1. Fu san ede a profeiti Danièl ben hari a prakseri fu den Babilonsma?

 A PROFEITI Danièl ben de wan yonguman di den Babilonsma teki en tyari gowe leki katiboman, farawe fu Yerusalem. Ma a de krin taki den sani di den heihei man fu Babilon ben si na Danièl ben hari a prakseri fu den. Den ben si „soso san na ai e si”. Den ben si taki nowan sani ben e mankeri Danièl, a ben moi èn a ben de fu wan prenspari famiri (1 Sam. 16:7). Dati meki den Babilonsma gi en leri fu wroko gi Kownu.​—Dan. 1:3, 4, 6.

2. Fa Yehovah ben denki fu Danièl? (Esekièl 14:14)

² Yehovah ben lobi Danièl. A no fu di Danièl ben moi noso fu di a ben wroko gi Kownu meki Yehovah ben lobi en, ma na fu di a yonguman disi ben teki bun bosroiti ini en libi. Fu taki en leti, a kan taki Danièl ben abi sowan 20 yari di Yehovah ben taki dati a ben de leki Noa nanga Yob. Sobun, aladi Danièl ben yongu, toku Yehovah ben si en leki wan reti-ati sma neleki Noa nanga Yob di ben dini en getrow furu yari langa (Gen. 5:32; 6:9, 10; Yob 42:16, 17; leisi Esekièl 14:14). Danièl ben libi langa èn a ben abi wan aparti libi. Èn Yehovah tan lobi Danièl en heri libi langa.​—Dan. 10:11, 19.

3. San wi o luku na ini na artikel disi?

³ Na ini na artikel disi wi o taki fu tu fasi fu Danièl di ben meki taki Yehovah lobi en. Wi o taki fosi fu situwâsi pe a ben sori ibriwan fu den fasi disi. Baka dati wi o si fa Danièl leri fu sori den fasi disi. Leki lasti, wi o luku fa wi kan teki na eksempre fu en. Aladi na artikel disi skrifi gi yongusma, toku wi alamala kan leri wan sani fu na eksempre fu Danièl.

4. Fa Danièl sori deki-ati? Gi wan eksempre.

⁴ Sma di abi deki-ati kan frede son leisi, ma den no e meki dati tapu den fu du san bun. Danièl ben de wan yonguman  di ben abi furu deki-ati. Luku tu situwâsi pe a ben sori deki-ati. A fosiwan ben de sowan tu yari baka di den Babilonsma pori Yerusalem. Kownu Nebukadnesar fu Babilon ben kisi wan dren fu wan bun bigi popki, di ben meki a frede srefisrefi. A kownu ben taki dati a ben o kiri ala den koniman, sosrefi Danièl, efu den no ben man taigi en san a ben dren èn san a dren ben wani taki (Dan. 2:3-5). Danièl ben musu du wan sani esi-esi noso furu sma ben o dede. A „go aksi Kownu efu a ben kan gi en ten, so taki a ben kan sori en san a dren ben wani taki” (Dan. 2:16). Danièl ben musu abi deki-ati nanga bribi fu man du so wan sani. Fu san ede? Fu di Bijbel no e taki dati Danièl ben tyari dren kon na krin kaba. A aksi Sadrak, meisak nanga Abedneikow, b den mati fu en, fu begi „a Gado fu hemel fu abi sari-ati nanga den èn fu tyari a kibritori disi kon na krin” (Dan. 2:18). Yehovah piki den begi fu den. Gado yepi Danièl fu fruklari gi Nebudkadnesar san a dren fu en ben wani taki. Na so Danièl nanga den mati fu en no dede.

5. Na ini sortu tra situwâsi Danièl ben musu sori deki-ati?

⁵ Wan pisi ten baka di Danièl ben fruklari a dren fu a bun bigi popki, wan tra sani pasa pe a ben musu sori furu deki-ati tu. Nebukanesar ben kisi wan tra dren di ben meki a frede srefisrefi. A ben dren fu wan kefalek hei bon. Danièl ben sori deki-ati di a taigi a kownu san a dren wani taki. A taigi a kownu srefi taki a ben o kon law èn taki a no ben o de kownu moro gi wan pisi ten (Dan. 4:25). A kownu ben kan si Danièl leki en feanti now èn a ben kan meki sma kiri en. Ma Danièl ben abi deki-ati èn a fruteri Nebukadnesar san a dren ben wani taki.

