1. Fu san ede yu e warderi sma di abi pasensi?

 WI ALAMALA lobi en te trawan abi pasensi nanga wi. Fu san ede? Wi abi lespeki gi den sma di man wakti wan sani sondro fu lasi pasensi. Wi de nanga tangi te trawan abi pasensi nanga wi te wi e meki fowtu. Èn wi e warderi en taki a sma di studeri Bijbel nanga wi ben abi pasensi nanga wi di wi ben leri sani fu Bijbel, di wi ben meki muiti fu frustan èn fu fiti den sani dati. Ma san moro prenspari, na taki wi de nanga tangi trutru taki Yehovah Gado abi pasensi nanga wi.​—Rom. 2:4.

2. Na ini sortu situwâsi a kan muilek gi wi fu abi pasensi?

² Aladi wi e warderi en taki trawan abi pasensi, toku a kan muilek gi wi son leisi fu abi pasensi. Fu eksempre, kande wi feni en muilek fu tan rustig te wi tanapu na ini wan langa rèi, spesrutu te wi lati. Kande wi e atibron te trawan e du sani di wi no lobi. Èn son leisi a kan muilek fu tan wakti tapu Yehovah fu tyari a nyun grontapu kon soleki fa a pramisi. Yu wani abi moro pasensi? Na ini na artikel disi wi o luku san a wani taki fu abi pasensi èn fu san ede a fasi disi de so prenspari. Wi o luku tu san kan yepi wi fu abi moro pasensi.

3. San wan sma di abi pasensi e du te trawan e du sani di kan meki a atibron?

³ Luku fo fasi fa wi kan sori pasensi. A fosiwan, na taki wan sma di abi pasensi no e atibron esi. So wan sma e tan rustig èn a no e pai ogri fu ogri te trawan e du wan fruferi sani nanga en di kan meki a atibron. Boiti dati, a no de grofu nanga trawan te a e stress. A fosi presi pe Bijbel e taki fu wan sma di no e ati bron esi na te a e taki fu Yehovah èn a e kari en „wan Gado di abi sari-ati nanga switifasi. En ati no e bron esi, a abi bun-ati pasa marki,  èn ala ten a e du san a e taki.”​—Eks. 34:6.

4. San wan sma di abi pasensi e du te a musu wakti?

⁴ A di fu tu, na taki wan sma di abi pasensi man wakti rustig tapu wan sani. Efu wan sani e teki moro langa leki san a ben fruwakti, dan so wan sma e pruberi fu no lasi pasensi èn fu no atibron (Mat. 18:26, 27). Furu situwâsi de pe wi musu wakti nanga pasensi. Fu eksempre, te wan sma e taki wi musu wakti rustig èn wi no musu koti en mofo (Yob 36:2). Kande wi musu abi pasensi tu te wi e yepi wan studenti fu frustan wan Bijbel leri noso fu tapu nanga wan takru gwenti.

5. Na sortu tra fasi wi kan sori pasensi?

⁵ A di fu dri, na taki wan sma di abi pasensi no e du sani esi-esi sondro fu denki. A tru taki son leisi wi musu du wan sani esi-esi. Ma te wan sma di abi pasensi musu du wan prenspari sani, a no e lon go du a sani èn a no e du en esi-esi. Na presi fu dati, a e poti nofo ten na wan sei fu luku san a o du. Baka dati a e teki nofo ten tu fu du a sani dati bun.

6. San wan sma di abi pasensi e du te a e kisi tesi noso te a abi en muilek?

⁶ A di fu fo, na taki wan sma di abi pasensi no o krutukrutu te a e kisi tesi. Na ini den situwâsi disi a de krin taki pasensi o yepi wan sma fu horidoro. A no de fu taki dati a no fowtu te wi e fruteri wan bun mati fa wi e firi te wi e kisi tesi. Ma wan sma di abi pasensi o prakseri den bun sani tu na ini en libi èn a o du ala san a man fu tan dini Yehovah nanga prisiri (Kol. 1:11). Wi leki Kresten musu abi pasensi na ala den fasi disi. Fu san ede? Kow go luku wan tu reide fu san ede wi musu du dati.

7. Soleki fa Yakobus 5:7, 8 e sori, dan fu san ede a de so prenspari fu abi pasensi? (Luku a prenki.)

⁷ Wi musu abi pasensi fu man kisi têgo libi. Neleki den futuboi fu Gado na ini a ten di pasa, na so wi musu wakti nanga pasensi tu tapu Gado fu meki den pramisi fu en kon tru (Hebr. 6:11, 12). Bijbel e agersi a situwâsi fu wi nanga a di fu wan gronman. (Leisi Yakobus 5:7, 8.) Wan gronman e wroko tranga fu prani den sani fu en èn fu gi den watra, ma a no sabi precies o ten den sani o gro. Dati meki a gronman e wakti nanga pasensi èn a abi a frutrow taki a o koti a nyanyan. Na so a de tu nanga wi. Wi e wroko tranga leki bakaman fu Yesus aladi wi „no sabi sortu dei [wi] Masra o kon” (Mat. 24:42). Wi e wakti nanga pasensi èn wi de seiker taki Yehovah o meki ala den pramisi fu en kon tru na a yoisti ten. Efu wi ben o lasi pasensi, wi ben o kon weri fu wakti èn wi ben o bigin gowe libi Yehovah. Wi ben o bigin feti baka sani tu di wi ben kan si leki sani di o meki wi koloku nownowde. Ma efu wi abi pasensi, dan wi kan horidoro te na a kaba èn wi kan kisi frulusu.​—Mika 7:7; Mat. 24:13.

