1. San wi kan aksi wisrefi te wi e prakseri a bribi fu Abraham?

 ALADI furu sma yere fu Abraham, toku wan lo sma no sabi furu fu en. Ma yu sabi furu sani fu Abraham. Fu eksempre, yu sabi taki Bijbel e kari en a „tata fu ala sma di e bribi” (Rom. 4:11). Ma kande yu e aksi yusrefi: ’Mi kan abi a srefi tranga bribi leki Abraham?’ Iya, yu kan abi so wan bribi.

2. Fu san ede a prenspari fu ondrosuku na eksempre fu Abraham? (Yakobus 2:22, 23)

² Wan fasi fa yu kan kon abi bribi neleki Abraham, na te yu e ondrosuku na eksempre fu en. Ala ten Abraham ben e du san Gado ben e taigi en. A ben froisi go na wan kondre fara fu en oso, a ben e libi na ini tenti furu yari langa, èn a ben de klarklari fu gi en lobi manpkin Isak leki ofrandi. Abraham ben du ala den sani disi fu di a ben abi wan tranga bribi na ini Yehovah. Fu di a ben abi bribi èn a ben du sani fu sori a bribi fu en, meki Yehovah ben breiti nanga en èn a tron Gado mati. (Leisi Yakobus 2:22, 23.) Yehovah wani taki wi alamala, sosrefi yu, kisi den srefi blesi disi. Fu dati ede a meki Paulus nanga Yakobus skrifi fu na eksempre fu Abraham na ini Bijbel. Kow poti prakseri na Romesma kapitel 4 nanga Yakobus kapitel 2 di e taki fu Abraham. Na ini den tu kapitel disi Paulus nanga Yakobus e taki tumsi prenspari sani fu en.

3. Sortu Bijbeltekst Paulus nanga Yakobus ben gebroiki?

³ Paulus nanga Yakobus taki fu Genesis 15:6, pe skrifi: „Abram poti bribi na ini Yehovah. Fu dati ede Gado si en leki wan reti-ati sma.” Te Yehovah feni wan sma bun, dan a e si so wan sma leki wan ret’ati sma noso leki wan sma  sondro fowtu. A de wan kefalek moi sani taki Gado kan si wan sondu libisma leki wan sma di no abi fowtu! A no de fu taki dati yu wani taki Gado si yu leki wan ret’ati sma tu, èn a sani dati kan. Kow go luku now fu san ede Yehovah ben si Abraham leki wan ret’ati sma èn san wi musu du fu man de ret’ati sma tu.

4. Fu san ede libisma no de ret’ati sma?

⁴ Na ini a brifi di Paulus skrifi gi den Romesma a taki dati ala sma sondu (Rom. 3:23). Fu dati ede wi a no ret’ati sma. Ma dan fa a kan taki Gado feni wi bun èn taki a e si wi leki ret’ati sma? Paulus gebroiki na eksempre fu Abraham fu yepi ala tru Kresten fu piki na aksi dati.

5. Fu san ede Yehovah ben e si Abraham leki wan ret’ati sma? (Romesma 4:2-4)

⁵ Yehovah ben kari Abraham wan ret’ati sma di a ben e libi na ini a kondre Kanan. Fu san ede Yehovah ben man taki dati Abraham na wan ret’ati sma? Na fu di Abraham ben gi yesi dorodoro na a Wet fu Moses? Nôno, kwetkweti (Rom. 4:13). Gado ben gi den Israelsma a Wet moro leki 400 yari baka di Gado kari Abraham wan ret’ati sma. Ma dan fu san ede Gado ben si Abraham leki wan ret’ati sma? Yehovah sori bun-ati gi Abraham èn a si en leki wan ret’ati sma fu di a ben abi wan tranga bribi.​—Leisi Romesma 4:2-4.

6. O ten Yehovah e si wan sondu sma leki wan ret’ati sma?

⁶ Paulus ben taki moro fara dati te wan sma e bribi na ini Gado, dan „a bribi fu en o meki taki Gado si en leki wan reti-ati sma” (Rom. 4:5). Paulus taki tu: „David srefi ben taki dati a no den sani di wan sma du e meki taki a de koloku, ma na te Gado e si en leki wan reti-ati sma. A ben taki: ’Koloku fu den sma di kisi pardon fu den kruktudu fu den èn koloku fu den sma di Gado tapu den sondu fu den. Koloku fu a sma di Yehovah no e prakseri den sondu fu en moro’” (Rom. 4:6-8; Ps. 32:1, 2). Gado e gi pardon noso a e tapu den sondu fu den sma di e bribi na ini en. A no e prakseri den sondu fu den moro. A e si den sma disi leki ret’ati sma fu di den e bribi na ini en.

