1. San a e du nanga wi te wi e denki dipi fu a têgo libi di Yehovah pramisi wi?

 YEHOVAH e pramisi taki den sma di e gi yesi na en o kisi „têgo libi” (Rom. 6:23). Te wi e denki dipi san Yehovah o gi wi, dan a no de fu taki dati wi e kon abi moro lobi gi en. Denki a tori: Wi hemel Papa lobi wi so te taki a wani gi wi a kado disi so taki noiti wi o prati fu en.

2. Fa a e yepi wi fu sabi taki Yehovah o gi wi têgo libi?

² Fu di wi sabi taki Gado o gi wi têgo libi, meki wi man horidoro te wi e kisi tesi. Awinsi den feanti fu wi wani kiri wi, toku wi no o tapu fu anbegi Yehovah. Fu san ede? Wan reide na taki wi sabi taki te wi e tan gi yesi na Yehovah te na dede, dan a o gi wi wan opobaka èn wi o abi a dyaranti taki wi no o dede noiti moro (Yoh. 5:28, 29; 1 Kor. 15:55-58; Hebr. 2:15). Fu san ede wi kan de seiker taki wi o man libi fu têgo? Kow go luku fu san ede.

3. Fu san ede wi kan de seiker taki Yehovah man gi wi têgo libi? (Psalm 102:12, 24, 27)

³ Wi sabi taki Yehovah man gi wi têgo libi fu di a libi e komoto fu en èn a e libi fu têgo (Ps. 36:9). Luku wan tu Bijbel vers di e sori taki Yehovah ben de ala ten kaba èn taki a o de ala ten. Psalm 90:2 e taki dati Yehovah „ben de Gado ala ten kaba”. Psalm 102 e taki wan srefi sortu sani. (Leisi Psalm 102:12, 24, 27.) Èn a profeiti Habakuk ben skrifi disi fu wi hemel Papa: „Sensi owruten yu  de, o Yehovah. Mi Gado, mi Santawan, yu no e dede noiti.”​—Hab. 1:12.

4. Wi musu broko wi ede efu wi no man frustan taki Yehovah ben de ala ten kaba? Fruklari dati.

⁴ Yu feni en muilek fu frustan taki Yehovah ben de „ala ten” kaba? (Yes. 40:28) Furu sma feni en muilek fu frustan a sani disi. Elihu ben taki fu Gado: „Nowan sma kan sabi o langa a de na libi kaba” (Yob 36:26). Ma a no fu di wi no man frustan wan sani, meki a sani dati no tru. Kande wi no man frustan finifini fa a du kon taki leti de, ma disi wani taki dati a no de trutru? Kwetikweti! Na so a de tu taki wi leki libisma no o man frustan finifini fa a kan taki Yehovah ben de ala ten kaba èn taki a o de ala ten. Ma toku a sani disi tru. A no fu di wi no man frustan ala sani fu wi Mekiman, meki wi musu denki taki den sani di abi fu du nanga en no tru (Rom. 11:33-36). Boiti dati, Gado ben de fosi hemel nanga grontapu kon de èn fosi a son nanga den stari kon de. Wi kan bribi den sani disi fu di Yehovah e gi wi a dyaranti taki „en na a Mekiman di gebroiki en krakti fu meki grontapu”. Iya, a ben de fosi a „bradi hemel leki wan krosi” (Yer. 51:15; Tori 17:24). San na wan tra reide fu san ede wi kan bribi taki wi man libi fu têgo?

5. Sortu howpu Adam nanga Eva ben abi?

⁵ Ala den libisani di Yehovah meki na grontapu ben o dede te fu kaba, boiti libisma. Yehovah ben gi libisma a moi howpu taki den no ben o dede noiti. Ma a ben gi Adam a warskow disi: „Ma fu a bon di nen ’Sabi san bun èn san ogri’, yu no musu nyan, bika na a dei di yu o nyan fu en, na dede yu o dede” (Gen. 2:17). Efu Adam nanga Eva ben gi yesi na Yehovah, dan den no ben o dede. Wi kan frustan taki te fu kaba Yehovah ben o gi den primisi fu nyan fu „a bon di nen ’Libi’”. Disi ben o gi den a dyaranti taki den ben o „libi fu têgo”. b​—Gen. 3:22.

6-7. (a) Sortu tra sani e sori taki Gado no ben meki libisma fu dede? (b) Sortu sani yu ben o wani du na ini a nyun grontapu? (Luku den prenki.)