8. Fa pasensi e yepi wi fu libi bun nanga trawan? (Kolosesma 3:12, 13)

⁸ Pasensi e yepi wi tu fu libi bun nanga trawan. A e yepi wi fu arki bun te trawan e taki (Yak. 1:19). Boiti dati, pasensi e yepi wi fu libi na ini freide nanga trawan. Te wi de na ini wan situwâsi di e meki wi stress, dan pasensi o meki taki wi no de gaw fu taki noso du wan sani di kan hati trawan. Te wi abi pasensi, dan wi no o atibron esi te wan sma hati den firi fu wi. Na presi fu pai ogri fu ogri, wi o „tan frudrage makandra èn gi makandra pardon nanga un heri ati”.​—Leisi Kolosesma 3:12, 13.

9. Fa pasensi e yepi wi te wi musu teki bosroiti? (Odo 21:5)

⁹ Pasensi kan yepi wi fu teki moro bun bosroiti tu. Na presi fu hasti wi srefi fu teki wan bosroiti sondro fu denki, wi o teki ten fu ondrosuku sani èn baka dati wi o bosroiti fu du sani moro bun. (Leisi Odo 21:5.) Fu eksempre, efu wi e suku wan wroko, dan kande wi o de gaw fu teki a fosi wroko di wi feni, awinsi a wroko o meki wi misi konmakandra noso a o meki taki wi no e preiki so furu moro. Ma efu wi abi pasensi, wi o teki ten fu ondrosuku sani bun. Kande wi o luku o fara a wrokope de, omeni yuru wi o abi fu wroko, èn fa a wroko disi o abi krakti tapu wi osofamiri èn tapu a matifasi di wi abi nanga Yehovah. Te wi abi pasensi, dan wi no o teki bosroiti di kan abi takru bakapisi gi wi.

10. Fa wan Kresten kan kon abi moro pasensi èn fa a kan tan sori a fasi disi?

¹⁰ Begi fu abi moro pasensi. Pasensi na wan fu den fasi di a yeye e meki sma kisi (Gal. 5:22, 23). Sobun, wi kan begi Yehovah fu gi wi en santa yeye èn wi kan aksi en fu yepi wi fu kweki a fasi disi. Efu wi kon de na ini wan situwâsi di kan meki wi lasi pasensi, dan wi kan „tan aksi” fu kisi a santa yeye di kan yepi wi fu abi pasensi (Luk. 11:9, 13). Wi kan aksi Yehovah tu fu yepi wi fu si a situwâsi soleki fa en e si en. Baka te wi begi kaba, wi musu du muiti fu abi pasensi ala dei. O moro  wi e begi fu abi pasensi èn o moro wi e du muiti fu sori a fasi dati, o moro Yehovah o yepi wi fu abi pasensi, awinsi wi no ben de so fosi.

11-12. Fa Yehovah sori pasensi?

¹¹ Denki dipi fu Bijbel eksempre. Bijbel abi furu eksempre fu sma di ben abi pasensi. Te wi e denki dipi fu den eksempre dati, dan wi kan leri fa fu abi pasensi tu. Fosi wi go luku wan tu fu den eksempre disi, meki wi go luku a tumusi moi eksempre fu Yehovah, di sori pasensi na a moro bun fasi.

¹² Na ini a dyari fu Eden, Satan gi Yehovah porinen èn a fruteri Eva ogri-ati lei fu Yehovah di a taki dati Yehovah no de wan lobi-ati èn bun Tiriman. Na presi taki Yehovah pori Satan wantewante, a sori pasensi èn a hori ensrefi, fu di a sabi taki a o teki ten fu buweisi taki En na a moro bun Tiriman. Aladi a e wakti, a e horidoro tu fu di sma e tan fruteri lei fu en. Boiti dati, Yehovah wakti nanga pasensi so taki moro sma kan abi na okasi fu libi fu têgo (2 Petr. 3:9, 15). Disi meki taki milyunmilyun sma kon sabi en. Te wi e poti prakseri na a pasensi fu Yehovah, dan a o moro makelek gi wi fu wakti tapu en fu tyari a kaba kon.

