1. Sortu bun sani furu yonguwan du kaba?

 IBRI yari dusundusun yongu Kresten e teki dopu. Yu na wan fu den? Efu yu na wan fu den, dan den Kresten brada nanga sisa breiti gi yu èn Yehovah e prisiri tu! (Odo 27:11) Prakseri omeni sani yu du kaba. Yu studeri Bijbel fayafaya, kande wan tu yari langa. A studie dati yepi yu fu de seiker taki Bijbel na a Wortu fu Gado. Ma a moro prenspari sani na taki yu kon sabi a Skrifiman fu a santa buku dati èn yu kon lobi en. Yu kon abi so furu lobi gi Yehovah taki yu teki dopu èn yu tron wan dinari fu en. Yu teki wan heri bun bosroiti!

2. Fu san wi o taki na ini na artikel disi?

 ² Fosi yu ben teki dopu, yu kisi tesi noso problema di ben meki en muilek gi yu fu tai hori na Yehovah. Ma te yu o kon moro owru, yu o kisi tra tesi. Satan o pruberi fu sorgu taki yu no lobi Gado moro èn a o wani tapu yu fu dini Yehovah (Ef. 4:14). Yu no musu meki dati pasa. San kan yepi yu fu tai hori na Yehovah èn fu dini en soleki fa yu pramisi? Yu musu tan go na fesi, yu musu „du ala muiti” fu tron wan lepi Kresten (Hebr. 6:1). Ma fa yu kan du dati?

3. San ala Kresten musu du, baka te den dopu?

³ Baka te wi dopu, wi alamala musu fiti a rai di na apostel Paulus ben gi den Kresten brada nanga sisa na ini Efeise. A ben gi den deki-ati fu tron Kresten di „lepi dorodoro” (Ef. 4:13). Dati wani taki dati den ben musu tan meki  muiti fu go na fesi. Di Paulus ben taki dati wi musu tron lepi Kresten, dan a ben teki dati gersi nanga a gro di wan pikin e gro. Papa nanga mama lobi a beibi fu den èn den breiti nanga en. Ma a no kan tan wan beibi fu ala ten. Baka wan pisi ten a no mag „du leki wan pikin” moro (1 Kor. 13:11). Na so a de tu nanga Kresten. Baka te wi dopu, wi musu tan go na fesi. Meki wi luku wan tu rai di o yepi wi fu du dati.

4. San kan yepi yu fu tron wan lepi Kresten? Fruklari dati (Filipisma 1:9).

⁴ Kon lobi Yehovah moro nanga moro. Yu abi furu lobi gi Yehovah kaba. Ma a lobi fu yu kan gro. Fa? Na apostel Paulus e taki fu wan sani di kan yepi wi, soleki fa a skrifi na ini Filipisma 1:9. (Leisi en.) Paulus ben begi taki den Filipisma ben o „sori lobi moro nanga moro”. Disi e sori taki wi kan kon lobi Yehovah moro nanga moro tu. Wi kan du dati te wi e „kon sabi finifini san na den tru tori fu Gado” èn te wi e „frustan krin san na a wani fu Gado”. O moro wi e kon leri sabi Yehovah, o moro wi o lobi en, èn o moro wi o warderi a fasi fa a de èn a fasi fa a e du sani. Wi o wani du ala muiti fu plisi en. Wi no o wani du sani di o meki a firi sari. Wi o meki muiti fu frustan san a wani taki wi musu du, èn fa wi musu du dati.

5-6. Fa wi kan kon lobi Yehovah moro nanga moro? Fruklari dati.

⁵ Yesus e du sani soifri leki en Papa. Sobun, yu kan lobi Yehovah moro te yu e kon sabi en Manpikin moro bun (Hebr. 1:3). A moro bun fasi fu kon sabi Yesus moro bun, na fu studeri den fo Evangelietori. Efu yu no abi a bun gwenti ete fu leisi Bijbel ibri dei, dan yu kan pruberi fu bigin now. Te yu e leisi den tori fu Yesus, dan poti prakseri na den moi fasi fu en. Sma ben lobi fu de nanga en èn fu taki nanga en. Fu eksempre, a ben brasa den pikin di den kon na en (Mark. 10:13-16). A ben abi switifasi, den disipel no ben frede fu fruteri en fa den ben e firi (Mat. 16:22). Na so fasi Yesus ben du sani neleki en hemel Papa. Sobun, wi no abi fu frede Yehovah tu. Wi kan taki nanga en na ini begi. Te wi e begi, wi kan fruteri en ala san wi e denki èn e firi. Wi de seiker taki a no o krutu wi. A lobi wi èn a e broko en ede nanga wi.​—1 Petr. 5:7.

