1-2. San wi o luku na ini na artikel disi?

BIJBEL e taki dati a libi fu wi syatu èn taki a „lai problema” (Yob 14:1). Dati meki son leisi wi kan lasi-ati. Wan tu anbegiman fu Yehovah na ini Bijbel ten ben firi so tu. Sonwan ben wani dede srefi (1 Kow. 19:2-4; Yob 3:1-3, 11; 7:15, 16). Ma ala ten Yehovah, a Gado di den ben frutrow, ben yepi den èn a ben gi den deki-ati. Den ondrofenitori fu den sma disi skrifi na ini Bijbel, so taki wi kan kisi trowstu èn so taki wi kan leri wan sani fu den.​—Rom. 15:4.

² Na ini na artikel disi wi o taki fu wan tu anbegiman fu Yehovah di ben kisi tesi di ben meki den lasi-ati. Wi o taki fu Yosef, Naomi nanga Rut, a Leifisma di skrifi Psalm 73 nanga na apostel Petrus. Fa Yehovah yepi den? Èn san wi kan leri fu na eksempre fu den? Den piki tapu den aksi disi o sori wi taki „Yehovah de krosibei fu den sma di lasi-ati” èn taki „a e frulusu den wan di brokosaka”.​—Ps. 34:18.

3-4. San pasa nanga Yosef di a ben yongu?

³ Di Yosef ben abi sowan 17 yari a kisi tu dren fu Gado. Den dren disi ben sori taki Yosef ben o tron wan prenspari sma èn taki en famiri ben o lespeki en (Gen. 37:5-10). Ma syatu baka di Yosef kisi den dren disi en heri libi kenki. Na presi taki den brada fu en sori lespeki gi en, den seri en èn a tron a srafu fu wan heihei man fu Egepte di ben nen Potifar (Gen. 37:21-28). Yosef no ben de na oso moro nanga en papa di ben lobi en, ma a ben de wan srafu  na ini Egepte èn a ben wroko gi wan man di no ben sabi Yehovah.​—Gen. 39:1.

⁴ Ma sani kon moro ogri gi Yosef. A wefi fu Potifar lei gi Yosef taki a ben wani dwengi en fu abi seks nanga en. Sondro fu ondrosuku a tori, Potifar poti Yosef na strafu-oso pe den ben tai en nanga keti (Gen. 39:14-20; Ps. 105:17, 18). Yosef ben yongu ete. Sobun, prakseri fa a ben firi di a frow fu Potifar lei gi en. Èn prakseri fa a sani disi ben kan tyari porinen gi Yehovah. Yosef ben abi furu reide fu lasi-ati!

5. San ben yepi Yosef fu no lasi en prisiri?

⁵ Di Yosef ben de wan srafu na ini Potifar en oso èn di a ben na strafu-oso, a no ben man du noti fu kenki en situwâsi. San yepi en fu no lasi en prisiri? Na presi fu prakseri san a no ben man du, a ben du a wroko di a ben kisi so bun leki a man. Ma san moro prenspari na taki a ben du a wani fu Yehovah. Dati meki Yehovah ben blesi ala san Yosef ben du.​—Gen. 39:21-23.

6. Fa den dren fu Yosef ben gi en deki-ati?

⁶ Kande Yosef ben kisi deki-ati tu te a ben prakseri den dren di a ben kisi omeni yari na fesi. Den dren ben sori taki a ben o si en famiri baka èn taki a situwâsi fu en ben o kenki. Na dati pasa tu. Di Yosef ben abi 37 yari den dren di a ben kisi fu Gado kon tru na wan fasi di a no ben fruwakti!​—Gen. 37:7, 9, 10; 42:6, 9.

7. Soleki fa 1 Petrus 5:10 e sori, dan san o yepi wi fu horidoro te wi e kisi tesi?

⁷ San disi e leri wi? A tori fu Yosef e memre wi taki wi e libi na ini wan ogri grontapu pe sma kan du ogri nanga wi. Srefi wan brada noso sisa kan du wan hati sani nanga wi. Ma efu wi e si Yehovah leki wi kibripe, dan wi no o lasi-ati tumusi èn wi no o tapu fu dini en  (Ps. 62:6, 7; leisi 1 Petrus 5:10). Prakseri tu taki kande Yosef ben abi 17 yari di a kisi den tu dren fu Yehovah. Disi e sori taki Yehovah e frutrow den yongu anbegiman fu en. Na ini a ten disi furu yonguwan de leki Yosef. Den e bribi na ini Yehovah. Sonwan fu den ben musu go na strafu-oso srefi fu di den ben wani tan gi yesi na Yehovah.​—Ps. 110:3.