⁶ Son sabiman kon si taki awinsi o furu sani wi kon sabi na ini wi libi, toku wi edetonton e wroko na so wan fasi taki wi man kon sabi moro leki dati. Na ini a yari 2010, wan koranti ben sori taki wi edetonton man teki sowan dri  milyun yuru fu TV programa (Scientific American Mind). Èn kande wi edetonton man teki moro leki dati srefi. Disi e sori taki Yehovah meki wi edetonton fu teki moro sani leki sani wi e kon sabi na ini 70 noso 80 yari.​—Ps. 90:10.

⁷ Boiti dati, Yehovah meki wi na so fasi taki wi wani tan na libi awinsi san pasa. Bijbel e taki dati Gado poti „têgo ten” na ini na ati fu libisma (Preik. 3:11). Dati na wan reide fu san ede wi e si dede leki wan feanti (1 Kor. 15:26). Efu wi e siki seryusu, dan wi o wakti nomo fu dede? Nôno. Nofo tron wi e go na datra noso wi e dringi dresi fu kon betre baka. Wi e du ala san wi man fu no dede. Èn te wan lobiwan fu wi dede, awinsi a sma dati yongu noso owru, dan wi e firi sari trutru, a no so? (Yoh. 11:32, 33) Wi kan tan leri sani fu ala ten èn wi wani tan na libi fu di wi lobi Mekiman meki wi na a fasi dati. Dati meki wi kan bribi taki a o man gi wi têgo libi. Ma moro reide de fu san ede wi kan bribi taki wi man libi fu têgo. Meki wi go luku wan tu fu den sani di Yehovah du na ini a ten di pasa èn na ini a ten disi fu sori taki a o du ete san a abi na prakseri gi libisma.

8. Sortu dyaranti Yesaya 55:11 e gi wi te a abi fu du nanga den sani di Yehovah abi na prakseri fu du gi wi?

⁸ Aladi Adam nanga Eva tyari dede kon gi den pikin fu di den sondu, toku Yehovah o du ete san a ben abi na prakseri biginbigin. (Leisi Yesaya 55:11.) A abi na prakseri ete fu gi sma di e gi yesi  na en têgo libi. Dati de krin fu si te wi e luku den sani di Yehovah taki èn du fu meki a pramisi fu en kon tru.

9. San Gado pramisi libisma? (Danièl 12:2, 13)

⁹ Yehovah pramisi taki a o gi den dedewan wan opobaka èn taki a o gi den na okasi fu libi fu têgo (Tori 24:15; Tit. 1:1, 2). A getrow man Yob ben sabi taki Yehovah no man wakti fu gi den dedewan wan opobaka (Yob 14:14, 15). A profeiti Danièl ben sabi taki libisma ben o kisi wan opobaka èn taki den ben o kisi na okasi fu libi fu têgo (Ps. 37:29; leisi Danièl 12:2, 13). Den Dyu na ini a ten fu Yesus ben sabi tu taki Yehovah ben o gi den getrow futuboi fu en „têgo libi” (Luk. 10:25; 18:18). Yesus ben e taki ibri leisi baka fu a pramisi disi èn en srefi ben kisi wan opobaka fu en Papa.​—Mat. 19:29; 22:31, 32; Luk. 18:30; Yoh. 11:25.

10. San den opobaka di pasa na ini owruten e sori? (Luku a prenki.)

¹⁰ Na Yehovah gi wi libi èn na en abi a makti fu gi sma wan opobaka. A ben gi a profeiti Elia a makti fu gi a manpikin fu na uma fu Sarfat wan opobaka (1 Kow. 17:21-23). Baka ten, Yehovah ben gi a profeiti Elisa a makti tu fu gi a manpikin fu na uma fu Sunem wan opobaka (2 Kow. 4:18-20, 34-37). Den opobaka dati nanga trawan sosrefi e sori taki Yehovah abi a makti fu gi sma libi baka. Di Yesus ben de na grontapu, dan a sori taki en Papa ben gi en a makti dati (Yoh. 11:23-25, 43, 44). Nownowde Yesus de na hemel èn a kisi „ala makti na ini hemel èn na grontapu”. Sobun, a man sorgu taki „ala den sma di de na ini den grebi” kisi libi baka èn taki den abi a howpu fu libi fu têgo.​—Mat. 28:18; Yoh. 5:25-29.

11. Fa a lusu-paiman e gi wi na okasi fu libi fu têgo?

¹¹ Fu san ede Yehovah gi pasi taki a lobi Manpikin fu en dede na wan ogri-ati fasi? Yesus ben taki fu san ede dati pasa: „Gado ben lobi grontapu so te, taki a gi en wan-enkri Manpikin, so taki ala sma di e bribi na ini en no sa dede, ma sa kisi têgo libi” (Yoh. 3:16). Fu di Gado gi en Manpikin leki lusu-paiman fu pai gi den sondu fu wi, meki wi man kisi têgo libi (Mat. 20:28). Na apostel Paulus ben fruklari a prenspari sani disi di a skrifi: „Fu di na wan libisma tyari dede kon, dan na wan libisma o meki taki dede sma opo baka tu. Neleki fa ala sma dede fu Adam ede, na so ala sma sa kon na libi baka tu fu Krestes ede.”​—1 Kor. 15:21, 22.

