1. San kan psa te wan sma du wan seryusu sondu?

 NA INI na artikel na fesi, wi kon sabi san na apostel Paulus ben taigi a gemeente na ini Korente fu du di wan man ben du wan seryusu sondu. A man dati no ben abi berow èn den ben musu puru en fu a gemeente. Ma soleki fa a thema tekst fu wi e sori, dan Gado kan yepi wan sma fu sori berow (Rom. 2:4). Fa Yehovah e gebroiki owruman fu yepi wan sma fu sori berow?

2-3. San wi musu du efu wi kon sabi taki wan brada noso wan sisa du wan seryusu sondu, èn fu san ede wi musu dati?

² Efu den owruman no sabi efu wan sma du wan seryusu sondu, dan den no o man yepi en. Sobun, san wi musu du efu wi kon sabi taki wan brada noso wan sisa du wan seryusu sondu di kan meki taki den puru en fu a gemeente? Wi kan gi a sma dati dek’ati fu go suku yepi na den owruman.​—Yes. 1:18; Tori 20:28; 1 Petr. 5:2.

³ Ma fa a de te a sma disi no wani taki nanga den owruman? Dan wi srefi musu go taki nanga den owruman fu sorgu taki a sma e kisi a yepi di a abi fanowdu. Te wi e du dati, dan wi e sori taki wi lobi wi brada noso sisa fu di wi sabi taki den owruman o man yepi en. Efu a sma e tan du san no bun, dan te fu kba a o pori a matifasi di a abi nanga Yehovah. A kan pori a nen fu a gemeente tu. Sobun, awinsi a kan muilek gi wi, tòg wi e go na den owruman fu di wi lobi Yehovah èn fu di wi lobi a sma di du wan seryusu sondu.​—Ps. 27:14.

 FA DEN OWRUMAN E YEPI DEN WAN DI DU WAN SERYUSU SONDU

4. San den owruman o pruberi fu du te den o taki nanga wan sma di du wan seryusu sondu?

⁴ Te wan sma na ini a gemeente du wan seryusu sondu, dan a skin fu owruman e meki dri owruman fu a gemeente taki nanga a sma. a Den man disi no musu denki tumsi furu fu densrefi èn den musu abi sakafasi. Te den o pruberi fu yepi a sma fu sori berow, dan den e hori na prakseri taki den no kan dwengi a sma fu kenki (Deut. 30:19). Den owruman e ferstan taki a no ala sma o sori berow neleki fa Kownu David ben du dati (2 Sam. 12:13). Son leisi, son sma di du wani sondu no wani gi yesi na a rai di den e kisi fu Yehovah (Gen. 4:6-8). Ma tòg den owruman wani yepi a sma fu sori berow. San den owruman musu hori na prakseri te den e taki nanga wan sma di du wan seryusu sondu?

5. Sortu rai den owruman musu hori na prakseri te den o taki nanga wan sma di du wan seryusu sondu? (2 Timoteyus 2:24-26) (Luku a prenki.)

⁵ Den owruman e si a sma di du wan sondu, leki wan lasi skapu di warti gi Yehovah (Luk. 15:4, 6). Dati meki te den o taki nanga a sma, den no e taki grofu èn den no e gi en a firi taki den no lobi en. Den no e denki tu taki na aksi den musu poti nomo gi a sma fu kon sabi san psa trutru. Na presi fu dati, den o sori den fasi di kari na 2 Timoteyus 2:24-26. (Leisi en.) Den owruman e tan sori safr’ati nanga swit’fasi gi a sma, fu di den wani yepi en fu kenki a fasi fa a e denki.

6. Fa den owruman o sreka den eigi ati fosi den taki nanga wan sma di du wan seryusu sondu? (Romesma 2:4)

⁶ Den owruman e sreka den eigi ati. Den e hori a sani disi na prakseri di Paulus ben taki: „Na fu di Gado abi bun-ati, meki a e pruberi fu meki yu abi berow.” (Leisi Romesma 2:4.) Owruman na skapuman èn den musu hori densrefi na den rai fu Krestes te den e sorgu gi a gemeente (Yes. 11:3, 4; Mat. 18:18-20). Fosi den brada o taki nanga wan sma di du wan seryusu sondu, den e begi Yehovah fu horbaka gi den so taki den kan yepi a sma fu sori berow. Den e ondrosuku sani finfini na ini Gado Wortu èn na ini den buku fu wi. Boiti dati, den e begi Yehovah fu yepi den fu ferstan a sma èn a situwâsi fu en. Den owruman o pruberi fu kon sabi moro fu a sma, so taki den man ferstan fu san ede a  sma e denki leki fa a e denki èn fu san ede a du a seryusu sondu.​—Odo 20:5.

7-8. Fa den owruman kan sori taki den abi pasensi neleki Yehovah te den e taki nanga wan sma di du wan seryusu sondu?

