1. San na „a freide fu Gado” èn fa a e yepi wi? (Filipisma 4:6, 7)

 WAN freide de di furu sma na grontapu no sabi. Dati na „a freide fu Gado”, noso a korostu firi di sma e kisi te den de mati fu wi hemel Papa. Te wi abi a freide fu Gado, dan wi de seiker taki sani o waka bun nanga wi. (Leisi Filipisma 4:6, 7.) Wi de bun mati fu sma di lobi en. Boiti dati, wi na bun mati fu „a Gado fu freide” (1 Tes. 5:23). Te wi sabi wi hemel Papa, te wi e frutrow na en tapu èn te wi e gi yesi na en, dan a freide fu Gado kan yepi wi fu no frede te wi e kisi fu du nanga muilek situwâsi.

2. Fu san ede wi kan de seiker taki wi kan abi a freide fu Gado?

² A tru taki wi kan abi freide fu Gado na ini muilek ten? Kande wan siki panya, kande wan rampu pasa, kande dyugudyugu de na ini a kondre, noso kande sma e frufolgu wi. Den seryusu problema disi kan meki wi frede. Toku Yesus ben gi den bakaman fu en a rai disi: „No broko un ede èn no frede” (Yoh. 14:27). A moi fu si taki den brada nanga sisa fu wi gi yesi na a rai fu Yesus. Yehovah yepi den fu kon abi freide aladi den hebi tesi disi ben e miti den.

3. Fa wi kan lasi a freide fu wi te wan siki panya?

³ Te wan siki panya, dan dati kan kenki sma heri libi. Luku san pasa nanga furu sma di a COVID-19 siki panya. Wan ondrosuku sori taki bun furu sma no ben man sribi bun. Furu sma ben e broko den ede, den ben e firi brokosaka srefisrefi, den ben e dringi sopi pasa marki, den ben e gebroiki drugs, den ben e du ogri na ini na osofamiri, èn den ben wani kiri densrefi. Efu wan siki panya na ini a kontren pe yu e tan, dan san yu kan du fu kon abi a freide  fu Gado èn fu no broko yu ede tumusi?

4. Fu san ede wi no o frede te wi sabi san Yesus ben taki fu den lasti dei?

⁴ Yesus ben taki dati na ini den lasti dei, takru siki ben o de „na ini a wan presi baka a trawan” (Luk. 21:11). Fu san ede a bun taki wi sabi a sani disi? Wi no e skreki te siki e panya. Wi e frustan taki den sani disi e pasa soifri soleki fa Yesus ben taki. Dati meki wi o gi yesi na a rai di Yesus ben gi den sma di e libi na ini den lasti dei. A ben taki: „No meki den sani disi skreki unu.”​—Mat. 24:6.

5. (a) Te wan siki panya, dan fa Filipisma 4:8, 9 e yepi wi fu kon sabi gi san wi musu begi? (b) Fa wan sisa kisi wini fu di a ben e arki audio fu Bijbel, èn san wi kan leri fu na eksempre fu en?

⁵ Te wan siki panya, dan nofo tron sma e broko den ede èn den e frede srefisrefi. Na dati pasa nanga wan sisa di nen Desi. b Di en omu, neef, nanga a datra fu en dede fu COVID-19, dan a ben frede taki en srefi ben o kisi a siki èn taki a ben o meki en mama di ben owru kaba kisi en tu. A ben e broko en ede tu taki a ben o lasi a wroko fu en èn a no ben sabi fa a ben o man bai nyanyan èn pai yuru-oso. Fu di a ben e tan broko en ede nanga den sani disi, meki a no ben man sribi te neti. Ma te fu kaba Desi no ben e broko en ede moro. Fu san ede? A begi Yehovah èn a aksi en fu yepi en fu no bruya èn fu denki bun sani. (Leisi Filipisma 4:8, 9.) Wan tra sani di a ben du, na taki a ben e arki audio fu Bijbel. A ben de neleki Yehovah srefi ben e taki nanga en. Desi taki: „Den sten fu den leisiman fu na audio ben e trowstu mi èn disi memre mi taki Yehovah e broko en ede nanga mi.”​—Ps. 94:19.

