1-2. (a) Fa Yehovah e si den sma di du seryusu sondu èn di no wani sori berow? (b) San Yehovah wani taki den sma disi du?

 YEHOVAH no feni ala sani bun. A no lobi te sma e du sondu (Ps. 5:4-6). Yehovah e ferwakti taki wi e gi yesi na den komando fu en na ini Bijbel, ma a sabi taki wi abi sondu èn taki wi o meki fowtu son leisi (Ps. 130:3, 4). Na a srefi ten, a no man ferdrage ’man di no e lespeki en èn di e teki a bun-ati fu wi Gado leki wan okasi fu du ogri sani sondro fu syen’ (Yud. 4). Iya, Bijbel e taki dati Gado o ’pori den ogri sma’ na ini a feti fu en na Armagedon.​—2 Petr. 3:7; Openb. 16:16.

² Ma Yehovah wani taki nowan sma kisi pori. Na ini den artikel na fesi wi leri taki Bijbel e sori krin taki Gado „wani taki ala sma musu kisi na okasi fu sori berow” (2 Petr. 3:9). Neleki Yehovah, den owruman abi pasensi te den e pruberi fu yepi sma di du sondu fu kenki den fasi fu den èn fu tron mati baka fu Yehovah. Ma son leisi wan sma di du sondu no e sori berow (Yes. 6:9). Son sma e tan du ogri aladi den owruman e tan pruberi fu yepi den. San owruman musu du na ini a situwâsi dati?

„PURU NA OGRIMAN NA UN MINDRI”

3. (a) Soleki fa Bijbel e sori, dan san musu psa nanga sma di no e sori berow? (b) Te wan sma e weigri fu sori berow, dan fu san ede wi kan taki dati na en srefi ben wani taki den puru en fu a gemeente?

³ Te wan sma di du wan seryusu sondu no e sori berow, dan den owruman musu du san skrifi na 1 Korentesma  5:13. A tekst dati e taki: „Puru na ogriman na un mindri.” A sma di du wan seryusu sondu sabi taki efu a no e sori berow, dan den o puru en fu a gemeente. Sobun, wi kan taki dati na en srefi ben wani taki den puru en fu a gemeente (Gal. 6:7). Fu san ede wi kan taki dati? Fu di a sma weigri fu kenki den fasi fu en, srefi baka di den owruman pruberi omeni leisi fu yepi en (2 Kow. 17:12-15). Den sani di a e du e sori taki a no wani gi yesi na den wet fu Yehovah.​—Deut. 30:19, 20.

4. Fu san ede den brada e meki bekènti taki wan sma di du wan seryusu sondu puru fu a gemeente?

⁴ Te den puru wan sma fu a gemeente fu di a no wani sori berow, dan den brada e meki bekènti taki a sma disi no de wan Yehovah Kotoigi moro. a Den no e du dati fu di den wani gi a sma syen, ma den e du en fu sorgu taki a gemeente kan gi yesi na a rai di e taki dati den „no musu bumui nanga” a sma dati. Den no musu „nyan srefi nanga so wan sma” (1 Kor. 5:9-11). Bun reide de fu san ede Yehovah gi a komando dati. Na apostel Paulus ben skrifi: „Pikinso srudeki nomo e meki ala blon sweri” (1 Kor. 5:6). Te sma di du wan seryusu sondu e weigri fu sori berow, dan tra sma ben kan denki taki den no abi fu gi yesi na den komando fu Yehovah.​—Odo 13:20; 1 Kor. 15:33.

