1. Soleki fa Hebrewsma 12:1 e sori, dan san wi musu du fu lon a streilon fu a libi te na a kaba?

 BIJBEL e sori taki a libi fu wi leki Kresten de leki wan streilon. Den sma di e lon te na a kaba o kisi têgo libi (2 Tim. 4:7, 8). Wi musu du ala san wi man fu tan lon go doro, spesrutu fu di a kaba de krosibei. Na apostel Paulus, di ben lon a streilon fu a libi te na a kaba, ben taki san o yepi wi fu wini a streilon disi. A ben gi a rai fu „puru ala hebi na wi tapu” èn fu „horidoro te wi e lon a streilon di wi musu lon ete”.​—Leisi Hebrewsma 12:1.

2. San a wani taki dati wi musu „puru ala hebi na wi tapu”?

² Di Paulus ben skrifi taki wi musu „puru ala hebi na wi tapu”, dan a ben wani taki dati wan Kresten no abi nowan lai fu tyari? Nôno, a no dati a ben wani taki. Na presi fu dati, a ben wani sori taki wi musu puru iniwan hebi di no de fanowdu. Den sortu hebi disi kan meki taki wi no lon so gaw moro èn den kan meki wi kon weri. Fu man horidoro te na a kaba, wi musu kon sabi nownow efu wi e tyari iniwan hebi di no de fanowdu èn wi musu trowe den wantewante. Ma na a tra sei, wi no wani trowe den lai di wi musu tyari. Efu wi ben o du dati, dan kande wi no o man tan na ini a streilon moro (2 Tim. 2:5). Sortu lai wi musu tyari?

3. (a) Soleki fa Galasiasma 6:5 e taki, dan san wi musu tyari? (b) San wi o luku na ini na artikel disi èn fu san ede?

³ Leisi Galasiasma 6:5. Na ini a tekst disi Paulus e kari wan sani di wi musu tyari. A ben skrifi taki „ibri sma sa tyari en eigi lai”. Dyaso Paulus e taki fu a lai di wi srefi musu tyari èn dati na a frantwortu di wi abi na fesi Gado. Nowan sma man tyari a lai dati gi wi. Na ini na artikel disi wi o luku san na wi „eigi lai” èn fa wi kan tyari en. Wi o  luku tu san na wan tu hebi di wi e tyari di no de fanowdu èn wi o leri fa wi kan puru den hebi disi na wi tapu. Te wi e tyari wi eigi lai èn wi e puru den hebi di no de fanowdu, dan dati o yepi wi fu lon a streilon fu a libi te na a kaba.

4. Fu san ede a no muilek fu hori wisrefi na a pramisi di wi meki fu dini Yehovah fu têgo? (Luku a prenki.)

⁴ A pramisi di wi pramisi Yehovah fu dini en fu têgo. Te wi gi wi libi abra na Yehovah, dan wi e pramisi en taki wi o dini en èn taki wi o du a wani fu en. Wi musu hori wisrefi na a pramisi dati. A de wan bigi frantwortu fu hori wisrefi na a pramisi dati, ma a no de wan hebi fu di Yehovah meki wi fu du a wani fu en (Openb. 4:11). A meki wi na so wan fasi taki wi wani kon sabi en èn anbegi en. A meki wi leki fa en srefi de. Fu dati ede, wi man kon krosibei na en èn wi e prisiri fu du a wani fu en (Ps. 40:8). Boiti dati, te wi e du a wani fu Gado èn wi e waka baka en Manpikin, dan wi o „kisi krakti baka”.​—Mat. 11:28-30.

5. San kan yepi yu fu hori yusrefi na a pramisi di yu meki na Yehovah? (1 Yohanes 5:3)

 ⁵ Fa yu kan tyari a lai dati? Tu sani kan yepi. A fosi sani na fu tan meki muiti fu abi moro lobi gi Yehovah. Yu kan du dati te yu e denki dipi fu ala den bun sani di a du gi yu èn fu den bun sani di a o du gi yu na ini a ten di e kon. O moro yu e kon lobi Gado, o moro makelek a o de fu gi yesi na en. (Leisi 1 Yohanes 5:3.) A di fu tu sani na fu teki na eksempre fu Yesus. Yesus ben man du a wani fu Gado fu di a ben begi Yehovah fu yepi en èn a ben tan poti ala en prakseri na a pai di a ben o kisi (Hebr. 5:7; 12:2). Neleki Yesus, yu kan begi Yehovah fu gi yu krakti èn fu tan poti ala yu prakseri na a howpu di wi abi fu libi fu têgo. O moro yu e kon lobi Gado èn o moro yu e teki na eksempre fu en Manpikin, o moro yu o man du ala den sani di yu pramisi Yehovah.

