1-2. (a) Sortu fesa e hori na ini son kondre èn san na a Prisiri-yari? (Luku a faki „ San na a Prisiri-yari?”) (b) Fu sortu sani Yesus taki na ini Lukas 4:16-18?

NA INI son kondre den e hori wan bigi fesa te wan kownu noso wan umakownu e tiri 50 yari. Kande a fesa dati e hori wan dei, wan wiki noso moro langa srefi. Ma te fu kaba a fesa e kon na wan kaba èn sma e frigiti a fesa.

² Na ini Israel fu owruten den ben hori wan fesa tu ibri di fu feifitenti yari. A fesa dati ben de a Prisiri-yari di ben meki taki den Israelsma ben kon fri. Fu san ede wi musu kon sabi moro fu a fesa dati? Fu di a e memre wi na a sani di Yehovah seti fu frulusu wi fu ala ten. Yesus ben taki tu fu a frulusu di wi o kisi.​—Leisi Lukas 4:16-18.

3. Soleki fa Lefitikus 25:8-12 e sori, dan sortu wini den Israelsma ben kisi fu a Prisiri-yari?

³ A o moro makelek gi wi fu frustan a sani di Yesus taki te wi luku a Prisiri-yari di den Israelsma ben musu hori. Yehovah ben taigi den Israelsma: „A di fu feifitenti yari musu de wan santa yari gi unu. Ala sma na ini a kondre musu kon fri. A de wan Prisiri-yari. Ibriwan fu unu musu drai go baka na en presi èn na en famiri.” (Leisi Lefitikus 25:8-12.) Na ini na artikel na fesi wi ben si fa den Israelsma ben kisi wini fu a Sabat-dei. Ma sortu wini den Israelsma ben kisi te den ben hori a Prisiri-yari? Kon meki wi taki dati wan Israelsma ben abi so furu paiman taki a ben musu seri en gron fu  pai a paiman. Na ini a Prisiri-yari so wan sma ben kisi en gron baka. Sobun, a man dati ben kan „drai go baka na en presi”. Bakaten a ben kan gi den pikin fu en a gron dati. Boiti dati, efu wan sma ben abi fu seri wan fu den pikin fu en noso ensrefi leki srafu fu di a no ben man pai en paiman, dan na ini a Prisiri-yari a ben ’drai go baka na en famiri’. Sobun, nowan sma ben tan wan srafu fu ala ten. A seti disi e sori taki Yehovah e broko en ede trutru nanga en pipel.

4-5. Fu san ede a prenspari taki wi leri moro fu a Prisiri-yari?

⁴ San na wan tra wini di den Israelsma ben kisi fu a Prisiri-yari? Yehovah ben meki Moses taigi a pipel: „Nowan fu unu o pôti, bika Yehovah un Gado o blesi unu na ini a kondre di Yehovah gi unu fu tan” (Deut. 15:4). Ma sani de heri tra fasi na ini a ten disi pe gudusma e kon moro gudu èn pôtisma e kon moro pôti.

⁵ Leki Kresten wi no abi fu hori wisrefi na a Wet fu Moses. Dati meki wi no abi wan Prisiri-yari pe srafu e kon fri, pe sma no abi fu pai den paiman moro èn pe sma e kisi den gron baka (Rom. 7:4; 10:4; Ef. 2:15). Ma toku a prenspari taki wi leri moro fu a seti disi. Fu san ede? Fu di a e memre wi na den sani di Yehovah seti fu frulusu wi fu sondu.

6. Fu sortu sani libisma musu kon fri?

⁶ Wi alamala na srafu fu sondu. Dati meki wi alamala musu kon fri fu sondu. Fu di wi na sondusma, meki wi e kon owru, wi e siki èn wi e dede. Furu sma e si taki disi tru te den e luku na ini wan spikri noso te den musu go na datra fu di den siki. Boiti dati, wi e lasi-ati te wi e sondu. Na apostel Paulus ben taki dati ’a sondu di de na ini en skin ben e basi en’. A ben taki tu: „Ai, mi de fu sari fu tru! Suma sa frulusu mi fu a skin disi di e tyari mi go dede?”​—Rom. 7:23, 24.

