1. Fa Yehovah e piki den begi fu den anbegiman fu en nofo tron?

 YU SABI taki Yehovah kan gebroiki yu fu piki a fayafaya begi fu wan sma? Yu kan yepi a sma awinsi yu na wan owruman, wan dinari ini a diniwroko, wan pionier, noso wan preikiman na ini a gemeente. Yu kan yepi tu awinsi yu yongu noso owru èn awinsi yu na wan brada noso wan sisa. Te wan sma di lobi Yehovah e suku yepi na en, dan a Gado fu wi nofo tron e gebroiki den owruman nanga tra getrow anbegiman fu „trowstu” a sma dati (Kol. 4:11). A de wan bigi grani fu dini Yehovah èn fu yepi den brada nanga sisa fu wi na a fasi disi! Wi kan yepi èn trowstu wi brada nanga sisa te wan siki panya na ala sei, te wan rampu pasa, noso te sma e frufolgu wi.

2. Fu san ede a kan muilek fu yepi trawan te wan siki panya na ala sei?

² Te wan siki panya na ala sei, dan a kan muilek gi wi fu yepi trawan. Fu eksempre, kande wi wani go luku den mati fu wi, ma a no ben o bun fu du dati. Kande wi wani kari den sma di no abi moni fu kon nyan nanga wi, ma dati srefi no man. Kande wi wani yepi trawan, ma a kan muilek gi wi fu di den sma fu wi eigi famiri siki noso e pina. Ma toku wi wani yepi wi brada nanga sisa èn Yehovah breiti te wi e du san wi man gi den (Odo 3:27; 19:17). San wi kan du?

3. San wi e leri fu den owruman na ini a gemeente fu Desi? (Yeremia 23:4)

³ San owruman kan du. Efu yu na wan owruman, dan kon sabi den skapu bun. (Leisi Yeremia 23:4.) Desi, wan sisa di wi ben taki fu en na ini na artikel na fesi, e  taki: „Den owruman na ini a preikiwroko grupu fu mi, ala ten ben e preiki nanga mi èn nanga trawan èn den ben e du tra prisiri sani tu nanga wi.” b A sani disi ben meki en moro makelek gi den owruman fu yepi Desi baka di a COVID-19 siki panya èn di wan tu famiriman fu en lasi libi fu di den kisi a siki disi.

4. Fu san ede den owruman ben man yepi Desi, èn san owruman kan leri fu disi?

⁴ Desi e taki: „Fu di den owruman ben de mi mati kaba, meki a ben moro makelek gi mi fu fruteri den fa mi ben e firi èn san ben e gi mi broko-ede.” San owruman kan leri fu disi? Sorgu gi den skapu fosi wan problema kon. De wan mati gi den. Efu wan siki panya èn yu no man go na den brada nanga sisa, dan pruberi fu taki nanga den na tra fasi. Desi e taki: „Son leisi difrenti owruman ben bel noso seni sms gi mi na a srefi dei. Den Bijbeltekst di den prati nanga mi, naki mi ati aladi mi ben sabi den tekst dati bun kaba.”

5. Fa owruman kan kon sabi san den brada nanga sisa abi fanowdu èn fa den kan yepi den?

⁵ Wan fasi fa yu kan kon sabi san den brada nanga sisa abi fanowdu, na te yu e poti aksi gi den sondro fu meki den firi syen (Odo 20:5). Den abi nofo nyanyan, dresi, noso tra sani? A de so taki den kan lasi den wroko noso taki den no man pai yuru-oso? Den abi yepi fanowdu fu lanti? Desi kisi yepi fu brada nanga sisa. Ma a moro prenspari sani di yepi en fu horidoro na a lobi di den owruman sori gi en èn a deki-ati di den gi en. A e taki: „Den owruman begi nanga mi. Aladi mi no man memre precies san den ben taki, toku mi sabi fa mi ben e firi. A ben de neleki Yehovah ben taigi mi: ’Mi de nanga yu.’”​—Yes. 41:10, 13.