6. Fu san ede wi musu tyari den frantwortu di wi abi na ini na osofamiri? (Luku a prenki.)

⁶ Den frantwortu di wi abi na ini wi osofamiri. Na ini a streilon fu a libi, wi musu lobi Yehovah nanga Yesus moro leki den famiriman fu wi (Mat. 10:37). Ma disi no wani taki dati wi no e tyari den frantwortu di wi abi na ini wi osofamiri, fu di wi feni taki den ben o hori wi na baka fu du san Gado nanga Krestes wani wi fu du. Na presi fu dati, efu wi wani taki Gado nanga Krestes feni wi bun, dan wi musu tyari wi frantwortu na ini na osofamiri (1 Tim. 5:4, 8). Wi o de moro koloku te wi e du dati. Yehovah sabi taki osofamiri o de moro koloku te masra nanga wefi lobi èn lespeki makandra, te papa nanga mama lobi den pikin fu den èn e gi den leri, èn te pikin e gi yesi na den papa nanga mama.​—Ef. 5:33; 6:1, 4.

7. Fa yu kan tyari yu frantwortu na ini yu osofamiri?

⁷ Fa yu kan tyari a lai dati? Awinsi yu na wan masra, wan wefi noso wan pikin, frutrow den koni rai fu Bijbel. No du nomo san yu denki taki a bun, san den sma na yu birti gwenti du noso san sabiman e taki dati yu musu du (Odo 24:3, 4). Gebroiki den buku fu wi di e sori fa fu fiti Bijbel gronprakseri na ini yu libi. Fu eksempre, a brochure Yu kan abi wan koloku osofamiri èn a buku Yu kan de koloku fu têgo! les 49 nanga 50 abi moi rai na ini di kan yepi trowpaar, papa nanga mama, èn yongusma na ini a ten disi. b Du ala muiti fu du san Bijbel e taki, srefi efu tra sma na ini na osofamiri no e du dati. Te yu du dati, dan yu osofamiri o kisi wini èn Yehovah o blesi yu.​—1 Petr. 3:1, 2.

8. Sortu krakti den bosroiti fu wi kan abi na wi tapu?

⁸ A frantwortu di wi abi fu den bosroiti di wi e teki. Yehovah meki wi na so wan fasi taki wi kan teki wi eigi bosroiti èn a wani wi teki bun bosroiti fu man de koloku. Ma efu wi teki don bosroiti, dan a e gi pasi taki wi ondrofeni den bakapisi fu dati (Gal. 6:7, 8). Dati meki wi e tyari den bakapisi fu wan don bosroiti di wi teki èn fu wan fowtu sani di wi taki noso du. Wi konsensi kan trobi wi te wi du wan sani di no bun. Ma te wi sabi taki wi abi fu tyari a frantwortu fu den bosroiti di wi e teki, dan dati kan meki wi taki fu den sondu fu wi, wi kan tyari kenki kon, èn wi kan luku bun fu no meki a srefi fowtu baka. Te wi  e du den sani disi, dan dati kan yepi wi fu tan na ini a streilon fu a libi.

9. San yu kan du efu yu teki wan don bosroiti? (Luku a prenki.)

⁹ Fa yu kan tyari a lai dati? Efu yu teki wan don bosroiti, dan san yu kan du? Hori na prakseri taki yu no man kenki san pasa. No lasi yu ten nanga yu krakti fu sori taki yu ben abi leti noso fu skoifi a fowtu di yu meki tapu trawan. Na presi fu dati, taki eerlijk dati yu meki wan fowtu èn du ala san yu man na ini a situwâsi fu yu. Efu yu konsensi e trobi yu fu wan ogri di yu du, dan sori sakafasi èn begi Yehovah. Taigi en sortu fowtu yu meki èn aksi en fu gi yu pardon (Ps. 25:11; 51:3, 4). Efu yu ben hati wan sma, dan aksi en pardon èn efu a de fanowdu, dan suku yepi na den owruman (Yak. 5:14, 15). Leri fu den fowtu di yu meki èn pruberi fu no meki den srefi fowtu baka. Te yu e du dati, dan yu kan de seiker taki Yehovah o sori sari-ati gi yu èn a o gi yu a yepi di yu abi fanowdu.​—Ps. 103:8-13.

