1. San meki Yesus agersi den bakaman fu en nanga skapu?

YESUS ben gebroiki na agersitori fu wan skapuman nanga den skapu fu en fu sori fa a lobi den bakaman fu en èn fa den e arki en (Yoh. 10:14). Disi na wan moi agersitori. Den skapu sabi a skapuman fu den èn na en sten den e arki. Wan man di ben rèis go na wan tra kondre si disi nanga en eigi ai. A taki: „Di wi ben wani meki wan felem fu wan tu skapu, wi pruberi fu kari den kon moro krosibei. Ma den skapu no kon fu di den no ben sabi wi sten. Baka dati wan pikin boi di ben e luku den skapu kon drape. A no kari den skapu wan bun fasi srefi, ne den bigin waka na en baka.”

2-3. (a) Fa den bakaman fu Yesus e sori taki den e arki a sten fu en? (b) San wi o luku na ini na artikel disi èn na ini a wan di e kon?

² Na ondrofenitori fu a man e meki wi prakseri san Yesus ben taki fu den skapu noso den bakaman fu en. A taki: „Den o arki mi sten” (Yoh. 10:16). Ma now Yesus de na hemel. Sobun, fa wi kan taki dati wi e arki en? Wan prenspari fasi fa wi e sori taki wi e arki a sten fu wi Masra na te wi e du san a leri wi.​—Mat. 7:24, 25.

³ Na ini na artikel disi èn na ini a wan di e kon, wi o luku san na wan tu sani di Yesus leri wi. Wi o leri sortu sani wi no musu du moro èn sortu sani wi musu du. Fosi wi du dati, meki wi go luku tu sani di a moro bun skapuman taki dati wi no musu du moro.

4. Soleki fa Lukas 12:29 e sori, dan san kan meki taki wi e ’broko wi ede’?

⁴ Leisi Lukas 12:29. Yesus taigi den bakaman fu en fu ’no broko den ede moro’ nanga san den abi fanowdu fu tan na libi. Wi sabi taki Yesus e gi koni rai ala ten èn a rai fu en bun. Ma aladi wi wani arki a rai disi, toku a e pasa son leisi taki a hebi fu du san a taki. Fa so?

5. Fu san ede son sma e broko den ede nanga san den abi fanowdu fu tan na libi?

 ⁵ Kande son sma e broko den ede nanga san den abi fanowdu fu tan na libi, soleki nyanyan, krosi nanga wan presi fu tan. A kan taki den e libi na ini wan pôti kondre. Kande a hebi gi den fu wroko nofo moni fu kan sorgu na osofamiri fu den. Noso a kan taki a sma di ben e sorgu na osofamiri kon lasi libi èn now moni no de fu bai den sani di den abi fanowdu. Noso kande a COVID-19 siki meki taki sma lasi den wroko èn taki den no abi moni (Preik. 9:11). Sobun, efu wan fu den sani disi pasa nanga wi, dan fa wi kan du san Yesus leri wi èn no ’broko wi ede moro’?

6. Fruteri san pasa wan leisi nanga na apostel Petrus.

⁶ Wan leisi na apostel Petrus nanga den tra apostel ben de na ini wan boto na a Se fu Galilea di wan tranga winti bigin wai. Di den si Yesus e waka na tapu a watra, Petrus taki: „Masra, efu na yu, dan taigi mi fu waka kon na yu na tapu a watra.” Baka di Yesus taigi Petrus taki a ben kan „kon”, Petrus komoto na ini a boto èn a „waka na tapu a watra fu go na Yesus”. Luku san pasa baka dati. „Di Petrus si fa a bigi winti e wai, dan a kon frede èn  di a bigin sungu, a bari: ’Masra, yepi mi!’” Ne Yesus langa en anu gi Petrus fu yepi en. San wi e si dya, na taki solanga Petrus ben e tan poti prakseri na Yesus, a ben man waka na tapu a krasi watra. Ma di Petrus luku fa a bigi winti ben e wai, a kon frede èn a bigin tweifri. Ne a bigin sungu.​—Mat. 14:24-31.

