1. San kan yepi wi fu lobi studeri Bijbel profeititori?

 „MI LOBI fu studeri Bijbel profeititori”, na so wan yongu brada di nen Ben e taki. Na so yu e denki tu? Noso yu feni taki Bijbel profeititori muilek tumusi fu frustan? Kande yu e denki srefi taki a no span fu studeri profeititori. Ma te yu kon sabi fu san ede Yehovah meki sma skrifi profeititori na ini en Wortu, dan kande yu o lobi den tu.

2. San wi o luku na ini na artikel disi?

² Na ini na artikel disi wi no o taki nomo fu san ede wi musu studeri Bijbel profeititori, ma wi o luku tu fa wi kan studeri den. Boiti dati, wi o luku tu profeititori na ini a buku Danièl fu si fa den kan yepi wi te wi e frustan san den wani taki.

3. San wi musu du efu wi wani frustan Bijbel profeititori?

³ Efu wi wani frustan Bijbel profeititori, dan wi musu suku yepi. Luku na eksempre disi. Kow taki dati yu e go na wan presi di yu no sabi, ma wan mati di sabi a presi bun de nanga yu. A sabi precies pe unu de èn pe ibri pasi e go. A no de fu taki dati yu o breiti dati yu mati kon nanga yu. Yehovah de leki a mati dati. A sabi precies na ini sortu ten wi e libi èn san o pasa na ini a ten di e kon. Sobun, efu wi wani frustan Bijbel profeititori, dan wi musu abi sakafasi èn wi musu aksi Yehovah fu yepi wi.​—Dan. 2:28; 2 Petr. 1:19, 20.

4. Fu san ede Yehovah meki sma skrifi profeititori na ini en Wortu? (Yeremia 29:11) (Luku a prenki.)

⁴ Ala bun papa nanga mama wani taki den pikin abi wan koloku libi. Yehovah wani dati tu gi den pikin fu en. (Leisi Yeremia 29:11.) Ma tra fasi leki libisma, Yehovah man fruteri wi soifri san o pasa na ini a ten di e kon. Yehovah  meki sma skrifi profeititori na ini en Wortu so taki wi kan sabi na fesi sortu prenspari sani o pasa (Yes. 46:10). Bijbel profeititori na kado di wi hemel Papa gi wi fu di a lobi wi. Ma fa yu kan de seiker taki den profeititori fu Bijbel o kon tru?

5. San wan yongu sma kan leri fu na eksempre fu Max?

⁵ Te den yonguwan fu wi de na skoro, den de na mindri sma di no abi nowan lespeki gi Bijbel. Son leisi den sani di den sma disi e taki èn e du kan meki wan yongu Kotoigi tweifri na den sani di a e bribi. Luku na eksempre fu wan brada di nen Max. A e taki: „Di mi ben de na skoro, mi bigin tweifri efu mi papa nanga mama ben leri mi a tru bribi èn efu na Gado ben meki sma skrifi Bijbel.” San en papa nanga mama du? Max e taki: „Aladi den ben e broko den ede, toku den no rigeri nanga mi.” Max en papa nanga mama gebroiki Bijbel fu piki den aksi fu en. Ma Max du wan sani tu. A e taki: „Mi srefi ben e studeri Bijbel profeititori èn mi ben e taki fu den nanga tra yonguwan na ini a gemeente.” San ben de a bakapisi? Max e taki: „Baka dati mi ben de seiker taki na Gado meki sma skrifi Bijbel!”

6. San yu musu du efu yu e tweifri èn fu san ede yu musu du dati?

⁶ Efu yu e bigin tweifri efu Bijbel e taki san tru neleki fa Max ben e tweifri, dan yu no abi fu syen. Ma a prenspari taki yu du wan sani wantewante. Tweifri de leki frustu. Efu yu abi wan diri sani di bigin frustu èn yu libi en so, dan a kan pori. Na so tweifri kan pori yu bribi tu. Fu man puru tweifri yu musu aksi yusrefi: ’Mi e bribi san Bijbel e taki fu a ten di e kon?’ Efu yu no de seiker, dan yu musu studeri Bijbel profeititori di kon tru kaba. Fa yu kan du dati?

