Yu man piki den aksi disi di abi fu du nanga den tori na ini den Waktitoren fu 2019?

San a pramisi disi fu Gado wani taki: „Awinsi sortu fetisani sma meki fu feti nanga yu, a no o abi bun bakapisi”? (Yes. 54:17)

Wi kan abi a frutrow taki Yehovah o kibri wi gi den „ogri-ati sma” di e kon na wi tapu (Yes. 25:4, 5). Awinsi san den feanti fu wi du, den no o man tapu wi fu kisi têgo libi.​—w19.01, blz. 6-7.

Fa wi man si taki Yehovah na wan Gado fu retidu te wi e luku san a du nanga den Kanansma nanga den Israelsma di ben du hurudu?

Gado ben strafu den sma di ben du wan lo morsu seks sani èn di ben du ogri nanga umasma nanga pikin. A ben blesi den sma di ben gi yesi na en èn di ben libi bun nanga trawan.​—w19.02, blz. 22-23.

San wi musu du te wan sma di no de wan Kotoigi e begi?

Wi kan tan pî èn wi kan sori lespeki. Ma wi no o taki „amen”. Wi no o hori anu tu nanga trawan te a sma e begi fu di dati ben o sori taki wi e begi makandra nanga den. Wi kan bosroiti fu begi ini wi ati.​—w19.03, blz. 31.

O seryusu a de te wan sma abi seks nanga wan pikin?

Te wan sma abi seks nanga wan pikin, dan a sma e du wan bigi ogri nanga a pikin, a e sondu teige a gemeente, a e pasa den wet fu lanti èn a e sondu teige Gado. Efu a kondre abi wan wet di e taki dati den sortu tori disi musu go na skowtu, dan owruman e gi yesi na a wet disi.​—w19.05, blz. 9-10.

Fa wi kan meki a denki fu wi kon nyun?

A prenspari taki wi abi a gwenti fu taki nanga Yehovah. Wi musu denki dipi tu fu san wi leisi, so taki wi kan ondrosuku wisrefi. Wi musu suku bun mati.​—w19.06, blz. 12.

Fa wi kan sreka wisrefi gi frufolgu?

Wi musu kon abi wan moro bun matifasi nanga Yehovah. Wi musu abi a frutrow taki Yehovah lobi wi èn taki noiti a o gowe libi wi. Wi musu leisi Bijbel ala dei èn wi musu begi doronomo. Wi musu abi na overtoigi taki Gado Kownukondre o tyari blesi kon. Wi musu pruberi fu leri den Bijbeltekst di wi lobi na ede nanga den singi fu wi.​—w19.07, blz. 2-4.

Fa wi kan yepi wi famiri fu kisi frulusu?

A prenspari taki wi e pruberi fu frustan fa den e firi, taki wi de wan bun eksempre gi den, taki wi abi pasensi èn taki wi e sori switifasi.​—w19.08, blz. 15-17.

Fa wi e kisi krakti, soleki fa Yesus pramisi na Mateyus 11:28?

Wi abi fesiman di lobi wi, wi abi den moro bun mati èn wi abi a moro bun wroko.​—w19.09, blz. 23.

Fa Gado e gi wi a firi nanga a krakti fu du sani? (Fil. 2:13)

Te wi e leisi Gado Wortu èn wi e denki dipi fu den sani di wi leisi, dan Gado kan gi wi a krakti nanga na angri fu du san a wani. A yeye fu en kan yepi wi fu du sani moro bun.​—w19.10, blz. 21.

San wi musu du fosi wi teki wan seryusu bosroiti?

Wi musu du feifi sani: Wi musu ondrosuku sani finifini. Wi musu begi Gado fu gi wi koni. Wi musu luku fu san ede wi wani du wan sani. Wi musu sabi san wi wani du. Wi no musu fruwakti tumusi furu fu wisrefi.​—w19.11, blz. 27-29.

A denki taki libisma abi wan sili di no man dede komoto fu a lei di Satan fruteri Eva?

A no sori so. Satan taigi Eva taki a no ben o dede. A no taigi en taki en skin ben o dede, ma a sili fu o ben o libi go doro na wan tra presi. Èn awinsi sma ben kon nanga a falsi leri disi bakaten, toku den alamala dede na ini a Frudu. A gersi leki sma bigin bribi a sani disi, fosi Gado panya den sma di ben bow a toren fu Babel.​—w19.12, blz. 15.