1. San a wani taki fu sori berow?

 TE WI du wan ogri, dan a prenspari taki wi sori berow. Bijbel e taki dati wan sma e sori berow te a e bigin tegu gi den sondu di a du, te a e tapu nanga den sani dati, èn te a e du tranga muiti fu no du den sani dati moro.​—Mat. 3:8; Tori 3:19; 2 Petr. 3:9.

2. Fu san ede wi alamala musu kon sabi san a wani taki fu sori berow? (Nehemia 8:9-11)

² Ibri sma di de na libi musu kon sabi san a wani taki fu sori berow. Fu san ede? Fu di wi alamala e sondu ibri dei. Fu di wi na bakapkin fu Adam nanga Eva, meki ibriwan fu wi kisi sondu èn wi e dede (Rom. 3:23; 5:12). Nowan sma kan taki dati a no e sondu. Srefi sma di ben abi wan tranga bribi, soleki na apostel Paulus, ben musu kakafutu gi sondu (Rom. 7:21-24). Ma disi wani taki dati wi musu firi brokosaka doronomo fu di wi abi sondu? Nôno. Yehovah e sori sar’ati gi wi èn a wani taki wi de koloku. Luku san ben psa nanga den Dyu na ini a ten fu Nehemia. (Leisi Nehemia 8:9-11.) Yehovah no ben wani taki a pipel fu en ben musu sari tumsi fu den sondu di den ben du fosi. A ben wani taki den musu anbegi en nanga prisiri. Yehovah sabi taki te wi e sori berow, dan wi o de koloku. Dati meki a e yepi wi fu sori berow. Efu wi e sori berow fu den sondu fu wi, dan wi kan de seiker taki wi lob’ati P’pa o gi wi pardon.

3. San wi o luku na ini na artikel disi?

³ Meki wi go luku moro fini san a wani taki fu sori berow. Wi o poti prakseri na dri sani. A foswan, na taki wi o luku fa Yehovah ben yepi a pipel fu Israel fu sori berow. Baka dati wi o luku fa Yehovah yepi sma di du sondu fu sori  berow. Leki lasti, wi o luku fa Yesus Krestes ben yepi den disipel fu en fu sori berow.

FA YEHOVAH YEPI A PIPEL FU EN FU SORI BEROW

4. Fa Yehovah yepi a pipel fu Israel fu sori berow?

⁴ Di Yehovah gi den Israelsma den wet fu en, dan den pramisi en taki den ben o gi yesi na en. Efu den ben o hori densrefi na den wet fu en, dan a ben o kibri den èn blesi den. A ben taki fu den wet fu en: „Den komando di mi e taigi unu tide, no muilek tumusi èn den no de tumusi fara fu unu” (Deut. 30:11, 16). Ma efu den Israelsma ben o opo densrefi teige Yehovah, fu eksempre, efu den ben o anbegi tra gado, dan a no ben o blesi den moro èn den ben o pina. Ma dati no ben wani taki dati Yehovah ben o drai baka gi den fu ala ten. Fu taki en leti den ben kan ’drai go baka na Yehovah Gado èn gi yesi na en’ (Deut. 30:1-3, 17-20). Den ben kan sori berow. Efu den ben o du dati, dan Yehovah ben o kon moro krosbei na den èn a ben o blesi den baka.

5. Fa Yehovah sori taki a no ben drai baka gi a pipel fu en? (2 Kownu 17:13, 14)

⁵ A pipel fu Yehovah ben e opo densrefi teige en ibri leisi baka. Boiti taki den ben e du afkodrei, den ben e du tra tegu sani tu. Dati meki den ben e pina. Ma Yehovah tan pruberi fu yepi a pipel fu en so taki den ben kan anbegi en baka. A seni profeiti go ibri leisi baka fu gi a pipel fu en dek’ati fu sori berow èn fu drai kon baka na en.​—Leisi 2 Kownu 17:13, 14.

