1. Na sortu wroko wi alamala e teki prati soleki fa 1 Tesalonikasma 5:11 e sori?

 OITI yu gemeente bow noso meki wan Kownukondre zaal kon bun baka? Dan kande yu e memre yu fosi konmakandra na ini a nyun zaal dati. Yu ben de nanga tangi srefisrefi gi san Yehovah du. Yu ben de so koloku taki kande yu ben wani krei srefi èn yu no ben man singi a fosi singi. Den moi Kownukondre zaal fu wi e gi Yehovah grani. Ma wi e gi en moro grani te wi e du wan tra sortu bow-wroko. A wroko dati abi fu du nanga wan sani di warti moro wan gebow. A abi fu du nanga a yepi di wi e yepi den sma di e kon na den presi disi pe wi e anbegi Gado. Na disi na apostel Paulus ben abi na prakseri di a skrifi den wortu na ini 1 Tesalonikasma 5:11, di de a thema tekst fu a studie-artikel disi.​—Leisi en.

2. San wi o luku na ini na artikel disi?

² Na apostel Paulus ben de wan bun eksempre. A ben sabi fa fu gi den brada nanga sisa fu en deki-ati. A ben e firi gi den. Na ini na artikel disi wi o luku fa a yepi den brada nanga sisa (1) fu horidoro te den ben kisi tesi, (2) fu libi na ini freide nanga trawan, èn (3) fu tranga den bribi na ini Yehovah. Meki wi luku fa wi kan de neleki Paulus, so taki wi kan yepi wi brada nanga sisa na ini a ten disi.​—1 Kor. 11:1.

3. Fa Paulus sori taki a ben e si sani na yoisti fasi?

³ Paulus ben lobi den brada nanga sisa fu en trutru. Ensrefi ben e kisi problema. Dati meki a ben kan sori sari-ati gi den brada nanga sisa èn a ben kan firi gi den te den ben e kisi tesi. Wán leisi Paulus no ben abi moni moro, dan a ben abi fu go suku wroko fu sorgu ensrefi nanga den wan di ben de nanga en (Tori 20:34). A ben e meki tenti. Di a doro  na Korente, a ben wroko makandra fosi nanga Akwila nanga Preskela di ben e meki tenti tu. Ma „ibri Sabat-dei” a ben e preiki gi den Dyu nanga den Grikisma. Dan di Silas nanga Timoteyus doro, „Paulus bigin preiki a wortu fu Gado fayafaya” (Tori 18:2-5). Noiti Paulus frigiti taki a moro prenspari sani na ini en libi ben de fu dini Yehovah. Paulus srefi ben sabi san a wani taki fu wroko tranga na ini a preikiwroko èn fu wroko fu sorgu ensrefi. Dati meki a ben man gi en brada nanga sisa deki-ati fu horidoro. A ben memre den taki den problema na ini a libi èn a sorgu di den musu sorgu den osofamiri no ben musu meki den frigiti „den moro prenspari sani”, dati wani taki ala sani di abi fu du nanga na anbegi fu Yehovah.​—Fil. 1:10.

4. Fa Paulus nanga Timoteyus yepi den brada nanga sisa fu horidoro di sma ben e frufolgu den?

⁴ Syatu baka di den ben seti a gemeente na Tesalonika, dan den nyun Kresten kisi hebi frufolgu. Di wan ogri-ati grupu sma no ben man feni Paulus nanga Silas, dan den gensman disi srepi „wan tu tra brada tyari go gi den tiriman fu a foto”. Den ben e bari: „Den man disi e pasa den wèt fu Grankownu” (Tori 17:6, 7). Yu no denki taki den nyun Kresten disi ben frede di den si taki den man fu a foto bigin frufolgu den? Den ben kan tapu nanga a diniwroko fu Yehovah, ma Paulus no ben wani dati pasa. En nanga Silas ben musu gowe fu drape, ma den sorgu taki a nyun gemeente kisi bun yepi. Paulus taigi den Tesalonikasma: „Wi ben seni wi brada Timoteyus kon na unu . . .  fu tranga unu èn fu trowstu unu fu meki un bribi kon tranga, so taki den pina disi di e miti unu, no o meki nowan fu unu degedege” (1 Tes. 3:2, 3). A kan taki Timoteyus srefi ben kisi frufolgu na ini a foto Listra pe a ben e tan. A si fa Paulus ben tranga den brada nanga sisa fu drape. Fu di Timoteyus si fa Yehovah meki sani waka, meki a ben kan gi den nyun brada nanga sisa fu en a dyaranti taki sani ben o waka bun gi den tu.​—Tori 14:8, 19-22; Hebr. 12:2.