7. Fu san ede wi kan taki dati den futuboi fu Gado na ini a ten di pasa ben de ret’ati sma?

⁷ Aladi Gado ben si Abraham, David nanga tra getrow anbegiman fu en leki ret’ati sma, toku den ben abi sondu ete. Ma fu di a bribi fu den ben tranga, meki Gado ben e si den leki sma di no abi fowtu, spesrutu te yu ben o teki den gersi nanga den sma di no ben e anbegi En (Ef. 2:12). Na ini a brifi di Paulus skrifi gi den Romesma, a e sori krin taki wi musu abi bribi fu man de Gado mati. Abraham nanga David ben de Gado mati fu di den ben bribi na ini en. Wi kan de Gado mati tu te wi abi bribi.

8-9. Sortu fowtu denki son sma abi fu den sani di Paulus nanga Yakobus skrifi, èn fu san ede den kon abi a denki disi?

⁸ Son kerki fesiman feni taki sma di e bribi na ini Gado musu du bun fu sori a bribi fu den. Ma tra kerki fesiman e leri sma taki na bribi nomo den musu bribi na ini Masra Yesus Krestes fu man kisi frulusu. Kande yu yere den taki a sani disi: „Bribi na ini Yesus, dan yu o kisi frulusu.” Kande den e gebroiki den wortu disi srefi fu Paulus: „A no den sani di wan sma du e meki taki . . . Gado e si en leki wan reti-ati sma” (Rom. 4:6). Ma tra sma e taki dati yu  kan kisi frulusu te yu e go na presi di a kerki e si leki santa presi èn te yu e du bun gi trawan. Kande den e gebroiki Yakobus 2:24, pe skrifi: „A no bribi wawan e meki taki Gado e taki dati wan sma na wan reti-ati sma, ma na te a sma e du sani fu sori a bribi fu en.”

⁹ Fu di sma e bribi den difrenti sani disi, meki son Bijbel sabiman e denki taki Paulus nanga Yakobus no ben e agri nanga makandra te a abi fu du nanga san wan sma musu du so taki Gado kan feni en bun. Soleki fa son kerki fesiman e taki, dan Paulus ben feni taki wan sma musu abi bribi wawan so taki Gado kan feni en bun. Ma Yakobus ben e bribi taki wan sma musu du bun so taki Gado kan feni en bun. Wan professor fu kerki tori taki dati Yakobus no ben e ferstan fu san ede Paulus ben taki dati a no den sani di wan sma e du prenspari fu man de wan ret’ati sma, ma na bribi wawan. Ma na Yehovah meki Paulus nanga Yakobus skrifi den sani disi (2 Tim. 3:16). Sobun, wan makelek fasi musu de fu ferstan den sani disi di Paulus nanga Yakobus ben skrifi. Kow go luku fa den tra vers na ini den kapitel o yepi wi fu ferstan den sani disi moro bun.

10. Na san Paulus ben e poti prakseri? (Romesma 3:21, 28) (Luku a prenki.)

¹⁰ Te wi e luku Romesma 3 nanga 4, dan na san Paulus ben poti prakseri? Paulus ben e poti prakseri na den sani di sma e du soleki fa a wet e taki. Disi na a wet fu Moses di Gado ben gi den Israelsma. (Leisi Romesma 3:21, 28.) Soleki fa a sori, dan na ini a ten fu Paulus son Dyu Kresten ben e bribi taki den ben musu hori a Wet fu Moses ete. Dati meki Paulus gebroiki na eksempre fu Abraham fu sori taki wan  sma no abi fu du san a wet e taki fu man de wan ret’ati sma gi Gado. Na presi fu dati Paulus sori taki wi musu abi bribi fu man de wan ret’ati sma. A sani disi e gi wi dek’ati fu di a e leri wi taki efu wi e bribi na ini Gado nanga Krestes, dan Gado o feni wi bun.

11. Fu sortu sani Yakobus ben e taki?

¹¹ Ma Yakobus kapitel 2 no e taki fu den sani di sma ben musu du soleki fa a Wet fu Moses ben e taki. Na ini a kapitel disi Yakobus e taki fu den sani di wan Kresten musu du na ini en ala dei libi. Den sortu sani dati e sori efu wan Kresten abi trutru bribi na ini Gado. Luku tu eksempre di Yakobus gebroiki.

12. Sortu eksempre Yakobus gebroiki fu sori taki wi musu du sani fu sori taki wi abi bribi? (Luku a prenki.)

¹² Na ini a fosi eksempre, Yakobus e sori taki Kresten musu libi bun nanga ala sma. A e taki fu wan man di ben du bun gi wan gudusma, ma a ben e wiswasi wan pôti sma. Yakobus e sori taki a man disi kan taki dati a abi bribi, ma den sani di a du no e sori taki a abi bribi (Yak. 2:1-5, 9). Na ini a tra eksempre, Yakobus e taki fu wan sma di si taki wan brada noso wan s’sa fu en no abi krosi noso n’nyan, ma dan a no e du noti fu yepi en. Srefi efu a sma dati taki dati a abi bribi, toku den sani di a e du no e sori dati. Yakobus e taki fu a sma dati: „A bribi dati na wan dede sani.”​—Yak. 2:14-17.

