1-2. (a) San na sondu èn fa wi kan kakafutu gi en? (Luku sosrefi „San a wortu disi wani taki”.) (b) San wi o luku na ini na artikel disi èn na ini den trawan di de fu feni na ini A Waktitoren disi? (Luku sosrefi „Wan tu sani gi den leisiman”, na ini a tijdschrift disi.)

 YU BEN o wani sabi o furu Yehovah Gado lobi yu? Yu kan kon sabi dati te yu e ondrosuku san a du fu ferlusu yu fu sondu nanga dede. Sondu a na wan ogr’ati feanti di wi no man wini nanga wi eigi krakti. Wi alamala e sondu ibri dei èn wi e dede fu di wi abi sondu (Rom. 5:12). Ma howpu de. Yehovah e pramisi wi taki a o ferlusu wi fu sondu nanga dede.

² Sowan 6.000 yari kba, Yehovah yepi libisma fu de en mati aladi den abi sondu. Fu san ede a e du dati? Fu di a lobi wi. Yehovah lobi libisma sensi a bigin di a meki den. Fu di a lobi wi so te, meki a du furu sani fu yepi wi te wi sondu. Gado sabi taki sondu e tyari dede kon èn a no wani taki wi dede. A wani taki wi libi fu têgo (Rom. 6:23). Na dati a wani gi yu. Na ini na artikel disi wi o poti prakseri na dri aksi: (1) Sortu howpu Yehovah gi sondu libisma? (2) San sondu libisma na ini Bijbel ten ben du fu plisi Yehovah? (3) San Yesus du fu ferlusu libisma fu sondu nanga dede?

SORTU HOWPU YEHOVAH GI SONDU LIBISMA?

 3. Fa wi fosi p’pa nanga m’ma tron sondu sma?

³ Di Yehovah meki a fosi man nanga uma, dan a ben wani taki den de koloku. A gi den wan moi tanpe, a meki  den tron masra nanga wefi, èn a gi den wan wroko di ben o gi den furu prisiri. Den ben musu furu grontapu nanga den bakapkin fu den, èn den ben musu meki heri grontapu tron wan paradijs neleki a dyari fu Eden. Ma wán sani nomo den no ben mag du. Yehovah ben warskow den taki efu den ben o trangayesi en, dan dati ben o tyari dede kon gi den. Wi sabi san psa. Wan ogri yeye di no ben lobi libisma nanga Gado, kori Adam nanga Eva fu meki den trangayesi Gado. Adam nanga Eva du san na ogri engel, Satan, ben wani. Fu di den no ben e fertrow a lobi P’pa fu den, meki den sondu. San Yehovah ben taki kon tru. Fu di Adam nanga Eva trangayesi Gado, meki den kon owru èn te fu kba den dede.​—Gen. 1:28, 29; 2:8, 9, 16-18; 3:1-6, 17-19, 24; 5:5.

 4. Fu san ede Yehovah no lobi sondu kwetkweti èn fa a e yepi wi fu kakafutu gi sondu? (Romesma 8:20, 21)

⁴ Yehovah meki sma skrifi a sari tori dati na ini Bijbel so taki wi kan ferstan wan prenspari sani. A tori disi e yepi wi fu ferstan fu san ede Yehovah no lobi sondu kwetkweti. Sondu e pori a matifasi di wi abi nanga Yehovah èn a e tyari dede kon gi wi (Yes. 59:2). Satan no lobi Yehovah nanga libisma kwetkweti. Dati meki a tesi Adam nanga Eva fu du sondu èn a e tesi libisma te nanga a dei fu tide. Sobun, di Adam nanga Eva sondu, dan a kan taki Satan ben denki taki a ben o tapu pasi gi Yehovah fu du san a ben abi na prakseri gi libisma. Ma a no ben e ferstan o furu Yehovah lobi libisma. Noiti Gado kenki a prakseri di a ben abi gi den bakapkin fu Adam nanga Eva. Fu di a lobi libisma, meki a gi den wan howpu wantewante. (Leisi Romesma 8:20, 21.) Yehovah ben sabi taki sma ben o de di ben o lobi en èn di ben o gi yesi na en. A ben sabi tu taki den sma disi ben o suku yepi na en fu man kakafutu gi sondu. Yehovah sorgu taki den sma disi man tron en mati so taki den kan kisi ferlusu fu sondu nanga dede. Fa Yehovah ben o sorgu taki den sani disi psa?

 5. Sortu howpu Yehovah gi libisma wantewante baka di Adam nanga Eva sondu? (Genesis 3:15)

⁵ Leisi Genesis 3:15. Nanga yepi fu a profeititori disi, Yehovah gi libisma howpu. A taki san ben o psa nanga Satan. Gado ben taki dati wan „pikin” ben o gebore di ben o ferlusu libisma. A pkin disi ben o tyari wan kba kon na Satan te fu kba, èn a ben o lusu ala den problema di ben opo kon na ini Eden (1 Yoh. 3:8). Ma a pkin dati ben o pina. Satan ben o gi en mankeri so taki a dede. A sani dati ben o meki Yehovah sari trutru. Ma Yehovah ben sabi taki te fu kba libisma ben o kisi ferlusu fu sondu nanga dede.