5. Fa brada Bryant kisi yepi fu wan owruman?

⁵ Na sortu tra fasi Paulus tranga den Kresten brada nanga sisa fu en? Di Paulus nanga Barnabas drai kon baka na Listra, Ikoniyum, nanga Antiokia, dan „na ini ibri gemeente den poti owru man” (Tori 14:21-23). A no de fu taki dati den owruman disi ben gi den gemeente trowstu, neleki fa den owruman e du dati na ini a ten disi. Luku san wan brada Bryant e taki: „Di mi tapu 15 yari, mi papa gowe libi wi èn mi mama tapu fu dini Yehovah. Mi ben firi leki ala sma gowe libi mi èn mi ben brokosaka.” San ben yepi Bryant fu horidoro na ini a muilek ten dati? A e taki: „Tony, wan owruman, ben taki nanga mi na den konmakandra èn na tra momenti. A ben fruteri mi fu sma di ben kisi tesi, ma toku den ben de koloku. A ben leisi Psalm 27:10 nanga mi, èn nofo tron a ben e taki fu Heskia di ben e dini Gado getrow aladi en papa no ben de wan bun eksempre.” Fa den sani disi yepi Bryant? Bryant e taki: „A deki-ati di mi kisi fu Tony meki taki te fu kaba mi bigin pionier èn disi e gi mi furu prisiri.” Owruman, un musu luku suma abi yepi fanowdu neleki Bryant èn „taki switi” nanga den fu gi den deki-ati.​—Odo 12:25.

6. Fa Paulus gebroiki ondrofenitori fu gi en brada nanga sisa deki-ati?

⁶ Paulus ben memre den Kresten brada nanga sisa taki „someni kotoigi de na wi  lontu neleki wan bigi wolku”, èn taki na Yehovah gi den a krakti fu horidoro te den ben kisi problema (Hebr. 12:1). Paulus ben frustan taki den ondrofenitori fu sma na ini owruten di nyan ala sortu pina, ben kan gi den brada nanga sisa deki-ati fu horidoro èn fu tan poti prakseri na a „foto fu a libilibi Gado” (Hebr. 12:22). Na so a de tu na ini a ten disi. Yu no kisi deki-ati di yu leisi fa Yehovah yepi Gideon, Barak, David, Samuel, nanga someni tra sma? (Hebr. 11:32-35) Fa a de nanga na eksempre fu brada nanga sisa di sori bribi na ini a ten fu wi? Nofo tron wi e kisi brifi na a edekantoro fu brada nanga sisa di kisi deki-ati fu di den leisi wan ondrofenitori fu wan anbegiman fu Yehovah na ini a ten disi.

7. San yu e leri fu a rai di Paulus gi na ini Romesma 14:19-21?

⁷ Wi kan yepi wi brada nanga sisa te wi e taki èn e du sani di e meki taki freide de na ini a gemeente. Wi no wani taki den difrenti fasi fa wi e si sani e meki taki pratifasi de na ini a gemeente. Èn wi no wani du nomonomo san wisrefi feni bun te wi e si taki tra sma no e du sani di de teige san Bijbel e leri. Luku wan eksempre. A gemeente na ini Rome ben abi Kresten di ben de Dyu èn trawan di no ben de Dyu. Di a Wet fu Moses no ben de moro, dan den anbegiman fu Yehovah no ben abi fu hori densrefi moro na den wet di abi fu du nanga spesrutu nyanyan (Mark. 7:19). Sensi a ten dati, son Dyu Kresten ben firi taki den ben kan nyan ala sortu sani. Ma tra Dyu Kresten no ben denki taki a bun fu nyan den sani dati. A sani disi ben tyari pratifasi kon na ini a gemeente. Paulus ben sori den taki a prenspari fu du sani di e tyari freide kon. A taki: „A bun fu no nyan meti, fu no dringi win, noso fu no du wan sani efu dati kan meki yu brada fadon.” (Leisi Romesma 14:19-21.) Na so fasi Paulus yepi den Kresten brada nanga sisa fu si taki den kesekese disi ben abi takru bakapisi gi sma èn sosrefi gi a heri gemeente. A ben de klariklari tu fu kenki a fasi fa ensrefi ben du sani so taki trawan no naki futu (1 Kor. 9:19-22). Wi kan yepi trawan tu te wi e suku freide na presi fu haritaki na ini afersi pe sma fri fu teki den eigi bosroiti.

