1. Fa furu sma e si wroko?

FA DEN sma na ini a kondre fu yu e si wroko? Na ini furu kondre sma e wroko moro tranga èn moro langa. Sma di e wroko tumusi furu no abi ten fu rostu, fu du sani nanga den osofamiri noso fu leri sani fu Gado (Preik. 2:23). Na a tra sei yu abi sma di no lobi wroko srefisrefi èn den e suku ala sortu reide fu no wroko.​—Odo 26:13, 14.

2-3. Fa Yehovah nanga Yesus e si wroko?

² Soleki fa wi si, furu sma na ini grontapu e wroko tumusi furu èn trawan no lobi wroko. Meki wi go luku fa Yehovah nanga Yesus e si wroko. Wi sabi taki Yehovah lobi wroko. Yesus ben taki fu en Papa: „Mi Tata tan wroko teleki now èn mi srefi e tan wroko tu” (Yoh. 5:17). Prakseri den someni engel, stari nanga planeiti di Gado meki. Prakseri den furu moi sani tu di Gado meki na grontapu. A psalm skrifiman ben abi leti di a taki: „Yehovah, den sani di yu meki furu srefisrefi. Yu meki den alamala na wan tumusi koni fasi. Grontapu lai nanga den sani di yu meki.”​—Ps. 104:24.

³ Yesus de neleki en Papa. A ben yepi Gado „sreka hemel”. A ben wroko makandra nanga Yehovah „leki wan tumusi bun wrokoman” (Odo 8:27-31). Bakaten di Yesus ben de na grontapu a ben wroko tranga tu. A wroko di Yehovah ben gi en ben de leki nyanyan gi en. Ala den sani di a ben e du ben sori taki na Gado seni en kon na grontapu.​—Yoh. 4:34; 5:36; 14:10.

4. Yehovah nanga Yesus e rostu?

 ⁴ Yu denki taki na eksempre fu Yehovah nanga Yesus e sori taki a no prenspari fu rostu? Nôno. Bijbel e taki dati baka di Yehovah meki hemel nanga grontapu, „a tapu fu wroko èn a go rostu” (Eks. 31:17). Ma Yehovah no e weri èn dati meki a no abi fu rostu. Sobun, Yehovah no tapu fu meki sani fu di a ben weri. A ben wani prisiri nanga den sani di a meki. Èn aladi Yesus ben wroko tranga di a ben de na grontapu, toku a ben meki ten fu rostu èn fu go nyan nanga den mati fu en.​—Mat. 14:13; Luk. 7:34.

5. San kan muilek gi anbegiman fu Gado?

⁵ Bijbel e gi a pipel fu Gado a deki-ati fu lobi wroko. Den anbegiman fu Gado musu wroko tranga, den no musu lesi (Odo 15:19). Kande yu e wroko fu sorgu yu osofamiri. Boiti dati, ala den disipel fu Krestes abi a frantwortu fu preiki a bun nyunsu. Toku yu musu rostu nofo tu. A muilek gi yu son leisi fu meki ten fu du yu wroko, fu du a preikiwroko èn fu rostu? Fa wi o sabi o furu wi musu wroko èn o furu wi musu rostu?

6. Fa Markus 6:30-34 e sori fa Yesus ben si wroko nanga rostu?

⁶ A prenspari fu si wroko na a yoisti fasi. Kownu Salomo ben skrifi: „Gi ala sani wan ten de.” A ben taki dati wan ten de fu prani gron, fu bow, fu krei, fu lafu, fu dansi èn fu du tra sani (Preik. 3:1-8). A de krin taki wroko nanga rostu na tu prenspari sani na ini a libi. Yesus ben wroko tranga, ma a ben meki ten tu fu rostu. Wan leisi den apostel ben preiki heri dei, ma sma ben tan kon na den. Dati meki „den disipel no ben abi ten fu nyan” srefi. Yesus taigi den: „Kon meki wi wawan go na wan presi fu kan rostu pikinso.” (Leisi Markus 6:30-34.) Aladi en nanga den disipel no ben man rostu leki fa den wani, toku Yesus ben sabi taki den ben abi rostu fanowdu.

7. Fa den sani di wi o leri fu a Sabat-dei kan yepi wi?

⁷ A bun fu rostu èn son leisi a bun fu du wan tra sani. Wi kan si dati te wi e luku a Sabat-dei di a pipel fu Gado ben musu hori ala wiki. Wi no abi fu hori wisrefi na a Wet fu Moses, ma wi kan leri furu fu a Sabat-dei. Den sani di wi o leri o yepi wi fu si efu wi abi a yoisti denki fu wroko nanga rostu.