7. San ben o pasa soleki fa Yesaya ben taki?

 ⁷ Wi breiti taki Yehovah seti sani fu frulusu wi fu sondu. A o gebroiki Yesus fu meki wi kon fri. Moro leki 700 yari fosi Yesus kon na grontapu, a profeiti Yesaya ben taki dati sma ben o kon fri. Ma sma ben o kon fri na wan moro prenspari fasi leki den Israelsma di ben abi a seti fu a Prisiri-yari. Yesaya ben skrifi: „A yeye fu a Moro Hei Masra Yehovah de na mi tapu, fu di Yehovah salfu mi fu fruteri den safri-ati sma bun nyunsu. A seni mi fu tai den soro fu den wan di e firi brokosaka, fu taigi den katiboman taki den fri” (Yes. 61:1). Fu suma a profeititori disi e taki?

8. Fu suma a profeititori fu Yesaya e taki?

⁸ A prenspari profeititori disi fu Yesaya bigin kon tru, baka di Yesus bigin nanga en wroko na grontapu. Di Yesus go na a snoga na ini Nasaret a foto pe a kweki, a leisi a profeititori fu Yesaya gi den Dyu di ben de drape. Yesus ben sori den taki a profeititori disi e taki fu en. A leisi: „A yeye fu Yehovah de na mi tapu, fu di a salfu mi fu fruteri den pôti sma bun nyunsu. A seni mi go fu preiki taki den katiboman o kon fri, taki den breniwan o si baka, èn taki den sma di e kisi kwinsi o gowe leki friman. A seni mi tu fu fruteri sma fu a ten te Yehovah o sori sma bun-ati” (Luk. 4:16-19, 21). Fa Yesus meki a profeititori disi kon tru?

9. Fu suma den sma na ini a ten fu Yesus ben wani kon fri?

⁹ Soleki fa a profeititori fu Yesaya ben sori èn soleki fa Yesus ben taki, dan sma bigin kon fri na ini a ten fu Yesus. Fu san ede wi kan taki dati? Yesus ben taki: „Tide den wortu di unu yere didyonsro kon tru” (Luk. 4:21). Furu fu den sma di ben yere a sani di Yesus leisi ben denki taki den ben o kon fri fu den Romesma. Den disipel fu Yesus ben denki so tu. Bakaten tu fu den ben taki: „Wi ben howpu taki a man disi ben o de a sma di ben o frulusu Israel” (Luk. 24:13, 21). Ma wi sabi taki Yesus no ben gi den bakaman fu en deki-ati fu opo densrefi teige den Romesma. Na presi fu dati a ben taigi den fu „pai Grankownu san na fu Grankownu” (Mat. 22:21). Sobun, fa Yesus frulusu sma na a ten dati?

10. Fu sortu sani Yesus ben frulusu sma?

¹⁰ A Manpikin fu Gado ben o meki  sma kon fri na tu fasi. Na a fosi presi a ben o frulusu a pipel fu den leri fu den kerki fesiman di ben de wan hebi gi den. Furu fu den Dyu ben hori densrefi na den gwenti fu libisma èn den ben bribi na ini falsi leri (Mat. 5:31-37; 15:1-11). Den kerki fesiman di ben musu yepi sma fu dini Gado, no ben dini Gado na a yoisti fasi. Sobun, a ben de neleki den man disi breni. Den no ben poti bribi na ini a Mesias nanga den sani di a ben leri den. Dati meki den no ben kon sabi Gado èn den no ben kisi pardon fu den sondu fu den (Yoh. 9:1, 14-16, 35-41). Ma Yesus ben leri sma san tru èn a ben de wan bun eksempre gi den. Na a fasi disi a ben yepi sma di abi sakafasi fu kon fri fu falsi leri.​—Mark. 1:22; 2:23–3:5.

11. San na a di fu tu fasi fa Yesus e meki sma kon fri?

¹¹ San na a di fu tu fasi fa Yesus e meki sma kon fri? Yesus e meki sma kon fri fu sondu. Fu di Yesus gi en libi leki wan lusu-paiman, meki Gado man gi sma pardon fu den sondu te den e bribi na ini a lusu-paiman èn te den e sori a bribi fu den (Hebr. 10:12-18). Yesus ben taki: „Efu a Manpikin meki unu kon fri, dan unu fri trutru” (Yoh. 8:36). A frulusu disi bun moro a frulusu di den Israelsma ben kisi na ini a Prisiri-yari! Wan man di ben kon fri na ini a Prisiri-yari ben kan tron wan srafu baka èn te fu kaba a ben o dede. Ma Yesus o frulusu sma fu ala ten.