⁷ Den owruman e sori taki den abi pasensi neleki Yehovah. Den e hori na prakseri fa Yehovah pruberi fu yepi sma di ben du seryusu sondu na ini owruten. Fu eksempre, Yehovah ben abi pasensi nanga Kain. A ben taigi en san ben o psa efu a no ben o kenki den fasi fu en èn a taigi en tu taki a ben o kisi blesi efu a ben o gi yesi (Gen. 4:6, 7). Yehovah ben seni a profeiti Natan fu go pir’ai gi David. Natan gebroiki wan agersitori di yepi David fu sori berow (2 Sam. 12:1-7). Èn ibri tron baka Yehovah tan seni den profeiti fu en go na a tranga-ede pipel fu Israel (Yer. 7:24, 25). A no wakti teleki a pipel fu en ben sori berow, fosi a yepi den. Na presi fu dati, den ben e du sondu ete di a gi den dek’ati fu sori berow.

⁸ Owruman e teki na eksempre fu Yehovah te den e pruberi fu yepi den wan di du wan seryusu sondu. Te den e taki nanga den sortu sma disi, dan den e du dati „nanga ala pasensi”, soleki fa 2 Timoteyus 4:2 e taki. Sobun, wan owruman ala ten musu hori ensrefi èn nanga pasensi a musu pruberi fu gi a sma di du wan sondu dek’ati fu du san bun. Efu na owruman e sori taki a e ferferi noso taki a e atibron, dan a sma no o wani teki a rai di a e kisi, noso a kan weigri fu sori berow.

9-10. Fa owruman kan yepi a sma fu kon ferstan san a du?

⁹ Den owruman e pruberi fu kon sabi sortu besroiti a sma ben teki fosi a du a sondu. San swaki a matifasi fu en nanga Yehovah? A tapu fu leisi Bijbel ibri dei noso fu go na ini a preikiwroko? A tapu nanga a gwenti di a ben abi fu begi Yehovah? A meki den takru lostu fu en abi krakti na en tapu? Nanga suma a ben e bemui? Sortu prisiriten a ben abi? Fa den besroiti disi ben kan abi krakti tapu na ati fu en? A e ferstan fa a sani di a du e meki en P’pa Yehovah firi?

¹⁰ Den owruman kan poti aksi gi a sma fu yepi en fu kon si sortu sani meki taki a matifasi fu en nanga Yehovah kon swaki èn di meki taki a du sondu (Odo 20:5). Boiti dati, neleki Natan, den kan gebroiki agersitori fu yepi a sma fu prakseri san a du so taki a e kon ferstan fu san ede a sani dati no bun. Kande na a fosi leisi kba te den owruman taki nanga a sma disi, a e bigin sari fu den besroiti di a teki èn fu a fasi fa a ben e denki. Kande a e sori berow srefi.

11. Fa Yesus ben e pruberi fu yepi sma di ben du sondu?

¹¹ Den owruman e pruberi fu teki na eksempre fu Yesus. Fu di Yesus ben wani yepi Paulus, meki a poti wan koni aksi gi en. A aksi en: „Saul, Saul, fu san ede yu e suku fu du ogri nanga mi?” Nanga yepi fu na aksi disi, Yesus yepi Paulus fu kon si taki san a ben e du no ben bun (Tori 9:3-6). Èn na ini a tori fu „na uma Iseibel”, Yesus ben taki: „Mi gi en ten fu a kan abi berow”​—Openb. 2:20, 21.

12-13. Fa den owruman kan gi wan sma ten fu a kan sori berow? (Luku a prenki.)

¹² Neleki Yesus, den owruman no de gaw fu denki taki a sma no wani kenki a denki fu en èn taki a no wani tapu fu du sondu. Son sma kan sori berow a fosi leisi kba te den owruman e taki nanga den. Ma son sma kande abi moro ten fanowdu. Dati meki den owruman kan besroiti fu taki moro leki wán leisi nanga a sma.  Kande baka a fosi leisi di den taki nanga a sma, a Kresten disi di du wan sondu e bigin denki bun fu san den brada taigi en. Kande a e begi Yehovah fu aksi en pardon gi den sondu fu en (Ps. 32:5; 38:18). Sobun, a tra leisi te den o taki nanga a sma, dan kande a e denki heri tra fasi leki a fosi leisi di den taki nanga en.

¹³ Den owruman e sori sar’ati nanga swit’fasi gi a sma di du wan seryusu sondu, fu di den wani yepi en fu sori berow. Den e begi Yehovah fu blesi a muiti fu den èn den e howpu taki a Kresten brada noso sisa fu den o kisi ensrefi èn o sori berow.​—2 Tim. 2:25, 26.

14. Suma musu kisi a grani te wan sma di du wan seryusu sondu e sori berow, èn fu san de dati de so?

¹⁴ Efu a sma e sori berow, dan wi breiti trutru (Luk. 15:7, 10). Suma musu kisi a grani? Na den owruman? Memre san Paulus ben skrifi fu sma di e du seryusu sondu: „Kande Gado o meki den abi berow” (2 Tim. 2:25). Sobun, na Yehovah na a sma di e yepi wan Kresten fu kenki a denki fu en. A no libisma. Paulus e ferklari sortu bun sani e psa baka te wan sma sori berow. A sma dati o kon ferstan a waarheid moro bun, a e kisi ensrefi baka, èn a kan kmoto na ini a trapu fu Satan.​—2Tim. 2:26.

