Te a abi fu du nanga a tori disi, dan ibri Kresten trowpaar musu kon sabi fa a spiraal e wroko èn san Bijbel e taki fu a tori disi. Disi o yepi den fu teki wan bosroiti di no o trobi a konsensi fu den.

Yehovah ben taigi Adam nanga Eva, èn bakaten Noa nanga en famiri: „Meki pikin èn kon furu” (Gen. 1:28; 9:1). Bijbel no e taki dati Kresten musu hori densrefi na a komando disi. Dati meki ibri trowpaar musu bosroiti gi densrefi o ten den o kisi pikin èn efu den o du wan sani fu sorgu taki den no e kisi tumusi furu pikin. Sortu sani den musu hori na prakseri?

Awansi sortu sani Kresten e du fu no kon de nanga bere, a prenspari fu luku san Bijbel e taki fu a tori dati. Dati meki Kresten di no wani kisi pikin no e puru bere. Te wan sma e bosroiti fu puru bere, dan a e du wan sani di no e kruderi nanga Bijbel fu di Bijbel e taki dati wi musu lespeki a libi. Fu taki en leti, wan sma di e puru bere e kiri wan pikin di e gro na ini en bere (Eks. 20:13; 21:22, 23; Ps. 139:16; Yer. 1:5). Ma fa a de te sma e gebroiki wan spiraal?

Na Ingrisitongo Waktitoren fu 15 mei 1979 (bladzijde 30, 31) ben taki fu a tori disi. Na a ten dati, den spiraal di ben de fu kisi na furu presi ben meki fu plastik. Datra ben e poti den spiraal disi na ini a muru fu umasma fu sorgu taki den no ben e kon de nanga bere. Na artikel ben sori taki sma no ben sabi finifini fa den spiraal dati ben e wroko. Furu sabiman ben taki dati den spiraal ben e meki taki skiti fu wan man no ben man doro den eksi fu wan uma fu man boro go na ini wan fu den. Efu dati no ben e pasa, dan wan nyun libi no ben e bigin.

 Ma buweisi ben de taki son leisi skiti ben e boro go na ini wan eksi fu na uma. Son leisi na eksi disi ben e bigin gro dorosei fu a muru, noso a ben e saka go na a muru. Te na eksi ben saka go na ini a muru, dan a spiraal ben kan tapu pasi gi na eksi disi fu go fasi ensrefi na a skin fu a muru èn na so, na eksi no ben o man gro go doro. A sani disi ben o de a srefi leki te wan sma ben o puru a bere. Na artikel ben taki moro fara: „Wan reti-ati Kresten di wani sabi efu a fiti fu gebroiki wan spiraal, musu poti prakseri na den sani disi fu di Bijbel e taki dati a libi santa.”​—Ps. 36:9.

Ma sensi di na artikel dati kon na doro na ini 1979, sabiman nanga datra kon sabi furu nyun sani.

Tu sortu spiraal de fu kisi now. Na a ten fu 1988, wan spiraal di abi kopro ben de fu kisi na furu presi na ini Amerkankondre. Boiti dati, sensi 2001 wan spiraal de fu kisi tu di e lusu wan hormoon. Fa den tu spiraal disi e wroko?

Kopro: Soleki fa wi si kaba, den spiraal e meki en muilek gi skiti fu pasa go na ini a muru fu boro go na ini wan eksi. Boiti dati, a kopro fu den spiraal no bun gi a skiti. A e kiri a skiti. * Wan tra sani, na taki a kopro fu den spiraal e kenki na inisei fu a muru pikinso.

Hormoon: Difrenti sortu spiraal abi a srefi sortu hormoon di de na ini den perki di umasma e dringi fu no kon de nanga bere. Den spiraal disi e lusu wan hormoon na ini a muru. Soleki fa a sori, dan den hormoon disi e tapu pasi gi son uma fu lusu wan eksi ibri mun. Te disi no e pasa, dan wan uma no man kon de nanga bere. Boiti dati, sabiman e denki taki a hormoon na ini den spiraal e kenki na inisei fu a muru pikinso tu. * Wan tra sani di a e du, na taki a e deki a slijm na a mofo fu a muru, so taki skiti no man pasa go na ini a muru.

Soleki fa wi si, dan ala den tu spiraal e kenki na inisei fu a muru pikinso. Ma fa a de te wan eksi e lusu èn skiti e boro go na ini na eksi dati? Kande na eksi e saka go na ini a muru, ma a no man tan fasi na ini fu di na inisei fu a muru kenki pikinso. Ma sabiman e bribi taki a sani disi no e pasa furu, èn a srefi sani kan pasa tu te wan sma e dringi perki fu no kon de nanga bere.

Dati meki wi no kan de seiker efu spiraal di e lusu kopro noso hormoon noiti o gi pasi taki skiti e boro go na ini den eksi fu wan uma. Ondrosuku sori taki a fasi fa den spiraal di kari na ini na artikel disi e wroko e gi umasma a dyaranti taki den no o kon de nanga bere makriki.

Wan Kresten trowpaar di wani gebroiki wan spiraal, kan taki fu a tori disi nanga a datra fu den. A datra kan taigi den sortu spiraal de fu kisi na ini a kontren pe den e tan èn a kan fruteri den tu sortu wini a o tyari kon èn sortu takru bakapisi a kan tyari kon gi a wefi. A trowpaar no musu fruwakti taki wan tra sma, awansi na wan datra srefi, e bosroiti gi den san den musu du. Den no musu gi pasi tu taki tra sma teki a bosroiti disi gi den (Rom. 14:12; Gal. 6:4, 5). Na densrefi musu teki a bosroiti. Den musu sorgu taki Gado feni a bosroiti fu den bun èn den musu abi wan krin konsensi.​—Luku 1 Timoteyus 1:18, 19; 2 Timoteyus 1:3.