Na ini a tori fu Deuteronomium 22:25-27 a de krin taki a man du wan ogri. Ma a wet disi ben poti moro prakseri na a uma di no ben du wan ogri. Meki wi luku a tekst moro fini.

Den vers na fesi e taki fu wan man di ben abi seks nanga wan uma di meki mofo fu trow. Ma a sani disi pasa ’na ini a foto’. A man disi ben du hurudu fu di a sribi nanga wan uma di ben meki mofo fu trow. Na ini a ten dati sma ben si so wan uma leki wan uma di trow. Ma fu san ede a wet ben taki dati na uma dati ben du hurudu tu? Fu di „a no bari na ini a foto”. Efu a ben bari, dan sma ben o yere èn den ben o kon yepi en. Ma a no bari. Disi e sori taki a ben wani abi seks nanga a man. Dati meki den ala tu ben musu dede.​—Deut. 22:23, 24.

Ma na ini Deuteronomium 22:25-27 a Wet e taki fu wan tra situwâsi: „Ma efu na dorosei fu a foto, wan man grabu wan uma di abi mofo fu trow, èn a didon nanga en, dan a man di didon nanga na uma musu dede. Un musu kiri en wawan. Ma un no musu du noti nanga na uma. A no du wan sondu di ben o meki taki unu musu kiri en. A sani disi di a man du, de a srefi leki te wan man go feti nanga wan trawan èn a kiri en. A man grabu na uma na dorosei fu a foto. Na uma di ben abi mofo fu trow ben e bari, ma nowan sma ben de drape fu yepi en.”

Na ini a situwâsi disi den krutuman ben bribi taki na uma no du wan ogri. Fu san ede? Fu di a „ben e bari, ma nowan sma ben de drape fu yepi en”. Sobun, na uma disi no ben du hurudu. Ma a man ben du hurudu. A ben ’grabu na uma di abi mofo fu trow, èn a didon nanga en’.

Sobun, a wet disi e sori taki na uma no du wan ogri. Ma a e taki dati a man ben du hurudu fu di a ben dwengi na uma fu abi seks nanga en. Wi de seiker taki den krutuman ben ondrosuku den sortu tori disi finifini èn den ben gebroiki den wet fu Gado fu teki bun bosroiti.​—Deut. 13:14; 17:4; Eks. 20:14.