7. San wi kan leri fu a sani di pasa nanga Petrus?

⁷ Wi kan leri wan sani fu san pasa nanga Petrus. Di a komoto na ini a boto èn a bigin waka na tapu a se, a no ben fruwakti taki wan sani ben o puru en prakseri èn taki a ben o bigin sungu. A ben wani tan waka na tapu a watra fu man go na Yesus. Ma a no tan poti prakseri na a sani di a ben wani du. A tru taki wi no man waka na tapu watra, ma na ini a ten disi problema e miti wi di kan tesi a bribi fu wi. Efu wi no e poti prakseri moro na Yehovah nanga den sani di a pramisi wi, dan wi o lasi wi bribi èn wi o bigin sungu. Awinsi sortu tesi e miti wi, wi musu tan poti prakseri na Yehovah èn wi musu tan bribi taki a man yepi wi. Fa wi kan du dati?

8. San kan yepi wi fu no broko wi ede tumusi nanga san wi abi fanowdu fu tan na libi?

⁸ Na presi fu broko wi ede nanga den problema fu wi, meki wi frutrow tapu Yehovah. No frigiti taki wi lobi-ati Papa pramisi wi taki efu wi e poti den sani fu en na a fosi presi, a o sorgu gi wi èn a o gi wi san wi abi fanowdu fu tan na libi (Mat. 6:32, 33). A sori ala ten taki a e du san a pramisi (Deut. 8:4, 15, 16; Ps. 37:25). Efu Yehovah e sorgu gi den fowru nanga den bromki, dan wi no abi fu broko wi ede nanga san wi o nyan noso san wi o weri! (Mat. 6:26-30; Fil. 4:6, 7) Neleki fa papa nanga mama e sorgu den pikin fu den fu di den lobi den, na so wi hemel Papa lobi a pipel fu en èn a e sorgu taki den e kisi den sani di den abi fanowdu. Sobun, wi kan de seiker taki Yehovah o sorgu wi!

9. San wi kan leri fu na ondrofenitori fu wan trowpaar?

⁹ Luku wan ondrofenitori di e sori fa Yehovah kan sorgu taki wi e kisi den sani di wi abi fanowdu. Wan trowpaar di de na ini a furuten diniwroko ben e rèi na ini na owru wagi fu den fu go teki wan tu sisa fu tyari den go na wan fu den konmakandra fu wi. Den sisa disi ben e tan na ini wan loweman-kampu. A brada taki: „Baka a konmakandra wi kari den sisa kon na wi oso fu kon nyan wan sani nanga wi. Ma wi ben frigiti taki wi no ben abi noti fu gi den.” San a trowpaar ben o du? A brada taki moro fara: „Di wi doro wi oso, tu bigi saka nanga nyanyan-sani ben de na wi mofodoro. Wi no sabi suma ben poti den drape. Na Yehovah ben sorgu gi wi.” No langa baka dati, a wagi fu a trowpaar disi kon broko. Den ben abi a wagi fanowdu fu go na ini preikiwroko, ma den no ben abi moni fu meki en. Di den tyari en go na wan monteur fu luku en, wan man kon drape, dan a aksi: „Suma abi a wagi?” A brada taigi en taki na en wagi èn taki a ben musu meki. A man piki en: „A no abi trobi. Mi frow wani sowan wagi èn a musu abi precies a sèm kloru. Omeni yu e seri en?” Na so a brada feni nofo moni fu bai wan tra wagi. A taki: „Yu kan frustan fa wi ben e firi na a kaba fu a dei. Wi ben sabi taki a sani disi no pasa somaar. Ma na Yehovah ben yepi wi.”

