1. Fu san ede Abraham ben kan tan howpu taki a ben o kisi wan manpkin?

 YEHOVAH ben pramisi en mati Abraham taki a ben o kisi wan manpkin di ben o meki ala den pipel fu grontapu kisi blesi (Gen. 15:5; 22:18). Fu di Abraham ben abi wan tranga bribi na ini Gado, meki a ben de seiker taki a pramisi fu Gado ben o kon tru. Ma toku di Abraham ben abi 100 yari èn en wefi ben de 90, a getrow trowpaar disi no ben kisi wan manpkin ete (Gen. 21:1-7). Toku Bijbel e taki: „Abraham ben bribi èn a ben abi a howpu taki a ben o tron a tata fu furu pipel.  . . . A ben bribi disi, fu di Gado ben taki [dati]” (Rom. 4:18). Yu sabi taki a howpu di Abraham ben abi kon tru. A kisi Isak, a manpkin di a ben howpu fu kisi langa ten kba. Fu san ede Abraham ben de seiker taki Yehovah ben o du san a pramisi en?

2. Fu san ede Abraham ben de seiker taki a pramisi fu Yehovah ben o kon tru?

² Na fu di Abraham ben sabi Yehovah bun, meki a „ben de seiker taki Gado man du san a pramisi” (Rom. 4:21). Na a bribi fu Abraham meki taki Yehovah ben feni en bun èn a ben e si en leki wan ret’ati sma (Yak. 2:23). Soleki fa skrifi na ini Romesma 4:18, dan Abraham ben abi bribi èn a ben abi howpu tu. Kow go luku san na apostel Paulus e taki fu howpu, soleki fa a skrifi na ini kapitel 5 fu Romesma.

3. San Paulus e taki fu howpu?

³ Paulus e sori fu san ede wi kan de seiker taki ’a howpu [di wi abi] no o meki wi lasi-ati’ (Rom. 5:5). A e yepi  wi fu ferstan tu fa a howpu di wi leki Kresten abi kan kon moro tranga. Te wi o luku san Paulus e taki na ini Romesma 5:1-5, dan prakseri tu san yu srefi ondrofeni. Te yu o du dati, dan yu o si taki a howpu di yu abi kon moro tranga. Wi o luku tu san yu kan du fu meki a howpu fu yu kon moro tranga leki fa a de now. Kow go luku fosi san na a moi howpu di Paulus e taki fu en èn fu san ede a no o meki wi las’ati.

4. Fu san Romesma 5:1, 2 e taki?

⁴ Leisi Romesma 5:1, 2. Paulus ben skrifi den wortu disi gi a gemeente na ini Rome. Den brada nanga s’sa drape ben kon leri sabi Yehovah nanga Yesus, den sori bribi, èn den tron Kresten. Dati meki Gado si den ’leki reti-ati sma fu di den ben abi bribi’ èn a salfu den nanga santa yeye. Iya, den ben kon abi wan trutru moi howpu èn den ben de seiker taki a ben o kon tru.

5. Sortu howpu den salfuwan abi?

⁵ Bakaten Paulus skrifi den salfu Kresten na ini Efeise fu a howpu di Gado ben gi den. Den ben o kisi wan „kefalek bigi gudu di [Gado] sreka gi den santawan” (Ef. 1:18). Èn Paulus ben sori den Kolosesma tu pe den ben o kisi a blesi fu den. A kari a blesi dati „a howpu fu kisi a sani di poti na wan sei gi unu na ini hemel” (Kol. 1:4, 5). Sobun, a howpu di den salfu Kresten abi, na taki den o opo baka na ini hemel pe den o tiri nanga Krestes fu têgo.​—1 Tes. 4:13-17; Openb. 20:6.

6. San wan salfu brada ben taki fu a howpu di a abi?

⁶ Den salfu Kresten e warderi a moi howpu disi. Brada Frederick Franz, wan fu den salfuwan, ben taki disi nanga en heri ati: „A howpu fu wi na wan sani di o kon tru seiker èn ibriwan fu wi di de fu a  pkin ipi fu 144.000 salfuwan, o kisi san Gado pramisi wi. A pai di wi o kisi o bun moro iniwan sani di wi prakseri oiti.” Baka di Brada Franz dini Gado getrow furu yari langa, a ben taki krin na ini 1991: „A howpu fu wi prenspari ete gi wi. . . . O moro wi e wakti, o moro wi de nanga tangi gi a howpu dati. Wi de klariklari fu wakti, awinsi wi musu wakti wan milyun yari. Mi e warderi a howpu moro leki bifo.”