⁶ Yesus ben abi sari-ati nanga sma. Na apostel Mateyus ben skrifi: „Di a si ala den sma, a ben e sari den, bika sma ben e pina den èn den ben e waka bruyabruya leki skapu di no abi skapuman” (Mat. 9:36). We, fa Yehovah e firi? Yesus ben taki: „Mi Tata na hemel no wani kwetikweti taki wan fu den pikinwan disi musu lasi libi” (Mat. 18:14). Disi e naki wi ati srefisrefi! O moro wi e kon leri sabi Yesus, o moro wi e kon lobi Yehovah.

7. Fa a kan yepi yu te yu e kon leri sabi den Kresten brada nanga sisa di abi furu ondrofeni?

⁷ Yu kan leri tu fu sori moro lobi èn fu tron wan lepi Kresten efu yu e kon leri sabi den brada nanga sisa na ini yu gemeente di abi furu ondrofeni. Luku o koloku den de. Den no e sari taki den bosroiti fu dini Yehovah. Aksi den fu fruteri yu wan tu sani di den ondrofeni na ini a diniwroko fu Yehovah. Aksi den rai te yu musu teki wan prenspari bosroiti. Hori na prakseri taki „frulusu de pe furu raiman de”.​—Odo 11:14.

8. San wi kan du te wi no de seiker fu son sani di Bijbel e leri?

 ⁸ Ondrosuku sani te yu e tweifri. Soleki fa wi si na ini  paragraaf 2, Satan o pruberi fu tapu yu fu kon abi wan moro tranga bribi èn fu kon moro krosibei fu Yehovah. Wan fasi fa a kan du dati, na fu meki yu tweifri efu son Bijbel leri tru. Fu eksempre, kande son sma o wani meki yu bribi taki a no Gado meki wi, ma taki wi kon de nanga yepi fu evolutie. Kande yu no poti tumusi furu prakseri na a tori disi di yu ben pikin, ma now di yu kon moro owru den e leri a sani disi na skoro. Kande den sani di den leriman e taki, gersi tru tori. Ma a kan taki den sma disi no meki nowan muiti fu kon sabi efu wan Mekiman de. Memre a gronprakseri na ini Odo 18:17: „A fosi sma di e opo taki gi ensrefi te sma e koti krutu gi en o kisi leti. Ma dan wan trawan e kon na inisei èn a e bigin poti aksi gi en fu tyari kon na krin fa sani de trutru.” Na presi fu bribi ala sani di den e leri na skoro, ondrosuku bun san Gado Wortu, Bijbel, e taki. Ondrosuku den buku fu wi. Taki nanga brada nanga sisa di ben e bribi na evolutie-leri fosi. Aksi den san ben meki taki den e bribi now taki wan Mekiman de di lobi wi. Te yu e taki nanga den, dan disi kan yepi yu fu ondrosuku den buweisi taki wan Mekiman de.

9. San yu e leri fu na ondrofenitori fu Melissa?

⁹ Wan sisa di nen Melissa ben go ondrosuku suma meki ala sani èn fa a libi du kon, èn dati yepi en fu no tweifri moro. * A e taki: „Den leriman na skoro e taki fu evolutie na so wan fasi taki a gersi tru tori. Fosi, mi no ben wani ondrosuku sani fu di mi ben frede taki kande evolutie tru. Ma dan mi go prakseri taki Yehovah no wani wi fu dini en sondro fu gebroiki wi frustan. Dati meki mi bigin ondrosuku sani. Mi leisi a buku Is er een Schepper die om u geeft? Èn den brochure Is het leven geschapen? nanga Vijf belangrijke vragen over het onstaan van het leven. Disi ben de soifri san mi ben abi fanowdu. Mi winsi taki mi ben du disi langa ten kaba.”