8. San Paulus du di sma bigin haritaki fu wan prenspari tori na ini a gemeente?

⁸ Paulus ben sori na wan heri bun fasi tu fa wi kan suku freide efu sma e haritaki fu prenspari tori. Fu eksempre, son sma na ini a gemeente fu den fosi Kresten ben feni nomonomo taki den sma di no de Dyu ben musu besnèi, kande fu sorgu taki den Dyu no ben o krutu den (Gal. 6:12). Paulus no ben agri nanga a denki dati kwetikweti, ma na presi fu dwengi den fu du san en ben feni bun, a sori sakafasi èn a aksi den apostel nanga den owruman na Yerusalem fu gi rai na ini a tori disi (Tori 15:1, 2). Fu di Paulus du sani na a fasi disi, meki a yepi den Kresten fu tan koloku èn fu tan abi freide na ini a gemeente.​—Tori 15:30, 31.

9. Fa wi kan teki na eksempre fu Paulus?

⁹ Efu sma e bigin haritaki fu wan seryusu tori na ini a gemeente, dan wi musu suku fu tyari freide kon. Wi wani go aksi rai na den wan di Yehovah poti fu sorgu a gemeente. Nofo tron wi kan feni Bijbel rai na ini den publikâsi fu wi, noso na ini den buku pe na organisâsi e sori fa sani musu  waka na wan leti fasi. Efu wi e suku fu gi yesi na den rai dati na presi fu du san wisrefi feni bun, dan wi e yepi fu meki freide de na ini a gemeente.

10. Na sortu tra fasi Paulus ben suku freide na ini a gemeente?

¹⁰ Wan tra fasi fa Paulus ben e suku freide, na taki a ben poti prakseri na den bun fasi fu den brada nanga sisa fu en, na presi fu poti prakseri na den sani di den no ben du bun. Fu eksempre, na a kaba fu a brifi di Paulus ben skrifi gi den Romesma, a ben kari furu sma na den nen èn a ben taki wan bun sani fu den, noso a ben taki wan sani di a ben sabi fu den. Neleki Paulus wi kan taki furu fu den bun fasi di wi brada nanga sisa abi. Te wi e du dati, dan wi e tron moro bun mati fu makandra èn wi e meki a lobi na ini a gemeente kon moro tranga.

11. Fa wi kan meki sani kon bun baka te wi kisi trobi nanga trawan?

¹¹ Son leisi, srefi lepi Kresten kan kisi wan trobi noso kesekese nanga makandra. Dati ben pasa nanga Paulus nanga en bun mati Barnabas. Den tu man disi ben o go na difrenti gemeente èn den ben e haritaki nanga makandra efu den ben o teki Markus nanga den. Den kisi „bun bigi trobi” èn ibriwan fu den teki en eigi pasi (Tori 15:37-39). Ma Paulus, Barnabas, nanga Markus ben meki sani kon bun baka, èn na so fasi den sorgu taki freide nanga wánfasi ben de na ini a gemeente. Bakaten Paulus fruteri bun sani fu Barnabas nanga Markus (1 Kor. 9:6; Kol. 4:10). Efu wi abi wan trobi nanga wan sma na ini a gemeente, dan wi musu meki sani kon bun baka tu èn wi musu tan poti prakseri na den bun sani di a e du. Na so fasi wi e sorgu taki freide nanga wánfasi de na ini a gemeente.​—Ef. 4:3.

12. San na wan tu problema di wi brada nanga sisa abi?

¹² Wi kan gi wi brada nanga sisa deki-ati te wi e meki a bribi di den abi na ini Yehovah kon moro tranga. Sonwan e kisi problema fu di famiriman di no de Kotoigi, sma na wrokope noso na skoro e spotu den. Trawan siki seryusu, noso den e sari fu di sma du wan hati sani nanga den. Son Kresten di dopu furu yari kaba e wakti te nanga now fu na ogri grontapu disi kon na wan kaba. Den situwâsi disi kan de wan tesi gi Kresten na ini a ten disi. Sma na ini a gemeente fu den fosi Kresten ben abi den srefi sortu problema disi. San Paulus du fu tranga den brada nanga sisa fu en?

13. Fa Paulus ben yepi den brada nanga sisa fu en te sma ben spotu den?

¹³ Paulus ben gebroiki Gado Wortu fu tranga a bribi fu den brada nanga sisa fu en. Fu eksempre, son famiriman fu den Dyu di ben tron Kresten ben feni taki a Dyu bribi ben bun moro a Kresten bribi. Kande den Kresten disi no ben sabi san fu taigi den famiriman fu den. A no de fu taki dati a brifi di Paulus skrifi gi den Hebrewsma, ben gi den Kresten disi deki-ati (Hebr. 1:5, 6; 2:2, 3; 9:24, 25). Den krakti wortu fu en ben kan yepi den fu sabi san den ben musu taigi den famiri di ben e krutu den. Na ini a ten disi wi kan yepi wi Kresten brada nanga sisa te sma e spotu den. Wi kan sori den fa fu gebroiki Bijbel publikâsi fu fruteri sma fu san ede den e bribi wan sani. Èn efu sma e lafu den yonguwan fu wi fu di den e bribi taki na Gado meki ala sani, dan wi kan yepi den fu ondrosuku sani moro fini na ini den brochure Is het leven geschapen? nanga Vijf belangrijke vragen over het ontstaan van het  leven. Dan den kan sori sma fu san ede den e bribi taki na Gado meki ala sani.