6. San ben kan yepi Danièl fu abi deki-ati?

⁶ San ben kan yepi Danièl fu abi deki-ati en heri libi langa? Wi kan de seiker taki Danièl en papa nanga mama ben de wan bun eksempre gi en di a ben yongu. A no de fu taki dati den ben du san Yehovah ben taigi papa nanga mama ini Israel èn den ben leri den pikin den wet fu Gado (Deut. 6:6-9). Danièl ben sabi den Tin Komando èn a ben sabi furu tra sani fu a Wet tu. Fu eksempre, a ben sabi san wan  Israelsma ben mag nyan èn san a no ben mag nyan c (Lef. 11:4-8; Dan. 1:8, 11-13). Danièl ben sabi a historia fu Gado pipel èn a ben sabi san ben pasa nanga den di den no ben gi yesi na Yehovah (Dan. 9:10, 11). Den sani di Danièl ondrofeni na ini en heri libi ben meki a de seiker taki Yehovah nanga den tranga engel fu en ben o yepi en awinsi san pasa.​—Dan. 2:19-24; 10:12, 18, 19.

7. Sortu tra sani ben yepi Danièl fu abi deki-ati? (Luku a prenki.)

⁷ Danièl ben studeri den sani di den profeiti fu Gado ben skrifi, soleki den profeititori fu Yeremia. Na so a kon sabi taki den Dyu di ben de wan langa pisi ten kaba na ini katibo na ini Babilon ben o mag drai go baka na den kondre heri esi (Dan. 9:2). A no de fu taki dati di Danièl si taki den profeititori fu Bijbel kon tru, dan en bribi ini Yehovah kon moro tranga. Sma di abi wan tranga bribi e frutrow Gado nanga den heri ati èn dati kan meki taki den abi furu deki-ati. (Luku Romesma 8:31, 32, 37-39.) Ma san moro prenspari na taki Danièl ben abi a gwenti fu begi en Papa na hemel (Dan. 6:10). A fruteri Yehovah den sondu fu en èn a taigi en fa a ben e firi. Boiti dati Danièl ben aksi Yehovah fu yepi en (Dan. 9:4, 5, 19). Neleki ala sma, Danièl no gebore nanga deki-ati. Na presi fu dati, a leri fu abi deki-ati fu di a ben e studeri, a ben e begi èn a ben frutrow tapu Yehovah.

8. San wi musu du fu kon abi deki-ati?

⁸ San wi musu du fu kon abi deki-ati? Kande yu papa nanga mama e taigi yu taki yu musu abi deki-ati. Ma awinsi yu papa nanga mama abi deki-ati, dan dati no wani taki dati yu o abi deki-ati tu. Te yu e du muiti fu kisi deki-ati, dan dati de neleki yu e leri fu du wan nyun sani. Wan fasi fa yu kan du dati, na te yu e luku bun san a leriman fu yu e du èn dan yu musu a srefi sani tu. Na so wi kan leri fu abi deki-ati te wi e luku bun fa tra sma sori a fasi disi èn dan wi e du a srefi tu. Sobun, san wi leri fu Danièl? Neleki Danièl, wi musu sabi Gado Wortu bun. Wi musu kon abi wan bun matifasi nanga Yehovah èn wi o man du dati te wi abi a gwenti fu taki nanga en èn fruteri en ala san wi e firi. Boiti dati wi musu abi a frutrow taki Yehovah o yepi wi ala ten. Na so wi o abi deki-ati te wi kisi tesi.

9. Sortu wini wi o kisi te wi abi deki-ati?

⁹ Wi e kisi wini na difrenti fasi te wi abi deki-ati. Luku na ondrofenitori fu Ben. A ben go na wan skoro na ini Doisrikondre pe ala sma ben e bribi na evolutie-leri èn den ben feni taki a tori na ini Bijbel di e taki fa Gado meki ala sani, no tru. Wan dei Ben kisi na okasi fu tanapu na fesi a klas fu fruteri fu san ede a e bribi taki na Gado meki ala sani. Ben sori deki-ati èn a fruteri ala sma san a e bribi. San ben pasa baka dati? Ben e taki: „A meneer fu mi ben arki bun èn a meki kopi fu ala den sani di mi ben gebroiki fu horibaka gi san mi ben fruteri èn a gi ibri studenti wan kopi.” San den pikin ini a klas du? Ben e taki: „Furu fu den ben arki èn den ben taki dati den abi lespeki gi mi.” Na ondrofenitori fu Ben e sori taki te yu abi deki-ati, dan sma o abi lespeki gi yu èn kande  den o wani leri sabi Yehovah. Soleki fa yu si, wi abi bun reide fu meki muiti fu kon abi deki-ati.

