1-2. San wi o luku na ini na artikel disi?

KON meki wi taki dati yu e fruwakti fu kisi wan dosu di abi wan sani na ini di yu abi tranga fanowdu. Ma dan now a dosu no man kon ete. Fa yu e firi? Yu lasi-ati fu di a dosu no doro ete? Kande yu e firi leki san skrifi na Odo 13:12: „Te wan sma no man kisi san a e fruwakti, dan en ati o kon siki.” Ma kon meki wi taki dati wan bun reide de fu san ede a dosu no doro ete. Efu dati de so, dan yu o sori pasensi èn yu o wakti.

² Na ini na artikel disi wi o luku wan tu Bijbel gronprakseri di kan leri wi fa fu wakti nanga pasensi (Mika 7:7). Baka dati, wi o luku tu situwâsi pe wi musu wakti Yehovah nanga pasensi teleki a du wan sani. Leki lasti, wi o luku sortu moi sani Yehovah pramisi den sma di e wakti en nanga pasensi.

3. San a gronprakseri na Odo 13:11 e leri wi?

³ Odo 13:11 e leri wi fu san ede wi musu abi pasensi. A tekst e taki: „Den gudu di wan sma kisi sondro fu meki muiti, e lasi gowe safrisafri, ma den gudu fu a sma di e tyari sani kon na wán pikinsopikinso, o kon moro furu.” San na a gronprakseri dyaso? A tekst disi e leri wi taki wan koni sma e du sani finifini èn nanga pasensi. Na so a o abi bun bakapisi.

4. San a gronprakseri na Odo 4:18 e leri wi?

⁴ Odo 4:18 e taigi wi taki „a pasi fu den reti-ati sma de leki a leti di e bigin skèin na musudei. Safrisafri a e kon moro krin, teleki a de leki a brenki leti fu son na mindridei.” Den wortu disi abi fu du nanga a fasi fa Yehovah e yepi en pipel fu frustan san a abi na prakseri fu du. A e  tyari sani kon na krin safrisafri. Ma a vers disi e yepi wi fu frustan tu fa wan Kresten e tyari kenki kon na ini en libi èn fa a e kon moro krosibei na Yehovah. A e teki ten fu du den sani disi. Efu wi e studeri fayafaya èn wi e teki den rai di wi e kisi fu Gado Wortu nanga en organisâsi, dan safrisafri wi o kisi den fasi di Krestes abi. Wi o kon sabi Gado moro bun tu. Meki wi go luku fa Yesus tyari a tori disi kon na krin nanga wan agersitori.

5. Sortu agersitori Yesus gi fu sori taki a e teki ten fu tyari kenki kon?

⁵ Yesus ben gebroiki wan agersitori fu wan pikin siri fu sori fa a Kownukondre boskopu di wi e preiki, e gro safrisafri na ini na ati fu den sma di lobi san reti. A ben taki: „A siri e gro teleki a kon bigi, ma a man [di trowe a siri na gron] no sabi fa dati pasa. Safrisafri a gron e gi nyanyan fu ensrefi. Fosi, a pransun e opo kon, dan a e gi nyanyan èn te fu kaba a nyanyan e kon lepi” (Mark. 4:27, 28). San Yesus ben wani sori nanga disi? Neleki fa wan pransun e gro safrisafri, na so wan sma di e bribi a Kownukondre boskopu e tyari kenki kon safrisafri. Fu eksempre, te den Bijbelstudenti fu wi e kon moro krosibei na Yehovah, dan wi o bigin si ala den kenki di den e tyari kon na ini den libi (Ef. 4:22-24). Ma wi musu hori na prakseri taki na Yehovah e meki a pikin siri disi gro.​—1 Kor. 3:7.

6-7. San wi e leri fu a fasi fa Yehovah meki grontapu?

⁶ Ala sani di Yehovah e du, a e du nanga pasensi èn a e teki ala a ten di de fanowdu fu klari a wroko fu en. A e du dati, fu meki en nen kisi glori èn fu meki trawan kisi wini. Luku fa Yehovah sreka grontapu safrisafri gi libisma.