6. San furu sma na ini a gemeente kan du fu yepi trawan? (Luku a fowtow.)

⁶ San trawan kan du. A tru taki den owruman musu yepi den brada nanga sisa na ini a gemeente. Ma Yehovah wani taki wi alamala gi trawan deki-ati èn taki wi yepi den (Gal. 6:10). Srefi efu wi du wan pikin sani gi wan sma di siki, a kan de wan bigi sani gi en. Wan pikin kan  seni wan karta noso wan tekening gi wan brada fu gi en deki-ati. Wan yonguwan kan go bai sani gi wan sisa. Trawan na ini a gemeente kan bori wan nyanyan gi wan sma di siki èn tyari en go na en oso. A no de fu taki dati te wan siki panya na ala sei, dan ala sma na ini a gemeente abi deki-ati fanowdu. Kande wi kan tan moro langa baka den konmakandra so taki wi kan taki nanga den brada nanga sisa, awinsi wi de na zaal noso na Internet. No frigiti taki den owruman abi deki-ati fanowdu tu. Son brada nanga sisa seni wan karta gi den owruman fu taki den tangi gi a tranga wroko di den du di wan siki panya. A de wan bun sani trutru te wi e du san wi man fu „tan gi makandra deki-ati èn tan yepi makandra”.​—1 Tes. 5:11.

7. Sortu problema kan kon te wan rampu pasa?

⁷ Te wan rampu pasa, dan wantronso wan sma en libi kan kenki. Son sma e lasi den sani di den abi, den oso, noso srefi sma di den lobi. Den ogri sani disi e pasa tu nanga den brada nanga sisa fu wi. San wi kan du fu yepi den?

8. San owruman nanga osofamiri-edeman kan du fosi wan rampu pasa?

⁸ San owruman kan du. Owruman, yepi den brada nanga sisa fu de srekasreka fosi wan rampu pasa. Sorgu taki ala sma na ini a gemeente sabi san den musu du fu kibri densrefi èn fa den kan meki kontakt nanga den owruman. Margaret di kari na ini na artikel na fesi, e taki: „Na a pisi ’Sani di a gemeente abi fanowdu’, den owruman fu wi ben warskow wi taki wan bigi faya ben kan panya na ini a kontren dati. Den taigi wi taki wi musu gwe wantewante te lanti taki dati noso te a situwâsi e kon moro ogri.” Den owruman ben gi den rai dati na a yoisti ten fu di feifi wiki baka dati wan bigi faya panya na ini a heri kontren. Te osofamiri-edeman e hori na Osofamiri Anbegi, dan den kan luku san ibri sma na ini na osofamiri musu du te wan rampu pasa. Efu yu nanga den pikin fu yu de srekasreka, dan unu no o bruya so makelek te wan rampu pasa.

9. Fa owruman kan seti sani bun fosi wan rampu pasa èn baka dati?

⁹ Efu yu na wan grupu-opziener, dan sorgu taki fosi wan rampu pasa yu abi a yoisti telefon nomru nanga adres fu ala den sma na ini yu preikiwroko grupu. Meki wan lijst èn sorgu taki ten na ten yu e luku efu ala sani bun ete. Te wan rampu pasa, dan a o moro makelek gi yu fu meki kontakt nanga ibri preikiman fu si san den abi fanowdu. Seni den sani disi wantewante gi a fesiman fu den owruman èn en o meki kontakt nanga a kring-owruman. Te den brada disi e wroko makandra, dan den kan yepi den preikiman na a moro bun fasi. Baka a bigi faya, a kring-owruman fu Margaret no sribi 36 yuru langa fu di a ben e orga sani nanga den owruman èn a ben pruberi fu meki kontakt nanga sowan 450 brada nanga sisa di ben musu gwe libi den oso (2 Kor. 11:27). Na so ala den sma disi feni wan presi fu tan.