10. San den wortu „tai hori” wani taki?

¹⁰ Na ini Bijbel, a Hebrew wortu di vertaal nanga „tai hori” abi fu du nanga a fasi fa Gado e tai hori na den mati fu en fu di a lobi den trutru. Den wortu dati abi fu du tu nanga a fasi fa den futuboi fu Gado e tai hori na makandra fu di den lobi makandra (2 Sam. 9:6, 7). Yehovah e fruwakti tu taki wi musu tai hori na en fu di wi lobi en. A lobi dati kan kon moro tranga baka wan pisi ten. Kow luku fa a lobi di Danièl ben abi gi Yehovah kon moro tranga èn fa dati yepi en fu tai hori na en.

11. Sortu tesi Danièl kisi di a ben owru? (Luku a prenki na tapu a kafti.)

¹¹ Na ini en heri libi, Danièl ben kisi tesi pe a ben musu sori taki a ben tai hori na Yehovah. Ma a kisi wan fu den moro bigi tesi di a ben pasa 90 yari. Na a ten dati den Mediasma nanga den Persiasma ben teki Babilon abra èn Kownu Darius ben e tiri. Ma den heihei man di ben wroko gi Kownu Darius ben teige Danièl èn den no ben abi lespeki gi a Gado fu en. Fu dati ede den meki mofo fu kiri Danièl. Den ben kon nanga wan wet di ben o de wan tesi gi Danièl èn den meki a kownu poti en nen na ondro a wet. Danièl ben o abi fu sori efu a ben o tai hori na en Gado noso na a kownu. A wan-enkri sani di Danièl ben musu du fu sori taki a ben gi yesi na a kownu èn taki a ben de leki ala tra sma, na taki a no ben musu begi Yehovah 30 dei langa. Danièl weigri fu du a sani dati èn a tai hori na Yehovah. Dati meki den trowe en na ini a lew-olo. Ma Yehovah yepi Danièl fu di a tai hori na en èn a frulusu en fu den lew (Dan. 6:12-15, 20-22). Fa wi kan tai hori na Yehovah neleki Danièl?

12. San yepi Danièl fu tai hori na Yehovah?

¹² Soleki fa wi ben si kaba, dan wi musu lobi Yehovah nanga wi heri ati efu wi wani tai hori na en. Danièl ben tai hori na Yehovah fu di a ben lobi en hemel Papa nanga en heri ati. A no de fu taki dati Danièl ben abi so wan tranga lobi gi Yehovah fu di a ben teki ten fu prakseri fu den fasi fu  Yehovah èn fa a ben sori den fasi dati (Dan. 9:4). Danièl ben denki dipi tu fu ala den bun sani di Yehovah ben du gi en nanga en pipel èn a ben de nanga tangi gi dati.​—Dan. 2:20-23; 9:15, 16.

13. (a) Sortu tesi den yonguwan fu wi e kisi? Gi wan eksempre. (Luku a prenki.) (b) Soleki fa a felem e sori, dan san yu kan taki te trawan e aksi efu Yehovah Kotogi e horibaka gi den sma di wani libi wan homolibi?

¹³ Neleki Danièl, den yongu brada nanga sisa fu wi e kisi fu du nanga furu sma di no abi lespeki gi Yehovah nanga den wet fu en di e taki san bun èn san ogri. Den sortu sma disi e teige iniwan sma di e taki dati a lobi Gado. Sonwan fu den sma disi e pruberi srefi fu dwengi den yonguwan fu wi fu du sani di no bun soso fu meki den drai baka gi Yehovah. Luku san pasa nanga wan yongu brada di nen Graeme èn di e libi na ini Australia. A ben kon na ini wan muilek situwâsi di a ben de na middelbaar skoro. A jufrow aksi a klas san den ben o du efu wan mati ben o fruteri den taki a de wan homo. A jufrow ben taki dati ala den pikin di ben o feni en bun taki den mati de wan homo ben musu go tanapu na a wan sei fu a klas èn den pikin di no ben o feni dati bun ben musu go tanapu na a tra sei. Graeme taki: „Ala den pikin, boiti mi nanga wan brada, ben o feni en bun taki den mati na wan homo èn dati meki den go tanapu na a wan sei fu a klas.” Dan a situwâsi kon moro ogri. Graeme ben abi fu sori taki a ben o tai hori na Yehovah. A e taki: „Wan heri yuru langa den tra studenti èn srefi a jufrow kosi wi. Mi tan rustig èn mi du ala san mi man fu opo taki gi a bribi fu mi na wan lespeki fasi, ma den no ben wani yere noti.” Fa Graeme ben e firi? A e taki: „Mi no ben lobi en taki den pikin ben kosi mi, ma mi ben breiti taki mi tai hori na Yehovah èn taki mi opo taki gi a bribi fu mi.” d