13. Sortu eksempre Yakobus gebroiki fu sori taki wi musu abi bribi èn taki wi musu du sani fu sori bribi? (Yakobus 2:25, 26)

¹³ Yakobus gebroiki na eksempre fu Rakab di sori nanga den sani di a du taki a abi bribi. (Leisi Yakobus 2:25, 26.)  Rakab ben yere fu Yehovah èn a kon ferstan taki Yehovah ben e horbaka gi den Israelsma (Yos. 2:9-11). Den sani di Rakab du ben e sori taki a ben abi bribi. A kibri tu Israel man di sma ben wani kiri fu di den ben kon luku a kondre. Dati meki Gado ben si na uma disi leki wan ret’ati sma, aladi a ben abi sondu èn a no ben de wan Israelsma. Na so a ben de tu nanga Abraham. Na eksempre fu Rakab e sori wi taki a de tumsi prenspari fu du sani fu sori taki wi abi bribi.

14. Fu san ede wi kan taki dati den sani di Paulus nanga Yakobus skrifi e kruderi nanga makandra?

¹⁴ Soleki fa wi si, dan Paulus nanga Yakobus ben tyari a tori disi kon na krin na tu difrenti fasi. Paulus ben e taigi den Dyu Kresten taki Yehovah no ben o feni den bun te den ben e hori a Wet fu Moses nomo. Yakobus ben e taki krin dati ala Kresten musu du bun gi trawan fu sori taki den abi bribi.

15. San na wan tu sani di wi kan du fu sori taki wi abi bribi? (Luku den prenki.)

¹⁵ Yehovah no e taki dati wi musu du precies san Abraham ben du fu sori a bribi fu en. Ma furu sani de di wi kan du fu sori a bribi fu wi. Wi kan gi nyun sma wan switikon na ini a gemeente, wi kan yepi brada nanga s’sa di de na nowtu trutru, èn wi kan du bun gi a famiri fu wi. Na den sani disi Gado feni bun èn a o blesi wi (Rom. 15:7; 1 Tim. 5:4, 8; 1 Yoh. 3:18). Wan fu den moro prenspari fasi fa wi kan sori bribi, na te wi e preiki a bun nyunsu fayafaya (1 Tim. 4:16). Wi alamala kan du sani fu sori taki wi e bribi taki den pramisi fu Yehovah o kon tru èn taki den sani di a e du bun ala ten. Efu wi du den sani disi, dan wi kan de seiker taki  Gado o si wi leki ret’ati sma èn wi o de en mati.

16. Fa a howpu fu Abraham ben tranga a bribi fu en?

¹⁶ Romesma kapitel 4, e taki fu wan tra prenspari sani di wi kan leri fu Abraham: Wi musu abi howpu. Yehovah ben pramisi taki „bun furu pipel” ben o kisi blesi nanga yepi fu Abraham. Prakseri o moi a howpu fu Abraham ben de (Gen. 12:3; 15:5; 17:4; Rom. 4:17). Ma di Abraham ben abi 100 yari èn Sara ben de 90, den no ben kisi a manpkin ete di Gado ben pramisi den. Gi libisma a ben kan gersi leki Abraham nanga Sara noiti no ben o kisi wan manpkin. A sani disi ben de wan bigi tesi gi Abraham. Ma Abraham „ben abi a howpu taki a ben o tron a tata fu furu pipel” (Rom. 4:18, 19). Èn te fu kaba, a howpu dati kon tru. A tron a papa fu Isak, a manpkin di a ben howpu fu kisi langa ten kaba.​—Rom. 4:20-22.

17. Fa wi du sabi taki Gado kan si wi leki ret’ati sma èn leki en mati?

¹⁷ Wi kan de sma di Gado feni bun èn wi kan de mati fu en, neleki Abraham. Na dati Paulus ben sori krin di a taki: „Den wortu ’Gado ben si en leki wan reti-ati sma’, no skrifi gi [Abraham] wawan, ma sosrefi gi wi di Gado e si tu leki reti-ati sma, fu di wi e bribi na ini a sma di gi Yesus, wi Masra, wan opobaka” (Rom. 4:23, 24). Neleki Abraham, wi musu bribi na ini Yehovah, wi musu du bun, èn wi musu abi a fertrow taki ala den sani di Yehovah pramisi o kon tru. Paulus e taki moro fara fu a howpu fu wi na ini Romesma kapitel 5. Wi o luku dati na ini a tra artikel.