6. Fa Yehovah gebroiki den profeiti fu leri a pipel fu en fu san ede den ben musu sori berow? (Luku a prenki.)

⁶ Yehovah ben gwenti seni profeiti fu go warskow a pipel fu en èn fu pir’ai gi den. Fu eksempre, Gado ben meki Yeremia taigi a pipel: „Israel, yu drai baka gi mi. Ma grantangi, drai kon baka na mi . . Mi no o luku yu nanga atibron moro, bika mi lobi yu ete . . A no fu ala ten mi ati o bron nanga yu. Ma prakseri den ogri di yu du, bika  na teige yu Gado Yehovah yu sondu” (Yer. 3:12, 13). Yehovah meki Yoèl taigi den: „Drai kon baka na mi nanga un heri ati” (Yoèl 2:12, 13). A meki Yesaya taigi den: „Meki unsrefi kon krin. No meki mi si den ogri sani moro di unu e du. Tapu nanga den ogri di unu e du” (Yes. 1:16-19). Èn Yehovah meki Esekièl aksi den: „Unu denki taki mi e prisiri te wan ogri sma dede? Unu no sabi taki mi e prisiri te na ogri sma tapu nanga den ogri di a e du, so taki a kan tan na libi? Mi no e prisiri kwetikweti te wan sma dede, . . Sobun, tapu nanga den ogri di unu e du, so taki unu kan tan na libi” (Esek. 18:23, 32). Yehovah e prisiri te a e si taki sma e sori berow, fu di a wani taki den tan libi fu têgo. Sobun, Yehovah no e sdon wakti nomo teleki sondu libisma kenki den fasi fu den, fosi a yepi den. Meki wi go luku ete wan tu eksempre.

7. San Yehovah ben wani leri a pipel fu en di a gebroiki a tori fu a profeiti Hosea nanga en wefi?

⁷ Luku san Yehovah ben leri a pipel fu en nanga yepi fu na eksempre fu Gomer, a wefi fu a profeiti Hosea. Baka di Gomer du hurudu, a gwe libi Hosea gi wan tra man. Yu denki taki a no ben o man kenki? Yehovah di sabi san de na ini wan sma ati, taigi Hosea: „Go baka na yu wefi, aladi a abi wan freiri. Yu musu lobi en, awinsi a e du sutadu. Bika na so Yehovah lobi den Israelsma, aladi den e dini tra gado” (Hos. 3:1; Odo 16:2). Hori na prakseri taki Hosea en wefi ben e du hurudu ete. Ma Yehovah taigi Hosea fu gi en pardon èn fu teki en baka leki en wefi. a Yehovah gebroiki na eksempre disi fu sori a pipel fu en taki a no ben drai baka gi den. Aladi den ben e du seryusu sondu, tòg a ben lobi den ete. A tan seni en profeiti fu go yepi den fu sori berow èn fu tyari kenki kon na ini den libi. Na eksempre disi e leri wi taki a Gado di „e ondrosuku sma ati”, o pruberi fu yepi wan sma di e du seryusu sondu ete fu sori berow (Odo 17:3). Meki wi go luku fa Yehovah du dati.

FA YEHOVAH E PRUBERI FU YEPI SMA FU SORI BEROW

8. San Yehovah du fu yepi Kain fu sori berow? (Genesis 4:3-7) (Luku a prenki.)

⁸ Kain ben de a fosi manpkin fu Adam nanga Eva. A ben kisi sondu fu en p’pa nanga m’ma. Boiti dati, Bijbel e taki fu en: „Ensrefi ben e du ogri” (1 Yoh. 3:12). Kande dati e yepi wi fu ferstan fu san ede Yehovah „no ben e prisiri nanga Kain èn nanga na ofrandi fu en”. Na presi taki Kain kenki den fasi fu en, a „kisi bigi atibron èn a swa en fesi”. San Yehovah du? A taki nanga Kain. (Leisi Genesis 4:3-7). Luku taki Yehovah taki switi nanga Kain, èn a taigi en taki a ben o blesi en efu ben o du san bun. Yehovah warskow Kain tu taki na atibron fu en ben kan meki taki a du wan ogri. A sari taki Kain weigri fu arki. A no meki Yehovah yepi en fu sori berow. Di Kain no arki Gado, dan yu denki taki Yehovah besroiti fu no yepi nowan sma moro fu sori berow? Kwetkweti!