6. Te yu e studeri èn te yu e go na den konmakandra, dan fa dati o yepi yu?

⁶ Te wan siki panya, dan son leisi wi no man du ala den sani di wi ben gwenti du fosi. Den ondrofenitori na ini den buku nanga den felem fu wi o memre yu taki den brada nanga sisa fu yu e tan getrow na Gado awinsi den srefi sortu problema disi e miti den (1 Petr. 5:9). Den konmakandra o yepi yu fu prakseri tori fu Bijbel di e gi deki-ati. Den o gi yu na okasi tu fu gi trawan deki-ati èn fu kisi deki-ati (Rom. 1:11, 12). Te yu e prakseri fa Yehovah yepi den anbegiman fu en di den ben siki, di den ben e broko den ede, noso di den ben e firi leki den de den wawan, dan dati o tranga a bribi fu yu èn yu o de seiker taki a o yepi yu tu.

7. San yu kan leri fu na apostel Yohanes?

⁷ Suku fasi fu taki nanga yu brada nanga sisa. Te wan siki panya, dan a kan de  fanowdu taki wi no e go tumusi krosibei fu trawan, srefi efu na wi brada nanga sisa. Na ini den sortu situwâsi dati, yu ben kan firi leki na apostel Yohanes. A ben e angri fu si en mati Gayus (3 Yoh. 13, 14). Ma toku Yohanes ben e frustan taki a no ben o man si Gayus fu wan pisi ten. Dati meki Yohanes du san a ben man du. A skrifi wan brifi gi Gayus. Efu yu no man go na den brada nanga sisa fu yu, dan pruberi fu bel den, video call nanga den, noso app den. Te yu e du muiti fu taki nanga den brada nanga sisa fu yu, dan dati o yepi yu fu no firi leki yu de yu wawan èn yu no o broko yu ede so furu moro. Efu yu e broko yu ede tumusi, dan suku yepi na den owruman so taki den kan gi yu deki-ati.​—Yes. 32:1, 2.

8. San kan pasa nanga yu te wan rampu pasa?

⁸ Efu oiti yu ben de na wan presi pe wan frudu pasa, wan gronseki, noso wan bigi faya, dan kande yu e tan broko yu ede nanga sani fu wan langa pisi ten baka a rampu. Efu yu lasi wan lobiwan na ini dede noso yu lasi yu oso nanga den sani fu yu, dan kande yu e sari srefisrefi, kande yu no sabi san yu musu du, noso kande yu ati e bron srefi. Ma te yu e kisi den firi disi, dan dati no wani taki dati yu lobi gudu noso taki yu bribi swaki. Yu pasa wan hebi tesi èn kande son sma e frustan fa yu e firi (Yob 1:11). Ma toku yu kan firi bun baka. San kan yepi yu?

9. San Yesus taki fu sreka wi gi rampu?

⁹ Hori na prakseri san Yesus ben taki. Son sma na ini a grontapu disi e denki taki noiti wan rampu o miti den. Ma wi sabi taki moro nanga moro rampu o pasa èn sonwan fu den sani disi kan miti wi tu. Yesus ben taigi den bakaman fu en taki „bigi gronseki o de” èn taki tra rampu ben o pasa fosi a kaba kon (Luk. 21:11). A ben taki tu dati „moro nanga moro sma o du ogri”. Wi kan si dati krin na ini a ten disi fu di moro ogridu de èn sma e du ala sortu ogri-ati sani fu gens tirimakti (Mat. 24:12). Yesus noiti no taki dati den sortu sani disi ben o pasa soso nanga den sma di no e dini Yehovah. Fu taki en leti, rampu miti furu fu den futuboi fu Yehovah (Yes. 57:1; 2 Kor. 11:25). Kande Yehovah no o kibri wi na wan wondru fasi gi ala den rampu disi, ma wi kan de seiker taki a o gi wi san wi abi fanowdu fu no bruya.

10. Fu san ede a de so taki wi e sori bribi te wi e sreka nownowde gi wan rampu? (Odo 22:3)

¹⁰ A o moro makelek fu no bruya efu wi sreka wisrefi na fesi èn efu wi sabi san wi musu du te wan rampu pasa. Ma disi e sori taki wi no abi bribi? Nôno, dati no de so. Fu taki en leti, te wi e sreka wisrefi na fesi gi wan rampu, dan dati e sori taki wi e bribi taki Yehovah o man sorgu gi wi. Fa so? Gado Wortu e gi wi a rai fu sreka wisrefi gi rampu di kan pasa. (Leisi Odo 22:3.) Na organisâsi fu Gado gwenti gi wi deki-ati fu sreka wisrefi gi wan rampu. Den e du dati na ini den tijdschrift, na den konmakandra, èn te den e seni brifi gi wi fu meki sani bekènti. c Wi e frutrow tapu Yehovah? Efu wi e du dati, dan wi o teki a deki-ati dati nownowde fosi wan rampu pasa.