14. San Paulus ben du aladi a ben abi en druk?

¹⁴ Paulus ben gi en brada nanga sisa deki-ati fu „du bun wroko” fu sori taki den lobi makandra (Hebr. 10:24). Paulus no ben yepi en brada nanga sisa soso nanga san a ben e taki, ma sosrefi nanga san a ben e du. Fu eksempre, di angriten ben de na ini Yudea, dan Paulus ben tyari sani gi den Kresten brada nanga sisa di ben abi yepi fanowdu (Tori 11:27-30). Srefi te Paulus ben abi en druk fu di a ben e preiki èn ben e gi sma leri, toku a ben e suku fasi fu yepi sma di ben abi sani fanowdu (Gal. 2:10). Na so fasi a ben e yepi den brada nanga sisa fu abi a frutrow taki Yehovah o sorgu den. Na ini a ten disi wi kan tranga a bribi fu wi brada nanga sisa tu te wi e gebroiki wi ten, nanga ala den koni di wi abi fu yepi den te wan rampu pasa. Boiti dati, wi kan gi moni ibri tron baka gi a wroko di e du na heri grontapu. Na den fasi disi wi kan yepi wi brada nanga sisa fu frutrow taki noiti Yehovah o gowe libi den.

15-16. Fa wi kan yepi wi brada noso sisa di bribi kon swaki?

¹⁵ Paulus ben tan yepi den sma di kon abi wan swaki bribi. A ben sori sari-ati gi den, a ben taki switi nanga den èn a ben taki bun sani fu den (Hebr. 6:9; 10:39). Fu eksempre, na ini a heri brifi di a skrifi gi den Hebrewsma, dan nofo tron a ben e gebroiki a wortu „wi”. Nanga dati a sori taki ensrefi ben musu gi yesi na den rai di a gi den (Hebr. 2:1, 3). Neleki Paulus, wi no e tapu fu yepi den sma di bribi kon swaki. Na presi fu dati, wi e yepi den fu di wi wani taki sani e go bun nanga den. Na so wi e sori krin taki wi lobi den. Te wi e taki na wan switi fasi èn nanga wan safri sten, dan sma  sa wani arki wi èn den o kisi deki-ati fu san wi e taki.

¹⁶ Paulus ben gi den brada nanga sisa fu en a dyaranti taki Yehovah sabi den bun sani di den du (Hebr. 10:32-34). Wi kan du a srefi sani tu te wi e yepi wan Kresten brada noso sisa di kon abi wan swaki bribi. Wi kan meki a fruteri wi fa a kon na ini waarheid, noso wi kan gi en deki-ati fu memre den momenti di a ben firi taki Yehovah yepi en. Wi kan gebroiki na okasi disi fu gi en a dyaranti taki Yehovah no frigiti san a du fu di a lobi Yehovah, èn taki na ini a ten di e kon Yehovah o tan horibaka gi en (Hebr. 6:10; 13:5, 6). Te wi e taki so nanga makandra, dan den lobi brada nanga sisa disi kan kisi a deki-ati fu dini Yehovah go doro.

17. Sortu sani wi kan leri fu du moro bun?

¹⁷ Neleki fa wan sma di e du bow-wroko e kisi moro ondrofeni baka wan pisi ten, na so wi kan kon sabi moro bun fa fu yepi trawan. Wi kan yepi den fu horidoro, te wi e taki nanga den fu sma di horidoro na ini a ten di pasa. Wi kan sorgu taki freide de, te wi e taki fu den bun sani di trawan e du, te wi e wai pasi gi sani di kan pori a freide, èn te wi e meki sani kon bun baka te wan trobi de. Boiti dati, wi kan tranga a bribi fu wi brada nanga sisa te wi e taki nanga den fu prenspari Bijbel leri, te wi e yepi den nanga sani di den abi fanowdu, èn te wi e yepi den wan di kon abi wan swaki bribi.

18. San yu bosroiti fu du?

¹⁸ Den wan di e du bow-wroko gi na organisâsi e firi prisiri èn den de koloku. Wi kan firi prisiri èn wi kan de koloku te wi e yepi fu tranga a bribi fu wi brada nanga sisa na ini a gemeente. Wan gebow kan pori gowe, ma den bun sani di wi du fu yepi wi brada nanga sisa kan tan fu têgo! Meki wi abi a fasti bosroiti fu „tan gi makandra deki-ati èn tan yepi makandra”.​—1 Tes. 5:11.