7. Fa Danièl de wan bun eksempre te a abi fu du nanga a fasi fa a ben e studeri profeititori? (Danièl 12:10) (Luku a prenki.)

⁷ Danièl na wan bun eksempre te a abi fu du nanga a fasi fa a ben studeri profeititori. Danièl ben abi a yoisti reide fu studeri Bijbel. A ben wani kon sabi san tru. Boiti dati, Danièl ben abi sakafasi. A ben frustan taki Yehovah ben o yepi en fu frustan profeititori efu a ben tan krosibei na en èn efu a ben tan gi yesi na en (Dan. 2:27, 28; leisi Danièl 12:10). Danièl ben sori taki a abi sakafasi fu di a ben abi a frutrow taki Yehovah ben o yepi en (Dan. 2:18). Boiti dati, Danièl ben e ondrosuku sani finifini. A ben e ondrosuku den pisi fu Bijbel di a ben abi na a ten dati (Yer. 25:11, 12; Dan. 9:2). Fa yu kan teki na eksempre fu Danièl?

8. Fu san ede son sma e studeri Bijbel profeititori, ma san wi musu du?

⁸ Prakseri fu san ede yu e studeri profeititori. Yu e studeri Bijbel profeititori fu di yu wani sabi a waarheid? Efu disi de so, dan Yehovah o yepi yu (Yoh. 4:23, 24; 14:16, 17). Ma son sma abi tra reide fu san ede den e studeri Bijbel. Den e du disi fu di den wani sori taki Bijbel no kon  fu Gado. Den e denki taki efu Bijbel no kon fu Gado, dan den kan bosroiti gi densrefi san bun èn san ogri. Ma wi musu abi a yoisti reide fu studeri Bijbel. Boiti dati, wi abi ete wan prenspari fasi fanowdu fu man frustan Bijbel profeititori.

9. Sortu fasi wi musu abi fu man frustan Bijbel profeititori? Fruklari dati.

⁹ Abi sakafasi. Yehovah e pramisi taki a o yepi den sma di abi sakafasi (Yak. 4:6). Dati meki wi musu aksi Yehovah fu yepi wi fu frustan Bijbel profeititori. Wi musu frustan tu taki wi abi a yepi fanowdu fu a srafu di a poti fu gi wi leri na a yoisti ten (Luk. 12:42). Fu di Yehovah na wan Gado di e orga sani bun, meki wi kan frustan taki a o gebroiki wán grupu sma nomo fu yepi wi fu frustan den tru tori na ini en Wortu.​—1 Kor. 14:33; Ef. 4:4-6.

10. San yu leri fu na ondrofenitori fu Esther?

¹⁰ Ondrosuku sani finifini. Bigin studeri wan profeititori di yu lobi. Na a sani disi wan sisa di nen Esther du. A ben wani kon sabi moro fu den profeititori di ben taki fu a Mesias. A e taki: „Di mi ben abi 15 yari mi bigin ondrosuku sani fu man si efu a de so trutru taki den profeititori disi ben skrifi fosi Yesus ben de na grontapu.” Den sani di a leisi fu den Dede Se Lolo gi en na overtoigi taki den profeititori fu a Mesias tru. A e taki: „Sonwan fu den profeititori disi ben skrifi fosi a ten fu Krestes, sobun a musu de so taki den kon fu Gado.” Esther e taki tu: „Mi ben musu leisi sani difrenti leisi fosi mi ben man frustan den.” Ma a breiti taki a meki a muiti dati. Baka di a studeri wan tu Bijbel profeititori finifini a taki: „Mi ben man si krin taki san skrifi na ini Bijbel, tru.”

11. Fu san ede a bun te wi de seiker taki Bijbel tru?

¹¹ Te wi si fa sonwan fu den profeititori na ini Gado Wortu kon tru kaba, dan wi o frutrow Yehovah nanga wi heri ati èn wi o frutrow a tiri di a e gi wi. Boiti dati, Bijbel profeititori e fruteri wi san o pasa na ini a ten di e kon. Sobun, te wi e studeri den, dan wi o tan denki a moi howpu di wi abi, awinsi sortu problema miti wi. Kow taki syatu fu tu profeititori di Danièl ben skrifi èn di e kon tru now. Te wi e frustan den, dan wi o man teki bun bosroiti.