12. Suma na den fosi sma di kon fri soleki fa Yesus ben taki?

¹² Na a Pinksterfesa fu a yari 33, Yehovah salfu den apostel nanga tra reti-ati man nanga uma nanga santa yeye. A teki den leki en manpikin èn den ben o kisi wan opobaka fu go tiri nanga Yesus na hemel (Rom. 8:2, 15-17). Den na den fosi sma di ben o kon fri soleki fa Yesus ben taki na ini na snoga na Nasaret. Den man nanga uma disi no ben bribi den falsi leri fu den Dyu kerki fesiman moro èn den no ben hori den srefi na den gwenti di no e kruderi nanga Gado Wortu. Gado e si den tu leki sma di kon fri fu sondu. A Prisiri-yari fu Kresten bigin di Gado salfu den bakaman fu Krestes nanga santa yeye na ini a yari 33 èn a o kon na wan kaba na  a kaba fu a Dusun Yari Tiri fu Yesus. Sortu bun sani o pasa ete na ini a Prisiri-yari fu Kresten?

13-14. Boiti den salfu Kresten, sortu tra grupu kan kon fri?

¹³ Na ini a ten disi milyunmilyun sma fu ala kondre de na ini a grupu fu den „tra skapu” (Yoh. 10:16). Gado no teki den fu tiri makandra nanga Yesus na hemel. Na presi fu dati den abi a howpu fu libi fu têgo na grontapu. Yu abi a howpu fu libi na grontapu?

¹⁴ Neleki den salfuwan yusrefi kan kisi wini kaba fu a sani di Yesus du gi wi. Efu yu e bribi na ini a lusu-paiman fu Yesus, yu kan aksi Yehovah fu gi yu pardon fu yu sondu. Te yu e du dati, dan Yehovah o feni yu bun èn yu o abi wan krin konsensi (Ef. 1:7; Openb. 7:14, 15). Boiti dati, prakseri den blesi di yu e kisi fu di yu kon fri fu falsi leri. Yesus ben taki: „Unu o sabi san tru èn dati o meki unu kon fri” (Yoh. 8:32). Wi breiti taki Yehovah frulusu wi fu den sani disi!

15. Fa wi o kon fri na ini a ten di e kon èn sortu blesi wi o kisi?

¹⁵ Yu o kon fri na wan moro bigi fasi na ini a ten di e kon. Heri esi Yesus o pori den falsi kerki nanga den ogri tiriman. Gado o kibri a „bigi ipi sma”  di e dini en èn a o meki taki den kisi furu blesi na ini a paradijs na grontapu (Openb. 7:9, 14). Na a ten dati furu sma o kisi wan opobaka. Den wan di bosroiti fu dini Yehovah, no o siki moro, den no o owru moro èn den no o dede moro.​—Tori 24:15.

16. Na sortu prenspari fasi libisma o kon fri na ini a ten di e kon?

¹⁶ Na a pisi ten fu a Dusun Yari Tiri, Yesus nanga den tra sma di o tiri makandra nanga en o yepi libisma fu kon gosontu baka èn fu tron pikin fu Gado baka. Neleki fa den Israelsma ben kon fri na ini a Prisiri-yari, na so sma o kon fri na wan moro prenspari fasi na a pisi ten fu a Dusun Yari Tiri. Na a ten dati ala sma na grontapu di e dini Yehovah o kon fri fu sondu.

17. Fa Yesaya 65:21-23 e sori fa a libi o de na grontapu na ini a ten di e kon? (Luku a fowtow tapu a kafti.)

¹⁷ A profeititori na ini Yesaya 65:21-23 e sori fa a libi o de na grontapu. (Leisi en.) Son sma e denki taki wi no o wroko na ini a paradijs, èn taki heri dei wi o relaks. Ma Bijbel e sori taki a pipel fu Gado o du bun wroko di e gi den prisiri. Wi kan de seiker taki na a kaba fu a dusun yari, ’den sani di Gado meki, o kon fri fu wan skin di e dede. Na so den o kon fri na wan tumusi moi fasi leki pikin fu Gado.’​—Rom. 8:21.

18. Fu san ede wi kan de seiker taki wi o de koloku na ini a ten di e kon?

¹⁸ Neleki fa Yehovah ben sorgu taki den Israelsma ben abi ten fu wroko èn fu rostu, na so a o du dati tu gi en pipel na a ten fu a Dusun Yari Tiri. Wi o abi nofo ten fu anbegi Gado. Neleki fa a de now, wi o abi fu anbegi Gado efu wi wani de koloku na ini a nyun grontapu. Iya, ala libisma o prisiri na a ten fu a Dusun Yari Tiri fu di wi o abi bun wroko èn wi o dini Gado.