1. San Yesus taigi na ogriman di ben e anga na en sei syatu fosi a dede? (Lukas 23:39-43)

 YESUS nanga den tu ogriman di ben e anga na ala tu sei fu en ben de fu dede èn den ben e pina srefisrefi (Luk. 23:32, 33). A de krin taki den tu ogriman disi no ben de disipel fu Yesus, fu di den ben e spotu en (Mat. 27:44; Mark. 15:32). Ma wan fu den man disi kenki a fasi fa a ben e denki. A taki: „Yesus, memre mi te yu kon na ini yu Kownukondre.” Yesus taigi en: „Fu tru, mi e taigi yu tide: Yu o de nanga mi na ini Paradijs.” (Leisi Lukas 23:39-43.) Noti e sori taki a man disi ben poti bribi na ini boskopu fu „a Kownukondre fu hemel”, di Yesus ben preiki. Èn Yesus noiti no ben taki dati a man disi ben o de na ini a Kownukondre dati (Mat. 4:17). Fu taki en leti Yesus ben e taki fu a Paradijs di o de na grontapu na ini a ten di e kon. Fu san ede wi kan taki dati?

2. Fa wi du sabi taki na ogriman di ben sori berow ben de wan Dyu?

² Soleki fa a sori, dan na ogriman di ben sori berow ben de wan Dyu. Na ogriman dati taigi a trawan: „Yu no e lespeki Gado srefi, now di yu kisi a srefi krutu?” (Luk. 23:40) Den Dyu ben e anbegi wán Gado, ma den tra pipel ben e anbegi furu gado (Eks. 20:2, 3; 1 Kor. 8:5, 6). Efu den ogriman dati ben de fu den tra pipel, dan kande a tra ogriman ben o aksi: „Yu no e lespeki den gado srefi?” Boiti dati, Gado no ben seni Yesus go na den sma fu tra kondre, ma soso na „den lasi skapu fu a pipel fu Israel” (Mat. 15:24). Gado ben meki den Israelsma kon sabi taki a ben o gi den dedewan wan opobaka. A kan taki na ogriman di ben sori berow ben sabi disi. Boiti dati, a sani di a taki e sori taki a ben e bribi dati Yehovah ben o gi Yesus wan opobaka fu tiri na ini a Kownukondre fu Gado. Soleki fa a  sori, dan a man dati ben e howpu taki Gado ben o gi en wan opobaka tu.

3. San na ogriman ben e prakseri kande di Yesus taki fu a Paradijs? Fruklari dati. (Genesis 2:15)

³ Efu na ogriman di ben sori berow ben de wan Dyu, dan a ben o sabi fu Adam nanga Eva èn fu a Paradijs pe Yehovah ben poti den. Sobun, a musu de so taki na ogriman ben e bribi taki a Paradijs di Yesus ben taki fu en ben o de wan moi dyari dyaso na grontapu.​—Leisi Genesis 2:15.

4. San wi musu prakseri te wi e luku san Yesus ben taigi wan fu den ogriman?

⁴ Den sani di Yesus taigi na ogriman musu meki wi prakseri fa a libi o de na ini Paradijs. Fu taki en leti, wi kan kon sabi fa a libi o de te wi e luku fa sani ben de na a ten di Kownu Salomo ben e tiri. Bijbel e taki dati Yesus bigi moro Salomo. Dati meki wi kan fruwakti taki Yesus nanga den sma di o tiri makandra nanga en o meki grontapu tron wan moi tanpresi (Mat. 12:42). A de krin taki den „tra skapu” musu wani kon sabi san den musu du fu man libi fu têgo na ini Paradijs.​—Yoh. 10:16.

5. Fa yu denki taki a libi o de na ini Paradijs?

⁵ Fa yu denki taki a libi o de na ini Paradijs? Kande yu e prakseri wan moi presi pe sma kan go koiri, leki a dyari fu Eden (Gen. 2:7-9). Kande yu sabi a profeititori fu Mika ete di e taki fu a pipel fu Gado: „Ibriwan sma o sidon na ondro en eigi droifibon nanga en eigi figabon” (Mika 4:3, 4). Kande yu man memre Bijbel vers di e taki dati bogobogo nyanyan o de (Ps. 72:16; Yes. 65:21, 22). Sobun, kande yu e si yusrefi na ini wan moi dyari pe yu e sidon na wan tafra di lai nanga switi nyanyan. Kande yu man smeri a switi smeri fu bon nanga bromki. Èn a musu de so taki yu man yere fa famiriman, mati, nanga den wan di kisi wan opobaka, e lafu èn e prisiri nanga makandra. A sani disi a no wan dren nomo. Yu kan de seiker taki ala den sani disi o pasa na grontapu. Na ini Paradijs, wi o du wroko tu di o gi wi prisiri.