10-11. San kan yepi yu fu tan tyari yusrefi na wan krin fasi? (1 Tesalonikasma 4:3, 4)

 ¹⁰ No du sani di no krin. Te yu e gro kon bigi, dan a firi fu abi seks kan kon moro tranga èn son leisi sma kan pusu yu fu abi seks fosi yu trow. Satan wani taki yu musu du san yu e firi. San kan yepi yu fu tan tyari yusrefi na wan krin fasi? (Leisi 1 Tesalonikasma 4:3, 4.) Te yu wawan e taki nanga Yehovah na ini begi, dan fruteri en san de tapu yu ati. Fruteri en fa yu e firi trutru èn aksi en fu a gi yu krakti (Mat. 6:13). Hori na prakseri taki Yehovah no wani krutu yu, ma taki a wani yepi yu (Ps. 103:13, 14). Yu kan feni yepi tu na ini Gado Wortu. Melissa di wi ben kari kaba ben musu feti fu no prakseri sani di no krin. A e taki. „Mi ben e leisi Bijbel ibri dei èn dati yepi mi fu tan feti teige den fowtu prakseri fu mi. A yepi mi fu memre taki mi na fu Yehovah èn taki mi wani dini en.”​—Ps. 119:9.

¹¹ No pruberi fu lusu yu problema yu wawan. Taki nanga yu papa nanga mama fu den sani di e moro yu. A tru taki a no makelek fu fruteri yu inibere tori, ma a prenspari fu du dati. Melissa e taki: „Mi begi fu abi deki-ati, dan mi taki nanga mi papa fu a problema fu mi. Baka dati, mi ben firi moro bun. Mi ben sabi taki Yehovah ben breiti nanga mi.”

12. Fa yu kan teki bun bosroiti?

¹² Meki Bijbel gronprakseri yepi yu fu teki bun bosroiti. Te yu e kon moro owru, dan yu papa nanga mama o gi yu moro okasi fu teki yu eigi bosroiti. Ma furu sani de di yu no sabi ete. Fa yu kan sorgu taki yu no meki wan fowtu di o pori a matifasi di yu abi nanga Yehovah? (Odo 22:3) Wan sisa di nen Kari e fruteri san yepi en fu teki moro bun bosroiti. A kon si taki lepi Kresten no abi wan wet fanowdu gi ibri situwâsi na ini den libi. A e taki: „Mi no ben musu luku nomo san mi mag du noso san mi no mag du, ma mi ben musu kon frustan fa Yehovah e denki fu sani.” Te yu e leisi Bijbel, dan aksi yusrefi: ’San a pisi disi e fruteri mi fu a fasi fa Yehovah e denki? A abi gronprakseri di kan yepi mi fu du san bun? Sortu wini mi o kisi efu mi e du san Bijbel e leri mi?’ (Ps. 19:7; Yes. 48:17, 18) Te yu e leisi Bijbel èn te yu e prakseri dipi fu san yu leisi, dan yu o feni en moro makelek fu teki bosroiti di e plisi Yehovah. Te yu e tan du disi go doro, dan yu o si taki yu no abi wan wet fanowdu gi ibri situwâsi na ini yu libi, fu di yu e frustan fa Yehovah e denki fu sani.

13. Fa bun mati kan yepi yu? (Odo 13:20)

¹³ Suku mati di lobi Yehovah. Soleki fa wi ben taki kaba, den sma di yu e teki leki mati kan yepi yu fu tron wan lepi Kresten. (Leisi Odo 13:20.) Wan sisa di nen Sara no ben de nanga prisiri moro. Dan wan sani pasa di yepi en fu firi koloku baka. Sara e fruteri: „Mi feni bun mati na a yoisti ten. Mi nanga wan yongu sisa ben kon makandra ibri wiki fu studeri A Waktitoren. Wan tra mati yepi mi fu bigin gi piki na den konmakandra. Fu di den mati fu mi yepi mi, meki mi bigin studeri èn begi moro seryusu. Mi ben kon abi wan moro tranga matifasi nanga Yehovah èn mi kon abi prisiri baka.”

14. Fa Julien feni bun mati?

¹⁴ Fa yu kan feni mati di o yepi yu fu tron wan lepi Kresten? Julien, di e dini leki owruman now, e taki: „Di mi ben  moro yongu, mi ben feni mati te mi ben e teki prati na a preikiwroko. Den mati disi ben de fayafaya èn den yepi mi fu si taki a preikiwroko na wan switi wroko fu du. A sani disi meki taki mi ben wani go na ini a furuten diniwroko. Mi kon si tu taki mi no ben abi furu bun mati fu di mi ben suku mati di abi a srefi yari leki mi. Bakaten mi feni bun mati tu na Betel. A bun eksempre fu den yepi mi fu luku bun nanga den sani di mi e arki èn e luku, èn disi tyari mi kon moro krosibei na Yehovah.”