SAN SONDU LIBISMA NA INI BIJBEL TEN BEN DU FU PLISI YEHOVAH?

 6. San Abel, Noa, nanga tra getrow futuboi fu Yehovah du fu man tron mati fu en?

⁶ Saf’safri Yehovah meki wi ferstan moro krin fa sondu libisma kan tron mati fu en. Baka di sma opo densrefi na ini Eden, dan Abel, a di fu tu manpkin fu Adam nanga Eva, ben de a fosi libisma di sori taki a ben e bribi na ini Yehovah. Fu di Abel ben lobi Yehovah èn fu di a ben wani tron wan mati fu en, meki a tyari wan ofrandi. Abel ben de wan skapuman, èn dati meki a teki wan tu fu den yongu pkin skapu fu en èn a gi Yehovah den leki ofrandi. San Yehovah du? A „ben e prisiri nanga Abel èn nanga na ofrandi fu en” (Gen. 4:4). Yehovah ben breiti tu nanga  den ofrandi fu tra sma di ben lobi en èn di ben e fertrow en, èn wan fu den sma dati ben de Noa (Gen. 8:20, 21). Fu di Yehovah ben feni den sortu ofrandi dati bun, meki a sori taki libisma kan tron mati fu en te den e du san a feni bun. b

 7. Abraham ben de klarklari fu gi en eigi manpkin leki ofrandi. San wi e leri fu disi?

⁷ Yehovah ben aksi Abraham di ben abi wan tranga bribi, fu du wan sani di ben muilek srefsrefi. A aksi en fu gi en eigi manpkin leki ofrandi. A no de fu taki dati a sani disi no ben makelek gi Abraham. Tòg a gi yesi na Yehovah. Ma di Abraham ben de fu kiri en manpkin, dan Gado tapu en fu no du dati. Na eksempre disi e yepi wi fu kon sabi san Yehovah ben o du na ini a ten di e kon. Yehovah ben o de klarklari fu gi en eigi lobi Manpkin leki ofrandi. Na so furu Yehovah lobi libisma.​—Gen. 22:1-18.

 8. San wi e leri fu den meti-ofrandi di sma ben musu tyari soleki fa a Wet ben e taki? (Lefitikus 4:27-29; 17:11.)

⁸ Di Yehovah gi den Israelsma a Wet, dan a taigi den fu tyari ofrandi so taki den ben kan kisi pardon fu den sondu fu den. (Leisi Lefitikus 4:27-29; 17:11.) Den ofrandi disi ben e prenki wan moro prenspari ofrandi di ben o ferlusu ala libisma fu sondu nanga dede. Gado ben taigi den profeiti fu en fu skrifi fu a pramisi pkin. Den ferklari taki a wan-enkri Manpkin fu Gado, ben o abi fu pina èn dede. Sma ben o srakti en leki wan skapu di sma ben gi leki ofrandi (Yes. 53:1-12). Denki a tori: Yehovah ben o gi en eigi lobi Manpkin leki srakti-ofrandi so taki libisma ben kan kisi ferlusu fu sondu nanga dede. Disi na wan kfalek sani di Yehovah du èn a du disi gi yu sosrefi.

SAN YESUS DU FU FERLUSU SONDU LIBISMA?

 9. San Yohanes a Dopuman ben taki fu Yesus? (Hebrewsma 9:22; 10:1-4, 12).

⁹ Na ini a yari 29, Yohanes a Dopuman si Yesus fu Nasaret èn a taki: „Luku! A Pikin Skapu fu Gado di e puru a sondu fu grontapu!” (Yoh. 1:29). Den wortu disi e sori taki Yesus ben de a pkin di Gado ben pramisi. A ben o gi en libi leki ofrandi. Te fu kba, a pkin disi gebore fu tyari wan kba kon na sondu.​—Leisi Hebrewsma 9:22; 10:1-4, 12.

10. Fa Yesus sori taki a ben „kon fu kari sondari”?

¹⁰ Yesus ben yepi spesrutu den sma di ben e sari fu di den ben du sondu. A gi den wan kari fu tron en bakaman. A ben sabi taki sondu ben de a rutu fu ala den problema fu libisma. Sobun, a ben e yepi man nanga uma di ben e pina fu di den ben du sondu. A ben taki: „Gosontu sma no abi datra fanowdu, ma na siki sma abi datra fanowdu.” A taki moro fara: „Mi no kon fu kari sma di e du san reti, ma mi kon fu kari sondari” (Mat. 9:12, 13). Èn na dati Yesus du. Di wan uma wasi Yesus futu nanga den watra-ai fu en, dan Yesus taki switi nanga en èn a gi en pardon fu den sondu fu en (Luk. 7:37-50). Yesus leri a Samaria uma prenspari tru tori, aladi a ben sabi taki na uma disi ben e libi nanga wan man di no ben de en masra (Yoh. 4:7, 17-19, 25, 26). Boiti dati, Gado gi Yesus a makti srefi fu tyari wan kba kon na sondu nanga dede. Fa Yesus o du dati? A o gi man, uma, nanga pkin di dede wan opobaka.​—Mat. 11:5.