14. San na wán sani di kan yepi wi fu tai hori na Yehovah?

¹⁴ Neleki Danièl, wi kan tai hori na Yehovah tu efu wi lobi en nanga wi heri ati. Wi o kon lobi Yehovah moro te wi e kon sabi den fasi fu en. Fu eksempre, wi kan ondrosuku den sani di a meki (Rom. 1:20). Efu yu wani kon lobi nanga lespeki gi Yehovah, dan yu kan leisi den syatu artikel di nen „Is het ontworpen?” noso yu kan luku den felem „Na wan sma meki en?” Yu kan leisi den brochure tu di nen Is het leven geschapen? nanga Vijf belangrijke vragen over het ontstaan van het leven. Luku san Esther, wan yongu sisa fu Deinsikondre, e taki fu den brochure disi: „A fasi fa den skrifi moi srefisrefi. Den brochure no e taigi yu san yu musu bribi, ma den e sori krin fa sani de èn den e libi en na yu fu teki wan bosroiti.” Ben, di wi ben kari kaba e taki: „Den brochure disi tranga mi bribi trutru. Den sori mi krin taki Gado meki ala sani.” Te yu ondrosuku den sani disi kaba, dan kande yu o agri nanga a sani disi di Bijbel e taki: „Na yu, Yehovah wi Gado, warti fu sma prèise yu gi a glori, a grani nanga a makti di yu abi, bika na yu meki ala sani.”​—Openb. 4:11. e

15. San na wan tra sani di kan yepi wi fu kon abi moro lobi gi Yehovah?

¹⁵ Wan tra fasi fa wi kan kon abi moro lobi gi Yehovah, na te wi e studeri a libi fu en Manpikin Yesus. Samira, wan yongu sisa di e libi na ini Doisrikondre du a sani disi. A e taki: „Di mi studeri a libi fu Yesus  mi kon sabi Yehovah moro bun.” Di a ben pikin, Samira no ben man frustan taki Yehovah abi firi. Ma a ben man frustan fa Yesus ben e firi. A e taki tu: „Mi ben lobi Yesus fu di a ben abi switifasi èn a ben lobi pikin-nengre.” O moro a ben kon sabi Yesus, o moro a ben kon lobi Yehovah. Fu san ede? A e taki: „Safrisafri mi kon frustan taki Yesus e du sani precies leki fa en Papa ben o du en. Den tu sma disi gersi densrefi. Mi kon frustan taki disi ben de wan fu den reide fu san ede Yehovah seni Yesus kon na grontapu so taki libisma ben kan leri sabi Yehovah moro bun” (Yoh. 14:9). Efu yu wani kon abi moro lobi gi Yehovah, dan a ben o bun fu teki ten fu leri ala san yu man fu Yesus. Te yu du dati, dan yu o kisi moro lobi gi Yehovah èn yu o man tai hori moro bun na en.

16. Sortu wini wi o kisi te wi e tai hori na Yehovah? (Psalm 18:25; 37:28)

¹⁶ Te wi e tai hori na trawan, dan nofo tron wi o abi bun mati di o tai hori na wi tu (Rut 1:14-17). Èn efu wi e tai hori na Yehovah, wi o firi bun èn wi o de koloku. Fu san ede? Fu di Yehovah pramisi taki a o tai hori na den sma di e tai hori na en. (Leisi Psalm 18:25; 37:28.) Prakseri a sani disi: Na Almakti Mekiman pramisi wi taki a o lobi wi fu ala ten. Èn te wi de bun mati fu Yehovah, dan nowan tesi, nowan gensman èn srefi dede no o man prati wi fu en (Dan. 12:13; Luk. 20:37, 38; Rom. 8:38, 39). Dati meki a prenspari srefisrefi taki wi e teki na eksempre fu Danièl èn tai hori na Yehovah awinsi san e pasa.

17-18. Sortu tra sani wi kan leri fu Danièl?

¹⁷ Na ini na artikel disi wi ben taki fu tu fu den fasi fu Danièl. Ma wi kan leri moro fu en. Fu eksempre, Yehovah ben meki Danièl kisi wan tu fisyun nanga dren èn a gi en a koni fu man fruklari profeititori. Furu fu den profeititori dati kon tru kaba. Tra profeititori e taki fu sani di o pasa ini a ten di e kon èn den o abi krakti tapu ibri sma na grontapu.

¹⁸ Na ini a tra artikel wi o luku tu profeititori di Danièl ben skrifi moro fini. Te wi e frustan den profeitiori disi, dan den o yepi wi alamala, awinsi wi yongu noso owru fu teki koni bosroiti nownowde. Den profeititori disi kan yepi wi tu fu abi moro deki-ati èn fu tai hori na Yehovah so taki wi kan de srekasreka gi den tesi di o kon heri esi.