1. San kan pasa te wi lasi-ati?

IBRI dei wi e kisi problema èn wi e du san wi man fu lusu den. Ma efu wi e firi brokosaka, dan a moro hebi gi wi fu lusu den problema fu wi. Wi musu hori na prakseri taki te wi lasi-ati, dan wi kan firi leki wi no warti noti èn wi kan lasi wi prisiri. Odo 24:10 e taki: „Yu e firi brokosaka te nowtu miti yu? Efu dati de so, dan yu no o abi furu krakti.” Sobun, te wi lasi-ati, dan wi e firi swaki èn dati kan meki en moro muilek gi wi fu horidoro te wi abi problema.

2. Sortu sani kan meki wi lasi-ati èn san wi o luku na ini na artikel disi?

² Furu sani de di kan meki wi lasi-ati. Kande wi lasi-ati fu di wi meki wan fowtu, fu di wi e feti nanga den swakifasi fu wi noso fu di wi siki. Wi kan lasi-ati tu fu di wi no kisi wan grani di wi ben wani na ini na organisâsi noso fu di wi e preiki na ini wan kontren pe furu sma no e arki. Na ini na artikel disi wi o si san kan yepi wi te wi lasi-ati.

3. San kan yepi wi te wi meki wan fowtu èn te wi e firi leki wi no bun?

³ Te wi meki wan fowtu noso te wi e feti nanga den swakifasi fu wi, dan makelek wi kan kisi a firi taki wi no bun. Kande wi e bigin denki srefi taki Yehovah no o meki wi libi na ini a paradijs. A denki disi no bun. Fa wi musu si den fowtu di wi e meki? Bijbel e sori taki boiti Yesus, ala libisma „sondu” (Rom. 3:23). Ma Yehovah no e tan prakseri den fowtu di wi meki èn a no e fruwakti taki wi no o meki fowtu. Na presi fu dati a lobi wi leki  wan Papa èn a wani yepi wi. A abi pasensi nanga wi. A sabi taki wi e du tranga muiti fu du san bun èn a de klariklari fu yepi wi.​—Rom. 7:18, 19.

4-5. Fa a sani di skrifi na ini 1 Yohanes 3:19, 20 yepi tu sisa fu no lasi-ati tumusi?

⁴ Luku na eksempre fu Deborah nanga Maria. * Di Deborah ben yongu en famiri no ben sori lobi gi en èn den ben gi en a firi taki a no bun. Den no ben abi a gwenti fu taigi en taki a du wan sani bun. Dati meki di a ben kon bigi a no ben abi wan bun denki fu ensrefi. Te a ben meki wan pikin fowtu, dan a ben firi leki a no man du noti bun. Maria ben abi a srefi problema. En famiri ben taigi en sani di ben meki a firi syen. Dati meki a ben abi a firi leki a no warti noti. Srefi baka di a dopu a ben feni taki a no ben bun nofo fu de wan Kotoigi fu Yehovah.

⁵ Toku den tu sisa disi no tapu fu dini Yehovah. San yepi den? Wan sani na taki den ben begi Yehovah èn den ben fruteri en fa den ben firi (Ps. 55:22). Den kon frustan taki Yehovah, wi hemel Papa sabi taki den ogri di miti wi kan meki wi firi leki wi no warti noti. Den leri tu taki Yehovah e si den bun fasi fu wi, srefi efu wi feni taki wi no abi bun fasi.​—Leisi 1 Yohanes 3:19, 20.

6. Fa wan sma kan firi te a meki a srefi fowtu baka?

⁶ Kande wan sma e du muiti fu tapu nanga wan takru gwenti. Ma efu a meki a srefi fowtu baka a kan firi brokosaka. Nofo tron te wi meki wan fowtu wi e abi konsensi fonfon (2 Kor. 7:10). Ma a fowtu di wi meki no musu meki taki wi bigin denki taki wi no warti noti èn taki Yehovah no o gi wi pardon. A denki disi no bun èn a kan meki taki wi tapu fu dini Yehovah. Prakseri san skrifi na ini Odo 24:10: Wi no o abi furu krakti te wi e firi brokosaka. Na presi fu firi brokosaka wi musu „seti sani kon reti baka” nanga Yehovah (Yes. 1:18). Wi musu begi en èn wi musu aksi en fu gi wi pardon. Efu a si taki wi abi berow èn wi e meki muiti fu kenki, dan a o gi wi pardon. Boiti dati, wi musu go suku yepi na den owruman. Nanga pasensi den o yepi wi fu kisi wisrefi baka.​—Yak. 5:14, 15.

