1-2. Soleki fa na ondrofenitori fu Angelito e sori, dan san ibriwan fu wi musu du?

YU PAPA nanga mama na Yehovah Kotoigi? Efu dati de so, dan yu musu hori na prakseri taki yu no o de wan mati fu Yehovah, soso fu di yu papa nanga mama na mati fu en. Awinsi wi papa nanga mama e dini Yehovah, toku wisrefi musu du muiti fu tron wan mati fu en.

² Luku na eksempre fu wan brada di nen Angelito. En heri famiri na Yehovah Kotoigi. Ma di a ben moro yongu a no ben firi leki en nanga Gado na mati. A e taki: „Mi ben dini Yehovah fu di mi ben wani du san mi famiri e du.” Ma Angelito bosroiti fu meki moro ten fu leisi Gado Wortu èn fu prakseri fu den sani di a leisi. A ben begi moro tu. San ben de a bakapisi? Angelito e taki: „Mi leri taki a wan-enkri fasi fa mi kan tron wan mati fu mi Papa Yehovah, na te misrefi e meki muiti fu kon sabi en.” Na ondrofenitori fu Angelito e meki wi prakseri den aksi disi: O ten wi kan taki dati wan sma sabi Yehovah bun? Fa wi kan kon sabi Yehovah moro bun?

3. O ten wi kan taki dati wan sma sabi Yehovah bun?

³ Kande wi e denki taki wi sabi Yehovah fu di wi sabi a nen fu en èn fu di wi sabi wan tu fu den sani di a taki noso du. Ma dati no wani taki dati wi sabi Yehovah bun. Efu wi wani kon sabi Yehovah bun wi musu meki ten fu  leri moro fu en nanga den moi fasi di a abi. A sani disi o yepi wi fu frustan fu san ede a e taki son sani èn fu san ede a e du son sani. Na so wi o kon sabi efu Yehovah lobi a fasi fa wi e denki èn efu a lobi den sani di wi e du. Te wi sabi san na a wani fu Yehovah, dan wi musu du en.

4. Fu sortu sani wi kan de seiker te wi e luku den eksempre fu Moses nanga Kownu David?

⁴ Kande son sma e spotu wi fu di wi wani dini Yehovah èn kande den e gens wi te wi e bigin go na den konmakandra. Ma efu wi e frutrow tapu Yehovah, dan noiti a o gowe libi wi. Te wi e frutrow tapu Yehovah, dan wi o man de mati nanga en wi heri libi langa. A sani disi kan? Iya! Den eksempre fu Moses nanga Kownu David e sori taki sondusma kan de mati fu Yehovah den heri libi langa. Te wi o luku san den du, dan wi o kisi piki tapu den tu aksi disi: Fa den kon sabi Yehovah? San wi kan leri fu na eksempre fu den?

5. Sortu bosroiti Moses teki?

⁵ Moses bosroiti fu dini Gado. Di Moses ben abi sowan 40 yari a bigin moksi nanga Gado pipel, den Israelsma. A no ben wani taki sma kari en „a manpikin fu na umapikin fu a kownu fu Egepte” (Hebr. 11:24). Moses ben kan abi wan hei posisi na ini Egepte. Ma di a teki a sei fu den Israelsma, di ben de srafu na ini Egepte, a ben sabi taki Farao ati ben o bron nanga en. Farao ben de wan makti kownu èn den Egeptesma ben si en leki wan gado. Moses ben abi wan tranga bribi trutru! Moses ben frutrow tapu Yehovah. Disi ben yepi en fu de wan bun mati fu Yehovah en heri libi langa.​—Odo 3:5.

6. San wi kan leri fu na eksempre fu Moses?

⁶ San na eksempre fu Moses e leri wi? Neleki Moses, wi alamala musu teki wan bosroiti: Wi musu bosroiti efu wi o dini Gado èn moksi nanga en pipel. Kande wi o abi fu libi sani na baka te wi bigin dini Gado èn kande den sma di no sabi Yehovah o bigin gens wi. Ma efu wi e frutrow tapu wi hemel Papa, wi kan de seiker taki a o horibaka gi wi.

7-8. San Moses ben leri fu Yehovah?

⁷ Moses ben leri moro fu den fasi fu Yehovah èn a ben tan du a wani fu en. Fu eksempre, di Yehovah aksi Moses fu tron fesiman fu den Israelsma èn fu tyari den komoto na ini Egepte, a ben frede èn a taigi Yehovah omeni leisi taki a no o man du a wroko. Gado sori taki a ben abi sari-ati nanga Moses èn a yepi en (Eks. 4:10-16). A bakapisi ben de taki Moses no ben frede fu tyari den boskopu fu Yehovah gi Farao. Baka dati Moses si a makti fu Yehovah di a frulusu den Israelsma èn a kiri Farao nanga a legre fu en na ini a Redi Se.​—Eks. 14:26-31; Ps. 136:15.