11. San yu e leri fu na eksempre fu Margaret?

¹¹ Luku na eksempre fu wan sisa di nen Margaret. Lanti ben taigi en fu gwe libi en oso wantewante fu di wan bigi faya  ben panya na a kontren dati. Fu di so furu sma ben e pruberi fu lowe na a srefi ten, meki den pasi ben druk èn nowan sma ben kan rèi go doro. Blaka smoko ben lai èn Margaret no ben man komoto na ini en wagi fu wan pisi ten. Ma a ben man gwe te fu kaba fu di a ben sreka ensrefi na fesi. A ben abi wan karta na ini en tas di a ben kan gebroiki fu feni wan tra pasi fu gwe. A ben rèi a pasi dati kaba fu kan sabi pe a musu go efu wan rampu ben o pasa. Fu di Margaret ben sreka ensrefi bun na fesi, meki a ben man pasa a rampu dati sondro taki wan sani pasa nanga en.

12. Fu san ede wi e gi yesi te wi e kisi rai fa fu kibri wisrefi te wan rampu pasa?

¹² Son leisi lanti kan poti wan tu wet fu kibri wi nanga tra sma. Kande den e poti wan yuru te sma no mag de na strati moro, kande den e taki dati sma musu gwe wantewante fu di wan rampu pasa, noso den kan aksi sma fu du tra sani so taki sani kan waka na wan orga fasi. Son sma no e gi yesi na den sani disi di lanti e taki fu di den no wani libi den sani fu den na baka. Ma san Kresten e du? Bijbel e taigi wi: „Saka unsrefi na ondro den wan di e tiri unu. Du dati fu Masra ede: awinsi na ondro wan kownu, fu di en na a moro hei sma, noso na ondro granman di a seni kon” (1 Petr. 2:13, 14). Na organisâsi fu Gado e gi rai tu fu kibri wi. Nofo tron den brada e memre wi fu gi den owruman fu wi, a yoisti telefon nomru nanga adres fu wi so taki den kan bel wi te wan rampu pasa. Yu du dati kaba? Noso kande den e taigi wi fu tan na oso noso fu lowe go na wan tra presi, kande den e taki pe wi kan feni sani di wi abi fanowdu te wan rampu pasa, noso kande den e taigi wi pe èn o ten wi kan yepi trawan. Efu wi no e gi yesi na den rai disi, dan a kan taki wi e poti wi eigi libi noso a libi fu den owruman na ini kefar. Hori na prakseri taki den getrow owruman disi abi a frantwortu fu sorgu èn fu luku wi (Hebr. 13:17). Margaret e taki: „Mi e bribi trutru taki mi ben man kibri mi libi fu di mi arki den owruman nanga den rai fu na organisâsi.”

13. San yepi furu Kresten fu tan abi prisiri nanga freide di den ben musu gwe libi den oso?

¹³ Furu brada nanga sisa di ben musu gwe libi den oso fu di wan rampu pasa  noso fu di dyugudyugu ben de na ini a kondre fu den, du ala san den man fu fiti densrefi na a nyun situwâsi fu den èn fu du moro gi Yehovah. Den brada nanga sisa disi e tan „preiki a bun nyunsu” awinsi pe den e go, neleki den fosi Kresten di ben panya go na ala sei fu di sma ben e frufolgu den (Tori 8:4). A preikiwroko yepi den fu poti den prakseri na a Kownukondre na presi fu a muilek situwâsi fu den. Disi meki taki den ben man tan de nanga prisiri èn den ben kan tan abi freide.

14. San kan pasa nanga wi te sma e frufolgu wi?

¹⁴ Te sma e frufolgu wi, dan kande wi no o man du furu fu den sani moro di e yepi wi fu de rustig. Wi de koloku te wi de fri fu kon makandra, fu preiki, èn fu du den tra sani di wi gwenti du sondro fu frede taki skowtu o grabu wi. Efu wi no de fri fu du den sani dati, dan wi kan bigin broko wi ede tumusi èn wi kan frede. Den sortu firi disi no fowtu. Ma toku wi musu luku bun. Yesus ben taki dati a kan pasa taki den bakaman fu en gwe libi en te sma e frufolgu den (Yoh. 16:1, 2). Sobun, fa wi kan tan abi freide te sma e frufolgu wi?