15. Fa den owruman kan tan yepi wan sma di abi berow fu den sondu di a du?

¹⁵ Te wan sma sori berow, dan den brada o tan fisiti en fu yepi en fu tranga a bribi fu en, fu tan kakafutu gi den tesi fu Satan, èn fu du san reti (Hebr. 12:12, 13). A no de fu taki dati den owruman no e ferteri trawan den finfini tori fu a sondu di a sma du. Ma san a gemeente musu kon sabi?

„LETI NA FESI ALA SMA YU MUSU PIRI-AI GI” EN

16. Suma na den „sma” di Paulus e taki fu den, soleki fa 1 Timoteyus 5:20 e sori?

¹⁶ Leisi 1 Timoteyus 5:20. Paulus ben skrifi den wortu dati gi Timoteyus, wan  tra owruman, fu taigi en taki a ben musu pir’ai gi sma di ben e du sondu, èn a ben musu du dati „na fesi ala sma”. San Paulus ben wani taki nanga dati? Paulus ben wani taki dati a sma di du wan seryusu sondu ben musu kisi pir’ai na fesi a heri gemeente? Nôno, dati no abi fu de so ala ten. Na presi fu dati a ben e taki fu den sma di ben sabi kba fu a sondu di a sma du. Kande den ben si san a sma du, noso kande a sma ben ferteri den san a du. Den owruman o ferteri soso den sma disi taki den seti a tori èn taki a sma kisi pir’ai.

17. Efu furu sma na ini a gemeente sabi kba taki wan sma du wan seryusu sondu, noso efu furu sma o kon sabi fu a tori, dan san den brada musu meki bekènti èn fu san ede?

¹⁷ Son leisi, furu sma na ini a gemeente sabi kba taki wan sma du wan seryusu sondu, noso a musu fu de so taki den o kon sabi a tori. Na ini sowan situwâsi, a sma musu kisi pir’ai na fesi a heri gemeente. Dati meki wan owruman musu meki bekènti na ini a gemeente taki a brada noso a sisa kisi pir’ai. Fu san ede? Paulus e taki: „So taki a kan de wan warskow gi den trawan” fu no du wan seryusu sondu.

18. Efu wan yonguwan di no tapu 18 yari ete du wan seryusu sondu, dan san den owruman musu du? (Luku a prenki.)

¹⁸ Fa a de te yonguwan di dopu èn di no tapu 18 yari ete du wan seryusu sondu? A skin fu owruman o seti sani, so taki tu owruman e taki nanga a yonguwan disi makandra nanga en Kresten p’pa nanga m’ma. b Den owruman o aksi a p’pa nanga  m’ma san den srefi du kba fu yepi a pkin fu den fu tyari kenki kon èn fu sori berow. Efu a yonguwan e gi yesi na a rai fu en p’pa nanga a m’ma, efu a e kenki a denki fu en èn a fasi fa a e tyari ensrefi, dan den tu owruman kan besroiti fu meki a p’pa nanga a m’ma tan yepi a pkin go doro. Den owruman sabi taki Yehovah gi a p’pa nanga a m’ma a frantwortu fu pir’ai gi den pkin fu den na wan lob’ati fasi (Deut. 6:6, 7; Odo 6:20; 22:6; Ef. 6:2-4). Baka dati, den owruman o taki nanga a p’pa nanga m’ma ten na ten fu luku efu a yonguwan e kisi a yepi di a abi fanowdu. Ma san den owruman musu du efu wan yonguwan di dopu e tan du san no bun? Na ini a situwâsi dati, dan dri owruman o taki nanga en makandra nanga en Kresten p’pa nanga m’ma.

„YEHOVAH LOBI SMA TRUTRU ÈN A ABI SARI-ATI”

19. Fa owruman e sori taki den e teki na eksempre fu Yehovah te den e taki nanga wan sma di du wan seryusu sondu?

¹⁹ Yehovah gi den owruman di e taki nanga sma di du wan seryusu sondu, a frantwortu fu hori a gemeente krin (1 Kor. 5:7). Ma den owruman e du ala san den man tu fu yepi wan sma fu sori berow. Èn te den e yepi a sma, den e tan howpu taki a sma o kenki. Fu san ede? Fu di den wani teki na eksempre fu Yehovah di „lobi sma trutru èn [di] a abi sari-ati” (Yak. 5:11). Luku fa na apostel Yohanes di ben kon owru kba ben sori taki a ben lobi den brada nanga sisa fu en. A ben skrifi: „Mi pikin, mi e skrifi unu den sani disi, so taki unu no du wan sondu. Ma toku, efu wan sma du wan sondu, dan wi abi wan yepiman na a Tata, dati na Yesus Krestes, wan reti-ati sma.”​—1 Yoh. 2:1.

20. San wi o luku na ini a lasti artikel fu a Waktitoren disi?

²⁰ A sari taki son leisi wan Kresten no wani sori berow. Efu dati de so, dan den musu puru en fu a gemeente. San den owruman musu du te dati psa? Wi o poti prakseri na dati na ini a lasti artikel fu a Waktitoren disi.