12. San den futu fu ’isri di ben moksi nanga safu klèidoti’ e prenki?

¹² Leisi Danièl 2:41-43. Na ini a dren di Danièl ben fruklari gi Kownu Nebukadnesar, den futu fu a popki di a kownu ben si ben meki fu ’isri di ben moksi nanga safu klèidoti’. Te wi e agersi a profeititori disi nanga tra profeititori na ini den buku Danièl nanga Openbaring, dan wi kan frustan taki den futu e prenki Amerkankondre nanga Ingrisikondre di e wroko makandra èn di de a moro tranga  tirimakti na grontapu. Danièl e taki fu a grontapumakti disi: „A kownukondre o tranga na a wán sei èn a o swaki na a tra sei.” Fu san ede wan pisi o swaki? Fu di a safu kleidoti di e prenki den borgu fu den kondre, e du sani di e meki taki a tirimakti disi no tranga leki isri. b

13. Sortu prenspari tru tori wi e kon sabi te wi e frustan a profeititori disi?

¹³ Wi e kon sabi prenspari tru tori te wi e leisi san Danièl skrifi fu a popki, spesrutu fu den futu fu a popki. A fosi sani di wi kon sabi na taki a Grontapumakti fu Ingrisikondre nanga Amerkankondre sori taki den tranga. Fu eksempre, Amerkankondre nanga Ingrisikondre ben de tu fu den kondre di ben wini a Fosi Grontapufeti nanga a Di Fu Tu Grontapufeti. Ma a grontapumakti disi swaki tu èn a o kon moro swaki fu di den borgu fu en e feti nanga makandra èn nanga lanti. A di fu tu sani di wi kon sabi na taki a Grontapumakti fu Ingrisikondre nanga Amerkankondre o de a lasti grontapumakti fosi Gado Kownukondre tyari wan kaba kon na ala libisma regering. Srefi te tra kondre e gens a Grontapumakti fu Ingrisikondre nanga Amerkankondre son leisi, toku den no o man teki en presi. Wi sabi dati fu di „a ston” o naki den futu fu a popki broko pisipisi. Dati wani taki dati Gado Kownukondre o tyari wan kaba kon na a Grontapumakti fu Ingrisikondre nanga Amerkankondre.​—Dan. 2:34, 35, 44, 45.

14. Te wi e frustan a profeititori fu den futu fu isri nanga klèidoti, dan fa dati kan yepi wi fu teki koni bosroiti?

¹⁴ Yu de seiker taki a profeititori fu Danièl di e taki fu den futu fu isri nanga klèidoti tru? Efu yu e bribi dati, dan a o abi krakti tapu a fasi fa yu e libi. Yu no o suku fu meki bun furu moni noso fu kon gudu, fu di yu sabi taki heri esi na ogri grontapu disi o kisi pori (Luk. 12:16-21; 1 Yoh. 2:15-17). Now di wi studeri a profeititori disi syatu, yu kan aksi yusrefi: ’Den bosroiti di mi e teki e sori taki mi de seiker taki heri esi Gado Kownukondre o pori ala libisma tirimakti?’

15. Suma na „a kownu fu noordsei” nanga „a kownu fu zuidsei” na ini a ten disi? (Danièl 11:40)

¹⁵ Leisi Danièl 11:40. Danièl kapitel 11 e taki fu tu kownu noso tirimakti di e strei nanga makandra fu abi a makti na heri grontapu. Te wi e teki a profeititori disi gersi nanga trawan na ini Bijbel, dan wi sabi taki „a kownu fu noordsei” na Rosiakondre nanga den kondre di e horibaka gi en èn „a kownu fu zuidsei” na a Grontapumakti fu Ingrisikondre nanga Amerkankondre. c