9. Fa Yehovah yepi David fu sori berow?

⁹ Yehovah ben lobi Kownu David trutru. A ben taki srefi fu David: „A de wan man di mi lobi èn a o du ala san mi wani” (Tori 13:22). Ma David du wan tu ogri sani, soleki sutadu, èn a kiri wan sma. Soleki fa a Wet fu Moses ben e sori, dan David ben musu dede (Lef. 20:10; Num.  35:31). Ma Yehovah ben wani yepi David fu sori berow. b A seni en profeiti Natan go na a Kownu David, aladi David no ben sori srefsrefi ete taki a ben abi berow. Natan gebroiki wan agersitori fu yepi David fu kon ferstan taki a ben du wan tu seryusu sondu. David kon si taki a sani di a ben du ben hati Yehovah srefsrefi èn dati meki a sori berow (2 Sam. 12:1-14). A skrifi wan psalm di e sori fa a sani di a ben du ben hati en (Ps. 51, luku san skrifi na loktusei fu a psalm). A psalm disi trowstu furu sma di ben du sondu èn a gi den dek’ati fu sori berow. Wi de nanga tangi trutru taki Yehovah yepi David fu sori berow.

10. Fa yu e firi te yu e prakseri taki Yehovah abi pasensi nanga wi èn taki a de klarklari fu gi wi pardon?

¹⁰ Yehovah no lobi nowan enkri sondu (Ps. 5:4, 5). Ma Yehovah lobi wi èn te wi du wan sondu, dan a wani yepi wi. Ala ten a e pruberi fu yepi srefi den moro bigi sondari fu sori berow èn fu tron mati fu en. A de wan trowstu gi wi trutru fu sabi taki Yehovah wani gi wi pardon. Te wi e prakseri fa Yehovah abi pasensi nanga wi èn fa a de klarklari fu gi wi pardon, dan dati e gi wi dek’ati fu tan getrow na en èn fu no draidrai fu sori berow te wi du wan sondu. Meki wi go luku now san Yesus ben leri den disipel fu en.

YESUS BEN LERI DEN DISIPEL FU EN O PRENSPARI A DE FU SORI BEROW

11-12. Fa Yesus yepi den disipel fu en fu kon sabi taki en P’pa de klarklari fu gi sma pardon? (Luku a prenki )

¹¹ Di a ten ben doro taki a Mesias kon na grontapu, dan Yehovah meki Yohanes a Dopuman preiki gi a pipel fu en fu gi den dek’ati fu sori berow. Di Yesus bigin nanga a diniwroko fu en, a leri sma tu o prenspari a de fu sori berow.​—Mat. 3:1, 2; 4:17.

¹² Di Yesus ben de na grontapu, a leri sma taki en P’pa de klarklari fu gi wi pardon te wi sondu. Wán fasi fa a du dati, na taki a ferteri wan moi tori fu wan p’pa nanga en manpkin. A yonguman dati ben  besroiti fu gwe libi oso fu go libi wan yayolibi. Ma „a kisi ensrefi” èn a drai kon baka na oso. San en p’pa du? Yesus ferteri taki a manpkin „ben de fara fu oso ete, di en papa si en. Ne a papa firi sari, a lon go brasa en boi èn a gi en wan switi bosi.” A manpkin ben wani aksi en p’pa efu a ben kan tron wan fu den wrokoman fu en, ma en p’pa ben de klarklari fu gi en pardon. A kari en „a boi fu mi” èn a teki en baka na ini a famiri. A p’pa taki: „A ben lasi, ma mi feni en baka” (Luk. 15:11-32). Di Yesus ben e libi na hemel, dan seiker a ben si furu leisi fa en P’pa ben e firi gi sma di ben sori berow èn fa a ben de klarklari fu gi den pardon. A tori di Yesus ferteri e trowstu wi trutru èn a e sori taki wi P’pa, Yehovah, abi sar’ati trutru.