6. San wi o du na ini Paradijs? (Luku a prenki.)

⁶ Yehovah meki wi na so wan fasi taki wi man prisiri nanga a wroko di wi e du (Preik. 2:24). A no de fu taki dati na a ten fu a Dusun Yari Tiri, wi o abi furu fu du. Den sma di o pasa a bigi banawtu libilibi èn den milyunmilyun sma di o kisi wan opobaka, o abi krosi, nyanyan nanga wan tanpresi fanowdu. A o gi wi prisiri trutru fu sorgu gi den sani dati. Neleki fa Adam nanga Eva ben musu sorgu gi a dyari pe den ben e tan, na so wi o abi a grani fu meki grontapu tron wan paradijs. Prakseri  sosrefi den milyunmilyun sma di o kisi wan opobaka èn di no sabi furu fu Yehovah èn fu den sani di a o du. A o gi wi prisiri trutru fu gi den sma dati leri. A o de wan moi sani tu fu yepi den futuboi fu Yehovah di ben e libi langa ten fosi Yesus, fu kon sabi san pasa sensi den dede.

7. Fu san wi kan de seiker èn fu san ede?

⁷ Wi kan de seiker taki te wi de na ini Paradijs, dan wi o libi na ini freide, wi o abi ala san wi abi fanowdu èn ala sani o waka na wan orga fasi. Fu san ede? Fu di Yehovah sori wi kaba fa a libi o de te en Manpikin tiri hemel nanga grontapu. A tori fu Kownu Salomo na wan eksempre fu dati.

8. Fa den wortu di skrifi na Psalm 37:10, 11, 29 kon tru na ini owruten? (Luku „Aksi fu leisiman” na ini A Waktitoren disi.)

⁸ Nanga yepi fu santa yeye, Kownu David ben skrifi fa a libi ben o de te wan koni kownu di ben o gi yesi na Gado ben o tiri. (Leisi Psalm 37:10, 11, 29.) Wi gwenti leisi Psalm 37:11 gi sma te wi e taki fu a Paradijs di o kon. Wi abi bun reide fu du dati fu di Yesus ben taki fu a tekst dati na ini a Bergitaki. Disi e sori taki a tekst dati o kon tru na ini a ten di e kon (Mat. 5:5). Ma a sani di David taki ben e sori tu fa a libi ben o de na a ten fu Kownu Salomo. Di Salomo ben e tiri Israel, dan a pipel fu Gado ben e libi na ini wan kondre di „lai merki nanga oni”. Disi wani taki dati den ben e libi na ini freide èn sani ben e go bun nanga den. Gado ben taki: „Efu unu tan gi yesi na den wèt fu mi . . . mi o meki sani waka bun gi unu na ini a kondre èn unu o sribi sondro fu frede wan sma” (Lef. 20:24; 26:3, 6). Den pramisi dati kon tru na a ten di Salomo ben e tiri (1 Kron. 22:9; 29:26-28). Èn Yehovah ben pramisi den taki ogri sma di ben e anbegi falsi gado ’no ben o de moro’ (Ps. 37:10). Dati meki den wortu di skrifi na Psalm 37:10, 11, 29 kon tru na ini owruten èn den o kon tru sosrefi na ini a ten di e kon.

9. San na umakownu fu Skeiba ben taki fu a tiri fu Kownu Salomo?

 ⁹ Na a ten di Salomo ben de kownu, dan na umakownu fu Skeiba yere fa a pipel fu Israel ben abi freide èn fa sani ben e waka bun nanga den. Na umakownu dati di ben de fu wan farawe kondre go na Yerusalem fu si nanga en eigi ai fa sani ben de drape (1 Kow. 10:1). Baka di a luku fa sani de na ini a kownukondre fu Salomo, dan a taki: „Sma no ben fruteri mi afu srefi! . . . Koloku fu den sma fu yu. Koloku fu den futuboi disi di e tanapu na yu fesi ala ten, e arki den koni sani di yu e taki!” (1 Kow. 10:6-8) Ma a fasi fa sani ben de na a ten di Salomo ben e tiri, ben de soso wan eksempre fu den sani di Yehovah o du gi libisma te en Manpikin, Yesus, o tiri.