8. Soleki fa Eksodes 31:12-15 e sori, dan fu san ede Gado taigi den Israelsma fu hori Sabat-dei?

⁸ Gado Wortu e taki dati baka siksi „dei” Gado kaba meki sani na grontapu (Gen. 2:2). Ma dati no wani taki dati Yehovah no ben wroko moro. Yehovah lobi wroko èn Bijbel e taki dati a „tan wroko” (Yoh. 5:17). Neleki fa Yehovah wroko siksi dei èn a rostu tapu a di fu seibi dei, na so a ben taigi den Israelsma fu rostu tapu a di fu seibi dei fu a wiki. Dati ben de a Sabat-dei. Gado ben taigi den: „Disi na wan sani di mi nanga unu seti.” Den Israelsma ben musu ’rostu na a dei dati. A ben de wan santa dei gi Yehovah.’ (Leisi Eksodes 31:12-15.) Nowan sma ben mag wroko tapu a dei dati. Pikin, srafu èn srefi den meti no ben mag wroko (Eks. 20:10). A dei disi ben gi a pipel na okasi fu poti prakseri na a anbegi fu den.

9. Sortu fowtu denki son sma ben abi fu a Sabat-dei na ini a ten fu Yesus?

⁹ A Sabat-dei ben bun gi a pipel fu  Gado. Ma furu fu den kerki fesiman na ini a ten fu Yesus ben meki wan lo tra wet gi a Sabat-dei. Den ben feni taki a ben de wan ogri fu piki pikinso aleisi fu nyan tapu a Sabat-dei noso fu dresi wan sma di siki (Mark. 2:23-27; 3:2-5). Ma a no so Yehovah ben denki èn Yesus ben yepi sma fu frustan dati.

10. Fa Mateyus 12:9-12 e sori wi fa Yesus ben denki fu a Sabat-dei?

¹⁰ Yesus nanga den Dyu di ben de disipel fu en, ben rostu tapu a Sabat-dei fu di den ben wani gi yesi na a Wet fu Moses. * Ma Yesus ben taki èn a ben du sani di ben sori taki sma ben mag yepi trawan tapu a Sabat-dei èn den ben mag sori switifasi tu. A ben taki: „Sma kan du bun na Sabat-dei.” (Leisi Mateyus 12:9-12.) A no ben feni taki a ben fowtu fu yepi sma tapu a Sabat-dei. Den sani di Yesus ben e du ben sori taki a ben frustan fu san ede Yehovah ben taigi en pipel fu hori a Sabat-dei. Fu di a pipel ben rostu tapu a dei dati, meki den ben abi ten fu poti prakseri na a anbegi fu den. Yesus kweki na ini wan osofamiri di ben poti prakseri na a anbegi fu den tapu Sabat-dei. Wi e si dati te wi e luku san Yesus du di a ben doro na Nasaret, a presi pe a ben kweki: „[Yesus] go na ini a snoga soleki fa a gwenti du na Sabat-dei èn a opo tanapu fu leisi.”​—Luk. 4:15-19.

11. Suma ben leri Yesus fa a ben musu si wroko?

¹¹ Yosef ben leri Yesus fu du temre-wroko èn fu lobi wroko neleki Yehovah (Mat. 13:55, 56). Yesus ben si taki Yosef ben wroko tranga fu sorgu en bigi osofamiri. Bakaten Yesus ben taigi den disipel fu en: „A wrokoman warti fu kisi a moni di a wroko” (Luk. 10:7). A de krin taki Yesus ben de wan sma di ben wroko tranga.

12. Sortu Bijbeltekst e sori fa Paulus ben denki fu wroko?

¹² Na apostel Paulus ben wroko tranga tu. A moro prenspari wroko di a ben e du, na taki a ben leri sma suma na Yesus èn san na a boskopu fu en. Ma Paulus ben wroko tu fu man sorgu ensrefi. Den Tesalonikasma ben sabi taki Paulus ben „wroko tranga dei nanga neti” fu di a no ben wani taki den ’pai furu moni fu sorgu en’ èn a no ben wani de ’wan hebi’ gi den (2 Tes. 3:8; Tori 20:34, 35). Paulus ben meki tenti. Sobun, kande a ben taki fu a wroko disi di a skrifi a brifi gi den Tesalonikasma. Di a ben de na ini Korente, a ben tan nanga Akwila nanga Preskela èn ’a ben wroko nanga den fu di den ben e du a srefi wroko leki en fu meki tenti’. Di Paulus taki dati a ben wroko „dei nanga neti”, dan dati no wani taki dati a no ben e rostu. A no ben meki tenti ala dei, ma a ben rostu tapu Sabat-dei. A ben gebroiki a dei dati fu preiki gi den Dyu, di ben rostu tu tapu a Sabat-dei.​—Tori 13:14-16, 42-44; 16:13; 18:1-4.

