YU NA wan sma di e warderi den sani di trawan e du gi yu? Na aksi disi prenspari gi wi alamala. Bijbel ben taki dati na ini a ten disi, furu sma „no o de nanga tangi” (2 Tim. 3:2). Kande yu miti sma di e fruwakti taki trawan musu du sani gi den. Den sma disi e feni taki den no abi fu de nanga tangi gi den sani di trawan e du gi den. A no de fu taki dati yu no wani den sortu sma dati leki mati.

Bijbel e sori taki den anbegiman fu Yehovah musu de tra fasi. A e taki: „Sori taki unu de nanga tangi” (Kol. 3:15). Fu taki en leti, a bun gi wi fu de nanga tangi. Meki wi go luku fu san ede dati de so.

Wan prenspari reide fu san ede a bun fu de nanga tangi, na taki a e yepi wi fu firi bun. Te yu e taki wan sma tangi gi den sani di a du gi yu, dan yu e firi bun èn a sma srefi e firi bun tu. Fu san ede unu ala tu e firi bun? Prakseri a sani disi: Te wan sma de klariklari fu du sani gi yu, dan dati e sori yu taki yu warti gi a sma. Yu e si taki a lobi yu. A sani dati e meki yu firi bun. Na so a ben musu fu de nanga Rut. Boas ben de klariklari fu du bun gi Rut. Di Rut si taki Boas ben broko en ede nanga en, dan dati ben meki a firi bun.​—Rut 2:10-13.

A prenspari taki wi sori taki wi de nanga tangi gi den sani di Gado du gi wi (1 Tes. 5:18). A no de fu taki dati son leisi yu e prakseri den furu bun sani di Yehovah du èn di a e tan du (Deut. 8:17, 18; Tori 14:17). Ma yu no musu prakseri den sani disi eife nomo. Yu musu meki ten fu denki dipi fu den furu blesi di Gado e gi yu, nanga den lobiwan fu yu. Te yu e du dati, dan yu o abi moro warderi gi yu Mekiman èn yu o abi a frutrow taki a lobi yu èn taki a e warderi den sani di yu e du.​—1 Yoh. 4:9.

Ma boiti taki yu e meki ten fu prakseri den blesi di yu e kisi fu Yehovah, yu musu sori Yehovah taki yu de nanga tangi (Ps. 100:4, 5). Ondrosukuman kon si taki sma de moro koloku te den e sori taki den de nanga tangi gi den sani di trawan du gi den.

Wan tra reide fu san ede a bun fu sori taki yu de nanga tangi, na taki a e yepi yu fu tron moro bun mati nanga sma. Wi alamala wani taki sma e warderi wi. Te yu e taki wan sma tangi gi a bun di a du gi yu, dan unu o tron moro bun mati (Rom. 16:3, 4). Boiti dati, sma di e warderi den sani di trawan du gi den de klariklari fu yepi tra sma. Fu di den e si den bun di sma e du gi den, meki densrefi wani du bun gi trawan. Iya, wi o de koloku te wi e yepi trawan. Prakseri san Yesus ben taki: „Wan sma sa de moro koloku te a e gi sani, leki te a e kisi sani.”​—Tori 20:35.

Robert Emmons di e wroko na wan universiteit na ini Kalifornia ben teki fesi gi wan grupu di ben ondrosuku a tori disi. A ben taki: „Te wi e frustan taki wi abi makandra fanowdu, dan dati o yepi wi fu de nanga tangi. Son leisi wi e gi sma sani, ma tra leisi wi e kisi sani fu sma.” Fu man tan na libi èn fu man de koloku, wi abi tra sma fanowdu. Fu eksempre, na tra sma e prani den sani di wi e nyan èn na tra sma e yepi wi te wi siki (1 Kor. 12:21). Dati meki wi musu warderi den sani di trawan e du gi wi. Yu abi a gwenti fu taki trawan tangi gi den sani di den e du gi yu?

Wan tra reide fu san ede a bun fu de nanga tangi, na taki a e yepi yu fu poti moro prakseri na den bun sani fu a libi na presi fu prakseri soso den problema fu yu. O moro yu de nanga tangi, o moro yu o si den bun sani di e pasa. Efu yu abi ai gi den bun sani na ini yu libi èn yu de nanga tangi, dan yu o man du san na apostel Paulus ben taki: „Prisiri ala ten fu Masra ede.”​—Fil. 4:4.

Nofo tron wan sma di de nanga tangi no e denki ala ten taki sani no o waka bun. Te sma de nanga tangi, dan a no o pasa makelek taki den e dyarusu, taki den e firi sari noso taki den e atibron. Wan tra sani, na taki a kan yepi sma fu no feti baka gudu. Sma di de nanga tangi e warderi den sani di den abi èn den no e feti fu kon abi moro.​—Fil. 4:12.

Yu sabi taki Satan wani taki den problema di yu e kisi na ini den lasti dei disi musu meki yu lasi-ati. A ben o lobi en efu yu ben o de wan sma di e krutukrutu fu ala sani. Ma efu yu de so, dan a o moro muilek gi yu fu preiki a bun nyunsu. Fu taki en leti, te yu de nanga tangi, dan dati e yepi yu fu kon abi den fasi di a yeye e meki sma kisi. Fu eksempre, yu o prisiri te yu e si den bun sani di Gado gi yu èn yu o abi wan tranga bribi na ini den sani di a pramisi wi gi a ten di e kon.​—Gal. 5:22, 23.

Leki wan Kotoigi, yu e agri nanga den sani di taki na ini na artikel disi. Ma yu sabi tu taki a no makelek fu de nanga tangi ala ten. Toku yu no abi fu lasi-ati. Yu man de wan sma di de nanga tangi gi den bun sani fu a libi. San kan yepi yu? Teki ten ibri dei fu prakseri den bun sani di yu e kisi. O moro yu e du a sani dati, o moro yu o de nanga tangi. A o yepi yu fu de koloku, na presi taki yu e poti prakseri nomo na den problema fu a libi. Prakseri den bun sani di Gado nanga tra sma e du gi yu fu meki yu prisiri. Kande yu kan skrifi den sani disi na ini wan buku. Ibri dei yu kan skrifi tu noso dri sani di wan sma du gi yu èn di meki yu firi bun.

Ondrosukuman kon si taki te sma abi a gwenti fu taki trawan tangi, dan dati kan kenki a fasi fa a frustan e wroko. A e meki en moro makelek gi den fu firi koloku. Sobun, wan sma di de nanga tangi, na wan koloku sma. Dati meki yu musu teri den blesi fu yu, yu musu prisiri nanga den bun sani di e pasa na ini yu libi èn yu musu sori taki yu de nanga tangi ala ten. Na presi fu denki taki den bun sani na ini yu libi kon fu den srefi, yu musu „taki Yehovah tangi bika a bun”. Iya, yu musu ’sori taki yu de nanga tangi’.​—1 Kron. 16:34; Kol. 3:15.