5. Fa wi musu si wan sma di den puru fu a gemeente, èn fu san ede?

⁵ Te den puru wan brada noso wan sisa fu a gemeente, dan fa wi musu si a sma dati? Aladi wi no e bemui nanga a sma dati, tòg wi musu si en leki wan lasi skapu. Wi no musu denki taki howpu no de moro gi en. Wan skapu di lasi kan drai kon baka na a ipi. Hori na prakseri taki a sma disi ben gi ensrefi abra na Yehovah. A sari taki nownowde a sma no e du san a ben pramisi Gado, èn dati kan tyari bigi problema kon gi en (Esek. 18:31). Ma ten de ete èn Yehovah de klarklari fu sori sar’ati gi a sma. Dati meki wi e howpu taki a sma o kenki. Sobun, fa den owruman kan yepi wan sma di puru fu a gemeente?

FA DEN OWRUMAN KAN YEPI DEN WAN DI PURU FU A GEMEENTE

6. San den owruman o du fu yepi wan sma di puru fu a gemeente?

⁶ Te wan sma puru fu a gemeente, dan dati wani taki dati den owruman no o pruberi moro fu yepi en fu drai kon baka na Yehovah? Kwetkweti! Te den owruman e taigi wan sma taki den o puru en fu a gemeente, dan den o taigi en tu san a musu du so taki den kan teki en baka na ini a gemeente. Ma den owruman o du moro srefi. Nofo tron, den o taigi a sma di du wan seryusu sondu taki den ben o wani taki baka nanga en baka wan tu mun fu si efu a kenki a denki fu en. Efu baka wan tu mun a sma wani taki baka nanga den owruman, dan den owruman o gi en dek’ati fu sori berow. Awansi a no kenki a denki fu en ete na a ten dati, tòg den owruman o pruberi ten na ten fu taki nanga en.

7. Fa den owruman kan sori sar’ati neleki Yehovah te wan sma puru fu a gemeente? (Yeremia 3:12)

⁷ Neleki Yehovah, den owruman e sori sar’ati gi den wan di puru fu a gemeente. Fu eksempre, Yehovah no ben wakti teleki  a tranga-ede pipel fu en na ini owruten Israel ben sori berow, fosi a pruberi fu yepi den. Na presi fu dati, a seni den profeiti fu en go na den, srefi di den no ben sori berow ete. Soleki fa wi si na ini a di fu tu artikel fu a Waktitoren disi, dan Yehovah ben taigi Hosea fu gi en wefi pardon èn fu teki en baka aladi a ben e du seryusu sondu ete. Na so Yehovah sori taki a abi sar’ati nanga sma (Hos. 3:1; Mal. 3:7). Neleki Yehovah, Kresten owruman wani taki a sma di du seryusu sondu drai kon baka na a gemeente, èn den no e meki en muilek gi en fu du dati.​—Leisi Yeremia 3:12.

8. Fa na agersitori fu a lasi manpkin e yepi wi fu ferstan moro bun fa Yehovah e si den wan di puru fu a gemeente? (Lukas 15:7)

⁸ Meki wi poti prakseri baka na a agersitori fu a lasi manpkin. Di a p’pa si taki a boi fu en ben e drai kon baka na oso, dan a „lon go brasa en boi èn a gi en wan switi bosi” (Luk. 15:20). Luku taki a p’pa no wakti teleki a boi fu en begi en fu gi en pardon. Na presi fu dati na en lon go na a boi fu di a ben lobi en. Na so Yehovah e si den wan di gwe libi en èn den owruman e du ala san den man fu teki na eksempre fu Yehovah. Den wani taki den lasi skapu disi drai kon baka na Yehovah (Luk. 15:22-24, 32). Te wan sma di du wan seryusu sondu drai kon baka na Yehovah, dan Yehovah, Yesus, den engel, nanga a heri gemeente e prisiri.​—Leisi Lukas 15:7.