7. Fu san ede wi no musu lasi-ati te wi e feti nanga wan swakifasi?

⁷ Jean-Luc, wan owruman fu Fransikondre abi a rai disi gi den wan di e feti  nanga wan swakifasi: „Gi Yehovah wan reti-ati sma a no wan sma di noiti e meki wan fowtu, ma na wan sma di abi berow te a meki wan fowtu èn di e meki muiti fu kenki” (Rom. 7:21-25). Sobun, no denki taki yu no warti noti te yu e feti nanga wan swakifasi. Hori na prakseri taki wi alamala e meki fowtu. Dati meki Yehovah sori bun-ati gi wi èn a seni en Manpikin kon fu dede gi wi.​—Ef. 1:7; 1 Yoh. 4:10.

8. Pe wi kan feni yepi te wi lasi-ati?

⁸ Den brada nanga sisa na ini a gemeente o gi wi deki-ati! Den kan arki wi te wi wani taki nanga wan sma èn den kan trowstu wi (Odo 12:25; 1 Tes. 5:14). Joy wan sisa fu Nigeria di ben lasi-ati wan pisi ten, e taki: „San mi ben o du efu mi no ben abi den brada nanga sisa? A deki-ati di den gi mi meki mi si taki Yehovah e piki den begi fu mi. Mi leri fa mi srefi kan gi trawan di lasi-ati deki-ati.” Ma hori na prakseri taki a no ala ten den brada nanga sisa o sabi taki wi abi deki-ati fanowdu. Dati meki son leisi na wisrefi musu go suku yepi na wan lepi brada noso sisa.

9. Fa Psalm 41:3 nanga 94:19 e gi wi deki-ati?

⁹ Suku yepi na Yehovah. Efu wi no e firi bun noso efu wi siki wan langa pisi ten, dan makelek wi kan lasi-ati. Aladi Yehovah no o dresi wi na wan wondrufasi, a o trowstu wi èn a o gi wi a krakti fu horidoro. (Leisi Psalm 41:3; 94:19.) Fu eksempre, a kan meki taki brada nanga sisa kon yepi wi nanga wan wroko na oso. Den kan go bai sani gi wi noso den kan begi nanga wi. Yehovah kan yepi wi tu fu memre den moi sani di skrifi na ini en Wortu, soleki a pramisi taki wi o libi sondro siki nanga pen na ini a nyun grontapu.​—Rom. 15:4.

10. San yepi Isang fu no tan firi brokosaka baka di a kisi wan mankeri?

¹⁰ Isang di e libi na ini Nigeria kisi wan hebi mankeri. En datra taigi en taki noiti moro a o waka. Isang taki: „Mi ben brokosaka srefisrefi.” Ma a ben tan firi so? Nôno! San yepi en? A taki: „Noiti mi nanga mi frow tapu fu begi èn fu studeri Bijbel. Wi ben de nanga tangi tu gi den bun sani di wi ben abi, soleki a howpu fu libi na ini a nyun grontapu fu Gado.”