10. Fu san ede owruman e si en leki wan prenspari sani fu sorgu gi den skapu? (Yohanes 21:15)

¹⁰ Den owruman abi a frantwortu fu gi den brada nanga sisa deki-ati èn fu yepi den wan di e broko den ede (1 Petr. 5:2). Te wan rampu pasa, dan a fosi sani di  den owruman musu du, na fu sorgu taki ibri brada nanga sisa de veilig èn taki den abi nyanyan, krosi, nanga wan presi fu tan. Ma srefi omeni mun baka a rampu, son brada nanga sisa o abi deki-ati nanga trowstu fanowdu. (Leisi Yohanes 21:15.) Harold, wan brada fu wan Bijkantoro Komte di miti furu brada nanga sisa di ben de na ini wan rampu e taki: „A e teki ten fu kisi yusrefi baka te wan rampu pasa. Son sma e bigin du den sani baka di den ben gwenti du, ma den kan tan prakseri wan lobiwan fu den di dede, den warti sani di den lasi, noso den ogri sani di miti den na ini a rampu. Te den e prakseri ala den sani disi, dan den kan firi sari baka. Disi no wani taki dati den no abi bribi, ma disi na wan firi di ala sma e kisi.”

11. San osofamiri abi fanowdu ete baka wan rampu?

¹¹ Owruman e teki a rai di Bijbel e gi fu „krei nanga sma di e krei” (Rom. 12:15). Den musu gi den sma di ben de na ini wan rampu a dyaranti taki Yehovah nanga den brada nanga sisa lobi den ete. Owruman o yepi osofamiri fu tan begi, fu tan studeri, fu tan go na den konmakandra èn na a preikiwroko. Owruman kan gi papa nanga mama deki-ati tu fu tan poti prakseri na den moro prenspari sani. Papa nanga mama, taigi yu pikin taki Yehovah o de den Mati ala ten èn taki a o yepi den ala ten. Èn fruteri den taki den abi brada nanga sisa na heri grontapu di de klariklari fu yepi den awinsi san e pasa.​—1 Petr. 2:17.

12. San trawan kan du fu yepi te wan rampu pasa? (Luku a fowtow.)

¹² San trawan kan du. Efu wan rampu pasa krosibei fu pe yu e libi, dan aksi den owruman san yu kan du fu yepi. Kande yu kan meki sma di ben musu gwe libi den oso noso den wan fu a bowgrupu tan na ini yu oso fu wan pisi ten. Kande yu kan tyari nyanyan nanga tra sani gi preikiman di de na nowtu. Efu wan rampu pasa na wan farawe presi, dan yu kan yepi tu. Fa? Yu kan begi gi den brada nanga sisa di ben de na ini a rampu (2 Kor. 1:8-11). Yu kan horibaka tu gi den sma disi te yu e gi bijdrage gi a wroko di e du na heri grontapu (2 Kor. 8:2-5). Efu yu man go na wan presi pe wan rampu pasa,  dan aksi den owruman san yu kan du fu yepi. Efu yu kisi a kari fu go yepi, dan den brada o leri yu wan tu sani so taki den o man gebroiki yu bun.

13. Sortu problema den brada nanga sisa fu wi abi na ini kondre pe lanti tapu a wroko fu wi?

¹³ Na ini kondre pe lanti tapu a wroko fu wi, a libi moro muilek fu di sma e frufolgu wi. Boiti dati, den brada nanga sisa na ini den sortu kondre dati abi moni problema, den e kon siki, èn den e lasi lobiwan na ini dede. Ma fu di a wroko tapu, meki a no makelek gi den owruman fu go luku den brada nanga sisa disi èn fu gi den deki-ati. Na dati pasa nanga Andrei, di ben kari na ini na artikel na fesi. Wan sisa na ini a preikiwroko grupu fu en ben abi moni problema. Bakaten, a kisi mankeri. A ben musu du wan tu oparâsi èn a no ben man wroko. Aladi a wroko fu wi ben tapu èn a COVID-19 siki ben de na ala sei, toku den brada du ala san den man fu yepi en. Yehovah si a muiti di den du.

