Na ini a brifi di na apostel Paulus ben skrifi gi den Kresten na ini Tesalonika, a ben taki: „Efu wan sma no e du san wi taki na ini a brifi disi, dan un musu luku bun nanga en” (2 Tes. 3:14). Fosi, wi ben taki dati a rai disi ben de gi owruman. Ma efu wan sma e tan sori taki a no e lespeki Bijbel gronprakseri aladi a kisi rai difrenti leisi, dan den owruman kan hori wan lezing fu warskow a gemeente fu luku bun nanga a sma dati. Baka dati, den preikiman ben kan besroiti fu no abi prisiriten nanga a sma dati.

Ma a de fanowdu taki wan kenki kon na ini a fasi fa wi e si a tori disi. A de krin taki a rai di Paulus ben gi abi fu du nanga wan besroiti di ibri Kresten musu teki te dati de fanowdu. Sobun, a no de fanowdu taki den owruman e hori wan lezing fu warskow a gemeente fu luku bun nanga wan spesrutu sma. Fu san ede wan kenki kon na ini a fasi fa wi ben e ferstan 2 Tesalonikasma 3:14? Luku fu san Paulus ben e taki di a gi a gemeente a rai disi.

Paulus ben si taki son sma na ini a gemeente ’no ben e tyari densrefi na wan fasi di fiti’. Den ben e weigri fu gi yesi na den rai di a ben gi den nanga yepi fu Gado Wortu. Di Paulus ben de na ini a gemeente wan pisi ten na fesi, dan a ben taigi den brada nanga sisa: „Efu wan sma no wani wroko, dan a no musu nyan tu.” Ma tòg son Kresten di ben man wroko ben e weigri ete fu wroko fu man sorgu densrefi. Boiti dati, den ben e bemui na ini tra sma tori. Fa den Kresten ben musu libi nanga den sortu sma disi di no ben e tyari densrefi na wan fasi di fiti?​—2 Tes. 3:6, 10-12.

Paulus ben taki: „Un musu luku bun nanga [den].” A Griki wortu e sori taki a gemeente musu luku bun nanga den sortu Kresten disi fu di den no de wan bun eksempre. A rai disi di Paulus ben gi ben de gi a heri gemeente, a no ben de soso gi den owruman (2 Tes. 1:1; 3:6). Disi e sori taki ibri Kresten di si taki wan brada noso wan sisa e trangayesi rai di e kmoto fu Gado Wortu, o besroiti fu „no bumui nanga [a sma dati] moro” fu di a no e tyari ensrefi na wan fasi di fiti.

Ma disi wani taki den musu si a Kresten disi leki wan sma di puru fu a gemeente? Nôno, fu di Paulus ben taki tu: „Tan gi en rai leki wan brada.” Sobun, Kresten brada nanga sisa ben kan bemui ete nanga a sma disi na den konmakandra èn na ini a preikiwroko, ma den no ben o abi prisiriten nanga en. Fu san ede? Paulus ben taki: „So taki a kan firi syen.” Te wi e tapu fu abi prisiriten nanga den brada nanga sisa disi, dan kande den o firi syen fu den sani di den e du èn a kan taki den kenki.​—2 Tes. 3:14, 15.

Fa Kresten na ini a ten disi kan sabi o ten den musu luku bun nanga wan brada noso wan sisa? A fosi sani, na taki wi wani de seiker efu a Kresten disi „no e tyari ensrefi na wan fasi di fiti”, soleki fa Paulus ben taki. Paulus no ben e taki fu den sma di e du sani di wi srefi no feni bun, ma di Bijbel no e krutu. Èn a no ben e taki tu fu den wan di hati den firi fu wi. Na presi fu dati, Paulus ben e taki spesrutu fu den sma di kisi rai fu Gado Wortu, ma tòg e besroiti fu trangayesi den rai dati.

Efu wi e si taki wan brada noso wan sisa e tan trangayesi rai fu Gado Wortu, a dan wi srefi musu besroiti efu wi o abi prisiriten nanga a sma dati. Disi na wan besroiti di wi srefi musu teki, dus wi no abi fu taki fu a tori nanga tra sma di no de na ini wi osofamiri. Ma wi o bemui nanga a sma na den konmakandra fu wi èn na ini a preikiwroko. Te a sma e kenki a denki fu en èn a fasi fa a e tyari ensrefi, dan wi o abi prisiriten baka nanga en.