8. San miti Naomi nanga Rut?

⁸ Fu di wan hebi angriten ben de na ini Yuda, meki Naomi nanga en osofamiri froisi go tan na Moab. Drape en masra Elimeilek dede èn a ben de en wawan nanga den tu boi fu en. Bakaten den tu boi disi trow nanga tu uma fu Moab, Rut nanga Orpa. Sowan tin yari baka dati den tu boi fu Naomi dede fosi den meki pikin (Rut 1:1-5). Prakseri fa den dri uma disi ben sari! Rut nanga Orpa ben kan trow baka. Ma suma ben o luku Naomi di ben kon owru kaba? Naomi ben sari so te taki a ben taki: „No kari mi Naomi. Kari mi Mara, bika na Almaktiwan tyari soso sari kon na ini mi libi.” Baka di ala den sari sani disi miti Naomi, a bosroiti fu drai go baka na Betlehem èn Rut go nanga en.​—Rut 1:7, 18-20.

9. Te wi luku Rut 1:16, 17, 22, dan fa Rut sori lobi gi Naomi?

⁹ San yepi Naomi? A lobi di sma sori gi en. Fu eksempre, Rut ben sori taki a lobi Naomi di a tan nanga en. (Leisi Rut 1:16, 17, 22.) Na ini Betlehem Rut ben wroko tranga. A ben piki nyanyan na den gron fu sorgu ensrefi nanga Naomi. A sani disi ben meki taki sma ben si taki en na wan bun uma di e wroko tranga.​—Rut 3:11; 4:15.

10. Fa Yehovah ben sori taki a ben lobi den pôtiwan, soleki Naomi nanga Rut?

¹⁰ Yehovah ben gi den Israelsma wan wet di ben sori taki a ben firi gi den pôtiwan, soleki Naomi nanga Rut. A ben taigi den Israelsma taki den no ben musu koti ala a nyanyan na a lanki fu den gron. Den ben musu libi dati gi den pôtisma (Lef. 19:9, 10). Dati meki Naomi nanga Rut no ben abi fu go begi sma nyanyan.

11-12. San Boas du gi Naomi nanga Rut?

¹¹ A gron pe Rut ben go piki nyanyan ben de fu Boas, wan gudu man. A ben lobi fa Rut ben yepi Naomi èn fa a ben sori lobi gi en. Dati meki a bai a gron baka di ben de fu a famiri fu Naomi èn a trow nanga Rut (Rut 4:9-13). Boas nanga Rut kisi wan pikin di ben nen Obed. Obed ben de a granpapa fu Kownu David.​—Rut 4:17.

¹² Prakseri o koloku Naomi ben de di a ben hori Obed na ini en anu èn fa a ben taki Yehovah tangi! Ma moro moi sani e wakti Naomi nanga Rut. Te den o kisi wan opobaka den o yere taki Obed ben de wan afo fu a Mesias, Yesus Krestes!

13. Sortu prenspari sani wi e leri fu a tori fu Naomi nanga Rut?

¹³ San disi e leri wi? Te wi e kisi tesi wi kan firi brokosaka. Kande wi e denki taki lusu no de gi a problema fu wi. Na den momenti dati wi musu frutrow tapu wi hemel Papa Yehovah èn wi musu tan krosibei fu den brada nanga sisa. A kan taki Yehovah no o puru a problema gi wi. Prakseri taki a no ben gi a masra nanga den tu boi fu Naomi wan opobaka. Ma ala ten a o yepi wi fu horidoro. Son leisi a e gebroiki den brada nanga sisa fu yepi wi.​—Odo 17:17.

14. Fu san ede wan Leifisma ben lasi-ati?

¹⁴ A skrifiman fu Psalm 73 ben de wan Leifisma. Sobun, a ben abi a grani fu dini na a santa presi fu Gado. Ma toku a man disi ben lasi-ati wan pisi ten. Fu san ede? A ben dyarusu tapu den ogrisma. A no ben dyarusu na den tapu fu di den ben e du san den ben wani, ma fu di den ben abi wan moro bun libi leki en (Ps. 73:2-9, 11-14). A ben gersi leki den ben abi ala sani. Den ben gudu, den ben abi wan switi libi èn den no ben abi broko-ede. A sani disi ben meki taki a psalm skrifiman ben firi lasi-ati èn a ben taki: „Na fu soso mi du muiti fu kon abi wan krin ati. Na fu soso mi wasi mi anu fu sori taki mi no du noti.” A sani disi ben kan meki taki a tapu fu dini Yehovah.

15. Soleki fa Psalm 73:16-19, 22-25 e sori, dan san yepi a Leifisma di skrifi a psalm disi fu no lasi-ati moro?

¹⁵ Leisi Psalm 73:16-19, 22-25. A Leifisma „go na ini a gran santa presi fu Gado”. Di a ben de na ini na oso fu Gado makandra nanga tra anbegiman, a bigin denki fu a situwâsi fu en èn a bigin begi. Disi yepi en fu si taki a denki fu en no ben bun èn taki a ben kan meki taki en nanga Yehovah no de mati moro. A kon si taki den ogrisma e „tanapu na wan grati presi” èn taki ’den no o de moro’. Di a psalm skrifiman bigin si sani neleki Yehovah, dan a no ben lasi-ati moro èn a no ben dyarusu moro tapu den ogrisma. Dati meki a ben de koloku baka. A ben taki: „Boiti [Yehovah], nowan sma de na grontapu di e gi mi prisiri.”

