1. Fu san ede Yesus aksi Yehovah fu kibri den bakaman fu en?

 A NETI fosi Yesus dede, a aksi en Papa na hemel wan prenspari sani. A aksi en fu kibri den bakaman fu en (Yoh. 17:15, 20). Dati wani taki dati Yehovah no ben e kibri en pipel noso taki a no ben e poti prakseri na den? Nôno. Ma Yesus ben sabi taki Satan ben o gens den bakaman fu en hebi. A ben e frustan tu taki na Yehovah wawan ben o man yepi den fu horidoro te Didibri ben o feti nanga den.

2. Soleki fa Psalm 33:18-20 e sori, dan fu san ede wi no abi fu frede te problema e miti wi?

² A grontapu disi di Satan e tiri e tyari furu problema kon gi tru Kresten na ini a ten disi. Wi e kisi tesi di kan meki wi lasi-ati noso di kan meki en muilek gi wi fu tan gi yesi na Yehovah. Ma na ini na artikel disi wi o si taki wi no abi fu frede noti. Yehovah e poti prakseri na wi. A e si sortu tesi nanga problema e miti wi èn a de klariklari fu yepi wi so taki wi kan pasa den. Meki wi go luku tu eksempre na ini Bijbel di e sori fa Yehovah e kibri noso e „poti prakseri na den sma di e lespeki en”.​—Leisi Psalm 33:18-20.

3. O ten wi kan firi leki wi de wi wawan?

³ Aladi wi abi bun furu brada nanga sisa na ini a gemeente, toku son leisi wi kan firi leki wi de wi wawan. Fu eksempre, yonguwan kan firi leki nowan sma de na den sei te den musu fruteri tra skoro pikin san den e bribi noso te den froisi go na ini wan tra gemeente. Sonwan fu wi e firi brokosaka èn wi e sari fu di wi e denki taki nowan sma man yepi wi. Kande wi e frede fu fruteri trawan fa wi e firi, fu di wi e  prakseri taki den no man frustan wi. Son leisi wi kan bigin denki srefi taki nowan sma e broko den ede nanga wi. Awinsi fa a no fa, den sortu firi disi kan meki wi bruya èn denki taki yepi no de gi wi. Ma Yehovah no wani taki wi firi so. Fa wi du sabi dati?

4. Fu san ede a profeiti Elia taigi Yehovah taki ’na en wawan ben tan abra’?

⁴ Luku a tori fu a profeiti Elia di ben abi wan tranga bribi. Pasa 40 dei langa a reti-ati man disi ben e lon fu go kibri fu di Iseibel ben sweri taki a ben o kiri en (1 Kow. 19:1-9). Te fu kaba, a doro wan bergi èn a go kibri na ini a bergi-olo. Drape a profeiti taigi Yehovah taki ’na en wawan ben tan abra’ (1 Kow. 19:10). Ma tra profeiti ben de na ini a kondre. Obadya ben man kibri moro leki 100 profeiti so taki Iseibel no kiri den (1 Kow. 18:7, 13). Dan fu san ede Elia ben e firi leki na en wawan de? A de so taki a ben denki taki den profeiti di Obadya kibri ben kon dede tu? A ben firi so fu di nowan sma ben bigin dini Yehovah baka di a sori tapu Karmel-bergi taki En na a tru Gado? A ben denki taki nowan sma ben sabi na ini sortu kefar en libi de? A ben feni taki nowan sma ben e broko den ede nanga en? Bijbel no e taki finifini fu san ede Elia ben e firi so. Ma san wi sabi seiker, na taki Yehovah ben e frustan fu san ede Elia ben firi taki a de en wawan èn Yehovah ben sabi precies fa a ben musu yepi en.

5. Fa Yehovah meki Elia si taki a no ben de en wawan?

⁵ Yehovah du someni sani fu yepi Elia. A gi Elia na okasi fu taki fa a e firi. Tu leisi a aksi en: „San yu kon du dya, Elia? (1 Kow. 19:9, 13) Ibri leisi Yehovah ben e arki te Elia ben e taki san de tapu en ati. Baka dati Yehovah sori Elia taki a de nanga en èn taki a abi furu makti. A taigi Elia tu taki omeni tra Israelsma de di e anbegi en (1 Kow. 19:11, 12, 18). Wi de seiker taki Elia ben firi bun, baka di a fruteri Yehovah san ben de tapu en ati èn di a si fa Yehovah piki en. Yehovah gi Elia wan tu prenspari  wroko fu du. A aksi en fu go salfu Hasaèl leki kownu fu Siria, Yehu leki kownu fu Israel èn Elisa leki profeiti (1 Kow. 19:15, 16). Den wroko disi di Yehovah gi Elia ben yepi en fu poti prakseri na sani di ben o gi en deki-ati na presi fu firi leki a de en wawan. Yehovah gi en wan mati tu, Elisa, di ben o wroko makandra nanga en. Fa Yehovah kan yepi yu te yu e firi leki yu de yu wawan?