7-8. Sortu howpu moro furu fu wi abi? (Romesma 8:20, 21)

⁷ Moro furu fu den sma di e anbegi Yehovah now abi wan tra howpu. Dati na a howpu di Abraham ben abi, èn dati na a howpu fu libi fu têgo na grontapu na ondro a tiri fu Gado Kownukondre (Hebr. 11:8-10, 13). Paulus ben skrifi fu a moi howpu disi. (Leisi Romesma 8:20, 21.) Di yu yere a pramisi fu Bijbel fu a fosi leisi, dan san yu ben lobi fu en? Yu ben lobi fu yere taki wan dei yu no o abi nowan sondu moro? Noso yu ben breiti srefisrefi fu kon sabi taki yu o si den lobiwan fu yu di dede èn taki den o libi baka na wan paradijs na grontapu? Fu di Gado gi wi a howpu dati, meki yu kan ferwakti furu moi sani na ini a ten di e kon.

⁸ Awinsi wi e ferwakti fu libi fu têgo na ini hemel noso na grontapu, toku wi abi wan moi howpu di e gi wi reide fu prisiri. Èn a howpu fu wi kan kon moro tranga srefi. Paulus e taki moro fara fa wi kan du dati. Kow go luku san a ben skrifi fu a howpu fu wi. Den sani di Paulus skrifi o gi wi moro fertrow taki a howpu fu wi o kon tru.

9-10. San Kresten kan ferwakti te wi e luku na eksempre fu Paulus? (Romesma 5:3) (Luku den prenki.)

⁹ Leisi Romesma 5:3. Paulus ben taki dati te wi de na ini banawtu, dan dati kan meki wi howpu kon moro tranga.  Kande a sani dati e ferwondru wi. Ma ala den bakaman fu Krestes kan ferwakti taki banawtu o miti den. Luku na eksempre fu Paulus. A ben taigi den Tesalonikasma: „Di wi ben de nanga unu, wi ben fruteri unu na fesi kaba taki wi ben o nyan pina. We, na dati pasa tu” (1 Tes. 3:4). Èn a ben skrifi den Korentesma: „Brada, wi wani taki un musu sabi sortu banawtu miti wi . . . Wi no ben sabi srefi efu wi ben o tan na libi.”​—2 Kor. 1:8; 11:23-27.

¹⁰ Kresten na ini a ten disi kan ferwakti tu taki banawtu o miti den (2 Tim. 3:12). Yu ben de na ini banawtu tu? Sma gens yu fu di yu poti bribi na ini Yesus èn yu bigin waka na en baka? Kande famiri nanga mati spotu yu. Kande den no libi bun nanga yu. Noso kande a muilek fu tan eerlijk fu di yu baas noso tra sma na wrokope e aksi yu fu du sani di no bun (Hebr. 13:18). Lanti e gens yu fu di yu prati a howpu fu yu nanga trawan? Awinsi na ini sortu banawtu wi de, toku Paulus e taki dati wi musu prisiri. Fu san ede?

11. Fu san ede wi musu hor’doro awinsi sortu tesi wi e kisi?

¹¹ Wi kan prisiri te wi de na ini banawtu fu di dati kan yepi wi fu kon abi wan prenspari fasi. Soleki fa Romesma 5:3 e sori, dan „banawtu o meki wi horidoro”. Banawtu o miti ala Kresten, èn dati meki ala Kresten musu hordoro. Wi musu hordoro awinsi sortu tesi wi e kisi. Soso te wi e hordoro wi o man si fa a howpu fu wi o kon tru. Wi no wani de leki den sma di Yesus ben abi na prakseri di a ben taki fu a siri di fadon na ston-gron. Den ben teki a wortu nanga prisiri, ma di „banawtu noso frufolgu kon”, den lasi bribi (Mat. 13:5, 6, 20, 21). A tru taki a no switi fu kisi gens noso tesi, ma wi e kisi wini te wi e hordoro èn te wi e tan dini Yehovah go doro. Sortu wini wi o kisi?

12. Sortu wini wi e kisi te wi e hor’doro?

¹² A disipel Yakobus taki fu den wini di wi o kisi te wi e hordoro. A ben skrifi: „Un musu tan horidoro te na a kaba, so taki unu kan kon bun dorodoro èn unu kan de sondro fowtu. Dan unu no o mankeri noti” (Yak. 1:2-4). Sobun Yakobus e sori taki wan reide de fu hor’doro. San na dati? A kan yepi yu fu kon abi moro pasensi, moro bribi, èn fu fertrow moro tapu Gado. Ma wi e kisi wini na wan tra prenspari fasi tu.

13-14. San e psa te wi e hor’doro èn san e psa nanga a howpu fu wi? (Romesma 5:4)

¹³ Leisi Romesma 5:4. Paulus e taki dati te wi hor’doro, dan „Gado o feni wi bun”. Disi no wani taki dati Yehovah breiti taki yu e kisi tesi noso problema. Na presi fu dati, a breiti taki yu e hor’doro. A e gi wi trutru dek’ati fu sabi taki Yehovah breiti nanga wi te wi e hor’doro.​—Ps. 5:12.