15. Sortu warskow Paulus ben gi Timoteyus te a abi fu du nanga den mati di a ben o teki? (2 Timoteyus 2:20-22)

¹⁵ San yu musu du te yu kon si taki wan sma na ini a gemeente no de wan bun mati gi yu? Paulus ben sabi taki son sma na ini a fosi yarihondro Kresten gemeente no ben e tyari densrefi leki Kresten. Sobun a ben warskow Timoteyus fu tan fara fu den. (Leisi 2 Timoteyus 2:20-22.) Wi matifasi nanga Yehovah na wan tumusi warti sani. Wi wroko so tranga fu kon abi a matifasi disi nanga wi hemel Tata. Sobun, wi no musu meki nowan sma pori en.​—Ps. 26:4.

16. Sortu marki yu musu suku fu doro?

¹⁶ Suku fu doro bun marki. Suku fu doro marki di o meki yu bribi kon moro tranga èn di o yepi yu fu tron wan lepi Kresten (Ef. 3:16). Fu eksempre, yu kan bosroiti fu meki moro muiti fu studeri èn leisi Bijbel doronomo (Ps. 1:2, 3). Yu kan pruberi tu fu begi moro furu èn fu begi komoto fu yu ati. Kande yu musu meki moro muiti fu luku bun nanga san yu e arki èn san yu e luku, èn fa yu e gebroiki yu ten (Ef. 5:15, 16). Te Yehovah e si o tranga yu e wroko fu tron wan lepi Kresten, dan a o prisiri nanga dati.

17. Te yu e yepi sma, dan fa dati kan yepi yu?

¹⁷ Yu o tron wan moro lepi Kresten te yu e yepi trawan. Yesus ben taki: „Wan sma sa de moro koloku te a e gi sani, leki te a e kisi sani” (Tori 20:35). Yu o firi koloku te yu e gebroiki yu ten èn yu krakti fu yepi trawan. Fu eksempre, yu kan pruberi  fu yepi den owruwan nanga den sikiwan na ini yu gemeente. Kande yu kan go na wenkri gi den, noso yu kan sori den fa den musu wroko nanga a tablet noso a telefon fu den. Efu yu na wan brada, dan suku fu tron wan dinari na ini a diniwroko so taki yu kan yepi den brada nanga sisa fu yu moro (Fil. 2:4). Yu e sori lobi tu gi den sma di no de na ini a gemeente te yu e preiki a bun nyunsu fu a Kownukondre gi den (Mat. 9:36, 37). Efu yu man, suku fu go na ini a furuten diniwroko.

18. Fa a furuten diniwroko kan yepi yu fu go na fesi èn fu abi wan moro bun matifasi nanga Yehovah?

¹⁸ Na ini a furuten diniwroko yu kan feni someni okasi fu go na fesi èn fu abi wan moro bun matifasi nanga Yehovah. Te yu e dini leki pionier, yu kan go na a Skoro gi Kownukondre preikiman. Yu kan dini na Betel noso yu kan yepi nanga bow-wroko. Wan yongu pionier sisa di nen Kaitlyn e taki: „A preiki di mi ben e preiki makandra nanga brada nanga sisa di abi ondrofeni, yepi mi fu kon abi wan moro bun matifasi nanga Yehovah, baka di mi dopu. Na eksempre fu den gi mi deki-ati fu studeri Bijbel moro bun èn fu gi leri na wan moro bun fasi.”

19. Sortu blesi yu o kisi efu yu e tan go na fesi?

¹⁹ Efu yu e tan meki muiti fu go na fesi, dan yu o kisi furu blesi. Yu no o gebroiki yu krakti fu du sani di no warti (1 Yoh. 2:17). Yu no o teki fowtu bosroiti di e meki yu firi sari. Na presi fu dati, yu libi o waka bun èn yu o de koloku trutru (Odo 16:3). A bun eksempre fu yu o gi den tra Kresten brada nanga sisa, yonguwan nanga owruwan, deki-ati (1 Tim. 4:12). Èn a moro prenspari sani na taki yu o firi korostu èn yu o de koloku fu di yu plisi Yehovah èn fu di yu abi wan bun matifasi nanga en.​—Odo 23:15, 16.