11. Fa a du kon taki Cindy ben prisiri aladi a ben abi wan seryusu siki?

¹¹ Cindy di e libi na ini Meksikow, ben abi wan siki di ben kan meki taki a dede. San yepi en? Di a ben de na ati-oso a ben meki muiti fu preiki ibri dei. A e skrifi: „Fu di mi ben du dati mi ben man poti prakseri na tra sma, na presi fu denki na oparâsi di mi ben musu du, a pen di mi ben abi noso a fasi fa mi ben firi. Na disi mi ben du: Te mi ben taki nanga den datra noso nanga den tra sma di e wroko na ati-oso, dan mi ben aksi den fa a e go nanga den famiri. Baka dati mi ben aksi den fu san ede den ben du a muilek wroko disi. Disi ben meki en moro makelek fu sabi fu sortu tori mi ben kan taki nanga den. Furu fu den ben taki dati den no ben gwenti en taki den sikisma ben aksi den fa a e go nanga den. Den ben de nanga tangi taki mi ben poti prakseri na den. Sonwan fu den ben gi mi na adres noso a telefon nomru fu den. Mi ben sabi taki Yehovah ben o yepi mi na ini a muilek ten disi. Ma mi no ben fruwakti  taki mi ben o abi so furu prisiri!”​—Odo 15:15.

12-13. Fa son brada nanga sisa di siki noso owru ben man preiki?

¹² Te wan sma siki noso te a owru, dan a kan firi lasi-ati fu di a no man preiki so furu moro. Toku furu fu den sma disi e feni wan fasi fu preiki. Na ini Amerkankondre, wan sisa di nen Laurel ben didon 37 yari na ini wan isri masyin di ben yepi en fu bro. A ben abi kanker, a ben du omeni oparâsi èn a ben kisi soro na en skin. Ma toku den sani disi no ben tapu en fu preiki. A ben preiki gi den sma di ben kon sorgu en na en oso èn gi den tra sma di ben kon luku en. San ben de a bakapisi? A ben yepi 17 sma fu kon dini Yehovah! *

¹³ Richard, wan owruman fu Fransikondre, abi a rai disi gi den sma di no man komoto na den oso noso di e libi na wan presi pe den e sorgu owrusma: „A bun fu poti wan tu buku nanga tijdschrift na wan presi pe sma kan si den. Te sma e waka pasa den o aksi yu san na den sani di yu poti drape, dan yu kan preiki gi den. A sani disi na wan deki-ati gi den brada nanga sisa di no man wroko oso fu oso moro.” Den wan di no man komoto na oso kan skrifi brifi tu gi sma noso den kan bel den.

14. Fu san ede Kownu David na wan moi eksempre gi wi?

¹⁴ Furu reide de fu san ede wi no e kisi wan grani di wi ben wani. Kande wi owru tumusi, kande wi siki noso kande wan tra sani de di e meki taki wi no man kisi a grani. Efu wi de na ini so wan situwâsi wi kan leri furu fu na eksempre fu Kownu David. David ben wani bow a tempel fu Yehovah, ma Yehovah gi wan tra sma a grani dati. Toku David ben horibaka gi a sma dati. A ben gi furu gowtu nanga solfru fu bow a tempel. David na wan moi eksempre gi wi.​—2 Sam. 7:12, 13; 1 Kron. 29:1, 3-5.

15. San ben yepi Humbert fu no firi brokosaka moro?

¹⁵ Humbert, wan brada fu Fransikondre no ben man dini moro leki owruman fu di a ben kon siki. A no ben man du pikinpikin wroko srefi na oso. A e skrifi: „Na a bigin mi ben firi brokosaka èn mi ben firi leki mi no warti noti. Ma baka  wan pisi ten mi kon si taki mi no ben musu tan prakseri den sani di mi no ben man du moro. Dati yepi mi fu prisiri nanga den sani di mi ben kan du ete gi Yehovah. Mi no o gi abra. Neleki fa Gideon nanga den 300 man fu en tan feti aladi den ben weri, na so mi o tan feti tu!”​—Krut. 8:4.

16. San wi kan leri fu na eksempre fu den engel?

¹⁶ Den engel na wan moi eksempre gi wi. Wan leisi Yehovah ben aksi den engel fu taigi en fa den ben o kori na ogri Kownu Akab. Wan tu engel fruteri en fa den ben o kori Akab. Ma Gado du san wán fu den engel nomo taigi en (1 Kow. 22:19-22). Den tra engel ben lasi-ati di Gado du dati? Den ben denki: ’Fu san ede mi lasi mi ten fu taigi Yehovah san mi ben o du?’ Nôno. Den engel abi sakafasi èn a prenspari gi den taki Yehovah kisi grani.​—Krut. 13:16-18; Openb. 19:10.

