Nôno. Nowan presi na ini Bijbel noso na ini den historia buku wi e leisi taki Kresten ben dopu gi dedesma di no ben dopu.

A fasi fa a vers disi vertaal na ini furu Bijbel e meki sma denki taki fosi, son Kresten ben dopu gi dedesma. Fu eksempre, a Nyun Testamenti e taki: „Efu a tru tak’ dedesma no o opo baka, fu sanede den e teki dopu gi den?”

Ma luku san tu Bijbel sabiman taki. Dr.  Gregory Lockwood ben taki dati nowan buweisi de taki fosi sma ben dopu gi dedesma èn nowan presi na ini Bijbel yu e leisi fu a sani disi tu. Wan tra Bijbel sabiman, Professor Gordon D. Fee e agri nanga san a taki. A ben skrifi taki Bijbel no e taki fu a sortu dopu disi èn wi no feni buweisi tu di e sori taki sma ben du disi. A e taki dati a Nyun Testamenti no e taki fu a dopu disi èn taki buweisi no de taki den fosi Kresten ben dopu gi dedesma.

Bijbel e taki dati den bakaman fu Yesus ben musu ’go na sma fu ala kondre èn den ben musu meki den tron disipel. Den ben musu dopu den èn den ben musu leri den fu du ala san Yesus taigi den fu du’ (Mat. 28:19, 20). Fosi wan sma kan dopu a musu kon sabi Yehovah nanga en Manpikin, a musu bribi na ini den èn a musu gi yesi na den. Wan sma di dede èn di de na ini en grebi no man du den sani disi èn wan tra Kresten di de na libi ete no man du en gi en tu.​—Preik. 9:5, 10; Yoh. 4:1; 1 Kor. 1:14-16.

Sobun, san Paulus ben wani taki?

Son Kresten no ben bribi taki dedesma ben o kisi wan opobaka (1 Kor. 15:12). Dati meki Paulus ben sori den taki na opobaka ben o pasa trutru. A ben taigi den taki ’ala dei a ben kan lasi en libi’. Ma a ben de seiker taki efu a ben o dede a ben o kisi wan opobaka fu go libi na hemel neleki Yesus.​—1 Kor. 15:30-32, 42-44.

Den salfu Kresten fu Korente ben musu frustan taki den ben o kisi tesi ibri dei èn taki den ben o dede fosi den kan kisi wan opobaka. Bijbel e taki dati den wan „di dopu èn di de wán nanga Krestes Yesus” ben „dopu fu dede tu, neleki en” (Rom. 6:3). Disi wani taki dati den ben o kisi tesi neleki Yesus èn taki den ben o dede fu man kisi wan opobaka fu go na hemel.

Moro leki tu yari baka di Yesus dopu na ini watra, a taigi tu fu den apostel fu en: „Unu o teki a dopu di mi o teki” (Mark. 10:38, 39). Dyaso Yesus no e taki fu a dopu fu en na ini watra. A ben wani sori den taki a ben o abi fu dede. Paulus ben taigi den salfuwan taki den ben o ’nyan pina neleki Yesus, so taki den kan kisi glori tu neleki en’ (Rom. 8:16, 17; 2 Kor. 4:17). Sobun, den srefi ben o abi fu dede fu kisi wan opobaka fu go na hemel.

Sobun, a yoisti fasi fu vertaal 1 Korentesma 15:29 na: „Bika sortu wini sma o kisi te den dopu fu dede? Efu trutru den dede sma no o kisi wan opobaka, dan fu san ede den e dopu tu fu dede?”