Yu man memre san yu leisi na ini den Waktitoren di kon na doro no so langa pasa? We, luku efu yu kan gi piki na tapu den aksi di e kon now:

Fu san ede papa nanga mama di go libi na ini wan tra kondre, musu luku sortu tongo den pikin e frustan moro bun efu den wani yepi den fu kon abi wan tranga bribi?

Nofo tron den pikin e leri a tongo fu a kondre na skoro èn fu tra sma di den e miti. A e tyari wini kon te wan pikin sabi taki moro leki wán tongo. Papa nanga mama musu denki bun san den pikin fu den abi fanowdu trutru fu man go na fesi na ini a tru anbegi. Den musu luku efu den o go na wan gemeente di e taki a tongo fu a kondre pe den kon tan, noso efu a moro bun fu go na wan gemeente pe den e taki a mamatongo fu den. Gi Kresten papa nanga mama, a bribi fu den pikin fu den prenspari moro iniwan tra sani di den srefi ben o wani.​—w17.05, blz. 9-11.

San Yesus ben abi na prakseri di a aksi Petrus: „Yu lobi mi moro den wan disi?” (Yoh. 21:15)

A kan taki Yesus ben taki fu den fisi di ben de na gron krosibei fu den, noso fu a fisiwroko. Baka di Yesus dede, Petrus go du a fisiwroko baka. Kresten musu ondrosuku o prenspari a grontapuwroko fu den de gi den.​—w17.05, blz. 22, 23.

Fu san ede Abraham aksi en wefi fu taigi sma taki den na brada nanga sisa? (Gen. 12:10-13)

Fu taki en leti, Sara ben de wan afu-sisa fu Abraham. Efu Sara ben o fruteri sma taki Abraham na en masra, dan den ben kan kiri Abraham. Efu dati ben pasa, dan Abraham no ben o tron afo fu a bakapikin di Gado ben pramisi en.​—wp17.3, blz. 14, 15.

San Elias Hutter du fu yepi den sma di wani leri Hebrewtongo?

A ben wani meki en moro makriki gi studenti fu kon si a difrenti na mindri den mamawortu na ini Hebrewtongo, nanga den letter di sma gwenti poti na fesisei noso na bakasei fu den wortu na ini Bijbel. A ben druk den mamawortu na ini Hebrewtongo nanga dungru letter èn den letter na fesisei noso na bakasei fu den wortu a druk nanga wan moro lekti kloru. Wi e si a srefi sani disi na ini den futuwortu na ini a Nieuwe-Wereldvertaling van de Heilige Schrift​—met studieverwijzingen.​—wp17.4, blz. 11, 12.

San wan Kresten musu hori na prakseri te a e prakseri fu abi wan gon fu kibri ensrefi teige tra sma?

Wan tu sani di wi musu hori na prakseri: Gi Yehovah, libi na wan santa sani. Yesus no gi den bakaman fu en deki-ati fu suku wan feti-owru fu kibri densrefi (Luk. 22:36, 38). Wi musu naki den feti-owru fu wi kon tron plugu. A libi prenspari moro gudu. Wi e lespeki a konsensi fu trawan èn wi wani de wan bun eksempre gi trawan (2 Kor. 4:2).​—w17.07, blz. 31, 32.

Fu san ede den sani di Mateyus nanga Lukas fruteri fu Yesus en yongu yari e difrenti fu makandra?

Mateyus e taki fu tori di abi fu du nanga Yosef. Fu eksempre a e sori wi san Yosef du di Maria fruteri en taki a ben de nanga bere, san a du di wan engel taigi en taki a musu lowe go na Egepte èn drai go baka na Israel bakaten. Lukas e taki moro furu fu Maria. A e fruteri wi taki Maria go luku Elisabet èn a fruteri tu san a taki di Yesus tan na baka na ini a tempel.​—w17.08, blz. 32.

San na wan tu sani di ben abi krakti tapu a Bijbel?

Baka wan pisi ten furu fu den wortu na ini Bijbel kon owru èn sma no ben e frustan den so bun moro. A politiek situwâsi na ini son kontren ben abi krakti tapu a tongo di furu sma ben e taki. Sma ben e gens den wan di ben wani vertaal Bijbel.​—w17.09, blz. 19-21.

Wi abi wan engel di e kibri wi?

Nôno. Wan leisi Yesus ben taki dati den engel fu den disipel fu en e si Gado (Mat. 18:10). Yesus no e taki dati ibri sma abi wan engel di e kibri en. Ma a ben wani sori taki den engel e poti prakseri na ibriwan fu den disipel fu en.​—wp17.5, blz. 5.

San na a moro prenspari lobi di de?

A moro prenspari lobi di de e kruderi nanga den leri fu Bijbel. A lobi disi na agape-lobi. Te wan sma abi a lobi disi gi trawan, dan a kan taki a e firi gi a sma dati. Ma moro furu a lobi disi e meki taki wi de klariklari fu du sani fu a bun fu trawan.​—w17.10, blz. 7.