12. Fa Yehovah o meki den sani di a abi na prakseri gi wi kon tru?

¹² Yesus ben leri den bakaman fu en fu begi taki Gado Kownukondre kon èn taki a wani fu Gado pasa na grontapu (Mat. 6:9, 10). Gado wani tu taki libisma libi fu têgo na grontapu. Fu man du dati, Yehovah poti en Manpikin leki Kownu fu a Mesias Kownukondre. Gado tyari 144.000 sma fu grontapu kon na wán fu wroko makandra nanga Yesus fu meki a wani fu Gado kon tru.​—Openb. 5:9, 10.

13. San Yehovah e du nownow kaba èn san yu musu du?

¹³ Nownowde Yehovah e tyari „wan bigi ipi” sma kon na wán èn a e gi den leri fa fu libi leki borgu fu a Kownukondre fu en (Openb. 7:9, 10; Yak. 2:8). Aladi furu sma na ini a ten disi no e libi na  ini wánfasi fu di den no lobi makandra èn fu di den e feti, toku den sma fu a bigi ipi e du ala muiti fu no abi nowan bita-ati moro gi trawan. Den sani di den e du e sori taki na agersi fasi den e naki den feti-owru fu den kon tron plugu (Mika 4:3). Den no e go na feti pe furu sma e lasi den libi, ma na presi fu dati den e gi sma leri fu a tru Gado èn fu den sani di a abi na prakseri fu du. Na so den e yepi sma fu feni „a trutru libi” (1 Tim. 6:19). A kan taki famiriman fu den o gens den noso kande den o abi moni problema fu di den e horibaka gi Gado Kownukondre, ma Yehovah o sorgu gi den sani di den abi fanowdu (Mat. 6:25, 30-33; Luk. 18:29, 30). Den sani disi e gi wi a dyaranti taki Gado Kownukondre e tiri trutru èn taki a o tan du san Gado abi na prakseri.

14-15. Fa Yehovah o puru dede na pasi fu ala ten soleki fa a pramisi?

¹⁴ Nownowde Yesus e tiri leki Kownu fu Gado Kownukondre na hemel èn a o meki ala den sani di Yehovah pramisi kon tru (2 Kor. 1:20). Sensi 1914, Yesus e poti den feanti fu en na en ondro (Ps. 110:1, 2). Heri esi en nanga den sma di o tiri makandra nanga en o tyari wan kaba kon na ala ogri sma.​—Openb. 6:2.

 ¹⁵ Na a ten fu a Dusun Yari Tiri fu Yesus, den dedewan o kisi wan opobaka èn libisma di e gi yesi na Gado no o abi sondu moro te fu kaba. Baka te den sma di Yehovah o si leki reti-ati sma kisi a lasti tesi, dan den „o kisi grontapu èn fu têgo den o tan libi drape” (Ps. 37:10, 11, 29). „Dede na a lasti feanti di a o puru na pasi.” Na a ten dati wi o prisiri srefisrefi.​—1 Kor. 15:26.

16. San musu de a moro prenspari reide fu san ede wi e dini Yehovah?

¹⁶ Soleki fa wi si, dan a howpu di wi abi fu libi fu têgo na wan trutru howpu di Gado Wortu e gi wi. A howpu dati kan yepi wi fu tai hori na Yehovah na ini den muilek lasti dei disi. Ma efu wi wani taki Yehovah feni wi bun, dan wi no musu gi yesi na en soso fu di wi wani tan na libi. A moro prenspari reide fu san ede wi e tan gi yesi na Yehovah nanga Yesus, na fu di wi lobi den nanga wi heri ati (2 Kor. 5:14, 15). A lobi dati e meki taki wi e teki na eksempre fu den èn wi e fruteri trawan fu a howpu fu wi (Rom. 10:13-15). Te wi e leri fu no denki wisrefi nomo èn fu gi trawan sani nanga wi heri ati, dan wi o tron den sortu sma di Yehovah wani leki mati fu ala ten.​—Hebr. 13:16.

17. Sortu frantwortu ibriwan fu wi abi? (Mateyus 7:13, 14)

¹⁷ Wi o de na mindri den sma di o kisi têgo libi? Yehovah gi wi na okasi dati. Now wi musu bosroiti fu tan waka tapu a pasi di e tyari sma go na têgo libi. (Leisi Mateyus 7:13, 14.) Te wi o abi têgo libi, dan fa a libi o de? Wi o piki na aksi dati na ini a tra artikel.