6. Fu san yu kan begi te yu e firi leki yu de yu wawan? (Psalm 62:8)

⁶ Yehovah e aksi yu fu begi en. A e si den problema di e miti yu èn a wani meki yu sabi taki a de klariklari fu arki den begi fu yu (1 Tes. 5:17). A e prisiri fu arki den begi fu den sma di e dini en (Odo 15:8). Fu san yu kan begi te yu e firi leki yu de yu wawan? Fruteri Yehovah ala san de tapu yu ati, neleki fa Elia ben du. (Leisi Psalm 62:8.) Fruteri en ala sani di e gi yu broko-ede èn fa den sani disi e meki yu e firi. Aksi Yehovah meki a sori yu san yu kan du te yu e firi leki yu wawan de. Fu eksempre, efu yu e firi leki yu de yu wawan noso efu yu e frede fu taki fu a bribi fu yu te pikin na skoro e poti aksi gi yu, dan yu kan aksi Yehovah fu gi yu deki-ati fu man taki fri. Yu kan aksi en tu fu gi yu koni so taki yu kan fruteri den pikin na wan bun fasi san yu e bribi (Luk. 21:14, 15). Efu yu e firi brokosaka noso yu lasi-ati, dan aksi Yehovah fu yepi yu so taki yu kan taki nanga wan lepi Kresten. Yu kan aksi Yehovah fu yepi a Kresten dati so taki a kan frustan fa yu e firi. Te yu e fruteri Yehovah ala san de tapu yu ati, te yu e si fa a e piki den begi fu yu èn te yu e teki a yepi di trawan e gi yu, dan yu no o firi so furu moro leki yu de yu wawan.

7. San yu leri fu na eksempre fu Mauricio?

⁷ Yehovah gi wi alamala wan wroko fu du di e meki wi firi prisiri. Yu kan de seiker taki a e si èn e warderi ala a wroko di wi e du na ini a gemeente èn na ini a preikiwroko (Ps. 110:3). Fa a wroko disi e yepi wi te wi e firi leki wi de wi wawan? Luku a tori fu wan yongu brada di nen Mauricio. * Syatu baka di Mauricio dopu, wan bun mati fu en gwe libi a tru anbegi. Mauricio taki: „Di mi si fa a e gwe libi Yehovah, dan mi ben e firi leki misrefi no ben o man du san mi pramisi Yehovah di mi gi misrefi abra na en. Mi ben e si leki mi ben o gwe libi a gemeente tu. Mi ben e firi leki mi de mi wawan èn taki nowan sma e frustan fa mi e firi.” San yepi Mauricio? A e taki: „Mi bigin du moro na ini a preikiwroko. Dati yepi mi fu no sidon e prakseri ala sortu fowtu sani èn fu no denki misrefi nomo.  Te mi ben e wroko makandra nanga trawan, dan mi ben e firi koloku èn mi no ben e firi so furu moro leki mi de mi wawan.” A tru taki srefi efu wi no man miti nanga wi brada nanga sisa fu preiki nanga den, toku wi e kisi deki-ati kaba te wi e preiki nanga fu skrifi brifi noso fu bel sma. Sortu tra sani yepi Mauricio? A e taki moro fara: „Mi ben e du moro na ini a gemeente tu. Mi ben e sreka misrefi bun fu hori den oefen-lezing di mi ben e kisi. Den grani disi ben e meki mi firi taki Yehovah nanga den brada nanga sisa e warderi mi.”

8. Fa wi kan firi te wi e kisi hebi tesi?

⁸ Wi sabi taki na ini den lasti dei disi wi o kisi tesi (2 Tim. 3:1). Ma toku te son tesi e miti wi, wi e skreki fu di wi no ben fruwakti en noso fu di a hebi tumusi. Fu eksempre, wantronso wi kan kon abi moni problema, wi kan yere taki wi abi wan takru siki noso a kan taki wan lobiwan fu wi lasi libi. A kan hebi gi wi tapu den sortu momenti dati èn wi kan lasi-ati, spesrutu efu den tesi e kon baka makandra noso efu den kon wantronso na wi tapu. Ma no frigiti taki Yehovah e si san e miti wi. Nanga a yepi fu en wi kan pasa iniwan tesi di e kon na wi tapu.