13. San wi kan leri fu na eksempre fu Paulus?

¹³ Na apostel Paulus na wan bun eksempre gi wi. A ben e wroko, ma a ben meki ten tu fu „preiki a bun nyunsu fu Gado” (Rom. 15:16; 2 Kor. 11:23). A ben gi trawan deki-ati fu du a srefi sani. Akwila nanga Preskela, ben ’du a wroko fu Krestes Yesus makandra nanga en’ (Rom. 12:11; 16:3). Paulus ben gi den Kresten na ini Korente deki-ati fu „abi furu fu du na ini a wroko fu Masra” (1 Kor. 15:58; 2 Kor. 9:8). Yehovah ben meki na apostel Paulus skrifi a sani disi srefi: „Efu wan sma no wani wroko, dan a no musu nyan tu.”​—2 Tes. 3:10.

14. San Yesus ben wani taki nanga den wortu na ini Yohanes 14:12?

¹⁴ A moro prenspari wroko di musu du na ini den lasti dei disi, na taki wi musu preiki èn wi musu meki disipel. Yesus ben taki srefi dati den disipel fu en ben o du moro bigi sani leki en. (Leisi Yohanes 14:12.) Yesus no ben taki dati wi ben o du wondru neleki en. Ma a ben wani sori taki den bakaman fu en ben o du a preikiwroko wan moro langa pisi ten, den ben o preiki na moro presi èn gi moro sma.

15. San wi musu aksi wisrefi èn fu san ede?

¹⁵ Efu yu abi wan grontapuwroko, dan aksi yusrefi den sani disi: ’Sma na wrokope sabi mi leki wan sma di e wroko tranga? Mi e klari mi wroko biten èn mi e du mi wroko so bun leki mi man?’ Efu a piki fu yu na „iya”, dan yu basi o frutrow yu. A o moro makelek gi yu tu fu preiki gi den sma na wrokope. Te a abi fu du nanga a preikiwroko, dan aksi yusrefi den sani disi: ’Sma sabi mi leki wan sma di e preiki fayafaya? Mi e sreka bun gi den takimakandra fu mi? Mi e meki muiti fu go so gaw leki mi man na sma di wani sabi moro? Mi e meki muiti fu du a preikiwroko na difrenti fasi?’ Efu a piki fu  yu na „iya”, dan yu o prisiri fu du a preikiwroko.

16. Fa Yesus nanga den disipel fu en ben denki fu rostu èn fa a denki fu den e difrenti fu a denki fu furu sma na ini a ten disi?

¹⁶ Yesus ben sabi taki a prenspari taki en nanga den apostel rostu. Ma furu sma na ini a ten fu en èn furu sma na ini a ten disi de leki a man na ini wan agersitori fu Yesus. A man dati ben taki: „Mi o teki en safrisafri, mi o nyan, dringi èn meki prisiri” (Luk. 12:19; 2 Tim. 3:4). A man dati ben si rostu nanga prisiri leki a moro prenspari sani. Ma Yesus nanga den apostel fu en no ben si prisiri leki a moro prenspari sani na ini den libi.

17. Fa wi e gebroiki wi ten te wi no abi fu wroko?

¹⁷ Na ini a ten disi wi wani teki na eksempre fu Yesus. Te wi no abi fu go na wroko, dan wi no e gebroiki a ten dati fu rostu nomo. Wi e preiki tu èn wi e go na den konmakandra. A prenspari gi wi fu meki disipel èn fu go na den konmakandra. Dati meki wi e du ala san wi man fu du den sani disi (Hebr. 10:24, 25). Srefi te wi e go nanga fakansi na wan presi, wi e tan go na den konmakandra èn wi e suku okasi fu preiki gi den sma di wi e miti.​—2 Tim. 4:2.

18. San wi Kownu Yesus Krestes wani taki wi du?

¹⁸ Wi de nanga tangi taki wi Kownu, Yesus Krestes, no e fruwakti tumusi furu fu wi èn taki a e leri wi fu abi a yoisti denki fu wroko nanga rostu (Hebr. 4:15). A wani taki wi rostu. Ma a wani tu taki wi wroko tranga fu sorgu wisrefi èn taki wi du a preikiwroko di e gi wi prisiri. Na ini a tra artikel wi o si san Yesus du fu meki wi kon fri.