16. San wi e leri fu a Leifisma di skrifi Psalm 73?

¹⁶ San disi e leri wi? Noiti wi musu dyarusu tapu a bun libi fu den ogrisma. A gersi nomo leki den abi wan switi libi, ma a prisiri fu den de fu wan syatu pisi ten èn den no o kisi têgo libi (Preik. 8:12, 13). Efu wi e dyarusu na den tapu, dan wi kan lasi-ati èn a kan meki taki wi no de mati moro nanga Yehovah. Efu yu e dyarusu tapu a libi fu den ogrisma,  dan yu musu du a srefi sani leki a Leifisma. Teki a rai fu Yehovah èn tan kon makandra nanga sma di e dini en. Te yu lobi Yehovah moro iniwan tra sani, dan yu o de koloku trutru. Yu o tan na tapu a pasi di o tyari yu go na „a trutru libi”.​—1 Tim. 6:19.

17. Fu san ede Petrus ben firi brokosaka?

¹⁷ Na apostel Petrus no ben frede fu du sani èn a no ben frede fu taki san de na tapu en ati. Ma son leisi a ben taki noso du sani sondro fu denki èn disi ben hati en bakaten. Fu eksempre, di Yesus taigi den apostel fu en taki a ben o nyan pina èn taki a ben o dede, dan Petrus taigi en: „A sani disi no o miti yu kwetikweti” (Mat. 16:21-23). Ma Yesus piri-ai gi Petrus. Di wan grupu sma kon fu sroto Yesus, dan sondro fu denki Petrus koti a yesi puru fu a srafu fu a granpriester (Yoh. 18:10, 11). Yesus piri-ai baka gi Petrus. Boiti dati, Petrus ben dyaf taki awinsi den tra apostel ben o gowe libi Yesus, noiti en ben o du dati (Mat. 26:33). Ma Petrus no ben tranga leki fa a ben denki. A srefi neti dati a kon frede so te, taki a taki dri leisi taki a no sabi Yesus. Petrus ben firi so brokosaka taki a „go na dorosei èn a krei nanga bigi sari” (Mat. 26:69-75). A ben musu fu aksi ensrefi efu Yesus ben o gi en pardon.

18. Fa Yesus yepi Petrus fu no lasi-ati moro?

¹⁸ Ma Petrus no meki taki a fasi fa a ben firi tapu en fu dini Yehovah. Baka di a meki a fowtu dati, a kisi ensrefi baka èn a ben kon makandra nanga den tra apostel (Yoh. 21:1-3; Tori 1:15, 16). San ben yepi en? Petrus no ben frigiti taki Yesus ben begi gi en èn taki a ben aksi Gado fu yepi en fu abi wan tranga bribi. Yesus ben taigi en tu taki te a ben kisi ensrefi baka a ben musu tranga den brada.  Yehovah piki a begi dati. Bakaten di Yesus kisi wan opobaka a go na Petrus fu gi en deki-ati (Luk. 22:32; 24:33, 34; 1 Kor. 15:5). Wan tra sani di Yesus du na taki a go na den apostel fu en, baka di den fisi wan heri neti èn den no fanga noti. A leisi dati Yesus ben gi Petrus na okasi fu taigi en o furu a lobi en. Yesus ben gi en mati pardon èn a ben gi en moro wroko tu.​—Yoh. 21:15-17.

19. Fa Psalm 103:13, 14 e sori fa Yehovah e si wi te wi meki wan fowtu?

¹⁹ San disi e leri wi? A fasi fa Yesus yepi Petrus e sori taki a abi sari-ati neleki en Papa. Dati meki wi no musu denki taki noiti Yehovah no o gi wi pardon te wi meki wan fowtu. Wi no musu frigiti taki na dati Satan wani wi denki. Ma na presi taki wi denki so, wi musu hori na prakseri taki Yehovah lobi wi èn taki a de klariklari fu gi wi pardon. Èn te trawan du wan hati sani nanga wi, wi musu gi den pardon tu.​—Leisi Psalm 103:13, 14.

20. San wi o luku na ini a tra artikel?

²⁰ Na eksempre fu Yosef, Naomi nanga Rut, a Leifisma nanga Petrus e sori wi taki „Yehovah de krosibei fu den sma di lasi-ati” (Ps. 34:18). Son leisi a e gi pasi taki wi e kisi tesi èn taki wi e firi brokosaka. Ma ala ten a o yepi wi fu horidoro. Disi o meki taki a bribi fu wi kon moro tranga (1 Petr. 1:6, 7). Na ini a tra artikel wi o si fa Yehovah e yepi den anbegiman fu en di lasi-ati fu di den meki wan fowtu noso fu di den de na ini wan muilek situwâsi.