14. Fa owruman kan sori taki den e frutrow tapu Yehovah?

¹⁴ San owruman kan du. Andrei begi èn a du ala san a ben man. Fa Yehovah yepi en? A gebroiki tra brada nanga sisa di ben abi okasi fu man du moro fu yepi a sisa. Sonwan fu den ben e tyari en go na datra. Trawan ben gi en moni. Yehovah meki den du san den ben man èn a blesi a muiti di den alamala du fu yepi a sisa (Hebr. 13:16). Owruman, te lanti tapu a wroko pe un de, dan aksi trawan fu yepi unu (Yer. 36:5, 6). San moro prenspari, na fu frutrow tapu Yehovah. A kan yepi yu fu sorgu gi den sani di yu brada nanga sisa abi fanowdu.

15. San wi kan du fu sorgu taki pratifasi no kon na wi mindri te sma e frufolgu wi?

¹⁵ San trawan kan du. Te lanti tapu a wroko na ini a kondre pe wi de, dan kande wi o abi fu kon makandra na ini moro pikin grupu. Fu dati ede a de tumusi prenspari fu libi bun nanga makandra. No meki Satan tyari pratifasi kon. No luku den fowtu fu yu brada nanga sisa èn pruberi fu lusu problema wantewante (Odo 19:11; Ef. 4:26). De klariklari  fu yepi makandra (Tit. 3:14). A yepi di a sisa di ben de na nowtu kisi, meki den sma na ini a preikiwroko grupu tron moro bun mati fu makandra. Den kon de leki wan famiri.​—Ps. 133:1.

16. Soleki fa Kolosesma 4:3, 18 e sori, dan fa wi kan yepi wi brada nanga sisa te sma e frufolgu den?

¹⁶ Dusundusun fu wi brada nanga sisa e tan dini Yehovah aladi lanti tapu a wroko na ini a kondre pe den de. Sonwan fu den de na strafu-oso fu a bribi fu den ede. Wi kan begi gi den nanga den famiri. Wi kan begi tu gi den tra brada nanga sisa di no e frede fu horibaka gi den aladi skowtu kan grabu den tu. Den e gi den brada nanga sisa disi deki-ati fu tan frutrow tapu Yehovah, den e gi den san den abi fanowdu, èn den e horibaka gi den te den musu go na fesi krutu. c (Leisi Kolosesma 4:3, 18.) No frigiti noiti taki den begi fu yu kan yepi ala den brada nanga sisa disi.​—2 Tes. 3:1, 2; 1 Tim. 2:1, 2.

17. Fa yu kan sreka nownow kaba gi frufolgu?

¹⁷ Yu nanga yu famiri kan sreka nownow kaba gi frufolgu (Tori 14:22). No go prakseri ala sortu ogri sani di kan pasa. Na presi fu dati, kon moro krosibei na Yehovah èn yepi yu pikin fu du a srefi. Efu son leisi yu e broko yu ede, dan fruteri Gado ala san de na tapu yu ati (Ps. 62:7, 8). Taki nanga yu osofamiri fu den difrenti sani di e sori fu san ede unu kan frutrow na en tapu. d Neleki fa a e yepi yu pikin te yu e sreka gi wan rampu, na so a e yepi den te yu e sreka gi frufolgu. Den o abi deki-ati èn den no o bruya fu di yu leri den fu frutrow tapu Yehovah.

18. San o pasa na ini a ten di e kon?

¹⁸ A freide fu Gado e gi wi a dyaranti taki sani o waka bun nanga wi (Fil. 4:6, 7). Na so Yehovah e yepi wi fu no bruya te siki panya, te rampu pasa, èn te sma e frufolgu wi. A e gebroiki den owruman di e wroko tranga fu yepi wi èn a e gi wi alamala a grani fu yepi makandra. A freide di wi abi now o yepi wi fu pasa moro bigi tesi na ini a ten di e kon, a o yepi wi srefi fu pasa a „bigi banawtu” (Mat. 24:21). Na a ten dati wi no musu meki noti pori a freide fu wi èn wi musu yepi trawan fu tan abi freide tu. Ma baka a bigi banawtu wi no o kisi nowan problema moro di kan frede wi. Na a ten dati trutru freide o de fu têgo, wan sani di Yehovah ben wani gi wi sensi ten.​—Yes. 26:3, 4.