⁸ Baka di Moses tyari den Israelsma komoto na ini Egepte, den ben krutukrutu ibri tron baka. Toku Moses si taki Yehovah ben abi furu pasensi nanga a pipel fu en di a ben puru na ini katibo (Ps. 78:40-43). Moses ben si tu o furu sakafasi Yehovah abi, di a kenki prakseri èn a no pori den Israelsma fu di Moses ben aksi en dati.​—Eks. 32:9-14.

9. Fa Hebrewsma 11:27 e sori taki Yehovah nanga Moses ben de bun mati?

 ⁹ Baka di den Israelsma komoto na ini Egepte, Moses kon tron so wan bun mati fu Yehovah taki a ben de neleki a ben si en hemel Papa. (Leisi Hebrewsma 11:27.) Bijbel e sori taki Moses nanga Yehovah ben de bun mati trutru. Na ini Eksodes 33:11 skrifi: „Yehovah ben e taki langalanga nanga Moses, neleki fa wan sma e taki nanga wan mati fu en.”

10. San wi musu du efu wi wani sabi Yehovah bun?

¹⁰ San disi e leri wi? Efu wi wani sabi Yehovah bun, dan wi no musu kon sabi den fasi fu en nomo, ma wi musu du a wani fu en. Na ini a ten disi Yehovah wani taki „ala sortu sma musu kisi frulusu èn taki den musu kon sabi a tru leri finifini” (1 Tim. 2:3, 4). Wan fasi fa wi e du a wani fu Yehovah na te wi e leri trawan moro fu en.

11. Fa wi e kon sabi Yehovah moro bun te wi e leri trawan sani fu en?

¹¹ Nofo tron a de so taki te wi e leri trawan sani fu Yehovah, wisrefi e kon sabi en moro bun. Fu eksempre, wi e si taki Yehovah abi sari-ati fu di a e yepi wi fu feni den sma di wani tron en mati (Yoh. 6:44; Tori 13:48). Wi e si taki Gado Wortu abi krakti fu di a e yepi den Bijbelstudie fu tapu nanga takru gwenti èn fu kenki (Kol. 3:9, 10). Èn wi e si taki Yehovah abi pasensi nanga sma fu di a e gi den furu okasi fu kon sabi en.​—Rom. 10:13-15.

12. Soleki fa Eksodes 33:13 e sori, dan san Moses ben aksi Yehovah èn fu san ede a du dati?

¹² Moses ben de nanga tangi taki a ben de wan mati fu Yehovah. Yehovah ben gi Moses a krakti fu du wondru. Sobun, Moses ben sabi Yehovah bun. Ma toku a ben aksi Yehovah fu yepi en fu kon sabi en moro bun. (Leisi Eksodes 33:13.) Aladi Moses ben pasa 80 yari kaba di a aksi Yehovah a sani disi, toku a ben sabi taki a ben musu leri furu ete fu en lobi-ati hemel Papa.

13. San na wan fasi fa wi e sori taki wi e warderi a matifasi di wi abi nanga Yehovah?

¹³ San disi e leri wi? Awinsi o langa wi e dini Yehovah kaba, wi musu tan warderi a matifasi di wi abi nanga en. Wan fasi fa wi kan sori dati na te wi e begi.

14. Fa begi e yepi wi fu kon sabi Gado moro bun?

¹⁴ Efu yu wani de wan bun mati fu wan sma, dan yu nanga en musu abi a gwenti fu taki nanga makandra. Dati meki a prenspari taki yu begi furu èn taki yu no frede fu taigi Yehovah fa yu e firi èn fa yu e denki (Ef. 6:18). Krista di e libi na ini Torkukondre e taki: „Ibri leisi te mi e taigi Yehovah fa mi e firi èn mi e si fa a e yepi mi, mi e kon lobi Yehovah moro èn mi e frutrow en moro. Te mi e si taki Yehovah e piki den begi fu mi, dan dati e yepi mi fu si Yehovah leki wan Papa nanga wan Mati.”

15. San Yehovah ben taki fu Kownu David?

¹⁵ Di Kownu David gebore, en papa nanga mama èn ala tra sma na en lontu ben dini Yehovah. Ma David no ben dini Yehovah, soso fu di en famiri ben du dati. Ensrefi meki muiti fu tron wan mati fu Yehovah èn Yehovah ben lobi en. Yehovah e taki na ini Bijbel taki David na ’wan man di a ben lobi’ (Tori 13:22). Fa David tron so wan bun mati fu Yehovah?

16. San David ben leri fu Yehovah te a ben luku den sani di a meki?

 ¹⁶ David kon sabi Yehovah di a prakseri den sani di a meki. Di David ben moro yongu a ben de furu na dorosei fu di a ben sorgu den skapu fu en papa. Kande na a ten dati a bigin denki dipi fu den sani di Yehovah meki. Fu eksempre, te David ben luku go na loktu te neti, a ben si dusundusun stari. Ma a no ben si den stari wawan, a ben si den moi fasi fu a sma di meki den. Dati meki a ben skrifi: „Hemel e taki fu a glori fu Gado. A loktu e fruteri fu ala den sani di en anu meki” (Ps. 19:1, 2). Te David ben prakseri a kefalek fasi fa libisma meki, dan a ben si a koni fu Yehovah (Ps. 139:14). David ben kon si taki noiti a ben o man frustan ala den sani di Yehovah meki.​—Ps. 139:6.