15. Fu san ede wi no musu frede taki sma o frufolgu wi? (Yohanes 15:20; 16:33)

¹⁵ Gado Wortu e taigi wi: „Sma o frufolgu ala den wan di wani dini Gado fayafaya leki bakaman fu Krestes Yesus” (2 Tim. 3:12). Wan brada di nen Andrei ben feni en muilek fu bribi a sani dati di lanti ben tapu a wroko fu wi na ini a kondre fu en. A ben prakseri: ’Bun furu Kotoigi de dya na ini a kondre. Fa lanti kan grabu wi alamala?’ Ma a prakseri disi no ben meki Andrei abi freide, ma a ben e broko en ede heri dei. Tra Kotoigi ben e frutrow tapu Yehovah èn den no ben e prakseri taki skowtu no ben o hori den. Den ben sabi taki skowtu ben kan hori den, ma den no ben e broko den ede so leki Andrei. Sobun, Andrei bosroiti fu denki leki den èn a poti en frutrow tapu Yehovah. Heri esi a no ben e broko en ede moro èn now a e prisiri aladi furu problema de ete. Wi kan du dati tu. Yesus  ben taigi wi taki wi musu fruwakti fu kisi frufolgu, ma a ben taigi wi tu taki wi kan tan getrow na Gado.​—Leisi Yohanes 15:20; 16:33.

16. Na suma wi musu gi yesi te sma e frufolgu wi èn fu san ede?

¹⁶ Te lanti tapu a wroko fu wi noso te wi no man du a wroko fu wi soleki fa wi ben gwenti, dan a kan taki a bijkantoro nanga den owruman o taigi wi san fu du. Den o du disi fu kibri wi, fu sorgu taki wi e tan kisi den leri fu Bijbel èn fu yepi wi fu tan preiki so furu leki wi man. Du ala san yu man fu gi yesi na den rai di yu e kisi, awinsi yu no e frustan krin fu san ede yu kisi den (Yak. 3:17). Boiti dati, noiti wi musu fruteri sma sani fu wi brada nanga sisa noso fu den sani di a gemeente e du, efu den sma dati no abi a reti fu sabi den sani dati.​—Preik. 3:7.

17. Te wi e luku na eksempre fu den apostel, dan san wi musu du?

¹⁷ Wan fu den moro prenspari reide fu san ede Satan e feti nanga a pipel fu Gado, na fu di den „kisi a wroko fu kotoigi fu Yesus” (Openb. 12:17). No meki Satan nanga a grontapu fu en tapu skreki gi yu. Te wi e preiki gi sma èn te wi e gi den leri aladi sma e frufolgu gi wi, dan dati o gi wi prisiri èn wi o abi freide. Na a ten fu den fosi Kresten, den Dyu tiriman ben taigi den apostel fu tapu nanga a preikiwroko, ma den reti-ati man dati bosroiti fu tan gi yesi na Gado. Den tan du a preikiwroko èn a wroko dati ben gi den prisiri (Tori 5:27-29, 41, 42). A no de fu taki dati te wi no de so fri fu preiki, dan wi musu luku bun te wi e du wroko dati (Mat. 10:16). Ma te wi e du ala san wi man, dan wi o abi freide fu di wi e du a wani fu Yehovah èn fu di wi e preiki a boskopu di e gi sma libi.

18. Fu suma wi kan kisi trutru freide?

¹⁸ Wi kan abi a frutrow taki wi kan abi freide, awinsi sortu problema e miti wi. Na den momenti dati wi musu hori na prakseri taki a freide di wi abi fanowdu na a freide fu Gado èn Yehovah wawan man gi wi dati. Frutrow na en tapu te wan siki panya, te wan rampu pasa, noso te sma e frufolgu yu. Tan krosibei fu na organisâsi èn tan prakseri a moi ten di e wakti yu. Te yu e du dati, dan ’a Gado fu freide o de nanga yu’ (Fil. 4:9). Na ini a tra artikel wi o luku fa wi kan yepi wi Kresten brada nanga sisa di e kisi tesi fu abi a freide fu Gado.