16. San „a kownu fu noordsei” e du nanga Gado pipel?

¹⁶ A pipel fu Gado di e libi na ondro a tiri fu „a kownu fu noordsei” e kisi frufolgu fu a kownu disi. Sma fon son Kotoigi èn den poti den na ini strafu-oso fu a bribi fu den ede. Den brada nanga sisa fu wi no frede „a kownu fu noordsei”, ma na presi fu dati den sani di a e du e tranga a bribi fu den. Fu san ede? Fu di den sabi taki a frufolgu di a pipel fu Gado e kisi e meki profeititori na ini a  buku Danièl kon tru  d (Dan. 11:41). Te wi sabi dati, dan a kan yepi wi fu tan poti prakseri na a howpu di wi abi èn fu tai hori na Yehovah awinsi san e pasa.

17. Sortu tesi Gado pipel e kisi na ondro a tiri fu „a kownu fu zuidsei”?

¹⁷ Na ini a ten di pasa, „a kownu fu zuidsei” ben frufolgu Yehovah pipel tu. Fu eksempre, disi pasa na a ten fu a Fosi nanga a Di Fu Tu Grontapufeti, di den ben poti furu brada na strafu fu di den no ben wani go feti. Boiti dati den ben puru son Kotoigi pikin na skoro fu di den no ben wani taki a fraga odi. Ma no so langa pasa, a pipel fu Gado di e libi na ondro a tiri fu a kownu dati kisi fu du nanga tra tesi pe den ben musu sori taki den e horibaka gi Gado Kownukondre. Fu eksempre, te verkiezing de, dan wan Kresten kan feni taki a wan politiek partij noso politiekman bun moro a trawan. Aladi a no e go stem, toku a kan winsi na  ini en ati taki wan spesrutu partij noso politiekman wini. Sobun, boiti taki wi no e du sani di e sori taki wi e teki sei na ini politiek, wi musu luku bun tu fa wi e denki èn fa wi e firi te a abi fu du nanga a tori disi.​—Yoh. 15:18, 19; 18:36.

18. San wi e du te wi e si fa den tu kownu e strei nanga makandra? (Luku a prenki.)

¹⁸ Den sma di no e bribi na ini Bijbel profeititori kan frede srefisrefi te den e si fa „a kownu fu zuidsei” e „strei doronomo” nanga „a kownu fu noordsei” (Dan. 11:40). Ala tu kownu abi bom di tranga nofo fu kiri ala libisani na grontapu. Ma wi sabi taki Yehovah no o meki a sani dati pasa (Yes. 45:18). Sobun, a strei na mindri „a kownu fu noordsei” nanga „a kownu fu zuidsei” no e frede wi, ma na presi fu dati a e tranga wi bribi. A strei disi e sori taki a kaba fu a grontapu sistema disi de krosibei.

19. San wi musu hori na prakseri te a abi fu du nanga Bijbel profeititori?

¹⁹ Wi no sabi fa son Bijbel profeititori o kon tru. Srefi a profeiti Danièl no ben sabi san ala den sani di a ben skrifi ben wani taki (Dan. 12:8, 9). Ma awinsi wi no sabi precies fa wan profeititori o kon tru, toku dati no wani taki dati a no o kon tru. Wi kan abi a frutrow taki Yehovah o tyari kon na krin gi wi san wi musu sabi èn a o du dati na a yoisti ten, neleki fa a ben du fosi.​—Amos 3:7.

20. Sortu span Bijbel profeititori o kon tru heri esi èn san wi musu tan du?

²⁰ Den pipel o taki: „Freide de èn ala sani e waka bun!” (1 Tes. 5:3) Dan den tirimakti fu a grontapu disi o feti nanga falsi kerki èn den o pori en (Openb. 17:16, 17). Baka dati den o kon feti nanga Gado pipel (Esek. 38:18, 19). Dan a lasti feti fu Armagedon o bigin (Openb. 16:14, 16). Wi kan de seiker taki den sani disi o pasa heri esi. Fosi a ten dati doro, wi musu tan poti prakseri na Bijbel profeititori èn wi musu yepi trawan fu du a srefi. Na so wi e sori warderi gi wi lobi-ati Papa na hemel.