10. Na sortu fasi Yesus bigi moro Salomo?

¹⁰ Yesus bigi moro Salomo na ala fasi. Salomo ben de wan man di ben abi sondu èn a ben meki seryusu fowtu di tyari bigi problema gi Gado pipel te fu kaba. Ma Yesus na wan Tiriman di bun moro ala trawan èn a no e meki fowtu (Luk. 1:32; Hebr. 4:14, 15). Yesus tan gi yesi na Yehovah aladi Satan ben e tyari hebi tesi kon na en tapu. Krestes sori taki a no o sondu noiti èn taki a no o du nowan sani di o tyari problema kon gi den reti-ati bakaman fu en. A de a moro bun Kownu di wi kan abi.

11. Sortu yepi Yesus o kisi?

¹¹ Yesus nanga den 144.000 sma di o tiri makandra nanga en o sorgu gi libisma èn den o meki a wani fu Yehovah pasa na grontapu (Openb. 14:1-3). Den sma disi kisi furu tesi nanga problema di den ben e libi na grontapu èn dati meki den o man frustan den sma di o libi na grontapu. San den tiriman disi o du?

12. Sortu wroko Yehovah o gi den 144.000 sma di o tiri makandra nanga Yesus?

¹² A wroko di Yesus nanga den 144.000 tiriman musu du, bigi moro a wroko di Salomo ben kisi. Kownu Salomo ben musu sorgu gi milyunmilyun sma di ben e tan na ini wán kondre nomo. Ma den sma di o tiri na ini Gado Kownukondre o yepi fu sorgu gi milyardmilyard sma di o libi na heri grontapu. Dati na trutru wan bigi grani di Yehovah gi den 144.000 sma disi!

13. Sortu frantwortu den sma di o tiri makandra nanga Yesus o abi?

¹³ Neleki Yesus, den 144.000 sma disi o dini leki kownu nanga priester (Openb. 5:10). Di den Israelsma ben musu hori densrefi na a Wet di Gado ben gi Moses, dan na den priester ben e yepi a pipel fu tan gosontu èn fu tan krosibei na Yehovah. A Wet ben de „soso wan skaduw fu den bun sani di musu kon ete”. Dati meki wi kan frustan taki den sma di o tiri makandra nanga Yesus o yepi a pipel fu Gado fu tan gosontu èn fu tan abi wan bun matifasi nanga Yehovah (Hebr. 10:1). Wi no sabi fa den kownu nanga den priester disi o meki den borgu fu a Kownukondre di o libi na grontapu kon sabi san den musu du. Awinsi fa a no fa, wi kan de seiker taki na ini a paradijs di o kon, den sma di o libi na grontapu o kisi a tiri di den musu kisi.​—Openb. 21:3, 4.

14. Fa den „tra skapu” nanga a „pikin ipi” de wán?

¹⁴ Yesus ben kari den sma di o tiri makandra nanga en wan „pikin ipi” (Luk. 12:32). A ben taki sosrefi fu wan tra grupu di a ben kari den „tra skapu”. Den tu grupu disi na wán ipi (Yoh. 10:16). Den e  wroko makandra kaba èn den o tan du dati te grontapu tron wan paradijs. A no de fu taki dati na a ten dati, den wan fu a „pikin ipi” o libi na ini hemel èn den „tra skapu” o abi a howpu fu libi fu têgo na grontapu. Ma wan tu sani de di den „tra skapu” musu du nownowde fu man libi na ini Paradijs.

15. (a) Fa den „tra skapu” e wroko makandra nanga den brada fu Krestes? (b) Fa yu kan teki na eksempre fu a brada na ini a wenkri? (Luku a fowtow.)