13-14. San Yesus ben leri na apostel Petrus èn san Petrus leri trawan? (Luku a prenki.)

¹³ Yesus ben leri na apostel Petrus fa Yehovah e gi sma pardon te den sori berow. Petrus ben meki furu fowtu èn Yesus ben de klarklari fu gi en pardon. Wan leisi di Petrus ben taki dri leisi taki a no ben sabi en Masra, dan a ben e hati en srefsrefi taki a ben du a sani dati (Mat. 26:34, 35, 69-75). Ma baka di Yesus kisi wan opobaka, dan a go taki nanga Petrus (Luk. 24:33, 34; 1 Kor. 15:3-5). Yesus ben sabi taki Petrus ben abi berow èn a ben wani gi en a dyaranti taki a ben gi en pardon.​—Luku Markus 16:7.

¹⁴ Fu di Petrus srefi ben sori berow èn fu di a ben ondrofeni fa Gado gi en pardon, meki a ben man ferteri trawan san a ben leri. Petrus ben meki den Dyu di ben de na a Pinksterfesa kon ferstan taki na den ben kiri a Mesias. Ma tòg a gi den a dek’ati disi: „Fu dati ede un musu abi berow èn un musu drai un libi, so taki Yehovah srefi kan figi un sondu puru. Dan a o gi  unu krakti” (Tori 3:14, 15, 17, 19). Na so Petrus sori taki te wan sma abi berow, dan dati o gi en dek’ati fu kenki a fasi fa a e denki èn e tyari ensrefi. A o tapu fu du san no bun, èn a o bigin du san e plisi Gado. Na apostel Petrus ben sori den Dyu disi tu taki Yehovah ben o gi den pardon nanga en heri ati. A de neleki a e figi den sondu fu den puru so taki den no de fu si srefsrefi moro. Èn furu yari baka dati, Petrus gi Kresten a dyaranti disi: „Yehovah . . abi pasensi nanga unu, bika a no wani taki wan sma lasi libi. A wani taki ala sma musu kisi na okasi fu sori berow” (2 Petr. 3:9). A sani disi e trowstu wi leki Kresten trutru te wi du wan sondu, awinsi na seryusu sondu.

15-16. (a) San yepi na apostel Paulus fu sori berow? (1 Timoteyus 1:12-15) (b) San wi o leri na ini a tra artikel?

¹⁵ Saulus fu Tarsus ben du furu ogri. A ben e ferfolgu den bakaman fu Krestes na wan ogr’ati fasi (Tori 7:58–8:3). A kan taki furu Kresten ben denki taki a no ben o kenki noiti, ma Yesus ben sabi taki Saulus ben kan kenki èn sori berow. Yesus nanga en P’pa ben man si den bun fasi fu Saulus. Dati meki Yesus ben taki: ’Mi teki a man disi fu go ferteri den trakondre sma fu a nen fu mi’ (Tori 9:15). Yesus ben du wan wondru srefi fu yepi Saulus fu sori berow (Tori 9:1-9, 17-20). Saulus sori berow èn a tron wan Kresten di sma ben sabi now leki na apostel Paulus. Paulus ben gwenti taki fa a ben de nanga tangi taki Yehovah nanga Yesus sori lobi nanga sar’ati gi en. (Leisi 1 Timoteyus 1:12-15.) Paulus leri den Kresten brada nanga sisa fu en: „Na fu di Gado abi bun-ati, meki a e pruberi fu meki yu abi berow.”​—Rom. 2:4.

¹⁶ Wan leisi, Paulus yere taki a gemeente na ini Korente ben e gi pasi taki wan man di ben du hurudu tan na ini a gemeente. San Paulus taigi den fu du? Den sani di a taigi a gemeente, e sori fa Yehovah e pir’ai gi wi na wan lob’ati fasi èn fu san ede a prenspari fu sori sar’ati gi trawan leki fa en e du dati. Na ini a tra artikel wi o taki moro fini fu a tori dati.