17. San wi kan leri te wi e prakseri den sani di Yehovah meki?

¹⁷ San disi e leri wi? Wi musu teki ten fu luku den moi sani di Yehovah meki. Prakseri san den bon, den bromki, den meti nanga den sma e leri yu fu Yehovah. Te yu e du dati, dan ibri dei yu o leri moro fu yu lobi-ati Papa (Rom. 1:20). Èn ibri dei yu o kon lobi en moro.

18. Te wi luku Psalm 18, dan san David ben sabi?

¹⁸ David ben sabi taki na Yehovah ben yepi en. Fu eksempre, di David ben kiri wan lew nanga wan beer fu kibri den skapu fu en papa, dan a ben sabi taki na Yehovah ben gi en a krakti fu du dati. Di a kiri a bigiskin man Goliat, a ben si taki na Yehovah ben yepi en (1 Sam. 17:37). Èn di a ben lowe gi Kownu Saul di ben dyarusu na en tapu, a ben frustan taki na Yehovah ben kibri en (Ps. 18, biginwortu). Efu David ben abi heimemre, dan a ben o denki taki na ensrefi ben man du den sani disi. Ma a ben abi sakafasi èn a ben sabi taki na Yehovah ben yepi en.​—Ps. 138:6.

19. San wi kan leri fu na eksempre fu David?

¹⁹ San disi e leri wi? Wi no musu aksi Yehovah fu yepi wi nomo. Wi musu man si tu o ten a e yepi wi èn fa a e du dati. Efu wi abi sakafasi, dan wi o frustan taki wi no man du ala sani èn taki Yehovah e yepi wi fu du den sani di wi no man. Ibri leisi te Yehovah e yepi wi, wi matifasi nanga en e kon moro tranga. Isaac, wan brada fu Fidyi di e dini Yehovah omeni yari kaba, ondrofeni taki a sani disi tru. A e taki: „Te mi e luku fa mi libi waka, dan mi e si fa Yehovah yepi mi sensi a ten di mi bigin studeri Bijbel teleki now. A bakapisi na taki mi nanga Yehovah tron moro bun mati.”

20. Fu san ede David ben de wan bun mati fu Yehovah èn san wi kan leri fu na eksempre fu en?

²⁰ David ben meki muiti fu abi den srefi fasi leki Yehovah. Yehovah meki wi na so wan fasi taki wi kan sori den srefi fasi leki en (Gen. 1:26). O moro wi e leri fu den moi fasi fu Yehovah, o moro wi o man sori den fasi fu en. Fu di David ben sabi en hemel Papa bun, meki a ben man sori den fasi fu en èn a ben libi bun nanga trawan. Luku wan eksempre. Aladi David ben sondu teige Yehovah di a du hurudu nanga Batseiba èn a meki sma kiri a masra fu en, toku Yehovah sori sari-ati gi David (2 Sam. 11:1-4, 15). Yehovah du disi fu di David ben teki na eksempre fu en èn a ben sori sari-ati gi tra sma. Fu di David ben de so wan bun mati fu Yehovah, meki den Israelsma  ben lobi en èn Yehovah ben si en leki wan bun eksempre gi den tra kownu.​—1 Kow. 15:11; 2 Kow. 14:1-3.

21. Soleki fa Efeisesma 4:24 nanga 5:1 e sori, dan san o de a bakapisi te wi e „teki na eksempre fu Gado”?

²¹ San disi e leri wi? A e leri wi taki wi musu „teki na eksempre fu Gado”. Te wi e du dati, wi o feni wini èn wi o kon sabi Yehovah moro bun. Te wi e kon abi den srefi fasi leki Yehovah, dan wi e sori taki wi na pikin fu Gado.​—Leisi Efeisesma 4:24; 5:1.

22-23. San o pasa te wi e du den sani di wi e leri fu Yehovah?

²² Soleki fa wi si, dan wi kan kon sabi Yehovah moro bun te wi e luku den sani di a meki èn te wi e studeri en Wortu. Bijbel lai bun eksempre fu anbegiman fu Yehovah, soleki Moses nanga David. Wi kan leri furu fu den. Sobun, Yehovah gi wi ala san wi abi fanowdu fu kon sabi en. Now wi musu du ala muiti fu leri so furu leki wi man fu en.

²³ Noiti wi o kaba leri sani fu Yehovah (Preik. 3:11). Dati meki a no prenspari o furu wi sabi fu en, ma san prenspari na san wi e du nanga den sani di wi e leri fu en. Efu wi e meki muiti fu du san wi e leri èn fu teki na eksempre fu wi lobi-ati Papa, dan a o kon moro krosibei na wi (Yak. 4:8). Na ini en Wortu a e gi wi a dyaranti taki noiti a o gowe libi den wan di e meki muiti fu kon sabi en.