Na ini 2 Korentesma 12:2, 3, Paulus e taki fu wan man di Masra „tyari go na a di fu dri hemel”. Suma na a man dati? Di Paulus skrifi a gemeente na ini Korente, a sori den krin taki Gado ben teki en leki apostel (2 Kor. 11:5, 23). Baka dati a taki fu ’fisyun di a kisi fu Masra èn fu sani di Masra tyari kon na krin’ gi en. Paulus no e taki fu nowan tra brada na ini a pisi disi. Sobun, wi kan taki dati na en na a man di a e taki fu en.​—2 Kor. 12:1, 5.

Na Paulus na a man di Masra „tyari go na a di fu dri hemel” èn „na ini a paradijs” (2 Kor. 12:2-4). Paulus ben taki fu sani di Masra „tyari kon na krin” gi en. Sobun, Masra fruteri en fu sani di ben o pasa na ini a ten di e kon.

San na „a di fu dri hemel” di Paulus si?

Na ini Bijbel, a wortu „hemel” kan abi fu du nanga a trutru hemel noso a loktu (Gen. 11:4; 27:28; Mat. 6:26). Ma „hemel” wani taki tra sani tu. Son leisi a abi fu du nanga libisma tirimakti (Dan. 4:20-22). Noso a kan abi fu du nanga a tiri fu Gado, soleki a Kownukondre fu en.​—Openb. 21:1.

Paulus si „a di fu dri hemel”. San disi wani taki? Son leisi Bijbel e taki dri leisi fu wan sani fu sori o prenspari a sani de noso o seryusu a de (Yes. 6:3; Esek. 21:27; Openb. 4:8). A kan taki di Paulus taki fu „a di fu dri hemel”, a ben e taki fu wan regering di bun moro ala trawan. Dati na a Mesias Kownukondre pe Yesus Krestes e tiri leki Kownu makandra nanga den 144.000 salfuwan. (Luku A Waktitoren fu 15 oktober 2004, blz. 8 par. 5.) Soleki fa na apostel Petrus skrifi, dan wi e fruwakti wan „nyun hemel” di Gado pramisi wi.​—2 Petr. 3:13.

San na a „paradijs” di Paulus si?

A wortu „paradijs” wani taki difrenti sani tu: (1) A trutru paradijs di o kon dyonsro na grontapu. (2) A freide di Gado o gi en pipel na ini a nyun grontapu èn den tra moi blesi di den o kisi. (3) A moi fasi fa sani e waka na hemel na ini „a paradijs fu Gado” di kari na ini Openbaring 2:7.​—Luku A Waktitoren fu 15 yuli 2015, blz. 8 par. 8.

A kan taki Paulus ben e taki fu ala den dri sani disi na ini 2 Korentesma 12:4.

San wi leri:

Soleki fa a sori, dan „a di fu dri hemel” di kari na ini 2 Korentesma 12:2 na a Mesias Kownukondre pe Yesus Krestes e tiri makandra nanga den 144.000 salfuwan, sobun a „nyun hemel”.​—2 Petr. 3:13.

A e kari en „a di fu dri hemel” fu di a Kownukondre bun moro ala tra regering.

Soleki fa a sori, dan a „paradijs” pe Masra tyari Paulus go na ini a fisyun na: (1) A trutru paradijs di o kon dyonsro na grontapu. (2) A freide di Gado o gi en pipel na ini a paradijs di e kon èn den tra moi blesi di den o kisi. (3) „A paradijs fu Gado” na ini hemel di o de na a srefi ten te a nyun grontapu o de.

Sobun, a nyun grontapu makandra nanga a nyun hemel, o de wan nyun seti. A seti disi na a Kownukondre di o tiri na ini hemel èn den reti-ati sma di o dini Yehovah na ini a paradijs na grontapu.