13. Fa Yesus sori pasensi neleki en Papa? (Luku a prenki.)

¹³ Yesus abi pasensi neleki en Papa èn a sori a fasi disi di a ben de na grontapu. A no ben makriki ala ten gi en fu abi pasensi, spesrutu te a ben kisi fu du nanga den leriman fu Wet nanga den Fariseiman (Yoh. 8:25-27). Ma neleki en Papa, na so Yesus no e atibron esi. A no  ben pai ogri fu ogri te sma ben kosi en (1 Petr. 2:23). Nanga pasensi Yesus horidoro di a kisi tesi èn a no ben e krutukrutu. Wi kan frustan fu san ede Bijbel e taki dati wi musu „poti prakseri finifini na a sma di ben horidoro, srefi te sondari ben e taki ogri fu en” (Hebr. 12:2, 3). Te Yehovah e yepi wi, dan wi kan horidoro nanga pasensi tu awinsi sortu tesi wi e kisi.

14. San wi kan leri fu a pasensi di Abraham ben abi? (Hebrewsma 6:15) (Luku a prenki.)

¹⁴ Ma fa a de efu den sani di yu ben fruwakti fu a ten fu a kaba no kon tru ete? Kande yu ben fruwakti taki a kaba ben o kon langa ten kaba. Ma now yu e frede taki yu no o de na libi fu si a kaba. San kan yepi wi fu tan wakti nanga pasensi? Luku na eksempre fu Abraham. Di Abraham ben de wan owru man fu 75 yari èn a no ben abi nowan pikin ete, dan Yehovah pramisi en: „Mi o meki yu tron na afo fu wan bigi pipel” (Gen. 12:1-4). Abraham ben si a fa a pramisi dati kon tru? A no si a heri pramisi kon tru. Baka di Abraham abra Eufraat-liba, a wakti 25 yari fosi a ben man si fa en manpikin Isak gebore na wan wondru fasi. Èn 60 yari baka dati, Esau nanga Yakob, den granpikin fu en, gebore. (Leisi Hebrewsma 6:15.) Ma noiti Abraham si taki den bakapikin fu en tron wan bigi pipel èn taki den kisi a Pramisi Kondre. Ma Abraham ben abi wan bun matifasi nanga en Mekiman (Yak. 2:23). Te Abraham o kisi wan opobaka, a o breiti srefisrefi fu kon sabi taki a bribi nanga a pasensi fu en meki taki ala pipel fu grontapu  kisi blesi (Gen. 22:18). San disi e leri wi? Kande wi no si fa ala den pramisi fu Yehovah kon tru nownow. Ma efu wi abi pasensi neleki Abraham, wi kan de seiker taki Yehovah o blesi wi now èn a o blesi wi moro na ini a nyun grontapu di a pramisi wi.​—Mark. 10:29, 30.

15. Sortu sani wi kan luku te wi e studeri?

¹⁵ Furu tra eksempre skrifi na ini Bijbel fu sma di ben abi pasensi (Yak. 5:10). A ben o bun fu meki wan studie fu den eksempre disi. b Fu eksempre, aladi David ben salfu fu tron kownu fu Israel di a ben yongu ete, toku a ben musu wakti omeni yari langa fosi a tron kownu. Simeon nanga Ana ben anbegi Yehovah getrow aladi den ben e wakti a pramisi Mesias (Luk. 2:25, 36-38). Te yu e studeri den tori disi, dan luku efu yu kan feni a piki tapu den aksi disi: San ben yepi a sma disi fu abi pasensi? Sortu wini a kisi di a sori pasensi? Fa mi kan teki na eksempre fu en? Yu kan leri wan sani tu te yu e studeri den tori fu den sma di no ben abi pasensi (1 Sam. 13:8-14). Kande yu kan poti den aksi disi: ’San meki taki a sma disi lasi pasensi? Sortu takru bakapisi a ben abi fu di a lasi pasensi?’

16. San na wan tu wini di wi o kisi te wi abi pasensi?

¹⁶ Den wini di wi o kisi te wi abi pasensi. Te wi abi pasensi, dan wi o de moro koloku èn moro rustig. Sobun, pasensi kan yepi wi fu abi wan moro bun gosontu. Te wi abi pasensi nanga trawan, dan wi o man libi moro switi nanga den. Disi o meki taki wánfasi de na ini wi gemeente. Efu wan sma kosi wi èn wi no e atibron esi, dan wi no o meki a problema kon moro bigi (Ps. 37:8; Odo 14:29). Ma san moro prenspari, na taki te wi abi pasensi, dan wi e teki na eksempre fu wi hemel Papa èn wi o kon moro krosibei na en.

17. Sortu muiti wi alamala musu du?

¹⁷ Pasensi na trutru wan moi fasi di e tyari wini kon gi wi. Aladi a no makelek ala ten fu abi pasensi, toku wi kan tan meki muiti fu abi moro pasensi te Yehovah yepi wi nanga dati. Èn aladi wi e wakti a nyun grontapu, wi kan de seiker taki „Yehovah e poti prakseri na den sma di e lespeki en. A e poti prakseri na den wan di e wakti fu a sori den bun-ati” (Ps. 33:18). Meki a de so taki wi alamala e du muiti fu abi pasensi.