9. Fruteri sortu tesi Yob kisi.

⁹ Prakseri fa Yehovah ben yepi a reti-ati man Yob. Na ini wan syatu pisi ten Yob ben kisi wan lo hebi tesi. Ini wán dei sma kon fruteri Yob a takru nyunsu taki sma fufuru sonwan fu den meti fu en èn taki trawan fu den kon dede. A yere tu taki sma kiri den wrokoman fu en. Ma san moro ogri srefi, na taki ala den pikin fu en kon dede (Yob 1:13-19). Yob no ben kaba row srefi di wan takru siki naki en (Yob 2:7). A situwâsi fu Yob ben takru so te, taki Yob taki: „Mi e tegu gi a libi disi. Mi no wani libi fu ala ten.”​—Yob 7:16.

10. Fa Yehovah yepi Yob fu horidoro di a kisi tesi? (Luku a fowtow na tapu a kafti.)

¹⁰ Ma Yehovah ben e poti prakseri na Yob. Fu di a ben lobi Yob, meki a gi en san ben de fanowdu fu man pasa den tesi èn fu horidoro. Yehovah taki nanga Yob. A memre Yob taki en na wan Gado di abi bun furu koni èn taki a lobi den mekisani fu en. Yehovah fruteri Yob tu fu den furu kefalek meti di A meki (Yob 38:1, 2; 39:9, 13, 19, 27; 40:15; 41:1, 2). Yehovah meki wan yongu man di nen Elihu taki nanga Yob tu fu gi en deki-ati èn fu trowstu en. Elihu taigi Yob taki ala ten Yehovah e pai den anbegiman fu en di e horidoro. Ma Yehovah meki Elihu gi Yob rai na wan lobi-ati fasi. A yepi Yob fu no denki tumusi furu fu ensrefi, ma fu hori na prakseri taki a no de noti te a teki ensrefi gersi nanga Yehovah, a Gado di meki hemel nanga grontapu (Yob 37:14). Yehovah ben gi Yob wan moi grani tu. A taigi en taki a ben musu begi gi den dri mati fu en di ben sondu (Yob 42:8-10). Fa Yehovah e yepi wi na ini a ten disi te wi e kisi hebi tesi?

11. Fa Bijbel e yepi èn e trowstu wi te wi e kisi tesi?

¹¹ Yehovah no e taki langalanga nanga wi leki fa a ben taki nanga Yob, ma a e taki nanga wi nanga yepi fu en Wortu Bijbel (Rom. 15:4). A e trowstu wi nanga yepi fu den sani di a pramisi wi gi a ten di e kon. Luku wan tu Bijbeltekst di e trowstu wi te wi e kisi tesi. Na ini Bijbel Yehovah e gi wi a dyaranti taki nowan sani, sobun nowan hebi tesi tu ’sa man prati wi fu a lobi fu en’ (Rom. 8:38, 39). A wani meki wi sabi taki „a de krosibei fu ala den wan di e bari kari  en” na ini begi (Ps. 145:18). Yehovah e taigi wi tu taki efu wi e frutrow tapu en, dan wi o man horidoro awinsi sortu tesi wi e kisi èn wi o man de nanga prisiri tu (1 Kor. 10:13; Yak. 1:2, 12). Gado Wortu e memre wi taki den banawtu di wi e kisi de fu wan syatu pisi ten nomo, ma den blesi di wi o kisi o de fu têgo (2 Kor. 4:16-18). Boiti dati, Yehovah pramisi wi taki a o pori den wan di e meki taki wi e kisi ala sortu tesi. Dati na Satan Didibri nanga ala den wan di e du ogri neleki en (Ps. 37:10). Yu sabi wan tu Bijbeltekst na ede di kan yepi yu te yu o kisi tesi na ini a ten di e kon?

12. San Yehovah e fruwakti fu wi efu wi wani taki en Wortu yepi wi?

¹² Yehovah e fruwakti fu wi taki wi e poti ten na wan sei fu studeri Bijbel èn fu denki dipi fu san wi e leisi. Te wi e du den sani di wi leri, dan wi bribi e kon moro tranga èn wi e kon moro krosibei fu wi hemel Papa. Na so wi e tranga wisrefi fu man horidoro te wi e kisi tesi. Yehovah e gi en santa yeye tu na den sma di e suku yepi na ini en Wortu. A santa yeye disi kan gi wi „a krakti di bigi pasa marki” so taki wi kan horidoro awinsi sortu tesi wi e kisi.​—2 Kor. 4:7-10.