¹⁵ Na ogriman di ben sori berow dede fosi a kisi na okasi fu sori warderi gi san Krestes du gi en. Ma tra fasi leki na ogriman dati, wi di de fu den „tra skapu” o abi furu okasi fu sori taki wi lobi Yesus. Fu eksempre, wi e sori taki wi lobi en te wi e libi bun nanga den salfu brada fu en. Yesus ben taki dati a ben o luku fa sma ben o libi nanga den brada fu en, so taki a kan bosroiti efu den na skapu (Mat. 25:31-40). Wan fasi fa wi kan horibaka gi den brada fu Krestes, na te wi de klariklari fu yepi den fu preiki a bun nyunsu èn fu meki disipel (Mat. 28:18-20). Dati meki wi wani gebroiki den buku nanga den tra sani wi kisi fu studeri Bijbel nanga sma. Wan fu den buku dati na a Koloku fu têgo!-buku. Efu yu no e studeri ete nanga wan sma, dan a ben o bun fu aksi someni sma leki yu man efu den wani studeri Bijbel.

16. Fa wi kan sreka nownow kaba gi a libi na ini Paradijs?

¹⁶ Wi no abi fu wakti teleki wi e libi na ini Paradijs fu tron den sortu sma di Yehovah wani drape. Nownowde wi kan wroko na wi srefi fu no lei, fu no bedrigi trawan, èn fu poti den moro prenspari sani na a fosi presi na ini wi libi. Wi kan leri tu fu tai hori na Yehovah, na wi trowpatna, èn na den Kresten brada nanga sisa fu wi. O moro wi e hori wisrefi na den wet fu Yehovah aladi wi e libi na ini na ogri grontapu disi, o moro a o makelek gi wi fu hori wisrefi na den wet dati na ini Paradijs. Wi kan sori taki wi e sreka wisrefi gi a libi na a ten dati te wi e leri fa fu du spesrutu wroko èn te wi e kweki moi fasi.  Luku na artikel „Yu de srekasreka fu ’kisi grontapu’?” na ini A Waktitoren disi.

17. Wi musu tan firi sari fu wan seryusu sondu di wi ben du? Fruklari dati.

¹⁷ Wi musu du muiti tu fu no tan firi sari fu wan seryusu sondu di wi ben du. Ma a no fu di Yesus pai a lusu-paiman, meki wi musu denki taki wi kan „du sondu fu espresi” (Hebr. 10:26-31). Ma efu wi du wan seryusu sondu, dan wi musu sori trutru berow, wi musu suku yepi na Yehovah nanga den owruman èn wi musu kenki den fasi fu wi. Te wi du den sani disi, dan wi kan de seiker taki Gado o gi wi pardon nanga en heri ati (Yes. 55:7; Tori 3:19). No frigiti a sani disi di Yesus ben taigi den Fariseiman: „Mi no kon fu kari sma di e du san reti, ma mi kon fu kari sondari” (Mat. 9:13). A frulusu-ofrandi bun nofo fu tapu ala den sondu fu wi.

18. Fu san yu ben o wani taki nanga na ogriman di ben anga sei Yesus?

¹⁸ Yu man si yusrefi kaba na ini Paradijs? Yu man si fa yu e taki nanga na ogriman di ben anga sei Yesus? A no de fu taki dati un ala tu ben o fruteri fa un breiti taki Yesus dede gi libisma. Kande yu ben o aksi en fu fruteri yu san pasa na ini den lasti yuru di Yesus ben de na libi na grontapu. Kande yu o aksi en tu fa a e firi now di a si taki Yesus du san a ben aksi en. Ma kande a e aksi yu fu fruteri fa a libi ben de na ini den lasti dei fu a grontapu fu Satan. A o de wan grani trutru fu studeri Gado Wortu nanga den sortu sma dati.​—Ef. 4:22-24.

19. Fu san ede a libi na ini Paradijs no o soi noiti? (Luku a prenki na tapu a kafti.)

¹⁹ A libi na ini Paradijs no o soi noiti. Ala ten wi o miti sma di kan leri wi sani èn furu bun wroko o de fu du. Ma san moro moi, na taki ibri dei wi o leri sabi wi Papa na hemel moro bun èn wi o prisiri nanga den sani di a gi wi. Noiti wi o kaba leri sani fu en èn wi o man leri bun furu fu den sani di a meki. Dei fu dei a lobi di wi abi gi a Gado fu wi o kon moro tranga. Wi de nanga tangi trutru taki Yehovah nanga Yesus pramisi wi taki wi kan libi fu têgo na ini Paradijs.