⁷ Te Bijbel e taki fa Yehovah meki grontapu, dan a e sori taki Yehovah „bosroiti o bigi grontapu musu de”, èn a poti „pilari” nanga „ukuston” gi en (Yob 38:5, 6). A teki en ten srefi fu luku ala den  sani di a meki (Gen. 1:10, 12). Prakseri fa den engel ben musu firi di den si fa safrisafri Yehovah meki nyun sani fu sreka a grontapu. A musu de taki a ben span gi den! Dati meki den ben „prèise en nanga wan tranga sten” te fu kaba (Yob 38:7). San disi e leri wi? Yehovah teki dusundusun yari fu meki grontapu, den stari, nanga ala den libisani. Ma di a luku ala den sani di a meki finifini, dan a taki dati den ben de „heri bun”.​—Gen. 1:31.

8. San wi o luku now?

⁸ Den eksempre disi sori wi taki furu gronprakseri de na ini Gado Wortu di e leri wi taki wi musu abi pasensi. Wi o luku tu situwâsi now pe wi musu wakti Yehovah nanga pasensi.

9. San na wan situwâsi pe wi musu wakti tapu Yehovah?

⁹ Wi musu wakti Yehovah fu piki den begi fu wi. Wi kan begi Yehovah fu gi wi krakti te wi e kisi tesi noso wi kan aksi en fu yepi wi nanga wan swakifasi. Ma son leisi wi kan kisi a firi taki Yehovah e teki tumusi langa fu piki a begi fu wi. Fu san ede Yehovah no e piki ala den begi fu wi wantewante?

10. Fu san ede wi musu wakti nanga pasensi taki Yehovah piki den begi fu wi?

¹⁰ Yehovah e arki bun te wi e begi en (Ps. 65:2). Te wi e begi en nanga wi heri ati, dan Yehovah e si den begi dati leki wan buweisi taki wi e bribi en (Hebr. 11:6). Yehovah wani si tu efu wi e meki muiti fu du den sani di wi aksi en èn efu wi de klariklari fu du a wani fu en (1 Yoh. 3:22). Sobun, te wi e aksi Yehovah fu yepi wi fu no du wan sani moro di a no feni bun, dan wi musu abi pasensi èn wi musu du ala san wi man fu tyari kenki kon. Yesus yepi wi fu frustan taki Yehovah no e piki sonwan fu den begi fu wi wantewante. Dati meki a gi wi a deki-ati disi: „Tan aksi, dan unu o kisi. Tan suku, dan unu o feni. Tan naki na tapu a doro, dan a doro o opo gi unu. Bika a sma di e aksi, o kisi. A sma di e suku, o feni. A sma di e naki na tapu a doro, a doro o opo gi en” (Mat. 7:7, 8). Te wi e teki a rai disi èn wi e „tan begi”, dan wi kan de seiker taki wi hemel Papa e yere wi èn a o piki den begi fu wi.​—Kol. 4:2.

11. Fa Hebrewsma 4:16 e yepi wi te wi no e kisi piki wantewante tapu den begi fu wi?

¹¹ Aladi a kan gersi leki Yehovah no e piki a begi fu wi ete, toku Yehovah e pramisi taki a o piki den begi fu wi „na a yoisti ten”. (Leisi Hebrewsma 4:16.) Dati meki wi no musu denki noiti taki Yehovah meki wan fowtu efu a no e piki wi begi so esi leki wi wani. Fu eksempre, furu sma e begi omeni yari kaba taki Gado Kownukondre tyari wan kaba kon na a ogri grontapu disi. Yesus srefi ben taki dati wi musu begi taki disi pasa (Mat. 6:10). Ma a ben o de wan don sani efu wi lasi bribi na ini Gado, fu di a kaba no kon na a ten di wi ben denki taki a ben o kon (Hab. 2:3; Mat. 24:44). Wi o de koni sma te wi e tan wakti Yehovah, te wi e tan begi, èn te wi e bribi taki a o piki den begi fu wi. A kaba o kon na a yoisti ten, fu di Yehovah poti „a dei nanga a yuru” gi dati kaba. Èn te a dei dati doro, dan a o doro na a moro bun ten gi ala sma.​—Mat. 24:36; 2 Petr. 3:15.