9. Sortu dek’ati Yehovah e gi sma di du seryusu sondu?

⁹ Te so fara wi leri taki Yehovah no wani taki sma di e weigri fu sori berow e tan na ini a gemeente. Ma tòg a e tan pruberi fu yepi den. A wan taki den drai kon baka na a gemeente. Èn te sma e sori berow, dan luku fa Yehovah e si dati. Hosea 14:4 e taki: „Mi o meki a pipel disi kon betre, dan den o gi yesi na mi baka. Mi o lobi den, fu di misrefi wani dati. Mi ati no o bron nanga den moro.” (Hos. 14:4). Fu di den owruman sabi fa Yehovah e firi, meki den e luku bun efu den man si beweisi di e sori taki a sma e bigin sori berow. Den wortu disi musu gi iniwan sma di gwe libi Yehovah a dyaranti taki a lobi den èn taki a wani taki den drai kon baka na en.

10-11. Fa den owruman o pruberi fu yepi den wan di ben puru fu a gemeente na ini a ten di psa?

¹⁰ Fa den owruman o pruberi fu yepi den wan di ben puru fu a gemeente, kande omeni yari psa? Kande den sma dati no e du a sondu moro di meki taki den brada puru den fu a gemeente. Na ini son situwâsi, a kan taki den no sabi srefsrefi moro fu san ede den brada ben puru den fu a gemeente. Ma awinsi o langa a sma ben puru fu a gemeente, tòg den owruman o pruberi fu feni a sma èn fu go luku en. Te den owruman go luku a sma, dan den o aksi a sma tu efu den kan begi gi en èn den o gi en dek’ati fu drai kon baka na a gemeente. A no de fu taki dati efu wan sma ben gwe fu a gemeente omeni yari langa, dan a musu de so taki a bribi fu en kon swaki srefsrefi. Sobun, efu a e taki dati a wani drai kon baka na a gemeente, dan den owruman kan seti sani so taki wan sma e studeri Bijbel nanga en, srefi efu den no teki en ete na ini a gemeente. Na ini ala situwâsi, na den owruman musu seti sani so taki wan sma e studeri Bijbel nanga en.

¹¹ Neleki Yehovah den owruman e pruberi  fu sori taki den e firi gi sma. Dati meki den brada o go suku ala sma di gwe libi Yehovah èn den o gi den dek’ati fu drai kon baka na en. Te wan sma di du wan seryusu sondu e sori taki a kenki a fasi fa a e denki èn a fasi fa a e tyari ensrefi, dan den kan teki en baka na ini a gemeente.​—2 Kor. 2:6-8.

12. (a) Na ini sortu situwâsi den owruman musu luku bun? (b) Fu san ede wi no musu denki taki Yehovah no o sori sar’ati gi sma di du son sondu? (Luku a futuwortu.)

¹² Na ini son situwâsi, den owruman musu luku bun fosi den teki wan sma baka na ini a gemeente. Fu eksempre, efu wan sma ben du ogri nanga wan pkin,  efu a ben panya falsi bribi, noso efu a broko trow na wan triki fasi, dan den owruman wani de seiker efu a sma disi abi berow (Mal. 2:14; 2 Tim. 3:6). Den musu kibri den brada nanga sisa na ini a gemeente. Na a srefi ten, wi musu ferstan taki Yehovah o teki ibri sma baka di abi trutru berow èn di e tapu fu du san no bun. Sobun, aladi den owruman wani de seiker efu wan sma di no libi bun nanga trawan abi berow trutru, tòg den no musu denki taki noiti Yehovah o gi a sma dati pardon. b​—1 Petr. 2:10.

SAN A GEMEENTE KAN DU

13. Fa a fasi fa wi e libi nanga sma di kisi pir’ai fu den owruman e difrenti fu a fasi fa wi e libi nanga wan sma di den puru fu a gemeente?

¹³ Neleki fa wi ben si na ini na artikel na fesi, den owruman e meki bekènti son leisi taki wan sma kisi pir’ai. Te dati de so, dan wi kan tan bemui nanga a sma dati fu di wi sabi taki a sori berow èn taki a tapu fu du san no bun (1 Tim. 5:20). A de wan skapu fu Yehovah ete èn a de fanowdu taki a gemeente e gi en dek’ati fu tan du san bun (Hebr. 10:24, 25). Ma dati no de so nanga wan sma di den puru fu a gemeente. Wi „no musu bumui nanga” a sma dati, nôno, wi „no musu nyan srefi nanga so wan sma”.​—1 Kor. 5:11.