11. Fu san ede sondu libisma ben lobi fu de nanga Yesus?

 ¹¹ Wi kan ferstan fu san ede sma di ben e du sondu ben lobi fu de nanga Yesus. A ben e ferstan fa den ben e firi èn a ben e sori swit’fasi gi den. Den no ben e frede fu taki nanga Yesus (Luk. 15:1, 2). Yesus prèise den sortu sma dati èn a blesi den fu di den ben e bribi na ini en (Luk. 19:1-10). Yesus ben abi sar’ati neleki en P’pa (Yoh. 14:9). A fasi fa Yesus ben e taki nanga sma èn a fasi fa a ben e libi nanga den e leri wi taki Yehovah abi sar’ati, taki a lobi libisma, èn taki a wani yepi ibriwan fu wi fu kakafutu gi sondu. Yesus yepi sondu sma fu kon abi na angri fu kenki den fasi fu den èn fu tron bakaman fu en.​—Luk. 5:27, 28.

12. Fa Yesus ben o dede, soleki fa a ben taigi den disipel fu en?

¹² Yesus ben sabi taki a ben o gi en libi leki wan srakti-ofrandi. Moro leki wán leisi a taigi den bakaman fu en taki sma ben o tori en èn taki den ben o anga en na wan pina-postu (Mat. 17:22; 20:18, 19). A ben sabi taki a srakti-ofrandi fu en ben o puru ala sondu fu grontapu, neleki fa Yohanes nanga den profeiti ben taki. Yesus ben taki tu taki baka te a dede, a ben o „hari ala sortu sma” kon na en (Yoh. 12:32). Yehovah ben o feni den sma bun di ben o bribi na ini Yesus èn di ben o gi yesi na den komando fu en. Te den ben o du dati, dan te fu kba den ben o „kon fri fu sondu” (Rom. 6:14, 18, 22; Yoh. 8:32). Na fu a sani disi ede meki Yesus  no ben frede fu dede na wan ogr’ati fasi so taki wi ben kan kisi ferlusu.​—Yoh. 10:17, 18.

13. Fa Yesus dede, èn san a dede fu en e leri wi fu Yehovah? (Luku a prenki.)

¹³ Wan fu den bun mati fu Yesus tori en. Baka dati, den feanti fu en grabu en, den kosi en, èn den krutu en fu sani di a no ben du. Den gi en dedestrafu èn baka dati den wipi en. Te fu kba den spikri Yesus na wan postu. Yesus tan hordoro aladi di a ben e pina so hebi. Ma a no de fu taki dati a ben hati Yehovah trutru fu si san ben e psa nanga a Manpkin fu en. Yehovah ben abi a makti fu tyari wan kba kon na a pina di en Manpkin ben e pina, ma tòg a no du dati. Efu Yehovah ben lobi en Manpkin so te, dan fu san ede a meki a pina èn dede? Fu di Yehovah lobi wi. Yesus ben taki: „Gado ben lobi grontapu so te, taki a gi en wan-enkri Manpikin, so taki ala sma di e bribi na ini en no sa dede, ma sa kisi têgo libi.”​—Yoh. 3:16.

14. San a srakti-ofrandi fu Yesus e leri yu?

¹⁴ A srakti-ofrandi fu Yesus na a moro bigi beweisi taki Yehovah lobi den bakapkin fu Adam nanga Eva. Na ofrandi disi e sori o furu Yehovah lobi yu. Aladi a ben hati en srefsrefi, tòg a gi en eigi lobi Manpkin leki srakti-ofrandi fu man ferlusu yu fu sondu nanga dede (1 Yoh. 4:9, 10). A wani yepi ibriwan fu wi fu dini en aladi wi na sondu sma ete, èn na ini a ten di e kon a wani tyari wan kba kon na sondu fu ala ten.

15. San wi musu du fu man kisi wini fu a lusu-paiman?

¹⁵ Fu di Gado gi en wan-enkri Manpkin leki lusu-paiman, meki wi kan kisi pardon fu den sondu fu wi. Ma efu wi wani taki Gado gi wi pardon, dan wi musu du wan sani. San na dati? Yohanes a Dopuman nanga Yesus sosrefi taigi wi san wi musu du. Den e taki: „Un musu abi berow, bika a Kownukondre fu hemel kon krosibei” (Mat. 3:1, 2; 4:17). Dati meki wi musu sori berow fu den sondu fu wi efu wi wani tron mati fu Yehovah èn efu wi wani taki a gi wi pardon. Ma san a wani taki fu sori berow, èn fa dati e yepi wi fu plisi Yehovah aladi wi na sondu sma? A tra artikel o piki na aksi disi.