12. Na ini sortu situwâsi a kan muilek fu sori pasensi?

¹² Wi musu abi pasensi èn horidoro te  trawan e du ogri nanga wi. Sma na ini a grontapu disi lobi fu du ogri nanga trawan di no de leki den, di de fu wan tra ras, lo noso kondre. Sma e du ogri nanga trawan di siki noso di no de so bun na den ede. Furu anbegiman fu Yehovah kisi fu du nanga ogri fu di den poti bribi na ini Bijbel. Te sma e du den sortu ogri disi nanga wi, dan wi musu hori a sani disi na prakseri di Yesus ben taki: „A sma di horidoro te na a kaba, na en o kisi frulusu” (Mat. 24:13). Ma efu yu kon sabi taki wan sma na ini a gemeente du wan ogri noso wan seryusu sondu, dan san yu musu du? Efu den owruman sabi a tori kaba, dan yu o sori taki yu abi a pasensi nanga a frutrow taki den o seti a tori na a fasi fa Yehovah wani dati? San den owruman o abi fu du te wan sma du wan seryusu sondu?

13. San Yehovah wani taki owruman musu du te wan sma du wan seryusu sondu?

¹³ Te den owruman kon sabi taki wan sma na ini gemeente du wan seryusu sondu, den e begi Yehovah èn den e aksi „a koni fu hemel” so taki den kan si a tori soleki fa Yehovah e si en (Yak. 3:17). Den owruman wani yepi a sma di sondu fu puru en „na a takru pasi fu en” efu a kan (Yak. 5:19, 20). Den wani du ala san den man tu fu kibri a gemeente èn fu trowstu den wan di a sma ben hati (2 Kor. 1:3, 4). Te den owruman kon sabi taki wan sma du wan seryusu sondu, dan den musu go ondrosuku fosi san pasa trutru. A sani disi kan teki ten. Baka dati, den e begi, den e gi a yoisti rai fu Bijbel èn den e gi a sma a piri-ai di a „musu kisi” (Yer. 30:11). Aladi den owruman no e wakti tumusi langa fu seti a tori, toku den no e teki wan bosroiti tumusi gaw tu. Te owruman e du sani soleki fa Yehovah wani dati, dan ala sma na ini a gemeente o kisi wini fu dati. Ma srefi efu den owruman du sani na a yoisti fasi, toku a sma di no du noti, kan firi den bakapisi ete fu a sondu di a tra sma du. Efu yu de na ini so wan situwâsi, dan san kan yepi yu?

14. Sortu Bijbel eksempre kan yepi yu efu wan brada noso sisa du yu wan hati sani?

¹⁴ Oiti wan sma du wan hati sani nanga yu? Kande a sma dati ben de wan brada  noso wan sisa srefi. Efu dati de so, dan yu kan feni moi eksempre na ini Gado Wortu di e leri wi fa fu wakti tapu Yehovah fu seti a tori na wan reti fasi. Fu eksempre, aladi Yosef en eigi brada du ogri nanga en sondro taki a ben du den wan sani, toku Yosef no hori den ati fu a fowtu di den meki. Na presi fu dati, a tan poti prakseri na Yehovah èn a tan du ala san a man fu dini en. Yehovah blesi en fu di a ben abi pasensi èn fu di a horidoro (Gen. 39:21). Baka wan pisi ten, Yosef ben man gi pardon na den sma di du hati sani nanga en èn a ben man si krin fa Yehovah ben blesi en (Gen. 45:5). Wi o kisi trowstu neleki Yosef, te wi e kon moro krosibei fu Yehovah èn te wi e libi den sortu sani disi gi en fu seti en na wan reti fasi.​—Ps. 7:17; 73:28.