10. Fa Psalm 37:5 e yepi wi fu no broko wi ede moro nanga san wi abi fanowdu fu tan na libi?

 ¹⁰ Te wi e arki Yesus, a moro bun skapuman èn wi no e broko wi ede tumusi nanga san wi abi fanowdu fu tan na libi, dan wi kan de seiker taki Yehovah o sorgu wi (Leisi Psalm 37:5; 1 Petr. 5:7). Denki den situwâsi di kari na ini  paragraaf 5. Kande te nanga now, Yehovah sorgu gi yu osofamiri fu di a gi na osofamiri-edeman a krakti fu wroko gi a moni di un abi fanowdu, noso fu di a gi yu na okasi fu feni wan wroko. Ma efu na osofamiri-edeman no man du dati moro noso efu yu lasi yu wroko, dan awinsi fa a no fa, Yehovah o sorgu gi yu. Meki wi luku wan tra sani now di a moro bun skapuman taki dati wi no musu du moro.

11. Soleki fa Mateyus 7:1, 2 e sori, dan san Yesus taki dati wi no musu du moro, ma fu san ede disi muilek son leisi?

¹¹ Leisi Mateyus 7:1, 2. Yesus ben sabi taki den arkiman fu en na sondu libisma èn taki nofo tron den ben e krutu trawan. Dati meki a taki: „No krutu sma moro.” Kande wi e du san wi man fu no krutu wi brada noso sisa. Ma wi alamala na sondu sma èn wi e meki fowtu. Sobun, te wi e si taki son leisi wi e krutu trawan, dan san wi musu du? Arki Yesus èn du ala san yu man fu no krutu trawan moro.

12-13. Te wi e luku a fasi fa Yehovah ben e si Kownu David, dan fa dati o yepi wi fu no krutu trawan moro?

¹² Wi kan leri wan moi sani te wi e denki na eksempre di Yehovah e gi. A e poti prakseri na a bun di sma e du. A ben du dati nanga Kownu David, wan man di ben e meki seryusu fowtu. Wan leisi a ben du hurudu nanga Batseiba èn a meki sma kiri a masra fu Batseiba srefi (2 Sam. 11:2-4, 14, 15, 24). A sani di David du, tyari omeni problema kon gi en nanga en osofamiri èn gi den tra wefi fu en (2 Sam. 12:10, 11). Wan tra leisi David sori taki a no ben e poti ala en frutrow tapu Yehovah èn a go teri omeni srudati ben de na ini a legre fu Israel, aladi a no ben abi primisi fu du dati. Kande a ben kisi bigifasi di a si o bigi en legre ben de èn a ben poti en frutrow na tapu a legre disi. San ben de a bakapisi? Wan takru siki kiri sowan 70.000 Israelsma!​—2 Sam. 24:1-4, 10-15.

¹³ Efu yu ben e libi na Israel na a ten dati, dan san yu ben o denki fu David? Yu ben o krutu en èn si en leki wan sma di Yehovah no ben musu gi pardon? Yehovah no ben e si en so. A ben sabi taki David sori bribi en heri libi langa èn taki a ben sari fu den fowtu di a meki. Dati meki Yehovah gi David pardon fu den seryusu sondu disi. Yehovah ben sabi taki David ben lobi en trutru èn taki a ben wani du san bun. Yu no breiti taki Gado e poti prakseri na den bun di wi e du?​—1 Kow. 9:4; 1 Kron. 29:10, 17.

14. San e yepi Kresten fu no krutu trawan moro?

¹⁴ Efu Yehovah e gi sondu libisma pardon, dan wi srefi musu gi sma pardon tu èn wi musu luku a bun di den e du. A makelek fu suku fowtu na trawan èn fu krutu den. Ma wan sma di lobi Yehovah o man libi bun nanga trawan, awinsi a e si den fowtu fu en. Wan grofu dyamanti no moi fu si. Ma te wan sma di abi frustan fu dyamanti e luku en, dan a o si moro leki san tra sma e si. A o si taki te a dyamanti kon grati èn a e brenki, a o abi furu  waarde. Neleki Yehovah nanga Yesus, meki wi poti prakseri na den bun di trawan e du, na presi fu poti prakseri na den fowtu fu den.

