a preikiwroko. Mi pruberi tu fu gi piki na den konmakandra di e gi trawan deki-ati. Boiti dati, mi ben gi mi nen fu go na Betel èn a yari baka dati den ben teki mi.”

13. San o pasa efu yu e du ala san yu man na ini a wroko di yu kisi fu du now? (Preikiman 2:24)

¹³ Efu yu e du ala san yu man na ini a wroko di yu kisi fu du now, dan dati wani taki dati yu o kisi moro frantwortu na ini a ten di e kon? Dati kan pasa, soleki fa a ben pasa nanga Nick. Ma efu dati no pasa soleki fa a ben de nanga Melissa, dan toku yu kan abi moro prisiri èn yu kan breiti nanga den sani di yu e du gi Yehovah. (Leisi Preikiman 2:24.) Boiti dati, yu o de nanga bigi prisiri fu di yu sabi taki yu e du san wi Masra, Yesus Krestes wani.

14. San wi musu hori na prakseri ala ten te a abi fu du nanga den marki di wi e poti?

¹⁴ Ma efu wi e du ala san wi man na ini a diniwroko fu Yehovah now, dan dati wani taki dati wi no musu luku fa wi kan du moro gi en? Nôno. Wi musu poti marki di o yepi wi fu tron moro bun preikiman nanga leriman èn di o meki taki wi man yepi wi brada nanga sisa moro bun. A de wan koni sani fu abi sakafasi fu di dati o meki taki wi man yepi trawan, na presi fu poti prakseri na wi eigi afersi nomo.​—Odo 11:2; Tori 20:35.

15. San na wan tu marki di yu kan poti so taki yu kan de nanga moro prisiri?

¹⁵ Sortu marki yu kan poti gi yusrefi? Aksi Yehovah fu yepi yu fu kon si sortu marki yu o man doro (Odo 16:3; Yak. 1:5). Yu kan du muiti fu doro wan fu den marki di kari na ini a  fosi paragraaf fu na artikel disi? Kande yu kan go na ini a yepi-pionierwroko, yu kan tron wan gewoon pionier, yu kan dini na Betel, noso yu kan yepi nanga a bow-wroko. Efu yu man, yu kan leri wan tra tongo so taki yu kan preiki gi sma fu wan tra kondre. Yu kan kon sabi moro fu den sani di yu kan  du te yu leisi kapitel 10 fu a buku Wi orga fu du a wani fu Yehovah èn yu kan taki nanga den owruman fu yu gemeente. * Te yu e du muiti fu doro den marki disi, dan trawan o si taki yu e go na fesi èn yu o de nanga moro prisiri.

16. San yu kan du efu yu no man doro wan marki now?

¹⁶ Ma fa a de efu yu no man doro den marki di wi ben kari kaba? Pruberi fu poti tra marki di yu man doro. Luku wan tu sani di yu kan du.

17. Soleki fa 1 Timoteyus 4:13, 15 e taki, dan san wan brada kan du fu tron wan moro bun leriman?

¹⁷ Leisi 1 Timoteyus 4:13, 15. Efu yu na wan dopu brada yu kan pruberi fu tron wan moro bun takiman noso leriman. Fu san ede dati bun? Efu yu e du tranga muiti fu tron wan bun leisiman, wan bun takiman, noso wan bun leriman, dan yu o man yepi den sma di e arki yu. Pruberi fu studeri ibri les na ini a brochure Meki muiti fu leisi bun èn fu gi leri. Meki muiti fu du den sani di a brochure e taki. Pruberi fu teki wán les ibri leisi, dan yu e oefen en bun na oso, èn wroko na a les dati te yu e hori yu lezing. Suku rai na a brada di e yepi a skoro-opziener, noso wan fu den tra owruman „di e wroko tranga fu taki fu a wortu fu Gado èn fu leri sma a wortu dati” * (1 Tim. 5:17). No luku nomo taki yu musu frustan a les, ma luku tu fa yu kan  yepi den arkiman fu yu fu tranga den bribi noso fu gi den deki-ati fu du san den leri. Te yu e du dati, dan yu o de nanga moro prisiri èn trawan o prisiri tu.

18. San kan yepi wi fu du a preikiwroko moro bun?

¹⁸ Wi alamala abi a frantwortu fu preiki èn meki disipel (Mat. 28:19, 20; Rom. 10:14). Yu wani du a tumusi prenspari wroko disi moro bun? Studeri a Gi leri-brochure èn du den sani di yu e leri so taki yu kan go na fesi. Yu kan luku den eksempre na ini a Wi Kresten libi nanga a preikiwroko​—Studie-buku nanga den felem fu den mindriwiki konmakandra di e sori fa fu hori wan takimakandra. Pruberi den difrenti sani fu si san e wroko moro bun. Te yu e gebroiki den rai disi, dan yu o tron wan moro bun preikiman èn disi o gi yu moro prisiri.​—2 Tim. 4:5.

19. San yu kan du fu kon abi den moi fasi di wan Kresten musu abi?

¹⁹ Yu no musu frigiti taki wan fu den moro prenspari marki di yu kan poti gi yusrefi, na fu kon abi den moi fasi di wan Kresten musu abi (Gal. 5:22, 23; Kol. 3:12; 2 Petr. 1:5-8). San yu kan du? Kon meki wi taki dati yu wani abi wan moro tranga bribi. Dan yu kan leisi artikel na ini den buku fu wi di e sori krin san yu kan du fu tranga yu bribi. Yu kan luku difrenti pisi fu den JW Broadcasting^® di e sori fa brada nanga sisa ben abi wan tranga bribi di den kisi tesi. Baka dati, luku fa yu kan sori bribi neleki den.

20. Fa wi kan sorgu taki wi de nanga moro prisiri èn taki wi no lasi-ati tumusi?

²⁰ A no de fu taki dati wi alamala wani du moro leki san wi e du now gi Yehovah. Na ini a nyun grontapu wi o man du ala den sani di wani du gi en. Ma efu wi e du ala san wi man na ini a diniwroko fu en now, dan wi kan kon de nanga moro prisiri èn wi kan sorgu taki wi no lasi-ati tumusi. A sani di prenspari, na taki wi o gi grani na Yehovah èn wi o prèise „a koloku Gado” fu wi (1 Tim. 1:11). Sobun, prisiri nanga den sani di yu man du gi Yehovah.