13. Fa den sani di „a koni srafu di de fu frutrow” e gi wi e yepi wi fu horidoro?

¹³ Nanga yepi fu Yehovah „a koni srafu di de fu frutrow” e sorgu taki wi e kisi omeni artikel, felem nanga poku di e yepi wi fu abi wan tranga bribi èn fu tan krosibei na Yehovah (Mat. 24:45). Wi musu gebroiki ala den sani disi di Yehovah e sreka gi wi. No so langa pasa, wan sisa fu Amerkankondre ben taki fa a e warderi den sani di wi e kisi fu tranga wi bribi. A e taki: „Na ini ala den 40 yari di mi e dini Yehovah, furu sani miti mi pe mi ben musu sori taki mi bribi tranga.” A sisa disi kisi hebi tesi: Wan drunguman ben rèi naki en granpapa kiri, en papa nanga mama kon dede baka di den siki seryusu èn tu leisi a kisi kanker. San yepi en fu horidoro? A e taki: „Ala ten Yehovah luku mi èn a kibri mi. Den sani di a e gi wi nanga yepi fu a koni srafu di de fu frutrow, yepi mi fu horidoro. Dati meki mi e firi leki Yob di a ben taki: ’Mi o tai hori na Gado teleki mi hari mi lasti bro!’”​—Yob 27:5.

14. Fa Yehovah e gebroiki a gemeente fu yepi wi te wi abi problema? (1 Tesalonikasma 4:9)

¹⁴ Yehovah leri a pipel fu en fu sori lobi èn fu trowstu makandra na ini muilek ten.  (2 Kor. 1:3, 4; leisi 1 Tesalonikasma 4:9.) Neleki Elihu, wi brada nanga sisa de klariklari fu yepi wi te wi abi problema so taki wi kan tan getrow na Yehovah (Tori 14:22). Luku fu eksempre fa a gemeente fu Diana ben gi en deki-ati èn fa den yepi en fu tan krosibei na Yehovah baka di en masra kon siki seryusu. Diana e taki: „A ben hebi gi wi, ma wi firi a lobi nanga a krakti fu Yehovah na ini den muilek mun dati. A gemeente yepi wi furu. Den brada nanga sisa ben kon luku wi na oso, den ben e bel wi, èn den ben e brasa wi. Ala den sani disi yepi wi fu horidoro. Fu di mi no e rèi wagi, meki den ben e seti sani gi mi so taki mi ben kan go na den konmakandra nanga a preikiwroko te mi ben man.” Na wan bigi grani taki wi abi brada nanga sisa di e sori so furu lobi gi wi!

15. Fu san ede wi de seiker taki wi o man horidoro te wi e kisi tesi?

¹⁵ Wi alamala o kisi tesi. Ma soleki fa wi leri, dan wi no abi fu pasa den tesi disi wi wawan. Yehovah na wan lobi-ati Tata di e luku wi èn e kibri wi. A de krosibei fu wi èn a de klariklari fu langa wan anu gi wi te wi e begi en fu feni yepi (Yes. 43:2). Wi de seiker taki wi kan pasa iniwan tesi di wi e kisi fu di Yehovah gi wi ala san wi abi fanowdu fu man horidoro. A gi wi a grani fu begi en, a gi wi a Bijbel, a gi wi furu tra sani fu tranga wi bribi, èn a gi wi brada nanga sisa di lobi wi èn di e yepi wi te nowtu miti wi.

16. San wi musu so taki Yehovah kan tan sorgu gi w?

¹⁶ Wi de nanga tangi taki wi abi wan Papa na hemel di e poti prakseri na wi èn di e kibri wi. Yehovah „e meki wi ati prisiri” (Ps. 33:21). Te wi e gebroiki ala den sani di Yehovah gi wi fu yepi wi, dan wi e sori en taki wi de nanga tangi gi a lobi fu en. Meki wi du muiti tu fu tan krosibei na Gado. Fu taki en leti, efu wi e tan gi yesi na Yehovah èn efu wi e du san a feni bun, dan a o tan poti prakseri na wi èn a o kibri wi fu têgo!​—1 Petr. 3:12.