¹⁴ Prakseri taki di Abraham hor’doro di a kisi tesi, dan Yehovah ben feni en bun. Yehovah ben e si en leki en mati èn leki wan ret’ati sma (Gen. 15:6; Rom. 4:13, 22). Na so a kan de tu nanga wi. Gado no e luku o furu wi e du na ini en diniwroko noso sortu grani wi abi, fu man feni wi bun. A e feni wi bun te wi e hor’doro aladi wi e kisi tesi. Awinsi o owru wi de, awinsi na ini sortu situwâsi wi de, noso awinsi san wi man du, wi alamala man hor’doro. Yu e hor’doro aladi  yu e kisi wan tesi nownow? Efu dati de so, dan no frigiti taki Gado feni yu bun. Te wi e ferstan taki Gado feni wi bun, dan dati o tranga a howpu di wi abi.

15. San Paulus e taki moro fara na Romesma 5:4, 5 èn san wan sma kan aksi ensrefi?

¹⁵ Soleki fa Paulus sori, dan Yehovah o feni wi bun te wi e hor’doro aladi wi e kisi tesi. Luku san Paulus e taki moro fara: „Te Gado feni wi bun, dan wi o abi howpu. A howpu dati no o meki wi lasi-ati” (Rom. 5:4, 5). Son sma no e ferstan a sani disi. Fu san ede? Fu di na ini Romesma 5:2, Paulus e taki dati den Kresten na ini Rome ben abi wan howpu kaba, „a howpu fu kisi a glori fu Gado”. Dati meki wan sma kan aksi ensrefi: ’Dus, efu den Kresten dati ben abi wan howpu kba, dan fu san ede Paulus e taki fu howpu baka?’

16. Fa a howpu fu wan sma e kon moro tranga? (Luku den prenki.)

¹⁶ Wi kan ferstan san Paulus ben wani taki te wi e hori na prakseri taki howpu na wan sani di e kon moro tranga. Luku wan eksempre: Yu sabi ete fa yu ben firi di yu yere fu a moi howpu di skrifi na ini Gado Wortu? Kande yu ben denki taki têgo libi na ini wan paradijs na grontapu na wan moi sani, ma yu no ben de seiker efu a o kon tru. Ma o moro yu kon leri sani fu Yehovah èn fu den pramisi fu Bijbel, o moro yu kon abi a fertrow taki a howpu disi o kon tru.

17. Fa a howpu di yu abi e kon moro tranga baka di yu gi yusrefi abra na Gado èn dopu?

¹⁷ Srefi baka di yu gi yusrefi abra na Gado èn dopu, a howpu fu yu kon moro tranga fu di yu kon leri sabi Yehovah moro bun èn yu kon lobi en moro (Hebr. 5:13–6:1). A de krin taki yu ondrofeni san skrifi na Romesma 5:2-4. Yu ben kisi  ala sortu tesi, ma yu hor’doro èn Yehovah sori yu taki a feni yu bun. Fu di yu sabi taki Gado lobi yu èn taki a feni yu bun, meki yu bribi kon moro tranga na ini den sani di a pramisi. A howpu fu yu kon moro tranga leki fa a ben de. A kon de wan trutru sani gi yu. A abi moro krakti na tapu ala san yu e du na ini yu libi èn a kenki a fasi fa yu e libi nanga yu famiri, fa yu e teki bosroiti, èn srefi fa yu e gebroiki yu ten.

18. Sortu dyaranti Yehovah e gi wi?

¹⁸ Na apostel e taki ete wan prenspari sani fu a howpu di yu kisi baka di Gado feni yu bun. A e gi yu a dyaranti taki a howpu fu yu o kon tru. Fu san ede yu kan de seiker fu dati? Paulus e taki fu a dyaranti di Gado e gi Kresten: „A howpu dati no o meki wi lasi-ati, bika Gado poti a lobi fu en na ini wi ati nanga yepi fu a santa yeye di a gi wi” (Rom. 5:5). Yu abi ala reide fu de seiker taki a howpu di Yehovah gi yu o kon tru.

19. Fu san yu kan de seiker?

¹⁹ Prakseri san Yehovah pramisi Abraham èn fa a du kon taki Gado feni en bun èn taki a si en leki en mati. A howpu fu Abraham no ben de fu soso. Bijbel e taki: „Baka di Abraham hori pasensi, a kisi a sani di Gado pramisi en” (Hebr. 6:15; 11:9, 18; Rom. 4:20-22). Iya, a howpu fu Abraham kon tru. Neleki Abraham, yu kan de seiker tu taki efu yu tan getrow, a howpu fu yu o kon tru. A howpu fu yu na wan trutru sani. A e meki yu prisiri, a no e meki yu las’ati (Rom. 12:12). Paulus ben skrifi: „Meki a Gado di e gi sma howpu, gi unu furu prisiri nanga freide fu di unu e frutrow na en tapu. Dan unu o kisi moro howpu nanga yepi fu a krakti fu a santa yeye.”​—Rom. 15:13.