10. Fu san ede a de wan hebi te wi e fruwakti tumusi furu fu wi srefi? (Galasiasma 6:4)

¹⁰ Te wi e fruwakti tumusi furu fu wi srefi. Te wi e teki wisrefi gersi nanga trawan, dan wi kan bigin fruwakti tumusi furu fu wi srefi. A sani dati kan de wan hebi na wi tapu. (Leisi Galasiasma 6:4.) Efu wi e teki wisrefi gersi nanga trawan ibri tron baka, dan wi kan kon dyarusu na den tapu èn wi kan bigin strei nanga den (Gal. 5:26). Efu wi e pruberi fu du san trawan e du aladi wi no man du den sani dati, dan wi kan pina wisrefi. Prakseri a sani disi tu: Bijbel e taigi wi taki wi kan lasi-ati te wi no man kisi wan sani di wi e fruwakti (Odo 13:12). Wi o lasi-ati moro srefi efu wi e fruwakti wan sani di wi no kan kisi noiti. Efu wi ben o du dati, dan wi ben o kon weri èn wi no ben o lon so gaw moro na ini a streilon fu a libi.​—Odo 24:10.

11. San kan yepi yu fu no fruwakti tumusi furu fu yu srefi?

¹¹ Fa yu kan puru a hebi dati na yu tapu? No fruwakti moro fu yu srefi leki san Yehovah e aksi fu yu. Noiti a e fruwakti taki yu du moro leki san yu man du (2 Kor. 8:12). Yu kan de seiker taki Yehovah no e agersi san yu e du nanga san trawan e du (Mat. 25:20-23). Yehovah e warderi a diniwroko di yu e du nanga yu heri ati, a e warderi en taki yu e tai hori na en, èn a e warderi en taki yu e horidoro. Sori sakafasi èn hori na prakseri taki yu no man du ala san yu wani du now kande fu di yu kon owru, fu di yu siki, noso fu di a situwâsi fu yu no e gi yu pasi fu du moro. Neleki Barsilai, wi musu de klariklari fu no teki wan grani na wi tapu efu a gosontu noso a yari fu wi o meki en muilek fu du a sani dati (2 Sam. 19:35, 36). Neleki Moses, wi musu aksi trawan fu yepi wi èn wi musu meki trawan tyari son frantwortu tu te a fiti (Eks. 18:21, 22). Te yu e du dati, dan yu e sori sakafasi èn a o meki taki yu no o fruwakti tumusi furu fu yu srefi fu di dati kan meki yu weri na ini a streilon fu a libi.

12. Na wi musu tyari a frantwortu fu den don bosroiti di trawan e teki? Fruklari dati.

¹² Te wi e firi taki na wi musu tyari a frantwortu fu wan don bosroiti di trawan teki. Wi no kan teki bosroiti gi trawan èn wi no kan kibri den ala ten gi den bakapisi fu den don bosroiti di den e teki. Fu eksempre, papa nanga mama kan abi wan manpikin noso wan umapikin di bosroiti fu no dini Yehovah moro. A bosroiti  dati kan meki a papa nanga mama sari srefisrefi. Ma papa nanga mama di e gi densrefi a fowtu fu a don bosroiti di a pikin fu den teki, e poti wan hebi na den tapu. Yehovah no e fruwakti taki papa nanga mama tyari a frantwortu dati.​—Rom. 14:12.

13. San wan papa noso wan mama kan du te en pikin teki wan don bosroiti?

¹³ Fa yu kan puru a hebi dati na yu tapu? Hori na prakseri taki Yehovah meki wi na so wan fasi taki wi kan teki wi eigi bosroiti. A e meki ibri sma teki en eigi bosroiti. A e meki ibri sma bosroiti tu efu a wani dini en. Yehovah sabi taki yu e meki fowtu leki papa noso mama. Ma san a wani, na taki yu du ala san yu man leki papa noso mama. A bosroiti di yu pikin e teki na en frantwortu, a no yu frantwortu (Odo 20:11). Ma toku a kan taki yu e broko yu ede nanga den fowtu di yu meki leki papa noso mama. Efu dati de so, dan fruteri Yehovah fa yu e firi èn aksi en fu gi yu pardon. A sabi taki yu no man kenki den sani di pasa kaba. Èn a no e fruwakti taki yu e kibri yu pikin gi den bakapisi fu a don bosroiti di a teki. Hori na prakseri taki efu yu pikin e meki muiti fu drai kon baka na Yehovah, dan Yehovah de klariklari fu teki en baka.​—Luk. 15:18-20.