15. Te wi e luku a situwâsi fu tra sma, dan fa dati o yepi wi fu no krutu den?

¹⁵ San moro kan yepi wi fu luku a bun di trawan e du, na presi fu krutu den? Kande yu kan pruberi fu frustan na ini sortu situwâsi den de. Luku wan eksempre. Wan dei Yesus ben de na a tempel di a si wan pôti uma e poti tu pikin sensi na ini wan monikisi. Yesus no aksi fu san ede na uma no poti moro moni na ini a kisi. Na presi fu luku omeni moni na uma disi gi, a luku na ati fu en nanga a situwâsi pe a ben de na ini, èn a prèise na uma fu di a du ala san a ben man du.​—Luk. 21:1-4.

16. San yu kan leri fu na ondrofenitori fu Veronica?

¹⁶ Na ondrofenitori fu wan sisa di nen Veronica e sori wi o prenspari a de fu luku a situwâsi pe wan sma de na ini. Na ini a gemeente fu Veronica, wan mama ben de di no ben trow èn a ben abi wan boi. Veronica taki: „Mi ben denki taki den no ben e du so furu na ini a gemeente. Dati meki mi no ben e denki bun fu den. Ma wan dei mi nanga a mama disi wroko makandra na ini a preikiwroko. A taigi mi taki a boi fu en ben abi wan problema na frustan sei. A ben e du ala  san a man fu sorgu en boi èn fu yepi en fu tron wan mati fu Yehovah. Son leisi, te a boi fu en ben e siki, dan a ben abi fu go na wan konmakandra na ini wan tra gemeente.” Veronica taki: „Noiti mi ben sabi taki a ben de so hebi gi en. Now mi lobi a sisa disi so te èn mi e lespeki en moro fu ala san a e du fu dini Yehovah.”

17. San Yakobus 2:8 taigi wi fu du èn fa wi kan du dati?

¹⁷ San wi musu du te wi si taki wi krutu wan brada noso sisa? Hori na prakseri taki wi musu lobi wi brada nanga sisa. (Leisi Yakobus 2:8.) Wi musu begi Yehovah fayafaya tu fu aksi en efu a kan yepi wi fu no krutu sma moro. Wi kan pruberi fu du san wi aksi Yehovah na ini begi èn go taki nanga a sma di wi ben krutu. Disi o gi wi na okasi fu kon sabi a sma moro bun. Kande wi kan aksi en fu wroko makandra nanga wi na ini a preikiwroko, noso fu kon nyan wan sani nanga wi. Te wi kon sabi wi brada moro bun, dan wi kan pruberi fu du leki Yehovah nanga Yesus èn poti prakseri na den bun di a e du. Na so wi o leri fu no krutu sma moro èn wi o sori taki wi e arki san Yesus, a moro bun skapuman, ben taigi wi.

18. Fa wi kan sori taki wi e arki a sten fu Yesus, a moro bun skapuman?

¹⁸ Neleki fa wan skapu e arki a sten fu en skapuman, na so den bakaman fu Yesus e arki en sten tu. Efu wi e du ala san wi man fu no broko wi ede nanga san wi abi fanowdu fu tan na libi èn wi no e krutu sma moro, dan Yehovah nanga Yesus o blesi a muiti fu wi. Awinsi wi na fu a „pikin ipi” noso wi na „tra skapu”, meki wi tan arki Yesus, a moro bun skapuman, èn meki wi tan gi yesi na en (Luk. 12:32; Yoh. 10:11, 14, 16). Na ini a tra artikel, wi o luku ete tu sani di Yesus taigi den bakaman fu en fu du.