17. San wi musu du efu wi e sari fu di wi no kisi wan grani di wi ben wani?

¹⁷ No frigiti taki a moro bigi grani di wi abi na fu de wan Kotoigi fu Yehovah èn fu preiki fu a Kownukondre. Awinsi wi kisi wan grani noso wi lasi wan grani, a no den grani di wi abi e meki taki wi prenspari gi Yehovah. Efu wi abi sakafasi, dan Yehovah nanga den brada nanga sisa o lobi wi. Sobun, begi Yehovah fu yepi yu fu tan abi sakafasi. Prakseri den moi eksempre na ini Bijbel fu anbegiman fu Gado di ben abi sakafasi. De klariklari fu du iniwan wroko di yu e kisi na ini Yehovah en organisâsi.​—Ps. 138:6; 1 Petr. 5:5.

18-19. San o yepi yu fu du a preikiwroko nanga prisiri te furu sma na ini a kontren no wani arki?

¹⁸ Yu e firi lasi-ati son leisi fu di den sma na ini a kontren fu yu no e arki noso fu di den no e de na oso? San kan yepi yu fu tan abi prisiri? Wi e kisi wan tu moi rai na ini a faki „ Sani di o yepi yu fu abi moro prisiri te yu e du a preikiwroko”. A prenspari tu fu abi a yoisti denki fu a preikiwroko. San o yepi wi fu du dati?

 ¹⁹ Hori na prakseri taki a moro prenspari reide fu san ede wi e preiki na fu meki sma kon sabi Gado nen èn fu fruteri den fu a Kownukondre. Yesus ben sori taki furu sma no ben o tron bakaman fu en (Mat. 7:13, 14). Te wi e du a preikiwroko, dan wi abi a grani fu wroko makandra nanga Yehovah, Yesus nanga den engel (Mat. 28:19, 20; 1 Kor. 3:9; Openb. 14:6, 7). Na Yehovah e hari sma kon na en (Yoh. 6:44). Sobun, efu wan sma no wani arki wi, dan kande tra leisi te wi go na en a o arki wi.

20. Fa Yeremia 20:8, 9 kan yepi wi te wi lasi-ati?

²⁰ Wi kan leri furu fu a profeiti Yeremia. A ben musu preiki na ini wan kontren pe sma no ben wani arki a boskopu fu en. Den sma ben e kosi en èn den ben e spotu en „heri dei”. (Leisi Yeremia 20:8, 9.) Wan leisi a ben firi so lasi-ati taki a no ben wani preiki moro. Ma toku a go doro. Fu san ede? „Den boskopu fu Yehovah” ben de leki wan faya na ini Yeremia èn a no ben man hori en gi ensrefi. Wi kan de leki en te wi e studeri Bijbel ibri dei èn te wi e denki dipi fu san wi leri. Disi o yepi wi fu abi moro prisiri na ini a preikiwroko èn a kan meki taki moro sma arki wi.​—Yer. 15:16.

21. San o yepi wi te wi lasi-ati?

²¹ Deborah di wi ben taki fu en kaba, e taki: „Satan wani taki wi firi brokosaka.” Ma awinsi san Satan e gebroiki fu meki wi lasi-ati, Yehovah kan yepi wi. Sobun, te yu e firi so, dan yu musu begi Yehovah. A o yepi yu fu feti nanga den swakifasi fu yu. A o horibaka gi yu te yu siki èn a o yepi yu fu si sani na a yoisti fasi te yu no kisi wan grani di yu ben wani. Boiti dati a o yepi yu fu du a preikiwroko nanga prisiri. Dati meki wi musu begi wi hemel Papa èn wi musu fruteri en fa wi e firi. Iya, Yehovah o yepi wi fu no lasi-ati.