14. Fu san ede a de wan hebi te wi e tan sari fu wan fowtu di wi meki?

¹⁴ Te wi e tan sari fu wan fowtu di wi meki. Te wi du wan sondu, dan wi e firi sari fu a sani di wi du. Ma noiti Yehovah ben wani taki wi e tan firi sari fu wan fowtu di wi meki. Dati na wan hebi di wi musu puru na wi tapu. Fa wi kan sabi efu wi e tan firi sari fu wan fowtu di wi meki? Efu wi fruteri sortu sondu wi du, wi sori berow èn wi e du sani fu no du a sondu dati moro, dan wi kan abi a frutrow taki Yehovah gi wi pardon (Tori 3:19). Te wi du den sani dati kaba, dan Yehovah no wani taki wi tan firi sari fu a fowtu di wi meki. Yehovah sabi taki a no bun gi wi efu  wi e tan firi sari (Ps. 31:10). Efu wi e tan sari, dan a kan pasa taki wi no horidoro na ini a streilon fu a libi.​—2 Kor. 2:7.

15. San kan yepi yu te yu e tan firi sari fu wan fowtu di yu meki? (1 Yohanes 3:19, 20) (Luku a prenki.)

¹⁵ Fa yu kan puru a hebi dati na yu tapu? Te yu e tan firi sari fu wan fowtu di yu meki, dan pruberi fu poti ala yu prakseri na a fasi fa Gado e gi „pardon trutru” (Ps. 130:4). Te Yehovah e gi sma pardon di abi berow trutru, dan a e pramisi den: „Mi no o memre den sondu fu den moro” (Yer. 31:34). Disi wani taki dati noiti moro Yehovah o prakseri a sondu fu yu te a gi yu pardon fu dati kaba. Sobun, no denki taki den bakapisi di yu e ondrofeni fu a sondu fu yu, wani taki dati a no gi yu pardon. Èn no atibron nanga yusrefi fu di yu lasi son grani na ini a gemeente. Yehovah no e tan prakseri den sondu di yu du èn yu no musu tan prakseri den tu.​—Leisi 1 Yohanes 3:19, 20.

16. San wi musu frustan te wi e lon a streilon fu a libi?

¹⁶ Te wi e lon a streilon fu a libi, dan wi musu ’lon na so wan fasi taki wi kan wini’ (1 Kor. 9:24). Wi kan du dati te wi e frustan fa den lai di wi musu tyari e difrenti fu den hebi di wi musu puru na wi tapu. Na ini na artikel disi wi taki fu wan tu lai di wi musu tyari èn wan tu hebi di wi musu puru na wi tapu. Ma tra sani de tu. Yesus ben taki dati wi musu ’luku bun taki noiti wi nyan pasa marki, taki wi no dringi tumusi furu, noso taki wi no broko un ede nanga na aladei libi’, fu di den sani dati kan de wan hebi na wi tapu (Luk. 21:34). Den tekst disi nanga tra tekst kan yepi yu fu kon sabi sortu kenki yu musu tyari kon na ini a fasi fa yu e lon a streilon fu a libi.

17. Fu san ede wi kan de seiker taki wi o wini a streilon fu a libi?

¹⁷ Wi kan de seiker taki wi o wini a streilon fu a libi fu di Yehovah o gi wi a krakti di wi abi fanowdu (Yes. 40:29-31). Sobun, no lon moro safri! Teki na eksempre fu na apostel Paulus di ben lon bun tranga fu kisi a pai di ben de na en fesi (Fil. 3:13, 14). Nowan sma kan lon a streilon disi gi yu, ma Yehovah o yepi yu fu wini. Yehovah kan yepi yu fu tyari den lai fu yu èn fu puru iniwan hebi na yu tapu (Ps. 68:19). Te Yehovah de na yu sei, dan yu o man horidoro na ini a streilon èn wini!