14. Sortu besroiti wan Kresten kan teki te a abi fu du nanga wan sma di den puru fu a gemeente? (Luku a prenki.)

¹⁴ A de so taki a rai na 1 Korentesma 5:11 wani taki dati wi no kan kari wan sma di puru fu a gemeente kon na a konmakandra, noso taki wi no mag taki en odi efu a kon na wan konmakandra? Nôno. A no de fu taki dati wi no o bemui nanga en. Ma efu a sma di den puru fu a gemeente na wan famiriman fu wi noso efu a ben de wan bun mati fu wi, dan wi kan besroiti gi wisrefi efu wi o kari en kon na wan konmakandra. Fa a de efu a sma e kon na a konmakandra? Fosi, wi no ben o taki a sma dati odi. Ma na ini a situwâsi disi tu ibri Kresten musu meki a  konsensi fu en di oefen nanga yepi fu Bijbel, tiri en te a e besroiti san a o du. Son sma kan feni taki a no de wan problema gi den fu taki a sma odi noso fu gi en wan switikon na a konmakandra. Ma wi no o taki langa tori nanga a sma èn wi no o abi demakandra nanga en na tra fasi tu.

15. Fu sortu sma 2 Yohanes 9-11 e taki? (Luku a faki „ A de so taki Yohanes nanga Paulus ben e taki fu a srefi sortu sondu?”)

¹⁵ Son sma ben kan aksi den srefi: ’Ma Bijbel no e taki dati wan Kresten di e taki sowan sma odi e horbaka gi den ogri sani di a e du?’ (Leisi 2 Yohanes 9-11.) A tekst disi e sori taki a rai disi abi fu du nanga den sma di fadon kmoto na bribi èn nanga tra sma di e pruberi fu meki trawan du sani di Bijbel e krutu (Openb. 2:20). Dati meki efu wan sma e gi trawan dek’ati fu drai baka gi Yehovah noso fu du tra sani di no bun, dan den owruman no o seti sani fu taki nanga en. Tòg howpu de ete taki a sma kisi ensrefi. Ma teleki dati psa, wi no musu taki sowan sma odi èn wi no musu gi en wan kari tu fu kon na wan gemeente konmakandra.

NELEKI YEHOVAH, SORI TAKI YU E FIRI GI SMA ÈN TAKI YU ABI SAR’ATI

16-17. (a) San Yehovah wani fu sma di e du sondu? (Esekièl 18:32) (b) Fa owruman kan sori taki den e wroko makandra nanga Yehovah te den e pruberi fu yepi wan sma di du wan seryusu sondu?

¹⁶ San wi leri fu den feifi artikel na ini a Waktitoren disi? Yehovah wani taki nowan sma musu lasi en libi! (Leisi Esekièl 18:32.) A wani taki sma di du sondu e meki en bun baka nanga En (2 Kor. 5:20). Dati meki ala ten Yehovah gi den futuboi fu en di gwe libi en a dek’ati fu sori berow èn fu drai kon baka nanga en. Den owruman na ini a gemeente abi a grani fu wroko makandra nanga Yehovah fu yepi den wan di du wan seryusu sondu fu sori berow.​—Rom. 2:4; 1 Kor. 3:9.

¹⁷ Bigi prisiri de na ini hemel te wan sma di du wan sondu sori berow! Wi P’pa na hemel, Yehovah, e prisiri ibri leisi baka te wan fu den lasi skapu fu en e drai kon baka na a gemeente. A lobi di wi abi gi Yehovah e kon moro tranga te wi e denki dipi fu a sar’ati fu en, fu a bun’ati fu en, èn fu a fasi a e broko en ede nanga wi.​—Luk. 1:78.