15. San yepi wan sisa fu horidoro nanga pasensi di wan tra sma du wan hati sani nanga en?

¹⁵ A no de fu taki dati te sma du hati sani nanga wi, dan a no ala ten a de leki na ogri di sma du nanga Yosef. Ma awinsi fa a no fa, wi e firi en te sma no libi bun nanga wi. Te wi abi wan problema nanga wan sma, srefi efu na wan sma di no e dini Yehovah, dan wi o kisi wini te wi gebroiki Bijbel gronprakseri fu lusu a tori (Fil. 2:3, 4). Luku san ben miti wan sisa. A ben hati en srefisrefi di a kon yere taki wan frow na en wrokope ben e taki wan lo sani fu en di no ben tru. Na presi taki a sisa du wan sani wantewante, a teki ten fu go prakseri na eksempre fu Yesus. Te sma ben kosi en, a no ben kosi den baka (1 Petr. 2:21, 23). A sisa hori na eksempre fu Yesus na prakseri èn a libi a tori. Bakaten a sisa kon yere taki a frow disi ben siki seryusu èn a taki a ben e stress. Sobun, a sisa prakseri na ensrefi taki kande a frow no taki den sani dati fu hati en fu espresi. A sisa ben breiti taki a horidoro nanga pasensi na ini a situwâsi disi èn a no ben broko en ede moro nanga a tori disi.

16. San kan trowstu yu efu sma du wan hati sani nanga yu? (1 Petrus 3:12)

¹⁶ Efu sma no libi bun nanga yu noso efu wan tra situwâsi e meki yu pina, dan  hori na prakseri taki Yehovah de krosibei fu „den sma di lasi-ati” (Ps. 34:18). A lobi yu fu di yu e horidoro nanga pasensi èn fu di yu e trowe yu hebi na tapu en (Ps. 55:22). En na a Krutuman fu heri grontapu. A e si ala san e pasa. (Leisi 1 Petrus 3:12.) Sobun, te yu abi seryusu problema di yu no man lusu, dan hori na prakseri taki a prenspari fu wakti tapu Yehovah.

17. San Yehovah pramisi fu du na ini Yesaya 30:18?

¹⁷ Heri esi wi hemel Papa o gi wi bun furu blesi nanga yepi fu a Kownukondre fu en. Yesaya 30:18 e taki: „Yehovah o tan wakti unu, fu di a wani du bun gi unu. A o opo du wan sani fu sori unu sari-ati. Bika Yehovah na wan Gado di e koti krutu na wan reti fasi. Koloku fu ala den sma di e tan wakti en.” Den sma di e tan wakti Yehovah, o kisi furu blesi nownow kaba èn na ini a nyun grontapu di o kon.

18. Sortu blesi wi o kisi?

¹⁸ Te a pipel fu Gado o go na ini a nyun grontapu, dan noiti moro den o kisi den problema nanga broko-ede di den e kisi na ini a ten disi. Sma no o du ogri moro nanga den èn pen no o de moro (Openb. 21:4). Na a ten dati wi no o abi fu broko wi ede efu wi o kisi san wi abi fanowdu, fu di sani o de bogobogo gi ala sma (Ps. 72:16; Yes. 54:13). Dati o de wan bigi blesi trutru!

19. Gi san Yehovah e sreka wi now?

¹⁹ Yehovah e sreka wi now so taki wi kan libi na ondro a tiri fu en na ini a ten di e kon. Dati meki a e yepi wi fu tapu nanga takru gwenti èn a e yepi wi fu kisi den fasi di a feni bun. No lasi-ati èn no tapu fu dini Yehovah. Wan kefalek bun libi e wakti yu! Meki wi hori a moi ten dati na prakseri èn wakti nanga pasensi teleki Yehovah du den sani di a pramisi.